Shillong: Myn hynnin ka sngi, ka jingthoh ne signboard ka la mih kynsan ba la pynieng ha iew dielang ha Iewduh hadien ba ki nongrep hapoh ka jingialam ka Hill Farmers Union (HFU) ki la iakynduh ia u Deputy Chief Executive Member (Dy.CEM) ka Khasi Hills Autonomous District Council (KHADC) bah Pyniaid Sing Syiem ban dawa ban pyntreikam hok ia ka rai ban khang pyrshah ia ki mahajon ban khang ot kilo ia ki mar rep ha katei ka iew.

Kane ka signboard la pynieng da ka Hima Mylliem hadien ba la rai ka jingialang hapdeng ki nongialam ka HFU, ka KHADC bad ka Hima Mylliem ha ki bnai ba la dep, khnang ban mana ia ki mahajon ban ot kilo. Ha kine ki sngi, ym ju don ka jingbuh ia katei ka signboard hynrei ka la mih kynsan mynta ka sngi hadien ba ki nongrep bad ka HFU kila iakynduh ia u Dy.CEM ban pynkynmaw ia ki rai ba la shim mynshwa kiba khlem pyntreikam satia.

U general secretary ka HFU u bah Alfonsebirth Kharsyntiew, haba kren sha ki lad pathai khubor mynta ka sngi, u la iathuh ba ka jingiakynduh kam long kaba seisoh namar ba ka Hima Mylliem kam shym la pyntreikam satia ia ki rai ka jingialang mynshwa bad halor kane, ka u Dy.CEM u bah Pyniaid u la kular ban khot biang ia ka jingialang ha ka 28 tarik mynta u bnai ban iakren halor kane ka kam.
Ki jingdawa jong ki nongrep ka long ban khang pyrshah ban ot kilo da ki mahajon ia ki mar rep ha iew dielang. Ka jingialang mynshwa ka la rai ruh ba ki nongthied ki dei ban ai da ka rusit kaba pynmih da u Syiem ka Hima Mylliem hynrei kane ruh kam pat shym la treikam. Kawei pat ka long ba ia ka jingkhate dei ban leh tang ia ki khoh ki kriah ne byrni hynrei kane ruh kam pat treikam satia bad ka jingot kilo ka dang bteng haduh kine ki sngi.
Kawei pat ka rai ka long ba ki kudam ki dei ban don da ka number ia ki nongkhaii khnang ban suk ban tip ia kiba leh tuh hynrei kane ruh kam shym la treikam.
“Ngin ap haduh ka 28 tarik ban iakren bad lada kam long kumba la dawa, yn iaid da kawei ka lad ban leit tied jingkhang sha ka sorkar lyngba ka tnad Metrology bad yn ujor ruh sha u Chairperson ka Farmers Commission”, la ong u bah Alfonsebirth.

Shillong: Ka Savio Higher Secondary School ka ba don ha 9 mer Baridua Ribhoi District, ka la rakhe ia ka “Tini Tots Day” myn hynnin ka sngi phyllaw jong kane ka skul.

Ha kane ka sngi la pyniphuh i phieng ia kane ka sngi da ki programme ba pher bapher jong ki khynnah skul jong kane ka skul.
Ha ka ne ka sngi la iadon ryngkat lang da ka DC Ribhoi ka kong R.M Kurbah, ha ka ba ka long kum ka kongsan ha ka jingiadon ryngkat ki Principal jong ki skul ba marjan kum ka kongsan.
Ha kane ka sngi ka kong R M Kurbah ka la pynpaw ia ka jing sngewkmen haba ka iohi ia ka sap ba ki khynnah kane ka skul bad ka la pynpaw ruh ia ka jing bynnud jong ka ia ka jing long khynnah.
Naka liang ka DC Ribhoi ka la ai mynsiem ruh ia ki nongpyniaid kane ka skul ba kin nang lah shuh shuh ban kyntiew ia ki sap ki phong ki ba ki khynnah ki don.
Ha kane ka sngi ka D.C Ribhoi ka la plie ruh ia ka Science and Arts Exhibition ba la pynlong da ka Savio School, ha ka ba la pyni nam ia ka jing stad science ba mynta bad ruh ia ki jing buh jing sat ki por barim ki riam tynrai bad ki jing shet tynrai ka thain shatei lam mihngi.

Shillong: Ka sorkar jylla, lyngba ka Political Department hynnin ka sngi, ka la thung dkhot ïa i kong Haffindalyne Giri, ha ka Meghalaya Human Rights Commission.

I kong Haffindalyne Giri i dei District & Sessioon Judge ba la shong thait.
Lah ban kdedw ba kane ka hukum lane ka Warrant of Appointment ka la mih hadien ba u Lat ka Jylla u Tathagata Roy u la la bthah katkum ka sub-section (1) hapoh ka Section 22 jong ka Protection of Human Rights Act, ban thung dkhot ïa i kong Haffindalyne Giri, ha ka Meghalaya Human Rights Commission.

I kong Haffindalyne Giri, in leit ban shimti ïa ka kam ha ka Meghalaya Human Rights Commission kat kum ka sub-section (2) jongka Section 21, Chapter V jongka Act ba la kdew haneng.
Ïa kane la bthah ha ka 26 tarik u Jylliew 2017 da u lat ka jylla u Tathagata Roy, bad la pynskhem bad pynbna lyngba ka Memo POL.155/96/Pt111/50 ba la soi da ka kong RV Suchiang, Additional Chief Secretary to the Govt of Meghalaya, Political Department ha ka 15 tarik u Risaw 2019.

Nongpoh: Na ka bynta ban wanrah ia ka jingiajan bad ka jingiatreilang hapdeng ki Bank bad ki paidbah khamtam ia ki nongrep, hynnin ka sngi ki heh na ka Bank of Baroda, Shillong, ki la hiar sha ka shnong Umrnong, ha Ri Bhoi, na ka bynta ban pynshai paidbah, halor ka jingdonkam ki paidbah khamtam ia ki nongrep, ba kin don ka jingiadei kaba jan bad ki Bank, khnang ba kin nanglah ban kyntiew ia ki kam rep kam riang jong ki, lyngba ka jingiarap na ki Bank.

Lyngba jong katei ka sngi, kitei ki briew na ka Bank of Baroda, ki la pynshai sha ki paidbah kiba dei ruh ki nongrep, da kaba ki pynshlur ia ki ba ki dei ban don ka jingiajan bad ki Bank, khanang ba kin nanglah ban kyntiew ia ki kam rep kam riang jongki, namar kumba ka long hi kiba bun ki Bank, ki ju iarap bad pyrkhat kyrpang ia ki nongrep, da kaba pynduna ia ka Sut haba kiba leit ban shim ram na ki bank.
Ki la pynshai ruh, da kaba ong ba lada ki kwah ban long shisha kita ki nongrep kiba paka bad kiba kwah ban kiew lyngba ki kam rep, kim dei ban tieng ha ka ban leit shim ram na Bank, hynrei ki dei ban long kiba shlur bad ban leit mih barabor sha ki bank, khnang ba ki Bank ruh kin lah ban ai haba ki shim ram.
Shuh shuh, ki la ong ruh ba bun na ki paidbah kim tip ia ki lad jingmyntoi kaba ki dei ban ioh na ki Bank bapher bapher, namar ha ka jingshisha hi ka long ba baroh ki Bank, ki ai beit ia ki lad jingiarap sha ki paidbah bad khamtam eh ia ki nongrep.
Ha kawei pat ka liang, ki la ong ba ka dei hi ia ki paidbah ba kin shem jingeh, namar ba ki paidbah ruh kim ju leit wad jingiarap na ki Bang bad ha kajuh ruh ka por ba ki briew na ki Bank kim ki wan mih ne ban pynshai sha ki paidbah, halor shibun ki jingmyntoi kiba ki dei ban ioh.
Nalor ka jingpynshlur haba iadei bad ki kam shimram na Bank, kitei ki briew na ka Bank of Baroda, ki la pynshai paidbah ruh halor ka jingmyntoi kaba ki ioh lada ki don ka jingiajan bad jingiatreilang bad ki Bank, kata ka long naduh ki Life Insurance, ki Accident Insurance lem bad kiwei kiwei.
Kiba la ai jingpynshai sha ki paidbah ha katei ka sngi ki kynthup ia ka Kong Daphishisha Diengdoh, Senior Manager ka Bank of Baroda, ka Kong L.R Syiem, Branch Manager ka Bank of Baroda, katba kiba la donlang ha katei ka sngi ki kynthup ia u Santosh Chhetri, Chief Manager ka Bank of Baroda, u Syiem ka Raid Mawbuh, u Paiem W. Macdonald Syiem, ki nongialam shnong lem bad ki paidbah jong katei ka shnong.

Nongpoh: Shisngi hadien ba la mih ka khubor, kaba la kynthoh halor ka jingsuba donkti ki sengbhalang, ha ka ban shalan beain ia ki Masi sha Bangladesh, u Bah Generous Warlarpih, President ka Khasi Jaintia Butcher Welfare Association (KJBWA), u la pynpaw ia ka jingsngewbynniaw halor katei ka khubor bad u la ong ba katei ka khubor, ka la ktah mationg bad ka pynsngewsih eh ia ki paralok Sengbhalang, kiba la ju trei kam ryngkat bad kiba la kyrshan borbah ban kyrshan ia katei ka synjuk ki nongotdoh ha ka por ba ki iakynduh jingeh.

U Bah Generous Warlarpih, u la ong ba katei ka khubor, nalor ba ka la ktah ia kiba bun ki nongialam sengbhalang kiba bym shem la donkti ha katei ka kam, hynrei ka ktah ruh ia u Bah Dundee Cliff Khongsit, u General Secretary ka FKJGP bad ha kajuh ka por u dei ruh u Adviser ka KJBWA.
U la pynshai ruh, ba ka daw kaba la pynlong ia u ba un pynmih ia kitei ki kyntien, ka dei ruh hadien ba ka kynhun ki nongotdoh, ki la shem sohsat shaba palat haba iadei bad ban ioh ia ki masi otdoh sha iew sha hat, namar ka jingjyllei pat ka jingshalan masi tuh sha Bangladesh, ka la pynduh mynsiem shikatdei eh ia ki nongotdoh bad kiba la duh jingkyrmen ban bteng ia katei ka kam.
Shuh shuh, u la ong ruh ba ha ka jingshisha hi, um shem la don jingmut ban kdewkti ne kynthoh iano iano ruh, hynrei nga shu kyntu ia kito ki dkhot jong ki Sengbhalang bapher bapher kiba ia donkti ha ka kam khaii masi beain sha Bangladesh, ba kin kylla noh bad ban sngewthuh lem ia kaei ka jingeh kaba la iakynduh da ki nongotdoh (kiba dei ruh tang ki Khasi suda) bad lashai shisngi, ka jingeh yn iakynduh da ki paid nongbam doh masi ha Ri Lum Khasi hi baroh kawei.
Kumta na ka liang ka KJBWA, ka ai ia ka jingiaroh ia kito ki Sengbhalang kiba la sngew ia ka Sur jong ka jingeh kaba ia iakynduh da ki Nongotdoh bad haduh mynta ngim duh mynsiem ngi shaniah tylli ha ki sengbhalang, ba kin nang trei shitom shuh shuh na ka bynta ka bha ka miat ka ri bad ka jaitbynriew.

Shillong: Ka Seng Samla Shnong Umkiang (SSSU), ka pyrshah jur halor ka jingthmu ka Star cement ban nang pynheh ia ka jingtih Mawshun (Limestone) sha duh shnong Brishyrnot.

Katei ka seng, ka ong ba naduh ki snem 1997- 2002, kam pat don kano kano ka jingktah, kylla rong jngum, ne ym pat don ka jingiap khlam ki dohkha, doh um, hynrei naduh u snem 2005 ba la pynmih ia ki Kharkhana dewbilat , la sdang ban iap khlam ki dohkha, bad khamtam bun ki briew ba duk na ka shnong Sonapur, Chymplong Borsara, Kuliang, bad Umkiang kiba ju im nong sngi da kaba die ia ki dohkha ba ki ioh khwai naka wah Lukha, hynrei mynta kim lah shuh ban kynrshan iala ka ing ka sem, kumba ki ju leh mynshwa, namar mynta man la ka snem ka don ka jingiap khlam ki dohkha,
Sa kawei ruh ka jingtih ia u Mawshun( Limestone) shaduh Brishyrnot, kan pynkylla ktieh ia baroh shilynter ka wah Lukha bad kumjuh ruh kan don shibun ki jingpynjot ki khlaw bad ki dieng ki siej, kiba iarap ban pyntngen ia ki sawdong sawkun ka Elaka Narpuh hi baroh ka wei. Ki nongkitkam ka Seng ki pyrshah jur iaka jingthmu ka sorkar ban ai lad ia kane ka kompani poi ei bam ei shi sngi, bad kyntu jur ia ka Sorkar Meghalaya bad ka Forest Department ban peit jngai bad khang shisyndon ia ka jingthmu bym don jingtiplem ia ka bha ka miat ka khia ka shon ki shnong ba don hapoh ka Elaka Narpuh, da kane ka kompani star cement.

Shillong: Ha ka 12 tarik u Risaw 2019, ka shnong Amlanai hapoh ka jingialam jong u Waheh shnong bathymmai jong kane ka shnong ,u Ma Jembis Khongiong uba la shah pynskhem da u Daloi myn ha ka 18 tarik u September ka la ioh ban lum ban lang ia baroh ki dkhot ka shnong kiba la kynjoh 18 snem shaneng, kynthup ia ki kynthei bad shynrang sha ka jingialang paitbah jong kane ka shnong, kiba don baroh 220ngut.

Ka kyrwoh khubor ka iathuh ba ha kane ka jingialang, ki paitbah ka shnong ki la ioh ka jingpynshai halor ki skhem jong ka PHE kumjuh ruh ki la ioh ka jinghikai kumno ban leh khuid leh suba ha ki sawdong sawkun jong ka shnong hi baroh kawei, namar ka jingleh khuid ka long hadien ia ka jinglong Blei bad ka long ka bynta kaba kongsan jong ki paitbah jong ka jylla bad ka ri hi baroh kawei, kumba la shimkhia da u Myntri Rangbahduh ka ri u Shri Narendra Modi.
Kumta ha kane ka jingialang u nongialam u la kyntu ia baroh ki dkhot ka shnong ban shim khia ia ka jingleh khuid leh suba khnang ba kan long ka jingkhiah krat ia ki dkhot ka shnong baroh kawei bad kan ai ruh ka lawei kaba kmen.

Shillong: Ki nongialam ka seng sain pyrthei NPP bad HSPDP ryngkat bad ki nongialam bahakhmat jong ka UDP, myn hynnin ka sngi, kila leit ialap elekshon ha shnong Wahkaliar, Laitduh bad Shella ban kyntu ia ki paidbah ban ai jingkyrshan pura ia u kyrtong ka UDP u Bah Balajiedkupar Synrem ha ka elekshon shiteng samoi na Shella Constituency.

Na ka liang ka seng NPP la wan ialap elekshon da u Ma Sniawbhalang Dhar uba long ruh u Myntri Sorkar uba khmih iaka tnad Transport, Community & Rural Development bad kiwei kiwei, u Chief Executive Member ka JHADC u Ma Thombor Shiwat bad ki MDC ka NPP, katba na ka liang ka seng HSPDP la wan ialap elekshon da u President bahakhliehduh u Bah KP Pangniang bad u Bah Samlin Malngiang uba long ruh u Myntri Sorkar uba khmih iaka tnad PHE bad kiwei kiwei.
Katba ki nongialam ka UDP la ialap elekshon da u u Chief Executive Member ka KHADC u Bah Teinwell Dkhar u ba dei ruh u MDC ka Shella Constituency bad u Working President ka UDP u Bah Titosstarwell Chyne uba long ruh u MDC ka Sohra bad ki nongialam UDP jong ka Shella Constituency.
U Ma Sniawbhalang Dhar, haba kren ha kitei ki jingialang u la ong, ba ka jingiadei ka UDP bad ka NPP ka long kum u Kpa bad ka Kmie bad ialade shimet hi u shim ba u (L) Dr Donkupar Roy u long kum u kpa jong u bad u la kyntu ia ki paidbah ha kitei ki jingialang ba kin kyrshan bad ban pynjop don burom ia u Bah Balajied ha katei ka elekshon kaban long ha ka 21 tarik mynta u bnai.
Katba u Ma Thombor Shiwat, u la ong ba watla u nongmihkhmat bad u CEM na rilum Jaintia, hynrei ka jingwan ka jongu shapoh Shella Constituency ban ialap elekshon kadei namar ba u burom bha ia u Dr Donkupar Roy namar ba ym dei tang u nongialam jong ka thain Shella hynrei u dei u nongialam jong ka jylla baroh kawei bad ula kyntu ia ki paidbah ba kidei ban ailad ia u khun jong u Dr Donkupar u Balajiedkupar Synrem ban mihkhmat iaka Shella.
U la ong, ka seng NPP baroh kawei ka ai ka iatreilang kaba pura ia ka seng UDP ban pynthikna ba u kyrtong u ba ka pynieng yn jop iaka elekshon shiteng samoi.
Katba ki nongialam ka HSPDP kiba kynthup ia u Bah KP Pangniang bad u Bah Samlin Malngiang, ki la ong ba u Dr Donkupar u dei u nongialam uba la thaw ia ka kynhun Regional Democratic Alliance (RDA) bad u la long hakhmat eh ruh ban thaw iaka sorkar Meghalaya Democratic Alliance (MDA) bad ka HSPDP kum ka jingburom ia une u nongialam ba radbah uba la khlad noh, kan ai jingkyrshan pura ban pynskhem iaka jingiadei lok bad kan ialap elekshon ban pynthikna ba u khun jong u Dr Donkupar yn jop ia ka elekshon na Shella.

Rampur: Hynnin ka sngi, U Azam Khan, uba dei u nongialam ba rangbah jong ka seng Samajwadi Party bad u MP ka Lok Sabbha, ula iam rangbah ha ka jingialang elekshon shiteng samoi, namar ba ula shah kynnoh, ba u dei u nongtuh blang bad u nongtuh syiar.

“Nga la shah pynngat ha ka ain IPC 307 (kaba dei ka jingthmu ban pyniap briew). Ka jinglong jingim jongnga, ka la shah ktah shaba palat bad ka jingkynnoh ba nga tuh syiar bad tuh blang, ka la ktah jubor ianga” bad u ong shuh shuh “Ah ko Blei, balei phim pyniap ianga, haba phi lap ba nga tuh syiar bad tuh blang?”

Utei u heh jong ka Samajwadi Party, u ong ba u hap ban siew da ka dor kaba rem, namar ba um ju leh niewbein ia u paidlang ka Rampur. “Kane ka leit jia, namar ba ngam ju die ia phi ne ialade ruh”, ong U Khan.

U Khan, ha ka 5tarik Risaw 2019, ula shah khot hajir ha ka Special Investigation Team (SIT), halor ka jingkynnoh shim jaka tuh, da ki bor pyniaid jong ka Mohammad Ali Jauhar University.

Ha katei ka elekshon shiteng samoi, ha Rampur, ka Samajwadi Party, ka pyn ialeh da ka Tazeen Fatima, ka tnga jong U Azam Khan bad la pynlong ia katei ka elekshon sha ka dorbar Jylla, hadien ba U Azam Khan, ula shah jied ialade ban leit mihkhmat sha Lok Sabbha.

AIS Suja

“Nga iohi ia u soitan ba u hap na bneng”. kane kam dei ka jingiohi jong u Nongthoh, hynrei ka jingiohi jong u Jisu ba u soitan u hap na bneng katba u dang ia kren bad ki 70 ngut ki synran jong u ban leit ialap kata ka por. Loukas 10:18.

U Jisu haba u ong kumne, kam mut ba u iohi ba u soitan u hap ha kata hi ka por, hynrei u la iohi lypa ia ka por kaba yn sa hap sha kane ka pyrthei ba ka la jan. U Jisu u ong – Nga la iohi ia u soitan ba u hap kum ka leilieh na bneng”. Ka mut ba ka jinghap u soitan kam dei na bneng kaba Lai (Third) ka jaka shong u Blei, namar u Blei u la beh noh ia u na ka Bneng ba Lai ka jaka shong u Blei mynba u dang don ka kyrteng ba la tip kum u Lucifer.

Dei haba u Blei u la beh noh ia u Lucifer na ka bneng kaba Lai, u leit shong noh ha ka jaka bneng (Heavenly realm) ba la tip kum ka bneng ba ar. Bad ha kane ka bneng kaba ar la kynthup nyngkong ki jaka hajan ki khlur (Astral plane) nangta ka Hive level ne ka jaka shong ki ksuid bad kaba lai ka jaka shong u soitan (Lucifer) (Kingdom level) ka hima ne jaka u soitan. Kumta lada ka don ka bneng kaba Lai (Third Heaven) 2 Korinth 12:2. Te ka don ruh ka bneng kaba Ar ka jaka shong u soitan Lucifer, bad ka don ruh ka bneng kaba Nyngkong ba ngi khot ka suinbneng (firmament).
Ia u Lucifer la beh noh na bneng ba lai sha ka jaka bneng ba ar, na ka daw ka pop ka jingsarong (Pride) bad ba u kwah ruh ban long kum u Blei. Isaiah 14:13-15. Haba la beh ia u, u la kylla long u ksuid bad u soitan, u nongshun jong u briew bad u nongialeh pyrshah ia u Blei.
Mynta ngi tip ba ki don lai tylli ki bneng kaba kynthup ia ka bneng (Paradise) jong u Blei. Ka ktien u Blei ha ka Kitab Genesis ka ong – “Ha kaba Nyngkong u Blei u la thaw ia ki bneng bad ia ka pyrthei”. In the beginning God created the HEAVENS and the EARTH” Genesis 1:1.
Kumta, ia u soitan (Lucifer) la beh noh na ka bneng ba lai sha ka bneng ba ar, bad mynta u don hangta naduh ka khyllipmat ba u Blei u la beh noh ia u. Mynta pat ka por kan poi, ba ym tang ban beh, hynrei yn pynhap ia u shi syndon sha kane ka pyrthei bad un ym shong shuh hangtei ha ka bneng ba ar, hynrei un hiar syndon sha pyrthei namar ka la dei ka pali jong u.
Kumta u Jisu u la iohi lypa ia kane ka por ba yn pynhap ia u soitan (Lucifer) sha kane ka pyrthei ka por jinghap jong u ka long kaba stet bha kum ka ding leilieh. Bad mynta ka por ka la jan ba yn pynhap noh ia u soitan na katei ka jaka bneng kaba ar (Heavenly realm) sha pyrthei bad ka ktien u Blei ka iathuh da kaba ong – “Te la shop noh arsut ia uta u Iakjakor bakhraw, uta u bsein tymmen uba la khot u ksuid bad u soitan ……. La shop arsut ia u sha khyndew, ia kita ki angel jong u (ki ksuid) la shop arsut lem bad u ……. Kordit ia kata ka khyndew (Earth) bad ia ka duriaw naba uta u ksuid u la leit hiar ha phi, uba don ka jingbitar bakhraw, naba u tip ba u don tang khyndiat ka por” Jingpynpaw 12:9-12. “Kata ka ia ka long hajan” Jingpynpaw 22:10, tang shu la pynieng ia ka Temple kaba Lai ha Jerusalem lyngba ka jingiateh jutang iasuk (Peace Treaty) hapdeng ka Israel. Ynda la pynieng ia ka Temple kaba Lai ha Jerusalem, kin sdang artad ki 7 snem (Shi taiew ba la ong da u Daniel Nongiathuhlypa. Daniel 9:27. Ki Jiw ne Israel ki ioh ban pyndonkam jingknia tang 3 snem shiteng bad hamar pdeng ki Lai snem shiteng jong ki 7 snem, ka long ka por ba yn pynhap noh ia u soitan na bneng (second heaven) kumba u Jisu u la ong, Loukas 10:12. Kata mar iakut ka jingwan mih ka kulai Baiong. Jingpynpaw 6:5-6. Ha kane ka por, u soitan u dap da ka jingbitar bakhraw namar u tip ba u don sa tang khyndiat ka por, kata tang 1290 sngi (1260 + 30 sngi) = 1290 sngi. Daniel 12:11. Ka mut ka por ai u soitan kaba long tang 3 snem shiteng + 30 sngi, lane 3 snem 7 bnai. Kan long ka por jingbitar shla u soitan. Jingpynpaw 12:13-17. Daniel 12:1. Mathaiios 24:15-21.
Kan long ka por ba jynjar tam ka ym pat ju long na myndang long ka pyrthei bad kan ym long shuh ruh. Mathaios 24:21. Kata hapoh ki 3 snem shiteng kaba Ar ka jingsynshar u ksuid u soitan kein. Kane ka wan hap ha ka kulai Babthuh. Jingpynpaw 6:7-8. Kan long ruh ka por jingphaidien bakhraw ki briew ha kylleng ka pyrthei. Mathaios 24:10 /2 Thessoloni 2:1-4. Ka por ba pynhap ia u soitan, ka por ba jynjar tam eh namar un synshar dusmon, un pyniap ruh. Bad ha shwa ba kan don ka jingmihpat, kan don shwa ka jingshah pyniap jong ki Riewkhuid, hadien ka jingshah pyniap ki riewkhuid ha u Mrad khlaw, jingpynpaw 13:2-17. Mathaios 24:9-13. Daniel 7:25. Hadien kane kkiba iap kin mihpat shwa bad yn rong noh sha suin. 1 Thessoloni 4:16-17.
Kumta ka por ka jingpynhap ia u soitan na ka bneng ba ar sha pyrthei, kan long ka por kaba shyrkhei tam na kiba shyrkhei. Kane ka long kata ka por jingsynshar jong u kein ia kane ka pyrthei. Jingpynpaw 22:10 “Naba kata ka ia ka la jan”.
Kumta kiba dang im kat haduh kata ka por kin hap ban mad ia ka jingshyrkhei ka jynjar bah, ka por ka jingsynshar u ksuid bad u soitan, namar kata ka jingsynshar jong u (his government) un pynbor ban pdiang ia ka shap 666. Jingpynpaw 13:15-18.
Na kata ka daw – “Suk uta uba pule bad kiba iohsngew ia ki ktien jong kane ka jingiathuhlypa kiba sumar ia kita kiei kiei ruh ba la thoh ha ka: Namar kata ka ia ka la jan” Jingpynpaw 1:3.

Dy. Inspector General of Police (A),
Meghalaya, Shillong.

Ha ka jingtyllun ka sha lyntem jong ka por ban bud dien ia ka mynnor, to ngin ia pynher ia ki jingmut jingpyrkhat jong ngi ban kynmaw burom ia ki kynrem ki lyndan jong kito ki mynsiem shlur kiba la pha ia la ka jong ka jingim na ka bynta ka ri.

Ka 21 tarik u Risaw, ka dei ka sngi kaba ngi kynmaw kyrpang ia ki matti bad nongmuna jong kito ki pulit riewshlur jong ka ri kiba la kyllon iap ba ngin ioh ka shong suk shong sain ha la ka ri.

Ka jylla jong ngi bad baroh kawei ka ri hi ka rakhie ia kane ka sngi kum ka “Police Martyrs’ Day” lane “Police Commemoration Day” ha kum kane ka sngi ngi ju pynlong kyrpang ka jingia lum lang jong baroh ki tnat pulit lyngba ki nongmihkhmat jong ki ban sakhi ia ka prokram bakhraw tam ha National Police Memorial ba juh pynlong ha Chanakyapuri, New Delhi, dei hangne kein ba ia ka nam bad burom jong kine ki reiwshlur ba la kyllon bad pha ia la ka jingim ban pyllait ia ngi na ki tyrsim jong ki nongshun kiba ialeh pyrshah ia ka ri da kaba pyrshang ban pynthud ia ka shong suk shong sain ha ka ri. Dei ha kane ka nongrim jong u bud lum jong ka ri ba ngi kynmaw kum ha kane ka sngi ia kine ki riewshlur kynthei bad shynrang.

Naduh ba ioh ia ka jylla jong ngi ha ka 21 tarik u kyllalyngkot 1972, ki riewshlur ba la shah pynkhmati ban bat ia kam shong suk ka shong sain ha ka jylla jong ngi, la don haduh 127 ngut kum ki riewshlur ba ka jylla ka la sakhi ba ki la pha ia la ka jingim ban iada ia ka jylla bad ka ri na ka jingwan lynshop jong ki bor ki bathmu ban pyntlor bad synjor ia ka im suk im sain kat kum kariti ka dustur ba la bynshet lyngba ka constitution jong ka ri India jong ngi. Dei lyngba jong kine kein ki riewshlur ka ri ba ngi lah ban ring mynsiem bad ban iaid pawing sawdong ka ri khlem jingshah teh kynjri.
Ha kum kane ka sngi ba ngi kynmaw tympang ia ki riewshlur jong ngi, ai ba ki khun kynthei-shynrang ka ri kin bsut ha ki ia ka mynsiem ieid ri da ka ba ki leit phai sha ka mynnor ki sngi ban ring ia ki nuksa jong ki riew shlur ka ri haba kin thang ka sharak jong ka jingieid ri shakiwei pat ki para ri ha ka jingim ba man la ka sngi, ban peit pyrman ia ka shong suk shong sain ka ri khnang ba ka lawei ka ri ka nnang khlain nang shait ban rat-dieng khong naduh ki phngiat ia ki nongshun ka ri, khnang ba ka ri kan im kan roi bad ka jingsuk-jingkmen kan synshar ha ngi.
Ka sorkar India lyngba ki tnat trei kam bapher-bapher jongka, ka lah ithuh ia bun kiba kum kine ki riewshlur ka ri da ka ba pynkup burom ia ki da ki khusnam bap her bap her kum ka dak ka jingithuh ia u synniang u bynhei bad kita ki long kum ka Ashoka Chakra, Ka Kirti Chakra, ka Police Medal for Gallantry, Ka Meghalaya Governors’ Medal bad bun kiwei pat ki kynja khusnam ban kynmaw pyrto ia ki kam bad kyrteng jong ki.
Ha ka“Police Martyrs’Day” lane “Police Commemoration Day”, to ngin ia ai burom bad pyrto ia ka nam jong kine ki riewshlur jong ka Ri bad ka Jylla jong ngi, namar ba ki lah pha ia la ka jingim na ka bynta ka shong suk shong sain ha la ka Ri.
“Im ka Kyrteng sah ka nam”

Dy. Inspector General of Police (A),
Meghalaya, Shillong.

Shillong: Ka tnat Meteorological Department jong ka sorkar India, ka maham ba ha ki 24 kynta ban wan, ka mariang ha Shillong, kan long kaba dum lyoh bad kan don ka jinghap slap bad ka jingtied pyrthat ruh.

La maham ruh ba ha kiwei ki bynta jong ka Jylla, kan don ka jingmeh leilieh bad ka jingtied pyrthat.

Ka suin bneng ha ki 24 kynta ba ladep, ha Shillong, ka long 22.4 kaba shit duh bad 13.9 kaba khriat duh bad ka don ka jinghap slap bniop bniop. Ha Sohra ka long 24.7 la 17.0 bad u slap u long 0.0 mm, katba ha Umiam ka long 27.9 lane 17.6 bad ka jinghap slap ka long 2.6 mm.

Shillong: Mynta ka sngi, ka Khasi Students’ Union (KSU) Narpuh Circle hapoh ka jingialam u bah KS Suchiang President, u S. Bamon General Secretary, ha ryngkat ki trai khyndew ba na Huroi kiba shah ktah bad shah pynjulor ki jingthung ha ka jingpyntrei ia u surok bad Indo Bangla Border Fencing da ka National Border Construction Company (NBCC), ki la ia kynduh ia U Deputy Commissioner, East Jaintia hills, ha kaba ki la iakren halor ka jingkyntait katei ka company ban siew ia ka bai luksan (Compensation)sha kitei ki trai jaka ba julor ki jingthung jingtep ha ka jingpyntrei ia katei ka project.

Haba ia kynduh mynta ka sngi, u DC u la ong ba ia kitei ki jaka ba julor la dep ban siew sha ki trai jaka naduh u snem 2012 bad ia katei ka jingsiew jingtda la leh da ka ophis u DC West Jaińtia naduh katei ka por, kito ki jaka ba hap hapoh Lahaleiñ.

Haba kylli pat kine ki trai jaka ba dawa na ka por sha ka por ia ka hok kim pat ioh satia ka jingsiew wat shi anna ruh, u DC u la ong ba katkum ka jingtip ha ka jingiadei bad katei ka jingsiew la dep pynbna (Notification) shwa ban siew, u ong ruh ioh lehse ba la shim kiba ha ing ha sem jongki. U ong ruh ba katei ka company kam lah ban siew arsien ia ka juh ka jaka, kumta kim donhok ban pynthut ne pynsangeh ia ka jingtrei bad u ong ruh ba lada ki leh kumta yn phah shipai ban pynshitom ia ki. Ki trai khyndew pat ki la ong ba kim tip shaei ka company bad ka ophis u DC ka siew ia katei ka pisa.

Ha kajuh ka por ka seng ka la ai ha u DC ia ka kopi, ba la thoh sha u Member Secretary Meghalaya State Pollution Board halor ka jingpyrshah ka seng ia ka jingpan jingbit ka Star Cement Ltd ban pyniar (Expand) ia ka jingkhlong mawshun ha Brichyrnot. Haba pynpaw ia ka jingpyrshah, u DC u la ong ka jingpynsngew paidbah kan iaid beit kumba la dep pynbna, hynrei ka shong ha u paidbah ka rai la ki kyrshan ne kyntait.

Haba pynpaw ia ka jingpyrshah, ka seng ka ong, ba kim pyrshah ia ka roi ka par ne kata ka development, hynrei namar ki shem ba katei ka jaka ban khlong mawshun kaba heh haduh 42.051 hectare ha Brichyrnot ka don marjan bad ka Wah Lukha bad Wah Lunar bad ki ong ba kaei ka ban jia ia kitei ki wah lada ioh lad katei ka company ban tih mawshun. Haba ia kren ia kane, u DC u la kubur da kaba ong ba ka mariang shisha ka la jot sha kito ki thaiñ bad u la ong ruh ha ka jingshisha ka Brichyrnot kam dei ban ai jingbit haba pan katei ka company. U DC u la ong ruh ba ka kam jong ka ophis jong u ka long tang ban pyniaid (Conduct) ia ka jingialang pynsngew paidbah (Public Hearing). Ha katei ka jingiakynduh ia u DC, la iadon lang ki dkhot KSU JHDU, u bah C. Suja GS bad u bah Shaniahskhem Dkhar Asst. Fin. Secy KSU JHDU.

Shillong: La iathuh ba la pyndep ia ka autopsy, ia ka met iap jong U Archbishop Dominic Jala bad lyngba ka jing pyndep ia katei ka autopsy, la khmih lynti, ba yn lah ban wan rah noh mar mar ia ka met jongu sha Shillong.

Ia ka met jong U Archbishop, la kynriah ia ka jaka buh met iap ha ha Mc Nary Moore Funeral Home kaba don ha Colusa Country Coroner bad ki bor pyniaid jong ka Indian Consulate ha San Francisco, ki dang pynbeit lut nadong shadong, na ka bynta ban kit ia ka met sha Shillong, katba kum ka jingtip, ba la sam da U Phadar Michael Makri, Director (operations) ka Don Bosco Media Network, Shillong mynta ka sngi.

Ha kawei pat ka khubor, la iathuh ba U Phadar Richard M Majaw, Secretary, ka Shillong Archidocesan Education Society, ka la thoh sha U Director School Education and Literacy, jong ka sorkar Jylla, ha kaba la iathuh ba ha ka sngi tep ia U Archbishop, ki skul Katholik ha East Khasi Hills bad Ri Bhoi District kin khan glut na ka bynta shisngi.
La iathuh shuh shuh ba U Ma Vincent H Pala, MP jong ka Shillong, u don mynta ha America, ban iarap lang na ka bynta ban wan rah noh ia ka met jong U Bishop sha Shillong.
Haba iakren bad ki katto katne ki lad pathai khubor, U Ma Pala, u iathuh ba mar ia ioh ia ka met iap, kin aiti sha ka kompeni kaba leh ia katei ka kam bad katei kan bah khlieh ban pynpoi beit ia ka met na California sha Guwahati, ha ka Sngi Hat Majai ne Sngi Balang bad ba ka met kan mih ha ka sngi saitjain na America.

Shillong:Mynta ka sngi u EM Incharge jong ka tnad Trade u bah Paul Lyngdoh u la pynshai ia ka jing pynmih ia ka jing pynbna paidbah ka ba la mih ha ka 4 tarik u Risaw 2019 lyngba ka tnad jong ka trade ha kaba ka la buh ia ki kyndon pyntrei ka ia ka rukom khaii pateng ka ba ia dei ha ka die madan (street hawking).

Na ka liang u bah Paul u la maham ruh ia ki trai jylla, kiba ju kam ne kiba ju leh benami ia ki dukan jong ki bar jylla da kaba ong “Kita ki la ki tih liewlep lupa ia lade, namar mynta ka kynti na ka liang ka Council, ki la pynkhreh bha ban tehlakam ia kum ki ne ki briew namar ngi don la ka jong ka ain ban pyntikna bha ban teh ban khum ia ki trai shnong ki ba shah pyndon kam ha kine ki bar jylla ban wanrah da ki khasi ban phah shong ne ban phah leh benami ia ki khaiii pateng jong ki. Ngin trei ha kata ka rukom ba shisien ba ngi la lah ban weng ia ki kin ym don kino kino kiwei pat ki ban lah buh ia kiwei ki wei ki briew ki ban phah shong ne ban phah leh benami”.

Na ka liang u bah Paul Lyngdoh ha ba ia kren bad ki nong pathai khubor ha ophis trei kam jong u ha KHADC u la ong “Ngi ladep ban pule bha ia ki act 1954 bad act 1959 ia kaba ngi la pynbha shuh shuh, ngi lap ba kane ka dei kawei ka jingkhaii ka ba ym shym la don nongpeit ne pynjari ne pyntrei kam ia ki ain ha ki nongkhaii ha madan dei na kane ka daw ba ki bar jylla (non tribal) ki la nang shim kabu ha ka ba ki la tur sha ki jaka jong ki paid bah ha ki jaka iaid kjat, ki kyndong kynshrot jong ki surok, bad ha ki jaka iaid ki paidbah.
U la ong ruh ba la lap ba kane ka dei kawei na ki jait jingkhaii, kaba ki dei ban ioh ia ka lisen lyngba ka tnad trade, hynrei ka jing bym trei kam jong ka ain ha kine ki snem ba la dep ka la wanrah ia ka jing ioh lad jong ki bar jylla ban khaii laitlan ha kaba ka la buh ia ki jingeh ia ki paidbah ha ka jing ia dei ha ka jingshngain, ha ka iaid ka ieng, ha kaba ki briew kim don jaka shuh wat ban iaid ban ieng ha ki lynti. Ka wan rah jingma ruh ia ka koit ka khia ha ka ba ki la shu die madan ia ki jingbam ha ka rukom bym ikhuid suba.
“Haba ngi iohi ba la don ka ain ba ki dei ban ioh ia ka lisen na ka council, hynrei ha ka jing bymtrei kam ia kata ka ain ka long noh shiliang bad ka pynkhia noh ia ki jing kit tang ia kito ki ba don dukan kiba ha ka ba ki hap pan ia ki laisen ki hap ban pynthymmai ia ki laisen man u bnai bad ki hap wanrah ia ka bai siew wai ha ki trai dukan, ki hap wan rah ia ki NOC na ki shnong kat ba kane kawei pat ka kynhun jong ki nongshongdie madan ki trei kam khlem da bud ia ki no kino ki kyndon ain jong ka KHADC bad kane ka wan rah ia kajing jyllei u bar jylla u ba die madan ha duh ba la poi ka pud ba ki lynti iaid paidbah ki ladap da ki briew ba die madan ha ba ka ain ka don kam dei ban don tang ha ki kot sada.Kane ka jingthmu ngi la pynmih ia kane ka jing pynbna paidbah (notice)”u la bynrap
Halor ka jingdon jong ki 7 ngut ki trai shnong ki ba la leit ban ujor pyrshah ia kane ka jing pynbna paidbah ba la pynmih da ka tnad Trade jong ka KHADC ha ka High Court jong ka jylla Meghalaya u bah Paul u la iathuh ban a ka liang ka High Court Meghalaya ka la ai ia ka jingbishar ka ba bha “Ha ka ba ka la la kylli kylla ia kine ki briew ba ha kano ka rukom phi wan sha kane ka court ha ba kane ka jingbthah kam ktah eiei ia phi bad phi pyllut por kai ia ka por jong ka court ha ka ba phi wan rah ia ka mat ka bym don jing mut eiei bad ka ne ka order ka la dain kuna ruh mar 5000 tyngka uwei uwei”.
“Na ka liang ka tnad Trade ngi la dep pynmih ia ki jingpynbna paidbah phim dei ban ong ba ngim tip kam dei shuh ka daw ba ka council ka khlem ai lad ban pynbiang ia ki kot ki sla bad ka council ka la shu niom ia ki jaka khaii jong ngi ngi la pynmih ia ki jingpynbna paidbah” u la ong .
“Ka kamram jong ka council mynta ngi la dep ia ka kam ba nyngkong ha ka ba ai ia ka jing pynbna paidbah (public notice), ka ba ar ka dei ban kine ki bar jylla (nontribal) ki ba die jingdie ha madan ha ki lynti ki dei ban burom ia ka jing pynbna (notice) jong ngi bad ban pan (apply) lyngba ki lynti jong ka ain ia ki lisen jong ki bad ka rai ka ba khadduh ka dei hi jong ka district council hadien ba ka ladep ban bishar bniah ia ki kot ki sla jong ki, la ki biang ne em ban ioh laisen bad kino ki no ki ba iaid lait ia kane ka ain ngi la pynkhreh ba kin kynduh ia ki jing pynsaja ki dei ban siew kuna lane ki ki don ki lynti jong ka ain ki ban khang pyrshah ia kine ki rukom khaii ki ban isaitmet ha ka por mynta.

Shillong: Ka “Select Committee” hapoh ka jingpyniaid jong u myntri rangbah u Conrad K Sangma, kum u Chairman mynta ka sngi ki la khot ia ka jingialang ban ia kren halor ka jingthung ia ki dkhot jong ka “Search Committee” ban jied ia ki dkhot jong ka Lokayokta.

U Myntri rangbah ka jylla U Conrad k Sangma haba kren ha ki lad pathai khubor ha dien ka jingialang, u iathuh ba mynta ka sngi la thaw ia ka “Search Committee” ha kaba la jied hynriew ngut ki dkhot ba kin wad ia ki briew bad ai jingmut sha ka sorkar ban thung ia ki kum ki dkhot jong ka Lokayata.

Na ka liang jong u myntri rangbah um shym la iathuh katno por la ai lad ai kane ka “Search Committee” ba kan phah ia ki kyrteng sha ka sorkar na ka bynta ban thung ia ki dkhot, hynrei u la iathuh ba kane kam dei ka kam kaba suk, namar hap ban peit iaki briew kiba dei na ka iing bishar.
Ka sorkar ka la dep ban wan rah ia ka jingpynkylla ha ka Lokyaokta ha kaba ka sorkar ka la thung ia u Chairman ha ka snem kaba la dep bad kane kala lah ban trei kam, hynrei mynta ka la thaw ia “Search Committee” ban thung ia ki dkhot hapoh jong ka Lokayokta.
Na ka liang jong u nongialam ka liang pyrshah, u Dr Mukul Sangma u la iathuh ba ha kane ka jingialang kaba la long mynta ka sngi, u la ong ba balei ka sorkar ka la pynslem haduh shisnem ban thung ia ki dkhot jong ka Lokaykota.
La iathuh ba ia ka Lokakya Act ha u snem 2014 bad katkum kane ka ain, ka long ban peit ia ki jingshah kynnoh bamsap wat ia ka ophis jong u mytnri rangbah ka jylla bad kiwei kiwei, kumba la paw ha ki lad pathai khubor halor ka jingkynnoh bamsap kaba la sdang tohkit ha GHADC ruh kumjuh.

Shillong: U myntri rangbah ka jylla u Conrad K Sangma ha ba iakren bad ki lad pathai khubor halor ki jingdawa ia ka Inner Line Permit (ILP) mynta ka sngi u la iathuh ba ka kamram ka ba hakhmat eh jong ka sorkar ka long ban iada ia ki trai Jylla, kane ka dei ka kam kaba ha khmat eh jong ka sorkar.

Na ka liang jong u myntri rangbah u la ong “Ka ILP ka dei tang kawei na ki bynta jong ka ain, hynrei ki don bun kiwei ki lad ki lynti kumno ban iada ia ki trai jylla,Ka sorkar kan iada ia la ki jong ki briew, ka sorkar ka long kaba la kloi ban ia kren bad ia mir jingmut halor kane ka bynta bad ha dien ka jingiamir jingmut ka sorkar kan shim ia ka rai ia mynta ym lah ban ong lano hynrei ha dien ba la kut ka ilekshon shiteng samoi bad ka jinglehniam Diwali kin sa ia kren bha ia kane ka bynta.”

U myntri rangbah u la ong ruh ba ka sorkar mynshuwa, ka la shim ia kawei na ki lad ban iada da kaba wanrah ia ka Meghalaya Residence Safety and Security Act, kane ruh ka long kawei na ki lad ki ba ka sorkar ka la shim, ka jingiamir jingmut ha kaba ia dei bad kane ka bynta ka dang bteng da kaba ia kren ruh bad baroh ki seng sain pyrthei kiba don ha ka jylla.

Shillong: Ka Meghalaya kala shah rem da hynriew wicket ha ka Chandigarh ha ka jingiakhun kaba khyndai bad kaba kut artad ka Vijay Hazare Trophy ka plate group myn hynnin ka sngi ha Dehra Dun.

Ka Chandigarh kaba jop ia ka kynting pisa, kala ap ktem da kaba ailad shwa ia ka Meghalaya kaba la lah ban tied tang 184/8 ha ka 50 overs.
Ki nongialehkai ka Meghalaya u Swarajeet Das (9) bad u Wallam Lyngdoh Kynshi ki kamai 45 run ha ka wicket ba nyngkong ha kaba u Kynshi bad u Amiangshu Sen kila hap noh ha ka 27 run bad u Punit Bisht (6) bad Ravi Teja (21). U Sanjay Yadav u kamai 61 run na ki 63 ball.

Shillong: Ka second semi final kaba la long hapdeng ka Mookbu sc pyrshah ia ka Kyortyrkhang sc ha mini stadium Khliehtyrshi ka long kaba ia jwat hi thoi namar baroh arliang kitei ki kynhun ki long kiba khlain bad biang bor.

Ha ka kylla step ka jingialehkai ym don satia ba ioh ban pynkhih jar, kawei ruh ka dei namar ka jingbom palat u slap kaba la pynlong ia ka madan ban dap um. Kumta haduh ba kut ka kylla step ka jingialeh ka long 0 la 0.

Hynrei mar ia sdang ka kylla miet pat tang kumba katto kattne por ka Mookbu ka la khyrniom tyngeh ia ka Kyortyrkhang bad pynsma bun tylli ki ball. Bad dei ha ka minit kaba 70 da ka jingbat ka um ia ka bol ka Mookbu khlem pynsepei u Shem War u la pyndei tiak bad ka bol ka la rung shapoh jar.
Wat la ka jing ialeh kaba mar ia khyrwit phewse ka jingpyrshang ka Kyortyrkhang kam lah ban sei soh. Kumta lyngba katei ka shi kol na u Shem ka Mookbu ka la biang pura ban ia ai reng sha ka final pyrshah ia ka Nongkhroh kfc kaba la ap lupa ban iakhun ha ka 23 tarik mynta u bnai ha ka por 1baje nohphai sngi.

Shillong: Ka kur Wahlang ka la pynlong ia ka Dorbar Bah kaba XIII jong ka ha District Library, Nongpoh, Ri-Bhoi District.

Ha kane ka dorbar baroh ki kur kiba najan bad kiba najngai ki la ia wan ban ia shim bynta ha kane ka dorbar kaba shisien shisnem, ha kaba ia ka Dorbar la pyniaid da U Rev. H.F. Wahlang bad kumjuh u la pdiang burom ia ki Kur kiba la pyllait por ban wan shane kane ka Dorbar.

Na ka liang jong ka Seng Kur, ka la don ruh ka jingpynsngew ia ki jingtrei kam jong ka haba kaba bun ki mat lyngba ka snem 1918-19 bad kumjuh ia ka report na U Treasurer, Education Secretary bad na U General Secretary jong ka Seng Kur halor ki mat treikam.Ha kane ka sngi la ioh ia ka jingkren na u President jong ka Seng kur, u Rangbah R.O. Wahlang, IFS(Rtd) bad u la sneng la kraw ia ki para Kur kiba poi sha kane ka jingialang.Ka la don ruh ka jingai khusnam ia ki samla na ka kur kiba la pass bha ha ki exams ha une u snem.

Na ka liang jong ka Dorbar Kur Wahlang ka la pynmih katto katne ki rai jong ka Dorbar bad kita ki long ba ka Kur Wahlang ka kyrshan ia ka jinglong kawei jong ka Kur bad ka jaitbynriew Hynniewtrep-Hynniewskum bad kam kyrshan ia ki jingpyrshang ban wanrah ia ka jingsngewpher halor ka jingngeit bad jingmane Blei, ka shongkha shongman, ne ha ki jaka shong, ne ha ka rukom kren ia ka ktien Khasi.Ka kyrshan ia ki jingpyrshang ban pynriewspah ia ka ktien Khasi, bad ban pynioh ia ka jingithuh hapoh ka Riti Synshar jong ka Ri.Ka kyrshan ia ka jingpynneh pynsah ia ki riti ki dustur jong ka jaitbynriew, khamtam eh ia ka TIP KUR, TIP KHA, kaba long ka thymmei jong ka jaitbynriew.
Ka Seng Kur Wahlang ka pynsngew ha ki bor synshar-khaddar ba ki dei ban bud ia ki riti-dustur Khasi bad ban don ka jingiaphylliew jingmut shuwa ban shim ia kino kino ki rai, ne thaw ia ki ain ki ban ktah bad pynkylla ia ki riti-dustur kiba ju don ha ka jaitbynriew naduh mynhyndai.Ka Kur Wahlang ka pyrshah ia kino kino ki jingpynkylla ia kane ka thymmei shim jait/khein jait na ka kmie kiba lah ban mih namar ka jingkylla niam ne jingpdiang ia kita kiba ka ain ka kdew kum ka “Personal Law”.Ka kyrshan ruh ia ka jingpyrshang ban buh beit buh ryntih ia ki rit-dustur da ki jingthoh jingtar bad da ka Ain, kat kum ka jingdawa ka por. Ka la pynpaw ruh ia ka jingsngewkhia halor ka jinglong jong ka imlang-sahlang jong kane ka juk mynta, ha kaba ki jingsniew ba har rukom ki jur bha ha kine ki sngi.Namarkata ka kyntu ia ki para samla ba kin kiar na ki jingsniew kiba ap ban pynthohbria ia ka longrynieng bad ka khot ban pynshlur ia ki samla ban kiar hordit hordang na ki jingsniew bad ban iabeh shaphrang ban long ki nongjop ha ka pule ka dangle ban pynkhraw ialade ia ka Kur bad ia ka jaitbynriew.Kumjuh ruh ka la pynpaw ia ka jingdiaw bad jingsngewkhia halor ka jingwan rung kyrthep ki bar jylla sha ka ri baieid jong ngi.