Ka NSCN (IM) ka ther tyngeh ba ka sorkar India, ka pyrshang mynta ban phai dien noh na ka jingiakren kaba mynshwa lane ban pyn kyllain halor ka jing ia kren kaba la iaid la arphew ar sem kynthih khnang ban kiar na ka soskular kaba dei ban ia mynjur bad ki jaitbynriew Naga.

“Ka long kaba lyngngoh ba ka sorkar India, ka sdang ban kyndat noh ia ka jingkren, da kaba wan rah ia ki katto katne ki briew, ki bym dei satia kiba bit ban iakren halor ki mat jong ki jaitbynriw Naga” ong katei ka seng, ha ka khubor mynta ka sngi.

Katei ka seng, ka ong ba kano kano ka rai kaba shet kylla ia ka jingmut jong ki Naga, kam dei ka jingbakla, ka bym iapher, na kaba la ju long mynshwa.

“Ngi sngew thikna ba kan dei ka jingduh kaba khraw ia ki paidbah, lada ngi duh ia kane ka kabu kaba mynta. Hynrei ngi sngewthuh ba ka jingshisha kan nym iap satia bad ym don bor ha ka pyrthei, kaba lah ban pynduh ia ka” ong shuh ka khubor.

La ong shuh shuh ba ka dei ha ka 11tarik Naitung 2002, ba ka sorkar India, ka ithuh ba ki Naga, kim pat ju don bynta satia bad ka India lane bad ka Burma, lada ka dei lyngba ka jingialeh thma lane da ka jing mynjur jong ki Naga, ong shuh ka kyrwoh.

New Delhi: U Ravi Shankar Prasad, myntri ka sorkar India, mynta ka sngi, ula pyni ia ki jingshisha ba kam don satia ka jinghiar ka ioh ka kot ha ka Ri India, kumba la don ba iakren bad ia katei u pyni nuksa, da kaba ki lai tylli ki phlim, kiba la pynmih ha ka 2tarik Risaw 2019, ki iaid iew haduh T.120klur ha ka shisngi.

Haba kren sha ki kotkhubor ha Mumbai mynta ka sngi, u myntri ka tnat Law and Justice, u ong ba ka ioh ka kot ka biang bha ka Ri, ha kaba ki lai tylli ki phlim kiba la pynmih ha ka 2tarik Risaw, ki ioh kamai sha ka T.120klur.

“Ha ka 2tarik Risaw, ki la mih lai tylli ki phlim. U nongkhein jingkhein shaphang ki phlim U Komal Nahta u ong ba ka jing kamai jong kitei ki phlim ka poi sha ka T.120klur. Ka ioh ka kot jong ka Ri, ka biang bha bad dei na katei ka daw ba ka don ka jing ioh kamai jong ki phlim sha ka T.120 klur ha ka shi sngi” ong U Prasad.

U kynnoh ba ki don ki briew kiba la pynkhreh lypa ban shu kren pyrshah beit ia ka sorkar India, ban ialam bakla bad ban pyni ia ka duh kam duhjam.

Balei ngi donkam ban thung dieng?

Bun naphi phim tip hynrei ka dei ka jing shisha ba ki jingthung jingtep kidei ki jingthaw ba nyngkong eh hakane ka pyrthei. Haba ong thung dieng kamut ban pynneh pynsah iaka mariang bad iaka pyrthei baroh kawei. Ban thung dieng kadei ka lynti kaba bha tam eh ban iada iaki sawdong sawkun jongka pyrthei.

Ki dieng ki iarap ban pynmih iaka lyer khuid ban ring mynsiem , ki kjit iaka lyer ba jaboh, ki ai jaka rieh iaki mrad khlaw bad ki pynkhuid ruh iaki um bangi dih. Ki ring ne tan noh iaki lyer jakhlia bad ki pynmih pat iaka lyer khuid. Katba ki lyer jakhlia kiba ngi pynmih ki nangkiew, ka jing donkam iaki dieng ruh ka nangkiew.

Naduh ba sdang, ki dieng ki siej ki pyndap pynbiang iaki jing donkam jongphi baroh kum ki jingbam jingdih, ka lyer khuid, ka iing ka sem ne ki jaka rieh, ki dawai lem bad kiwei kiwei de. Khamtam mynta ki por ka jingniewkor iaki dieng kala nangkiew namar kham bun ki jingmyntoi baphi ioh naki dieng lashem katkum ka jing pyndonkam iaki ban pyndap pynbiang iaki jing donkam khamtam haka juk mynta.

Ki diengbah ki lah ban kjit lut iaki lyer jakhlia, phim lah ban iohi hynrei ki sah haki dieng bad haba don ka jingpom pathar iaki dieng, ymdei tang ba phi pynjot iaka mariang ne phi pynthut iaka jingiaid ryntih ki lyer jakhlia sha ki dieng hynrei phi pyllait ruh iaki lyer jakhlia kiba la lumlang haki dieng ki siej.

Kane ka jingthoh harum ka thew shai balei phi dei ban thung iaki dieng ki siej bad ki jingmyntoi baphi ioh nakaba thung dieng:—

• Ban ioh iaka lyer khuid —– Ban ioh iaka lyer kaba khuid ka jingthung iaki dieng kalong kaba kongsan haduh katta katta. Lyngba ki sla bad ki snep ki tan ne ring iaki lyer jaboh kiba ktah iaka koit ka khiah bad pynmih iaka lyer khuid ban ring mynsiem.
• Haki sawdong sawkun jong ki jaka sor, ki dieng ki kjit iaki lyer jakhlia kum ki nitrogen oxide, ozone, carbon dioxide bad carbon monoxide bad ruh ki pynduh iaki phngit kiba rit kum ki pui pui bad ki tdem. Ka jingkiew ka lyer jaboh naka jingpom pathar iaki dieng bad ka jing kylla diengiap jong ki dieng kiba lah ban meh dieng ne thang, lah ban ngat haka jingkhluit jong kiei kiei kiba don sawdong jongphi. Hynrei ki dieng kaba khlain bad im ki iarap ban tan ne ring iaki jaboh, ki kjit iaki lyer jakhlia bad pynduna naka jingshah ktah jong ka suinbneng.
• [yn dang bteng]

Halor ka jingiap jong U Archbishop Dominic Jala, ka khubor jong ka The Week, kaba na Kerala, ka iathuh ba U Father Mawthew Vellankal, u dei u lyngdoh niam, uba na Kerala bad uba trei ha America bad U Father Vellankal, ula iap lang bad U Archbishop, ha katei ka jing tyngkhuh kali kaba sniewbok ha California, ha ka Sngi Palei (kat kum ka por jong katei ka Ri). La iathuh ba uba lai, u dei U Father Joseph Parekkatt, uba la mynsaw ha katei ka jingjia.

La iathuh shuh shuh da katei ka khubor, ba U Archbishp Dominic Jala bad U Father Mathew Vellankal, ki ia leit sha Clearlake ha California ha kaba kawei ka kali Toyota Prius, kaba ki shong ka ia tyngkhuh bad ka semi truck ha Colussa County.

Ha ka jingthoh ha ka Facebook, ki pulit ka California Highway Patrol, ki iathuh ba katei ka kali Toyota Prius, ka lah ban bakla, namar ba kam shym la ieng ha ka por ba pynieng kali. La iathuh ba U Archbishop Jala bad U Vellankal, ki shong uwei uba niah bad sa uwei pat uba shong ha khmat bad ym shym la tip satia, mano ba niah ia ka kali.

U Father Vellankal, u dei u nong peit jong ka St Isidore Parish ha California naduh u snem 2016. U Vellankal u dei uba na Kerala bad ula long lyngdoh niam naduh u snem 1987.

Kawei pat ka khubor online jong ka CBS Broadcasting, kaba thoh na Oakland, ka iathuh ba katei ka jingjia ka dei ha ka por 2.30 nohsngi ha ka por jong katei ka Ri, ha kaba ka Toyota Prius, ka la ia tyngkhuh bad ka Tractor Trailer Truck. Kane harum, ka dei ka jingthoh ha ka facebook na ki pulit ha Oakland.

app-facebook
CHP – Williams
on Friday
On 10/10/19, at 2:20 PM, the driver of a Toyota Prius traveling westbound on SR-16 failed to yield to traffic at SR-20. The driver of the Prius pulled out from the stop sign directly in front of a tractor/trailer and as a result the Prius was broadsided. The driver and right front passenger of the Prius were killed and their rear passenger sustained major injuries.
The CHP would like to remind drivers that driving is a complex task, requiring a motorist’s full attention. Pay attention to other vehicles around and the changing road conditions. Always drive defensively!

Ka jinghiar thma jong ka Turkey sha Syria, ka la pynlong ia ki 2lak ngut ki nongshong shnong, ba kin phet noh ialade na la ki iing ki sem jongki bad nangta sa 74ngut ki shipai Kurds, ba kin shah pyniap lem bad 30ngut ki riew paidbah, ong ka khubor jong ka Syrian Observatory for Human Rights.

U myntri iada ri jong ka Turkey, u iathuh ba ia ki bynta jong ka Ras al-Ain, kaba dei ka jaka sah jong ki riew paidbah, la dep shimti hapoh ka jing pyniaid jong katei ka ri, lyngba ka jinghiar thma, ha ki jaka kiba don ha rud jong ka wah Euphrates, ha kaba ka Turkey, ka la hiar thma naduh ka Sngi Balang.

Shillong: Ka Meghalaya SSA School Association (MSSASA) East Khasi Hills District Unit, lyngba ka kyrwoh khubor bala phah da i babu A. Kharbangar General Secretary ka pyntip ba ka jingialang jong ki nonghikai SSA kiba hap hapoh u pud u sam jong ka East Khasi Hills District kan long ha ka 19 tarik u Risaw hapoh Riatsamthiah Community Hall, Shillong kaba don hajan Christian Academy Higher Secondary School, Shillong ha ka por 11 baje mynstep.

Ha katei ka jingialang yn sa iadonlang ruh ki nongialam jong ka Central Body naduh u President babu Aristotle C Rymbai bad u General Secretary babu Ralbingland L Nonglait ban ai jingpynshai halor ki mat jingdawa jong ka Seng kiba kynthup ia ka shithi ba la ioh na u State Project Director, SEMAM (SSA) halor ka jingdawa ban pynkynriah noh ia baroh Ki nonghikai SSA hapoh ka Jylla kiba don 12541 ngut kynthup ia ki nonghikai Lower Primary bad Upper Primary napoh State Implementation Society shapoh Education Department katkum ka jingpruid dak jong ka RTE – SSA norms 2009, ka shithi bala ioh na u State Project Director SEMAM-SSA bad MHRD, Govt of India halor ka Arrear kaba dang sah jong u snem mang tyngka 2016-17, ka shithi ba la ioh na MBOSE halor ka improvement exams Class 12 na ka bynta ki nonghikai kiba la don lypa ha ka kam, ki kam kiba iadei bad ki kynrum kynram jong ka Result D. El.Ed jong ka 1st Batch (2013-15) bad 2nd batch (2015-17) bad kiwei kiwei de ki mat jingdawa kiba ka Seng kala buh ha khmat ka Sorkar.

Halor ka shithi (email) pan jingshai kaba 23 tarik September 2019 na ka Federation of Khasi States, u nongialam United Democratic Party u Bah Paul Lyngdoh, Working President, United Democratic Party (UDP), haba jubap bad pynshai lyngba ka shithi email kaba 24 tarik September 2019, u la pynshai sha ka FKS ba ki jingmih khubor ka jingkynthoh na uwei na ki nongialam UDP dang shen halor ka Instrument of Accession bad ka Annexed Agreement kaba la soi bad mynjur da u Governor General of India, Shri. C Rajagopalachari, Sorkar India bad ka synjuk Federation of Khasi States ha 17 tarik August 1948 ka dei ka jingpynsngew shimet bad kam dei ka rai ne ka jingsngew jong ka seng UDP.

Shuh shuh kum ka jingbuddien ka Federation of Khasi States lyngba ka shithi (email) kaba 26 tarik September 2019, ka la ai khublei ia ka jingioh ia ka jingpynshai ba la ioh na u Bah Paul Lyngdoh, Working President, United Democratic Party, bad lyngba kane ka shithi ka Federation of Khasi States ka la pynsngew ba dei ban don ka jingiakynduh bad ka jingiakren ha kaba baroh ki TRAI KAM (stakeholders – ki MLA, MDC, FKS bad ki Khlieh Nongsynshar) ki dei ban ia don lang ha ka miej ia kren ban ia pyrkhat lang halor kane ka kam kaba khia.

La pynsngew ruh ba kan long kaba iarap lada ka UDP kan tyrwa sha ka Sorkar Jylla ba kan thung ia ka Committee kyrpang ka ban kynthup ia baroh ki TRAI KAM (stakeholders) ha kaba yn don lang baroh ki seng sain pyrthei (all party) ha kaba ngin lah ban ia pynbeit ban thaw ka ain ka Assembly ne Council ka ban ithuh ia ki jingsynshar tynrai naduh (governance structure) naduh Dorbar Shnong, Dorbar Raid haduh Dorbar Hima ia ka ba baroh ngi sngewthuh ka long kaba donkam palat khnang ban ioh kawei ka jingmut kumno ban ioh iakren bad ka Sorkar India ban pyntreikam ia ki jingiateh bad ki jingiakut katkum ki kyndon IOA & AA.

Ha ki jingpynshai kiba bud u Bah BM Lanong, MDC, u la pynshai ba ki Syiem, Sirdar, Lyngdoh, Wahadar, ki don ia ka Executive, Legislative and Judicial authority bad u la kubur ruh ba ki khlem soi ia ka INSTRUMENT OF MERGER (Ki dulir pynwai pyndam hima) hynrei ha ka juh ka por kine ki jingsynshar bad kitei ki jingiateh ki jingkular haduh kine ki sngi KIM paw ha kaba shai hapoh ka Sixth Schedule lane Constitution Ri India haduh kine ki sngi, wat ki Act ki Rule jong kiba bun ki Hima /Elaka ki dang sah kut mynta la palat 70 snem tang katto katne tylli ki Hima ki don ILP bad kita ki kyndon ILP ruh kim long kiba don bniat lane kiba shai. Ngim lah ban klet ba kiba bun ki Rangbah Shnong /Sordar Shnong ki la shah kem bad shah set ha along. Ngi kynmaw ba u Bah Robert Kharshiing, Rangbah Shnong bad MP barim u shah kem namar ba pyntreikam ia ka rai ka Dorbar Shnong ha u September 1983, hapoh ki kyndon National Security Act(NSA), u Sordar Wahkhen, u shah set halor ka The Contempt of Courts Act 1971, bad ki bun kiwei kiwei ki ba ngat ha ki jingshah kem khlem tip ia ki ain Ri India bad namar ki Ain India kim ithuh ia ki Dorbar Synshar tynrai, ngin hap ban pynkynmaw ba ka Hukum jong ka iing bishar ba donburom ka Meghalaya High Court dang ioh tang ka Stay Order na ka iing Bishar kaba ha khlieh duh ka Supreme Court dei tang ka jingpynsangeh shipor.

Shuh shuh la pynsngew sha u Bah Paul Lyngdoh, MDC, Working President, UDP, ba ka Federation of Khasi States katkum ka ki kyndon IOA & AA ki la thaw ia ka legislative Assembly ka ( Khasi States Constitution Making Dorbar) kaba kynthup 25 ki Khlieh Hima (16 ngut ki Syiem (Khyrim State, Mylliem State, Nongkhlaw State, Cherra State, Nongstoin State, Maharam State, Nongspung State, Langrin State, Mawsynram State, Myriaw State, Rambrai State, Mawiang State, Bhowal State, Malaisohmat State, Nobosohphoh State bad Jirang State) 3 ngut ki Lyngdoh (Sohiong State, Mawphlang State, bad Lyngiong State) uwei u Wahadar (Shella State), 5 ngut ki Sirdar (Mawlong State, Mawdon State, Dwara Nongtyrnem State, Nonglwai State, bad Pansanngut State) ki nongmihkhmat ba jied da ki khun ki hajar jong ki Khasi States 12 ngut Khyrim State, 11 ngut Mylliem State, 4 ngut Maharam State, 4 ngut Nongkhlaw State, 3 ngut Nongstoin State, 3 ngut Cherra State, uwei na Nongspung, Langrin, ,Mawsynram, Myriaw, Rambrai, Mawiang, Bhowal, Malaisohmat, Nobosohphoh, Pamsanngut, Jirang, Sohiong, Mawphlang, Lyngiong, Shella, Mawlong, Mawdon, Dwara Nongtyrnem, bad Nonglwai, bad 8 ngut ki nongmihkhmat kiba shuh sieh (nominated) 4 ngut ki longkmie). Baroh lang katei ka Assembly ba nyngkong jong ki Khasi States ka la don 88 ngut ki dkhot. Katei ka Dorbar Thaw Ain ki Khasi States la plie ha ka 29 tarik July 1947 da u Lat (Governor) Assam ha Shillong. Hynrei kyndit ha u snem 1950 namar ba ka IOA & AA ka khlem paw dur hapoh ka Constitution Ri India katei ka Dorbar Thaw Ain ka sah teng ban ioh ia ka jingithuh da ka Sorkar India.

La pynsngew shuh shuh ha u Working President, UDP ba ki bor KHADC ki la mynjur ia lai tylli ki BILLS ha u snem 2006, 2016 bad 2018 ban thaw ia ka Council jong ki Nongsynshar naduh Shnong, Raid haduh Hima. Hynrei kitei baroh lai tylli ki bill la pynphai da ki bor Sorkar jylla da kaba ong ba hadien ba ka Sorkar ka la dep bishar bniah ia kitei ki bill la shem ba ka KHADC katkum ka Sixth Schedule kam shim don ka bor ban thaw bad mynjur kum kitei ki BILLS da kaba ong ba “the District Council does not have the legislative competence to pass such bills”.

Ha kaba iadei bad kane ka mat ka Federation of Khasi States ka pynsngew jur ba haba ka Sorkar Jylla ka pyntip sha ki bor KHADC ba kim don ia ka iktiar “Legislative Competence” ban thaw ia kum kitei ki BILL ki la dei ban khot jingialang ia ki TRAI KAM ka KHADC bad ia ka Federation of Khasi States ban ia kren ban ia shai mano pat ka bor kaba lah ban thaw ia ka council lane Assembly ki Khasi States, bad lada ka dei ka bor jong ka Sorkar Jylla ne ka Sorkar India ki la dei ban shim ia ka jingkitkhlieh ban pynbeit ia kitei ki jingeh ban pynlong ain ia ka Bill ka ban plie lad ia ki Nongsynshar Hima Khasi States ban ioh jaka lyngba ka Schedule kaba thymmai (Schedule Khadlai) lane ka jingpynbeit thymmai (Constitutional Amendment) ia ka Riti Synshar India lyngba ka Article thymmai khnang ban ioh ia ka bor jong ka Ain.

Ngi KHMIH LYNTI BA KI SENG UDP, HSPDP, KHNAM, PDF, NPP KIBA BAT IA U SHABI KA SORKAR kin leh ia kaba donkam ban thung ia ka Committee Sorkar kaban pyndep ia kitei ki jingsahkut ban ithuh da ka Constitution Ri India ia ki Hima Khasi States, la pynsngew bad ban jur lyngba ka shithi -email sha u heh UDP ba ka synjuk Federation of Khasi States bad ki khun ki hajar naduh ki kyntoit, ki shnong ka Ri Khasi bad Jaintia ki la long kiba DUH NONG na kane ka jing sahkut kitei ki jingiateh bad ki jingkular mynta la 70 snem na ka daw ka jingbym ia sngewthuh hapdeng ki Dorbar ki KHADC bad Sorkar Jylla halor katei ka phang ioh jingithuh ki Hima Khasi States hapoh ka Constitution Ri India.

Ngi kyrmen ba ngin ioh ia kynduh bad ka seng UDP ban ia kren markhmat halor kane ka phang.

Khublei,

John F Kharshiing,

Adviser & Spokesperson

Federation of Khasi States

Ki nongleit kai pyngngad lane kiba iaid ba ieng mynta ka sngi, kin ioh ia ka mariang kaba sngew tynnad, ong ka tnat Meteorological Department jong ka sorkar India, wat la kan don ka jingdum lyoh bad hap slap ha ki katto katne ki jaka.

Hynrei ka tnat jong ka MeT, ka pyntip ba mynta ka sngi, kam don kano kano ka jingmaham, ba kan don ka jinghap slap jur ne ka jingtied pyrthat bad meh leilieh ha ki bynta jong ka Jylla.

Shibun ki nongialam jong ka thain shatei lam mihngi, ki ai jingiaroh shi katdei ia U Narendra Modi, myntri rangbahduh, haba u pynlut por hynnin ka sngi ban lum niut ha ki rud um jong Mamallapuram ha ka por mynstep.

U myntri rangbahduh, u pyni ia ka video, kaba 3 minit 2 sekhon, kaba la peit da ki 6lak ngut, ha kaba u iaid da ka kjat suda bad u lum ia ki niut ki nier bad ki jaboh jabain na katei ka rud um bad u sa buh ha kawei ka pla bad aiti ia kitei ki niut ha uwei na ki nongtrei jong ka hotel, uba kyrteng U Jeyaraj.

Shillong: Ïa kane ka khusnam kaba dondor bha na ka bynta ki nongshna phlim, ka Kim Ji-seok Award, la pdiang da u Bah Pradip Kurbah ha ka jingïalang kaba shongkun kaba la long ha Busan, South Korea hynnin ka sngi ka 12 tarik u Risaw, 2019 na ka kti u Mohsen Makhmalbaf, uba dei u Director bapawnam ka ri Iran, uba dei ruh u dkhot nongbishar jong ka Festival.

“Ka dei ka jingshaniah kaba don ha ngi iwei pa iwei bad ka jingïatreilang kum ka kynhun kaba la pynlah ïa ngi kot sha ki kynjang kiba ngi kwah ban kynjoh, don ka bor kaba khraw bha haba shikynhun ki briew kiba don kajuh ka thong bad jingangnud ki ïatreilang”. Da kitei ki kyntien ai khublei kyrpang u Bah Pradip ïa baroh kiba la trei shitom ban pynlong ïa ka phlim Ïewduh.

U Bah Pradip Kurbah haba ïakren bad u nongthoh khubor, u la ai khublei ïa u Producer u Mr. Shankar Lall Goenka uba la ai ka jingshaniah kaba pura ha u na ka bynta ka jingpynlong ïa ka phlim Ïewduh bad ai nam kylliang ha ki nongshongïew ha Ïewduh halor ka jingjop jong u ïa kane ka Khusnam.

Washington: Ka World Bank mynta ka sngi, ka iathuh ba ka ioh ka kot jong ka India ha une u snem 2019-2020, kan hiar sha ka 6 percent, na kaba long 6.9 percent ha u snem 2018-19.

La khmih lynti ba ba ka India, kan sa kiew biang sha ka 6.9 percent ha u snem 2021 bad sha ka 7.2 percent ha u snem 2022.

Katei ka kaiphod jong ka World Bank, ka dei ha shwa jong ka jing ia kynduh jongka bad ka International Monetary Fund.

Ka jingmih na ki jingtrei karkhana ka long 6.9 percent, na ka jingkiew ha ka jingtrei jingktah, katba ka jinglong ka rep ka riang, ka long hapdeng ka 2.9 haduh 7.5 percent, ong ka World Bank.
Ka World Bank ka iathuh ruh ba ka jingduna pisa ka la nang kiew mynta sha ka 2.1 percent na ka GDP kaba long ha u snem 2018-19, na kaba long 1.8 percent ha u sem ba ladep bad katei ka pyni ba ka hiar shi katdei ka ioh ka kot bad khaii pateng ha kane ka shisnem ba ladep.

Na ka liang ka World Bank, ka shim ba ka jinghiar palat ka ioh ka kot ha India, ka dei namar ka jing pyntrei kam ia ka Goods and Service Tax (GST) bad nangta sa ka jing pyndun pisa ha u snem 2016 bad kane ka la wan rah ia ka jinghiar ka ioh ka kot, ka jingduh kam ki samla ha ki jaka sor bad ka jingduh ksew kiba bun ki long iing long sem ha ki bynta bapher jong ka Ri.

Shillong: Ka seng Jaintia Students Union (JSU) lyngba u President u samla Treiborlang R Suchen ka ai khublei ia u Officer In-Charge (OC) jong ka Pynursla Police Station u Bah Nonglang hadien ba u lah shim khia ban pynbeit ia ka jingdheng kali kaba jur na jingkieng Dawki ter ter haduh ha lad Umsyiem.

Ha ka kyrwoh ka JSU ka la ong ba ka jingdheng kali hangne ka jaka ka dei namar ba jingieng khlem akor ki kali kiba wan khwai dohkha ha wah Umngot bad don ruh ka jingpynieng kali ki nongwankai kiba wan shangkai sha kane ka jaka.

Ka jingdheng kali ha kane ka jaka ka buh iaki briew kiba sah ha ka thain War Jaintia lane na shiliang ka wah Umngot ban kynduh jingeh na ka por sha ka por khamtam haba don ki nongpang kiba hap ban kit sha ka Nongbah Shillong bad ia kiba beh kam beh jam sha Shillong kiba hap ieng blok da ki kynta ha kane ka jaka. nongialam ka seng JSU u la ioh ban kren bad u OC ka Pynursla bad u lah kyrpad ba ka tnat pulit ka dei ban hiar sha kane ka jaka ban tehlakam ia kane ka jingdheng kali ha kane ka jaka.

U samla Treibrolang u lah ai khublei kyrpang ia u OC ka Pynursla ba u lah kit khia ia ka jingud jingnam jong ki paidbah bad u lah phah ruh ia ki enforcement jong ka tnat pulit mynne ka sngi ban don ha kane ka jaka ban pynbeit ia ka jingpyniaid kali ban lait na jingdheng kali.

Ka seng JSU War Cirlcle ka lah kyrpad ruh ia ki briew kiba wan khwai sha ka wah Umngot ba kim dei ban buh kali ha rud surok na jan jingkieng Dawki ter ter sha lad Umsyiem bad ki nongkhwai kidei ban leit buh ia ki kali sha ka Shnong Umsyiem ne sha ki jaka ba kylluid ban lait na ka jingdheng kali kaba jur ha kane ka jaka namar kane ka jingieng ha ruh surok kan buh jingeh ia ki nongshong shnong kiba na ka thain Dawki ne War Jaintia.

Ka jingduh kaba khraw ym tang ïa ka Balang hynrei ïa ka Jaitbynriew baroh kawei.

I Archbishop Dominic Jala I long u briew uba sngewrit bad uba ieit ïa ka shnong. I ïadei dur bha bad ka jingbatai ki Japanese halor ka jingsngewrit – “The heavier the head of rice, the deeper it vows” (Katba nang khraw, nang jur ka jingsngewrit; humility is a virtue the Japanese hold dear).

Ha ka 3 tarik u bnai Nailur (September, 1980), I la wan shaw ïanga bad I kurim na ka Railway Station, Rome, bad I la pynbeit ruh ïa ka Hotel ba ngin sah.

Man ka por ba ngi ïa kynduh ha ki jingïalang ha Shillong, I ju wan kren barobor bad ong, “Para Nong Mawlai”.

Leit suk Archbishop Dominic Jala.

S. D. Khongwir

Mawlai, Shillong.

AIS Suja

U shong halor u Kadda. Bunsien u briew hyndai u shait leit lynti da kaba shong halor u kulai ne shong kulai. Hynrei u Jisu u iaid lynti sha Jerusalem, u shong halor kadda. Bad ia kane la thoh da u Sekharaiah ha ka Kitab u Sekharaiah ha ki snem 520 – 500 B.C ne shwa u Khrist. Bad ia kane la iathuhlypa da u Sekharaiah hi kaba ong – “To leh kmen ko khun ka Seion, to risa ko khun Jerusalem, ha khmih u Syiem jong pha u wan ha pha, u long uba hok, uba don jingpynim, uba leh rit, uba shong halor u Kadda halor u khun jong ka Kadda kein” Sekharaiah 9:9-10.

Kane ka dei ka jingiathuhlypa jong u Sekharaiah ha Israel ba un wan uwei u Syiem, u Syiem ki Israel kein, uba hok, uba dei u Nongpynim, uba don ka jingsngewrit, bad ka dei ia ki Israel ban pdiang ia u ban leh kmen ban risa jam ia u bad ka dak ka long ba un rung shapoh Jerusalem da kaba un shong halor u khun kadda.

Kane ka jingiathuhlypa u Sekharaiah ka la urlong bad ka la dep ruh, ha kaba u Jisu u la rung hapoh Jerusalem kum u Syiem ki Jiw (Israel) ha u snem 32 A.D shwa ba u Jisu un rung ha Jerusalem u la poi hajan Bethphagi bad Bethania hajan u lum Olives. Hangta u la phah ia ki 2 ngut ki synran jong u, u ong – khie leit ha katai ka shnong hamar pyrshah jong phi, phin shem ia u khun kadda ba la teh bad ym pat ju don briew mynno mynno bashong halor jong u, te to pyllait ia u, wallam ia u, te lada don ba kylli balei phi pyllait ia u, phin ong – Naba u Trai u donkam ia u, kita ki synran 2 ngut ki la shem thik kumba u Jisu u la bthah ia ki namar kita ki trai ki kylli – Hato balei phi pyllait ia u khun kadda? Kita ki la jubab “Ba donkam u Trai ia u” bad ki la wallam ruh ia u sha u Jisu, ki da siang ki jain kup halor uta u khun kadda, ki pynshong ia u Jisu halor kadda.
Te katba ki nangleit kita ki paidbah ki la sdang ia pyrta bad iaroh ia u Blei da ki sur bajam ki da ong – “Long ba la kyrkhu ia u Syiem uba wan ha ka kyrteng u Trai! Ka jingsuk ha bneng, ka burom ha kiba jrongtam eh. Hynrei ki Pharisi ki ia ong – Ko nonghikai, to sneng ia ki synran jong me, u Jisu u ong ha ki – “Lada kine (ki paidbah) kin shu sngap jar, ki maw hi kin sa ia kyang buk” Te haba u Jisu la poi hajan, u la khmih, u la iam na ka bynta jong ka (Jerusalem).
U Jisu u kynmaw ia ka jingiathuhlypa u Prophet Sekharaiah, bad u ong – Ah! Lada pha (Jerusalem) la lah tip lypa, ma pha ruh shisha, ha kane ka sngi ia kiei kiei kiba dei ka jingsuk ia pha! hynrei la buh ia ki ha khmat jong pha” Loukas 19:28-42.
Naduh ki snem shwa u Khrist (B.C) haduh 32 A.D la buh rieh ia kine kiei kiei na ki Jiw ha Jerusalem. La buh rieh na ki Jiw ia uta u Syiem ki Jiw uba long u Messiah jong ki ba kim ithuh ia u, kim sngewthuh aiu ba la iathuhlypa da u Prophet Sekharaiah, wat haba ki la iohi bad ki da ia risa hynrei kim ithuh kim pdiang pat ia u ba u dei uta u Syiem ki Jiw u Messiah jong ki. U Jisu u isynei ia ki Jiw ba kim tip ia ka por ka jingwan jngoh jong u ia ki na kata ka daw u iam. U Jisu u la iohi ia kine kiei kiei ba yn sa pynsakma ia ki Jiw sha kylleng ka pyrthei, u la iohi ruh ba yn sa pynjot ia ka Temple jong ki, bad kumta la pynjot ia ka ha ki snem 70 A.D.
Ka jingbymtip jong ki Jiw ne Israel ia ka por ba u Messiah jong ki kum u Syiem jong ki la ka pyllong pynban ia ki ban sahnarphna ia u. U Jisu u la kren ha ki pharshi ia ki. Loukas 19:11-14, hynrei kim pei phang ei ei. U da ong ruh “Ba yn pynjot ia ka Jerusalem, yn ym iehnoh maw halor u maw, naba pham shym la ithuh ia ka aiom ka jingwan jngoh ia pha” Loukas 19:28-44. Thik ka la long kumta, la pynjot ia ka Temple kaba Ar ha Jerusalem ha u snem 70 A.D da ki shipai Rom. Ha ka jingshisha, ki Israel ki la long ka jaid bynriew bakhraw tam ha pyrthei, hynrei ki la duh ia ka lad kaba khadduh ba u Blei u la tyrwa ha ki ban long ka jingpyniasuk hapdeng jong ki kum ka jaid bynriew bad u Blei. Na ka daw ka jingbymithuh jong ki, la kyntait noh ia ki Israel kum ka jaid bynriew ha kane hi ka sngi ha kaba ha ka jingshisha ka la dei ka sngi ba khrawtam jong ki Israel.
Ki Israel ki la jied ia ka jingtim na ka daw jingbymkohnguh. Deuteronomi 28:15-68. Ki Israel ki la shem jynjar jin haduh 1878 snem naduh 70 A.D – 1947 A.D ki la sakma bad longmraw kylleng ka pyrthei. Hynrei naduh 1948 A.D la lum pat ia ki mynta la 70 snem ha la ka ri lajong ka ri Israel kein, namar u Blei um dei u briew ba un lamler. Jingkhein 23:19. U Blei u la dep kular ban lum pat ia ki Israel na kylleng –pyrthei. “U Trai utei ia ka Jerusalem: u lum pat ia kiba latait jong ki Israel” Salm 147:2. La pyndep ia kane mynta. Hynrei ki Israel kin dang hap ban iaid shibun ki jingeh ha ki por ban wan. Hynrei u Blei u kular ban da ia ki bad ki long mynta ki atiar jong u ban ialeh thma pyrshah ia kiba ktah ia ka Jerusalem ha kine ki sngi kiba khadduh.
Wat lada ki Jiw ne Israel kim pdiang ia u, ne ithuh ia u Jisu hynrei ka por ka long hajan ba kin sa ia iam rangbah rangsan ia u ha kawei ka sngi, namar ka ktien ka la kren – “Kin ia khmih ha nga ia uba ki la sum (la sahnarphna) … kin iam briew ia u ……. Kin sngewkthang … ha kata ka sngi kan long kaba iam briew ha Jerusalem … Sekharaiah 12:10-11. Paralok, kine kiei kiei ki long hajan mynta, ha ki jingkhang kein to khmih bad to khmied ia la ki khmat. Mynta hi ka long ka por ba u briew un jied na ka bynta kita ki por ban sa wan. Na kata ka daw u Jisu u ong – “Uta u bym hok to un nangleh bymhok, uta uba tngit to un nangtngit, uba hok to nanglehhok uba khuid to un nangkhuid” Jingpynpaw 22:11.
Namar une uba shong kadda, un ym shong kadda shuh, hynrei un wan ha u lyoh ban bishar bad ban synshar 1000 snem hangne ha pyrthei. Jingpynpaw 20:1-6 / Jingpynpaw 21:9-26.
Amen.

Nongstoiñ: Ka Seng HYC West Khasi Hills, hapoh ka jing ialam jong u Samla Lumlang Kharsyiemlieh ha ka sngi Saitjaiñ ba ladep, ka la hiar shapoh ka karkhana sain nar kaba la tip ruh kum ka Shree Shakhambari Ferro Alloy Pvt Ltd kaba don hapoh ka shnong Riwiang na ka bynta ban leit khynra ia ki bar Jylla kiba trei ba ktah hapoh katei ka karkhana la ki biang ne em ia ki kot ki sla kum ka Labour Licence na ka KHADC bad kumjuh ia ka NRC ia ki nongtrei ba na ka Jylla Assam.

Na ka liang jong ka HYC ka la ioh ruh ban iakynduh bad iakren bad u Vice President katei ka Karkhana u S.C Mahanta bad ki dkhot jong ka Seng ki la phah wan ruh ia baroh ki nongtrei bar jylla kiba trei hapoh katei ka karkhana, hynrei na ka liang jong u Mahanta u la iathuh ba kim shymla don satia namar ba ka karkhana ka dang khang namar ki jingpynbit pynbiang ia ki tiar ki tar, kumta na ka liang jong ka Seng kala bthah ia u Mahanata ba un shu pyni noh da ki kot ki sla jong baroh ki nongtrei ha katei ka karkhana.

 Ha ka jingjurip ia ki kot ki sla na ka liang jong ka Seng kala lap ba katei ka karkhana kam shym pat la ioh satia ia ki Labour Licence na ka KHADC hynrei u tei u heh jong katei ka karkhana u la shu pyni da ki receipt na ka KHADC da kaba u la kam ruh ba ka karkhana kala dep ban pynapllai lut ia ki Labour Licence hynrei ka KHADC kam shym pat la lah ban pyndep bad haba ki dkhot jong ka Seng kila phah wanrah ia ki NRC jong ki nongtrei kiba na ka Jylla Assam u tei u heh ka karkhana u la lah ban pyni tang jong ki katto katne ngut.
Kumta na ka liang jong ka Seng kala dawa na u tei u heh jong katei ka karkhana ba u dei ban pynbiang lut noh ia baroh ki kot ki sla jong ki nong bylla khatma ka Labour Licence bad ka NRC jong kiba na ka Jylla Assam ha shwa ba kin wan ban trei biang ynda la plie ia katei ka karkhana bad na ka liang jong u S.C Mahanta ruh u la kular ban pynbiang ia ki kot ki sla bad ban pyni ruh sha ki dkhot jong ka Seng ynda ki nongtrei kila wan trei biang.
 Nalor ki kot ki sla jong ki nongtrei bar Jylla hapoh katei ka karkhana na ka liang jong ka Seng kala dawa ruh ba katei ka karkhana kadei ban siew dep noh ia baroh ki bill jong ki supplier kaba sah mynta sa kumba 1 klur shiteng bad ka Seng ka ai por ruh ia katei ka karkhana 10 sngi ba kan siew dep lut ia baroh ki bill ba sahteng jong ki supplier.
 Ym tang kata ki dkhot jong ka Seng kila dawa ruh ba katei ka karkhana kadei ban pynmyntoi lang ia ka shnong Riwiang bad ia ki shnong ba marjan kum ha ki kam pynroi namar ia kane la kular hi da katei ka karkhana ha kapor ba don ka jingpynsngew paidbah (Public Hearing) ha shwa ban pynieng ia katei ka karkhana.
 Ha kaba iadei pat bad kitei ki ar tylli ki mat jingdawa jong ka Seng na ka liang jong u S.C Mahanta u la ong ba ia ki bill jong ki supplier ka karkhana ka ju siew beit manla kapor la ka long ha ka shisien shi taïew lane shisien shibnai bad haduh mynta na ka liang jong ka karkhana kam shym pat la ioh pdiang ia ka jingujor na ki supplier ha kaba iadei bad ka jingbymbiang ka rukom siew ia ki bill.
 Katba ha kaba iadei pat bad ka jingiarap ia ki kam pynroi u la kubur ba haduh mynta ka karkhana ka dang lah ban shna tang ia kawei ka Dorbar Hall hapoh Riwiang bad u la ong ruh ia kiba bun ki lad jingiarap ym lah ban leh hi na ka karkhana kumta ka ju iarap bad noh synniang lyngba ki jingdonkam jong ki Sport Club, ki seng bapher bapher haba ki wan pan jingiarap haba donkam na ka liang jong ka karkhana kam ju kyntait

Shillong:San ngut ki Lyngdoh jong ka Hima Nongspung ki la ai da ka jingujor sha ka Khasi Hills Autonomous District Council (KHADC) bad sha ki bor Sorkar pyrshah ïa u Acting Syiem ka Hima bah Kyntiewborlang Syiemlieh halor ki jingkynnoh ba u donkti ban lum pisa be-aiñ bad ban soi thok ïa ka kyrteng ki Lyngdoh ban mynjur ïa ka Executive Committee jong ka Dorbar.

Kine ki san Lyngdoh ka Hima kila buh ïa kane ka jingujor hakhmat ka Deputy Commissioner bad ka Superintendent of Police ka East Khasi Hills, haba dawa ruh ba dei ban kem mardor ïa une u Acting Syiem u Bah Kyntiewborlang Syiemlieh uba dei na ka Shnong Mawkneng.

Ki san ngut ki Lyngdoh kiba buh ïa kane ka jingujor ki dei u Bah Swending Lyngdoh, Lyngdoh Nongspung, u Bah Phestinejohn Myrthong, Lyngdoh Umlang mar, u Bah H Rosiland Jywa, Lyngdoh Lawkhla, u Bah Orestar Lyngdoh, Lyngdoh ka Raid Lyngkhoi bad u Bah Ingdaron Wahlang Lyngdoh Mawsya.
Kine ki Lyngdoh kila buh nyngkong eh ïa ka jingujor hakhmat u Chief Executive Member (CEM) ka KHADC bad Dy CEM myn ha ka 16/08/2019 ba dawa ïa ka Council ba kan pynduh noh ïa ka jingmynjur ïa ki Dkhot ka Executive Committee jong ka Dorbar Nongpung ba thymmai namar ka jingkynnoh ba une u Acting Syiem ula soi thok ïa ka kyrteng jong ki. Ki ïathuh ba u Acting Syiem ula lum ïa ka Dorbar Hima ha ka 03/08/2019 bad ula thaw ïa ka Executive Committee jong ka Dorbar Hima khlem ma ki hynrei ïa ki kyrteng jong ki, la kynthup lang bad la pynsoi tuh.
 “Kane ka jingleh u Acting Syiem ka dei kaba be-aiñ bad kaba pyrshah ïa ka Riti ka Dustur bad ka rukom pynïaid jong ka Executive Dorbar jong ka Hima” ong kine ki san Lyngdoh ha ka jingujor sha KHADC.
 Ha ka 19/08/2019, kine ki Lyngdoh kila leit buh ïa ka jingujor sa hakhmat ka Deputy Commissioner ka East Khasi Hills bad ha kane ka jingujor la kynnoh ba une u Acting Syiem ula donkti ha ka jinglum pisa be-aiñ kum ka bai musur jongka Hima kaba jia ha ka 17 tarik Nailar ha ka shnong Mawkneng.
Kine ki Lyngdoh kila pyntip ruh ïa ka jingujor ba kila buh hakhmat ka KHADC haba dawa ban leh da kaba tyngeh ïa une u Acting Syiem.
Sa kawei pat ka jingujor la buh hakhmat ka Superintendent of Police ka East Khasi Hills halor ka jingkynnoh ba u pynsoi tuh ïa ka kyrteng jong ki ha ka jingthung ïa ka Executive Committee jong ka Dorbar Hima.
La kynnoh ruh ba u Acting Syiem ula pynsangeh jubor ïa ka jinglum musur ha ka shnong Mawjongka khlem ka jingtip jong ki Lyngdoh bad ka jingsam notice ba byrngem byrsit da ki ktiem ki bym iahap ha ka imlang sahlang. Halor kine, kila dawa ban kem mardor ïa une u Acting Syiem haba pyntip ruh ba u dei u briew uba la donteng ïa ka case ha ka tnad Pulit.

Shillong:U Bah Generous Warlarpih, President ka kynhun ki Nongotdoh ha Ri Lum Khasi bad Jaintia kaba la tip kum ka Khasi Jaintia Butchers Welfare Association (KJBWA), u la ong ba watla ki Nongotdoh ki la iakynduh ia shibun ki jingeh, haba iadei bad ban ioh ia ki Masi otdoh bad ban die sha Iew sha hat, hynrei kim nud shuh ban pan jingiarap nangno nangno ruh, kata ka long na ka sorkar ne Seng bhalang, namar haba ki pyntip halor ka jingeh kaba ki iakynduh na ka jingjyllei ki nongshalan Masi beain sha Bangladesh, ka kylla long pynban kumba ki leit iathuh ha ki ba ka don ka pisa kaba heh bha, na katei ka kam shalan Masi beain sha Bangladesh.

Haba iakren bad u Nongthohkhubor, la sngewthuh ba ka nongrim kaba la pynlong ia utei u rangbah nongialam ka kynhun ki nongotdoh ba pynmih ia kitei ki kyntien, ka dei hadien ba ki la shem ba mynshwa ba ki dang sngapjar bad dang duna kiba tip, ka jingiaid tuh ki Masi beain sha Bangladesh ka dang duna bha, hynrei ka jingkiew kynsan jong ki nongshalan beain sha Bangladesh, ka dei hadien ba kitei ki nongotdoh ki la leit ban pan jingiarap na ki nongialam sengbhalang bad ruh hadien ba ki la leit ban kynduh ia ki bor sorkar.

Khyndiat por mynshwa, kum ki nongotdoh haba ngi leit ban thied Masi na Iew Masi ha Baridua, ngi dang ioh ia ki masi ban thied na ka bynta ban pynlong kum ki Masi otdoh bad ban die ha kylleng ki Iew hapoh ka Ri Khasi bad Jaintia, hynrei kumba ka long mynta, namar ka jingjur ki masi kiba la shalan sha Bangladesh, ka pynlong syndon iangi ba ngim ioh masi shuh ban thied na katei ka Iew.
Haba iadei bad ka jingeh ban thied Masi na katei ka Iew ha Baridua, utei u nongialam u la ong, ba lada thied masi na katei ka Iew, ka la pynshem jingeh ym tang ia ki nongotdoh, hynrei wat ia ki paidbah nongbam doh Masi, namar lada ngin thied na katei ka Iew, ka dor jong ka Doh Masi kan sa poi haduh T. 400 tam ha ka Shi kilo.
Nalor ka jingeh haba iadei bad ka jingbymioh masi na katei ka Iew, hynrei ngi iakynduh sa ia kawei pat ka jingeh bad kata ka long, haba ngi leit ban thied Masi na ki shnong ha Assam, hynrei ngi shem jingeh pat ban pynpoi sha jylla, namar ka jingbymdon ia kita ki Sertiphiket na ka tnat Veterinary, kaba long ka jingpynshisha na ki Doktor halor ka jinglong jingman ki masi bad khamtam na ka bynta ban die sha ki paidbah.
Haba ngi thied Masi na Assam bad thmu pynpoi sha jylla, ngi shah bat pat ha ki Pulit ha Byrnihat bad kane kam banse iangi ba ngi hap ban siew pisa ia ki, khnang ba kin pyllait bad ban gin ioh ban poi sha ki Iew ki hat, na ka bynta ban shohdoh bad die sha ki paidbah, ha kaba kane ruh ka la dei ka jingeh kaba khraw bha iangi ki nongotdoh bad kiba la im ja im jhur na kane ka kam otdoh, pynpaw utei u rangbah.
Ha ka jingshisha, lada ka sorkar ne kita ki sengbhalang ki don ia kata ka mynsiem ban iarap kyrpang iangi ki nongotdoh kiba dei ruh tang ki para Khasi suda, thikna beit ba kin lah ban khang ia ka kam shalan masi sha Bangladesh, hynrei kumba ka long mynta ngi la long tang kum ki nongpeit kai halor ka jingiaid ki masi sha Bangladesh, bynrap utei u rangbah.
Namarkata, haba ngi lap bad iohi ba ym don kiba iarap lem ia ki jingeh jongngi, ka pynlong iangi ba ngin sngapjar, hynrei lada ka long ha kane ka rukom kumba ka long mynta, ka por kam slem ba ka kam otdoh masi kaba la trei tang da ki Khasi suda, kan sa jah noh, namar ym don shuh kiba nud ban thied ia ki masi, u la bynrap.

Shillong: U Bah Phrikshon Kharshiïing u la wanrah sha ka jaidbynriew sa kawei pat ka kot kaba thymmai “Ka Par Kordor Jingtip – I”.

Ïa kane ka kot la pyllait paidbah da u Myntri Incharge ka Hima Mawphlang Bah Hodling Kharshiïing ha ka Dorbar Kur kharshïiing kaba la long ha ka 12. 10. 2019 ha Iing Dorbar Shnong Nongrum Mawphlang. kane ka long ka kot kaba khadwei kaba u nongthoh u la noh synñiang sha ka thoh ka tar ka bri u Hynñiew Trep.

Kane ka kot ka long ka thup kaba la kynshew ha ka, ïa ki jingtip bad ki jingjia na ka mynnor kiba u nongthoh u la lum u la lang bin pa bin. Kane ka kot kan long ka jingmyntoi na ka bynta ki nongpule ba kin ïoh shibun ki jingtip kaba kordor kiba u nongthoh u la lum la lang da ki phew tylli ki snem. Da ka jingmih paidbah jong kane ka kot “Ka Par Kordor Jingtip – I” la nang sakhi ïaka jingnang kiew bad nongroi ka thoh ka pule ha ka ktien Khasi kaba dang iaksaid mynta ban ïoh rung ha ka khyrnit kaba phra ka Riti Synshar ka Ri India.

Ngi la kyndit haba ngi la ioh jingtip ba u Archbishop Dominic Jala, u khlieh ka Shillong Archdiocese ka Balang Catholic ula khlad ha ka jingtyngkhuh kali ha California USA ha ka 11 tarik October 2019.

Ngi kynmaw ia ka jingiajan jong ngi bad ka ing ka sem u Archbishop Jala, haba u hynmen jong u, u Anthony Jala ula ialeh ilekshon teng ha u snem 1983 na ka seng rim jong ngi ka APHLC na Mawlai.

Nalorkata, i kpa u Archbishop, i Babu Marius Lien Kharumnuid ruh iba la don bynta ha ka jingialeh ban ioh ia ka jylla Meghalaya.
Ha kaba pynpaw ia ka jingdap mynsiem jong ngi halor kane ka jingjia basngewsih, ngi halor ka jingduh noh ia une u khlieh ka jingngeit ha ka jylla ngi bad u paralok ki babun ha ka imlang sahlang bad kiwei ki balang de, ngi phah ka jingsngewlem sha ki bahaing hasem, sha ki paid riewngeit baroh, kiba don hapdeng ka jingsngewsih, ngi duwai ruh ba u Blei un ai ka jaka shongneh basuk bad ka jingsuk ia u Archbishop Dominic Jala ha ka Hima jong u.
S/d- B.M.Lanong
Chief Advisor UDP

Shillong: Ka ‘Cherra Bosconian Union’ (CBU), ka seng jong ki khynnah skul barim jong ka St. John Bosco Boys’ Higher Secondary School, Sohra; ka la kyntiew ia ka Lama Jubili Ksiar (Golden Jubilee) jong ka ha ka 14.10.2018 da U Ph. Paul Vadakumpadan SDB, Professor ka Sacred Heart Theological College, Mawlai ha ka jingiadon lang U Bah Wilfred Khyllep IAS bad ki past pupils ryngkat ki bahaiing hasem jong ki.

Ia kane ka ‘Jubili Ksiar’ (Golden Jubilee) yn pynhap pyrda noh ha ka 24tarik Risaw (October) 2019. La khot la wer ia baroh ki khynnah skul barim jong ka skul St. John Bosco Boys’ Higher Secondary School, Sohra, ban ia wan shim bynta lang sha kane ka jingrakhe Jubili kaba shisien ha ka rta jingim briew. Ka prokram kan sdang da ka Mass Bakhuid por 10 baje mynstep bad ka ‘Cultural programme’ ha ka por 1 baje nohphai sngi.

Ka CBU ka la noh synniang shikatdei eh ym tang ha ka ban tehsong lang ia baroh ki khynnah skul barim jong u Don Bosco bad ban kyntiew ia ka pule – ka dangle, hynrei ruh ban iarap bad kdew lynti lem ia ki khynnah skul sha ka lawei babha lyngba ki prokram bapher bapher ki jong ka naduh ba la seng ia ka ha ka 6 tarik Risaw (October), 1968 haduh mynta.

Bun na ki dkhot ki dang iai kynmaw kyndiang ia ki kam babha ba la leh da kane ka Seng ki khynnah skul barim, kum ka ‘Drama’, ka ‘shad tynrai’, ka ‘tem ksing-nakra’, ka ‘put besli-singphong’, ka tem duitara, ka ‘jingrwai khasi tynrai’ bad kiwei. Ka jingai ‘Award’ ia ki khynnah skul ba ioh heh eh ‘mark’ ha ka ‘sobjek Khasi’ ha ka matrik (MBOSE) naduh u snem 1984 haduh 2015. Bun ki khynnah skul na kylleng ka Ri Khasi-Jaintia kiba la ioh ia kane ka Khusnam. Naduh u 2017, ka Seng ka la phai khmat noh sha ka thong ban noh synniang jingiarap sha ki khynnah skul kiba wan na ki iing ki sem baduk, ong ka kyrwoh na U bah Bah Priak. K. Riahtam, General Secretary, Cherra Bosconian Union (CBU), SOHRA.