U Reverend Vijayesh Lal, General Secretary, ka Evangelical Fellowship of India ha ka jing pynmih khubor, u shim ba ka jing wad daw jong U Mohan Bhagwat, nongialam ka RSS ia ka kam shoh briew, da kaba pyn ia syriem bad ki jingjia ha ka Bible, kim dei satia kiba dei ban khein sting, hynrei dei ban pynrem jur. La ong shuh shuh ba ki jingkren jongu, la ju pyni paidbah ha ka prokram Doordarshan bad kane ka pyni, ba ka dei kaba la ai jingbit da ka sorkar India.

La ong shuh shuh da U Lal, ba ka RSS, ka dei kaba la donkti bha ban pynjop biang ia U Narendra Modi, ha ka elekshon kaba mynta u snem, da kaba pyni nia, halor ki kam pynroi kiba la trei da ka sorkar BJP.

La ong shuh shuh ba U Bhagwat, u pynieng nia, ia ka kyntien Abrahamic religion, kaba kdew ba ka niam Islam bad ka niam Khristan, ki dei ki niam nongwei bad kumta ki nongbud jongki, ki dei ban hap ha ka kyrdan kum ki nongshong shnong kiba ar. La ong shuh shuh ba mynta la iohi, ba kum ki Khristan, ki shah shoh ha Jharkhand, ha ki riew ieid masi bad kiba bun ki Dalit bad ki Muslim ki la shah pyniap halor ka jingsngew iapher niam iapher jaitbynriew.
Na ka liang ki Balang Khristan ha India, ki duwai ba ka jingshai kan wan ha ki nongialam bapher, ba kin sangeh noh ia ka jing isih ia kiwei pat bad la ong shuh ba ka pyrthei, ka la mad jingeh shi katdei, ha ka spah snem ba ladep, na kine ki jing ia isih para briew, ki jingsngew iapher jaitbynriew bad kiba la pynmih ia ka jing ia kynad ha Ri Europe.

Ka All India Catholic Union (AICU), ha ka jing pynmih khubor jongka, ka ai burom shi katdei ia U Mohan Bhagwat, uba dei u nongialam ka Rashtriya Swayamsewak Sangh, ha kaba ula pynkynmaw ia ka India, ba U Jisu, u hikai ban long uba map ei, uba sngewlem bad uba pyrshah ia ki kam pyntriem ba har rukom bad ban nym thombor ia kito kiba tlot bor.

La ong shuh shuh da katei ka kyrwoh, ba ha ka jing wohdaw jongu, ia ki kyntien ka Baibl, ka long ba u kwah ban pynduh ia ka jingsngew bad ka jinglong khristan bad ban pynieng niam halor ka jingshah shoh jong ki Dalit bad ki rit paid, da ki riew runar kiba kam ba ki dei ki nongsumar masi, hynrei katei ka pyni sha khmat ka pyrthei ia ki kam pyntriem jong kito ki briew kiba bud ia ki jinghikai jongu.

Ka jingjia ha kaba U Jisu, ula shimti ia ka kynthei, kaba shah shoh ha u paidbhur ha Israel, ka dei ka mat kaba donkam bha ha ka New Testament bad ka la dei ban shah thombor ha u paidbhur, ha jingbishar jong ka kangaroo court, lada U Jisu, um shym la iarap noh ia ka bad u da byrngem ia u paidbhur bad u ong “Dei tang uta u bym ju leh pop, ba un bishar ia ka bad ba un kawang ia u maw uba nyngkong” bad kitei ki kyntien, ki la pynlong ia u paidbhur ban pyllait noh ia katei ka kynthei.
La ong shuh shuh ba ki don bun bah ki kynhun Muslim bad ki Khristan, kiba la shah pyniap ha ka kynhun ki ehrang Hindutva, halor ka jingkynnoh ba ki kit doh masi bad nangta ki don ruh bun bah ki rit paid Dalit, kiba la shah shoh, shah lehbein bad shah pyniap bad kitei ki dei kiba kohnguh ia ka hukum jong ka seng U Bhagwat, ong ka AICU. Katei ka kyrwoh, ka ong shuh shuh ba ym dei satia tang U Bhagwat, hynrei U President jong ka seng BJP, uba dei u myntri korbar ri ruh, u shim ba ki rit paid, ki dei ki nongshun bad ki niang dait aiu re.
U Modi, uba kwah ban pyni ialade ba u dei u riew khraw jong ka pyrthei, u dei namarkata ban khanglad ia ki kam thombor bad ki kam leh niewbein ia ki para ri, hynrei ban bat ia ka jinglong laitluid niam jong ka riti synshar Ri, ong ka kyrwoh na U Dr John Dayal.

Hadien ba ka la kha ia ka khun kynthei jongka, kaba khia hynriew kilo, ka kmie, ka ong ba ka la ioh da ka khun ia lympat briew lane “mini sumo wrestler”.

Ka Emma Millar ka dei ka kurim jong U Daniel bad ka la ioh ia ka khun kynthei, ba ka la jer kyrteng ka Remi Frances Millar ha ka taiew ba ladep, kaba la kha khlem pat dap bnai pura.

La iathuh ba katei ka khyllung, ka don mynta 35 taiew bad ka jingkhein lyngba ka ultra sound, ka long 4 kilo, hynrei ka la nang khia palat ia kata.

Ka la mih mynta ka jing ia kynad kaba jur hapdeng ka Turkey bad ka Syria bad ka daw, ka long hadien ba ki riew ialeh jong ki Kurds lane ki Syrian Democratic Forces (SDF), ki la mynjur ban ia trei lang bad ka sorkar Syria, na ka bynta ban pynher krad ia ki shipai jong ka Turkey, kiba la rung ha kiba bun ki bynta jong ka Syria.

La iathuh ba ka jing ia mynjur hapdeng kitei ki ar kynhun, ka long ba ki shipai jong ki Kurds, ki dei ban iaid lang synrap bad ki shipai jong ka Syria, ban pahara ia ka thain khappud jong ka Syria.

Ki bor pyniaid jong ki Kurds, ki iathuh ba ka sorkar India, ka la iatrei lang bad ka Syrian Democratic Forces (SDF), na ka bynta ban khanglad ia katei ka jinghiar thma bad tam pud jong ka Turkey.

Ka khubor jong ka SANA, ka iathuh ba ki shipai jong ka Syria, ki la kiew shaneng jong ka Ri, na ka bynta ban ia khun pyrshah ia ka jingthombor ka Turkey.

La iathuh ba hynnin ki shiphew ngut ki briew, ki la iap ba kynthup ia ki nongthoh khubor bad ki riew paidbah, ha ka jingshah ther ha ki shipai na Turkey.

Shillong: Ka Shnong Umkiang, ka pynpaw ia ka jingpyrshah jur ia ka Public jingialang ban ioh jingmynjur jong ka Star Cement ka ban long ha ka tarik 19tarik Risaw 2019, na ka bynta ban pynheh ia ka jingtih mawshun, hapoh ka Elaka Narpuh, Brichynot.

Ka daw ka jingpyrshah ia katei ka public hearing jong ka star cement ka long ba lada ailad ban tih ne pynheh ia ka jingtih mawshun kan ktah ia ka mariang khamtam kan ktah ne pynjakhlia ia ka wah lukha nalor ba ka la shah pynjakhlia lypa.

Kaba ar ka long ba ka jingdon jong ki company kiba don hapoh ka Elaka Narpuh, kim ai jingmyntoi ei ei ruh ia ki ngi ki paitbah ka thain border Narpuh la ka long ha ka roi ka par, ka iohkam ioh jam bad lada ailad ia ka star cement ban khlong mawshun ne ban pynheh ia kaba la dep pynjot lypa kan ai jingmyntoi tang ia katei hi ka company.

Ka kyrwoh ka ong shuh shuh, ba kaba sngewsih ka long ba ha shwa ka puplic hearing, ki company ki tur iap ban leit khroh leit kjor ia ki paitbah ban iarap ia ki ne ban ai jingkyrshan ia ka puplic haring ryngkat shibun ki jingkular kiba heh baheh , hynrei hadien ba la dep ka kam ka jam ki company kim ju bna ia u paitbah khamtam ki samla ka thain kiba la biang ka jingnang jingstad bad kiba kyrduh kam kyrduh jam ne ki briew kiba duk ki bym don nongiarap ne nongkren sha ka company,
Kumta ka Shnong Umkiang, ka kyrpad jur ia ka Sorkar ban pynsangeh noh shisyndon ia katei ka public hearing ne ban nym ailad ia ka star cement ban khlong ia u mawshun namar kan ktah haduh katta katta iaka mariang khamtam ia ka wah lukha bad lada ka sorkar ka ailad ia kane ka jingtih mawshun jong ka Star Cement, ba kan iaid shaphrang, ka jingialang ban pynneh pyneh mariang jong ka sorkar kam don jingmut eiei bad la ong shuh shuh ba lada ka sorkar ka ailad ia kane ka public hearing, ki nongialam shnong jong ka Shnong Umkiang, kin nym iatreilang shuh bad ka sorkar lyngba ki tnat sorkar kiba dei peit ia ka khlaw (forest) ne kino kino ki tnat kiba dei peit kumno ban pynneh pynsah ia ka mariang nangne shakhmat.
Ka kyrwoh ka ong shuh shuh “Bad kaba sngewlyngngoh, ka long ba haba ki paitbah ne khynnah skul ki leit ban pan jingiarap na ka star cement ne kino kino ki company badon ha Narpuh, barobor ki phah leit ne phah ai jingthoh sha ka Association jong ki company cement. Kane ka jingleh jong kine ki company ka long ba kim khein snep ia ki briew jong ngi da kaba pynshad shrieh shane bad shatai” ong ka kyrwoh na U Ma Lasting Pala, Waheh Shnong Umkiang bad U Bah Nicholas Lyngdoh, General secretary, Umkiang.

Shillong: La pyntip sha baroh ki nongshong shnong ka Elaka Darrang bad kiba sah shabar jong ka Elaka, ba kin ia poi khnang ha ka 16 tarik u Risaw 2019 ba kan don ka ka jingpynkup burom kyrpang ia u Doloi ba pura ka Elaka Darrang kaba kynthup ia ki shnong Dawki,Darrang,Kongwang, Lymba, Ri Kynjai bad Shnongpdeng.

Ka jingpynkup burom ia u Doloi ba pura u Ma Pyrwa Lymba kan long ha ka por 11 baje mynstep ha ing skul Darrang. Kumta u Doloi bad ki riew rangbah ka Elaka ki khot sngewbha ia baroh ki khun ka Elaka ba phin ia poi lang sha kane ka jingpyn kup burom ia u Doloi ba thymmai kum u Doloi ba pura ka Elaka.

Bun na ki samla ki dap da ka jingpisa lynga jingmut ban jingpyrkhat na bynta ka kam ba kin trei bad kumno kata ka kam kan iarap ban saindur iaka lawei jong ki, kum kine por ki sngi ba hiran ka ioh ka kot ki shem jingeh haduh katta katta. Kiba bun ki im ha ka trei bylla bad kata bai nong sngi ka ba ki ioh kam lah ban pyndap pynbiang ia ki jingdonkam ba man ka sngi jong ka jingim bad ki im ha ka jynjar khait. Kumta ban weng ia kata ka jingeh, ki samla ki dei ban sngewthuh bad shim ia ka jingkitkhlieh na ka bynta ba kin pyntbit ia la ka sap jong ki, la ka dei ha ka kam rep kam riang, ka kam ri jing ri, kine ki kar khana pynmih bad shna ia ki mar ki ba ia hap bad katkum ka jingtbit ka jong ki hi bad ban long kynrad dalade ialade hi, ym ban shu long shakri tang ka trei bylla sngi ne shakri kam sorkar.

Mynta na ka liang jongka sorkar ka la shim khia ia ka jingdonkam ban pyntbit ia ka sap jong ki samla da ka ba ka pynmih ia ka Ministry of Skill Development & Entrepreneurship bad ki jaid scheme bapher bapher kum ka Deen Dayal Upadhyaya Grameen KaushalyaYojana, Pradhan Mantri Kaushal Vikas yojana,National career Service bad ki scheme ban seng kam kum ka MUDRA,Stand-Up India, PMEGP bad kiwei dei ki scheme ban kyntiew ia ka kam seng kam lajong khnang ba kane kan kyntiew ia ka ioh ka kot jong ka ri.

Te ka jingthmu jong kane ka jaka ia jinghikai, long ban iarap ban pyntbit ban hikai ia ki samla ba kin ieng ha la ki jong ki kjat bad ban seng kam lajong lyngba ka sap ka phong ba ki don khnang ba kin lah ban pyndap pynbiang ialade bad ka ing hi lyngba kata ka kam ba seng ban trei.Bad hadien ba ki la pyndep ia ka jingshah hikai la iarap ruh ia ki ba kin ioh ia kita ki jaid scheme bad ki subsidy khnang ba kin lah ban sdang laka jong ka kam (Business Unit ) bad ban long kita ki nongsengkam (Entrepreneur) .
kane ka jaka hikai ka pynlong ia ki (ki Free training) jaid jinghikai bapher bapher na duh ka kam rep, ri jingri, suhjain, thir ksai khniang ryndia, ban repairs mobile phone,pynmih ia ki mommati, ki achar- umsoh-jam,hikai khapsniuh na bynta ki shynrang bad kynthei,ban shna light bad maramot ia ki tiar light,ban hikai niah kali rit bad kiwei de ki jaid jinghikai. Ki ba don ia ka angnud ban ioh ia ki jinghikai ki dei ban long naduh ka 18 snem shajrong hadud 45 snem ka rta bad ki ba wan sha katei ka jingshah hikai ki dei ban nang ban thoh khasi bad kam donkam ka kyrsdan pule ba kham shajrong bad kito ki ba wan shah hikai kin ioh ei ia ka jinghikai, ka bai bam bad ka jaka sah khlem donkam ban siew ei ei bad la mang kyrpang ia ki kynthei lakajong bad ia ki shnyrang la ka jong
Ban iohrung sha ka tei ka jaka shah hikai ka ba khlem donkam ban lut ne siew pisa na bynta ka jingshah hikai ,ki donkam ban donn ia ka BPL card ne Ration card ba la ioh jingmynjur na ka ophis BDO ban pynshisha ba kidei na ki longing BPL, lem bad 3 tylli ki dur passpoty size bad ka Epic.

Ki jaid jinghikai ki don ki ban eh shi bnai bad don ki ba tang shiphew sngi, katkum ka jaid jinghikai.
La thoh da I Bah Lucky Star Lamin, Senior Faculty, jong ka State Bank of India Rural Self-Employment training Institute, Ri-Bhoi District.

Shillong: Ki pulit jong ka Meghalaya, ki la ioh kem hynnin ka sngi, ia u snar nongialam ba satar bha jong ka seng lehnoh Garo National Liberation Army (GNLA), U Nikrak M Sangma ha Rongara jong ka South Garo hills district.

Ki lad khubor ki iathuh ba utei u snar ehrang, ula wan poi sha India, haba u wan phai na Bangladesh.U Nikrak M Sangma, ula pyniasoh ialade bad ka GNLA, ha u snem 2011 bad ula leit sha Bangladesh naduh u snem 2015.

Ka GNLA, ka la sdang duh jait ha Garo Hills, hadien ka jingshah pyniap U Sohan D. Shira ha U Rymphang 2018, katba U Nikrak M Sangma, u iai bteng ban sah ha Bangladesh.

Shillong: Halor ka jingkhang jong ka Khasi District Council, ban nym die madan shuh, kaba sdang naduh mynta ka sngi, ki la don kiba leit mudui sha High Court, ha kaba la iathuh bad kitei kiba leit mudui ki dei ki Khasi suda lane ba la thoh “tribals” bad ha ka jing ia said, ba la mih khmat da U bah ND Chullai, uba dei U Additional Advocate General jong ka sorkar Jylla bad nangta sa U Bah VGK Kynta, uba mihkhmat na bynta ka Khasi District Council, la kren shai ba kitei ki Khasi lane ki tribal, kim don hok ban leit rah ia ka jingujor sha kashari, namar ba kim dei ma ki kiba shah ktah bad la ong ba kitei imat, ki don ia kano kano ka buit arsap ha ki.

Ha ka jing bishar, la ong jong U Chief Justice, ka Meghalaya High Court, la pyni ba kitei ki Khasi, kim don daw eiei ban leit rah ia ka jingujor, hynrei ki leit ban pynwit ia ki kam jong ka kashari.

La rai namarkata ban weng noh ia ka jingujor bad ban dain kuna T.5,000 marwei ia kitei ki nong ujor bad ba ki hap ban siew hapoh ka ar taiew sha ka Khasi District Council.

Kitei ki la ujor halor ka hukum ba la pynmih da ka Khasi District Council, ha ka 4tarik Risaw 2019, kaba khang ia ki bar Jylla, ban die madan ha u pud u sam jong ki jingtrei kam ka Council.

Nongpoh: Ki Nongialam ka Ri Bhoi District Sports Association (RBDSA) hapoh ka jingialam u Bah RB Shadap kum u President, ki la shim ia ka rai ba kin leit rung sha manla ki shnong na ka bynta ban wer ia ki kynhun ne ki club, ki bym pat iasoh bad ka RBDSA, kaba long ruh kum ka jingpynsuk ia ki ban ki wan pyniasoh ialade bad ka RBDSA.

U Bah RB Shadap President ka RBDSA, u la ong ba ka jingthmu jong ka Association ban leit sha ki shnong ka long ban pynsuk ia ki Sports club bad ki Club kynhun, ba kin nym lait than ban lut naka bynta ban pyniasoh ialade bad ka Association.

Shuh shuh, ua la ong ruh ruh hadien ba ki club bad ki kynhun ki la dep ban pyniasoh bad ka RBDSA, kin sa ioh ruh ia ka syrnod kum ka jingithuh ba ki dei ki kynhun kiba la dep ban pyniasoh bad ka bai pyniasoh kan long T.1500/- shi club na ka bynta 3 snem.

Ki jaka kiba ka RBDSA kala dep ban pynbeit ba ki kynhun lane ki sports club ki lah ban wan pynïasoh bad aiti ïaki form kan long haka 05.09.2019 kan long ha Iing Dorbar Umden naduh ka por 2 baje, 05.10.2019 kan long ha Iingskul Sumer haka por 8 baje mynstep, 19.10.2019 ha C&RD Block Bhoirymbong, 22.10.2019 ha Mawhati EAC Bulding naduh ka por 11 baje mynstep, 25.10.2019 kan long ha Madan Mawlasnai naduh ka por 11 baje mynstep, 28.10.2019 kan long ha ïing Dorbar Sajer Nongpoh naduh ka por 10 baje mynstep, 28.10.2019 ha ophis ka RBDSA ha Umsning, 01.11.2019 ha ïing Dorbar Byrnihat Proper naduh ka por 11 baje mynstep bad 07.11.2019 kan long ha IB Umsiang naduh ka por 11 baje mynstep.

Kumta na ka liang ka RBDSA ka khot bad wer ia baroh ki kynhun lane ki Sports Club ba kin wan pyniasoh ialade bad ka RBDSA kum ki kynhun ba ithuh, la bynrap u Bah Shadap.

Shillong: Ka Seng samla Catholic Umsning Parish, ka dap da ka jingsngew tmang mynsiem, halor ka jingkhlad noh jong U Archbishop Dominic Jala. Katei ka seng, ka ong ba U Archbishop, u long u paralok ba hajan eh bad u nong kynpham ia ki khun samla ban iaid ha lynti ka hok.

Shillong: U MLA ka NPP u Bah Sniawbhalang Dhar bad u MLA ka HSPDP u Bah Renikton Lyngdoh Tongkhar, ryngkat bad ki nongialam bahakhmat jong ka UDP, mynta ka sngi ki la leit ialap elekshon ha Laitkynsew bad Mawlong ban kyntu ia ki paidbah ban kyrshan pura ia u kyrtong ka UDP u Bah Balajiedkupar Synrem, ha ka elekshon shiteng samoi na Shella Constituency kaban long ha ka 21 tarik mynta u bnai.

U Bah Sniawbhalang Dhar haba kren ha kitei ki jingialang u la ong, ba ka NPP ka don ka jingiadei kaba iajan bad ka UDP khamtam eh bad u (L) Dr Donkupar Roy bad dei halor katei ka nongrim ba ka NPP kam shym la pynieng kyrtong ha ka elekshon bad ka NPP baroh kawei ka iatreilang bad ka UDP ban pynthikna ba u Bah Balajiedkupar yn jop suk iaka elekshon.

U Bah Renikton Lyngdoh Tongkhar, u la ong ba ka HSPDP kadei ka seng kaba donlang ha ka kynhun Regional Democratic Alliance (RDA) kaba donlang ka seng UDP, bad kum ka dak ban burom ia u Dr Donkupar Roy kim shym la pynieng kyrtong ha ka elekshon shiteng samoi hynrei ki ai jingkyrshan pura ia u kyrtong ka UDP uba dei ruh u khun jong u Dr Donkupar Roy ba yn jop ia katei ka elekshon ban pynkhlain shuh shuh iaka kynhun RDA bad iaka sorkar Meghalaya Democratic Alliance (MDA).
U Bah Balajied u la kyntu ia ki paidbah ba kin ai jingkyrshan ia u bad u la ong ba yn nym ai jingkular iano iano hynrei yn ialeh ban pyndep ia ki kam kiba sahteng kiba la ieh da u kpa jongu bad ynda u la jop ruh yn iatreilang bad baroh ki paidbah na ka bynta ban kyntiew iaka thain baroh kawei.
Ha katei ka jingialang la ioh ia ka jingkren na u President ka UDP u Bah Metbah Lyngdoh, u Working President ka UDP u Bah Titosstarwell Chyne ha kaba la iadonlang u Chairman bad Deputy CEM ka JHADC u Bah Finelyness Bareh bad u Bah Lasky Rymbai bad kiwei kiwei. Na u Bah Titosstarwell Chyne, Working President UDP.

Nongpoh: Kan dei ka jingjia kaba sngewphylla ba ki samla hapoh ka shnong ba kin hap ban pom da ki dieng na khlaw shnong, na ka bynta ban pynmih pisa bad ban ioh thied jaka ban pynlong kum ka madan ialehkai.

Katei ka la jia ha ka shnong Nongmawlong ha Ri Bhoi, kaba hap hapoh ka Umsning Constituency, ha kaba ki samla hapoh jong katei ka shnong hapoh ka Nongmawlong Sports Club, ki la hap ban kyrpad rit na ka Dorbar shnong, ba kin sngewbha ban ai ia ki dieng napoh ka khlaw shnong, ba kin pom ia ki bad ba ki die, khnang ba kin ioh ban thied jaka, na ka bynta ban pynlong kum ka madan ialehkai.

Haba iakren bad ki nongthohkhubor, kitei ki samla, ki la pynpaw ba watla ki dei ki briew kiba ieid maring, hynrei kim banse ban leh ia katei ka kam, tang na ka bynta ban ioh madan kaba biang bad ba kin ioh ban pynlong kum ka madan ialehkai.
Kitei ki samla, ki la iathuh ruh ba ki la shah shukor la bunsien ha ki nongmihkhmat, ha kaba ki la kular ban pynshna bad ai da ka madan kaba paka sha ki, hynrei katei ka jingkular, ka la shu kut tang ha ka jynhaw, naba da ki bun bun snem kaba ki la ap, pynban kam shem la wan urlong satia.
Ha kajuh ruh ka por, kitei ki samla ki la pynpaw ia ka jingsngewdiaw, hadien ba ki la mad ia shibun ki jingshah kular kai ha ki Nongmihkhmat bad kiba la ong ruh, lada kane ka jingkular da ki nongmihkhmat kan iai bteng, ka lawei jong ki samla ha ki shnong nongkyndong, kam poi shaei shaei ruh.
Ha kawei pat ka liang, kitei ki samla ki la kyntu ia ka sorkar ba ka dei ban pyrkhat lem ia ki khun samla kiba don ha ki nongkyndong, ym ban pyrkhat tang ia kito kiba don ha ki shnong kiba la kham long sor, namar ia kaei kaba ki la mad, ki la pynpaw ba ka sorkar lem bad ki nongmihkhmat, kim da pyrkhat eh ia ki samla ha Nongkyndong bad kiba la ong ruh ba lada ka long ha kane ka rukom ka lawei jong ki khun samla, kam poi shano shano ruh.

Shillong: U Acting Syiem ka Hima Nongspung u bah Kyntiewborlang Syiemlieh u la wer ia baroh ki khun ki hajar jong ka Hima Nongspung ban ia poi ryntih sha ka Dorbar Bah jong ka Hima ka ban long ha ka 19 tarik Risaw, 2019 ha Nongspung, ha ka por 11 baje mynstep.

Ki mat iakren ha katei ka Dorbar Bah kin long halor ban pynbeit ia u pud u sam jong baroh ki shnong kiba hap hapoh ka Hima Nongspung ryngkat jong ka Hima hi baroh kawei. Ban iakren halor ka khyndew ka shyiap jong ka Hima khamtam ha ki thaiñ khappud bad ka Assam ba la lilam da ki Syiem ba hashwa bad ban saiñdur ia ka Riti Synshar jong ka Hima bad kiwei kiwei.

U Acting Syiem u la khot la wer lang ia baroh ki Lyngdoh, ki Sordar, ki Rangbah Shnong, ki khun ki hajar ba kin ia pyllait por khnang khnang khlem pep ha katei ka sngi kumba la pynbna khnang ban lah ban kyntiew ia ka bha ka miat, ka roi ka par ha ka lawei jong ka Hima bad ka jingtip ba kongsan eh halor kiei kiei kiba iadei bad ka Hima baroh kawei kiba long ki kam sahteng naduh ki phew snem ba la leit noh.

Shillong: Ka Mawngap Multipurpose Cooperative Society Ltd kaba dei peit ia ka TWE Music School, ka la rai ba kan pynkynriah noh ia ka Music Festival “Scaling Height park 2019” ka ba la pynbeit ban long ha ka 19 tarik u Risaw 2019 ha madan Madan St.Paul Higher Secoundary School Mini stadium Marbisu bad yn pynlong ia kane ha ka 30 tarik u Naiwieng 2019.

Kumta na ka liang ka seng ka pan map ia ki nong kyrshan ki sponsor bad baroh kiba ia trei lang halor ka jing bym lah ban pynurlong ia kane ka programe ha ka 19 tarik u risaw bad ka pan ruh ia ka jing kyrshan ia ka jingthmu jong ki ban pynlong noh ha ka 30 tarik u Naiwieng 2019.

Ia ka Music Festival “Scaling Height park 2019” yn pynlong kum shi bynta ban jingrakhe ia ka jingdap 7 snem jong ka TWE music. Ka TWE music ka la sdang ia ka kam ban ai jinghikai lynba I jingsdang i barit hynrei ki khynnah ki la paw sted bha na kane ka skul la ka dei ha ka shnong ka thaw, ha ki balang bad ha ki skul don na pdeng kine ki khynnah ki ba la plie ia ka jinghikai tem lyngba ka jingiarap jong kane ka skul.
Ha kane ka sngi yn sa wan ban pynshongshit da ki kynhun tem ba pawnam ka jylla ka Snowwhite ha ryngkat ka jing synran lang ka kynhun tem Empirical Tribe bad kiwei. Ka Mawngap Multipurpose Cooperative Society Ltd ka ba dei peit ia ka TWE Music School kum shibynta ban burom bad ban pynpaw ia ka dak ja jing sngewsih ia ka jing khlad kyndit jong u Archbishop Rev Dominic Jala bad ka seng ka la rai ba kan pynkynriah noh ia ka Music Festival “Scaling Height park 2019” ka ba la pynbeit ban long ha ka 19 tarik u risaw 2019 ha madan Madan St.Paul Higher Secoundary School Mini stadium Marbisu.

Shillong: Baroh ki Parish bad ki iing niam jong ka balang katholik, kin pynlong ia ka dak jong ka jingsngew lem halor ka jingkhlad noh U Archbishop Dominic Jala.

Katei ka jingsngew lem, kan long katba kum ka jingpynbeit jong ka Shillong Archdiocese, ha kaba kan bteng haduh ban da dep leit on tep ia U Archbishop.

Katei ka long ka jing pyntip sha baroh ki parish, ki skul, ki kolej bad ki balang ruh, kiba hap hapoh ka Archdiocese of Shillong, kaba la pyntip da U Diocesan Administrator, Fr John Madur.

Shillong: Ka HYC Seng Kmie lyngba ka Central Executive Committee (CEC) kaba long mynta ka sngi ka la sngewdei ban pynleit jingmut bha ia ki mat ba khia ba ki samla pule ki ia kynduh na ka por Sha ka por. Ban pynjanai ia ka jingshakri ha ka pule puthi bad ban iarap ia ki samla pule ka jaidbynriew ka seng ka la shim ia ka rai ban don noh ia ka ” HYC Students’ Wing ” .

Ha ka kyrwoh ba la phah da u bah Roykupar Synrem, u general secretary, ka seng ka la ong ba ka Students’ Wing kan dei ka shnat treikam jong ka Seng ka ban pynleit jingmut beit thik ia ki mat ka pule puthi bad ia ki samla pule. Kan shim khia ban kyntiew ia ka pule puthi, ban iarap ia ki samla pule bad kan shim ia ki mat ban dawa kyntiew ia ki baibam, ban dawa ba ka baibam dei ban siew ha ka por ba biang, ban pynlong ia ki prokram ban kyntiew ia ki samla pule kum ki jingpynshai paidbah, ki jinghikai seng kam ne ïit kam bad ki jinghikai bapher bapher ba iadei bad ki samla, ki coaching class, ban dawa na sorkar ban don ki jaka pule ba biang bad ban dawa na ka sorkar ba kan wanrah ia ka Education Policy kaba bit ba biang na bynta ki samla pule.

Ka Seng kan sa shna ia ki unit ha man ki College bad University kiba don ia ki samla pule ka Jaidbynriew Hynniewtrep. Ha ki Secondary bad Higher secondary school ia mynta yn nym buh ne shna Unit.
Ha ka Students’ Wing yn shah tang ia ki samla pule Hynniewtrep kiba dang pule naduh Class XI shajrong bad kiba dang don ka ki jingpule bapher bapher, la pynkut ka kyrwoh na u bah Roykupar Synrem.

Shillong: Ka Muaythai Association of Meghalaya (MAM) kan pynlong ia ka 1st Meghalaya State Level Muaythai and Pro Championship 2019 naduh 24-26 tarik mynta u bnai ha Shillong.

U President ka seng u bah Angelus Sunn haba kren sha ki lad pathai khubor u la ong ba ka Muaythai Association of Meghalaya (MAM) u la iathuh ba ha kane ka jingialehkai yn pynlong ia ka kyrsan Amateur, Elite bad Pro Fight.

Katkum ka jingong u bah Sunn, ki don palat 500 ki nongialehkai ban wan iashim bynta.
Ia ka MAM la thaw ha u snem 2016 bad ka la iaid lai snem eiei mynta.
“Ngi la shu kyrpad na ka sorkar jylla lyngba ka tnad ialehkai ban iarap lada ioh ia ka pisa”, la ong u bah Sunn.
U la ong ba ka la don ka jingkyrmen ba ka jingialehkai Muaythai kan rung ha ka jingialehkai Olympic 2024.
Katkum ka jingong u bah Sunn, ka jinglut kam duna ia ka 3 lak eiei na ka bynta ka jingialehkai.

Shillong: Ka jingialehkai kaba san sngi ka Carrom Championship 2019 ba la pynlong ka Nongthymmai Sports & Cultural Club ka la kut ha kane ka sngi Saitjain Indoor Hall, Nongthymmai.

Ha kane ka jingiakop, ka Jewel Star ka la rah ia ka nam lahduh katba ka Madanrting Carrom ka long baar napdeng ki kynhun.

U MDC ka thain u bah Latiplang Kharkongor u la long kum u kongsan ba la wan lang u bah B. Khyriem, President, Rev. N Diengdoh, Chairman, Indoor Games & Sports Committee, bah D.S Wallang, Secretary, Nongthymmai Carrom Club bad kiwei.
Ha ka Men’s Doubles la rah khusnam nyngkong u bah S Syiem & K Nongrang, baar R. K Rani & R. Nongrum. Ha ka Men’s Singles, la rah u bah S Sawkmie bad baar J Kharkongor. Ha Women’s Doubles, la rah ka kong S Mukhim & B Dohling bad baar ka S Nongbet & W Kharmawlong. Ha ka Women’s Singles la rah da ka kong S Mukhim, baar M Mukhim.
Ha ka jingiakhun ki khynnah shynrang, la rah da u M Rapsang bad baar Mri. K Kharkongor.
Kane ka long ka kyrwoh na u Secretary bah John Cajee.

Shillong: Ka seng Khasi Student’s Union (KSU) Border Area Unit kaba hap hapoh ka KSU South Central East Circle Pynursla hadien ka jingud jong ki paidbah ka thain ia ka jingbymdon doktor ha Pongtung PHC ngi pynpaw ka jingsngewkhia shi katdei eh.

Ha ka jingwad jingtip jong ka seng, ka la lap ba u doktor ba dei peit ia katei ka PHC u dang shim shuti kumba lai taiew eiei bad ym don doktor satia ban peit shipor ia katei ka PHC.

Ka seng kam pyrshah ne kynthoh eiei halor ka jingshim shuti jong u doktor ba dei peit ia katei ka jaka ai jingsumar hynrei ka pynpaw ka jinglyngngoh halor ka jingbym shimkhia jong ki bor bahalor ba dei peit ia ka tnad ka koit ka khiah ha ka jylla ban phah doktor shipor ban iarap ia ki paidbah ki ba donkam jingsumar kyrkieh.
Kum ban shu pyntip katei ka PHC ka dei peit ia bun tylli ki shnong naduh khappud bad ka Bangladesh haduh ki bynta ba sharum jong ka Pynursla.
“Ngi kyrpad ia ki bor bahalor ban pyrshang ban thung doktor noh kham kloi ha katei ka jaka ai jingsumar khnang ba kan ym ktah ia ki paidbah ka thain khamtam ia kito kiba duk ba kyrduh”, la ong ka kyrwoh na u President ka seng KSU Border Area Unit u Samla Thawthymmai Suting.