Khliehriat: Ka Rural & Urban Development Society, East Jaintia Hills District ka long kawei na ki Seng treimon sngewbha kaba trei naka bynta ka bha ka mait bad ka roi ka par jong ki nongkyndong hapoh ka district kala pyrshah jur ia ka public hearing Jong ka star Cement halor ka jingthmu Jong ka ban pynheh ia ka jingpyntih mawshun ha ka shnong Brishyrnot, elaka narpuh. Ka Seng kala pyrshah jur ia ka public hearing halor kiba bun ki nongrim:-

1. Ka jaka kaba thmu ban tih mawshun ka company ka iajan bha bad ka narpuh wildlife sanctuary bad kane ka jaka hap hapoh ka Eco-sensitive zone.
2. Kane ka jaka ba thmu tih mawshun ruh ka iajan bha bad ka wah Lukha bad kane Kan sa ktah bha is jingim ba don hapoh um.
3. Kane ka jaka ba thmu ban tih mawshun ka Jan bha bad ki jaka sah ki briew. Bad kane kan sa ktah shibun bha ia ka koit ka khiah Jong kine briew hakane ka jaka khamtam lyngba ki pum pum Kan sa ktah ia ka jingring mynsien Jong ki.
4. Kane ka company kam shym la iaid lane bud ryntih ia ki agreement haka ka por ba iasoi kum ka kam thungkam thungjan Jong ki trai shnong lane ki briew local.
   5 kane ka company kam shym la ai jingmyntoi ia ki Trai shnong hynrei ka wanrah pynban tang ka jingpynjot ia ka mei rammew hi.
   6.lada kane ka jingthmu Jong ka company ka sa long Kan wanrah pynban ka jingpynsniew ia ka mei rammew baroh.

Halor kane ka nongrim ka Seng ka la dep ai jingthoh ka jingpyrshah ia kane ka jingthmu ka star cement ban pynheh ia ka jing tih mawshun sha ka Meghalaya State pollution control board, shillong. Bad ruh kala kyrpad ia ka meghalaya state pollution control ban pynpep noh ia kane ka jingthmu jong ka.

AIS Suja

Yn ym pat dep ban ialap ia ka Gospel ha Israel tad haduh ka jingwan u Jisu sha kane ka pyrthei. Kane ka long ka jingphylla na ki jingphylla baroh. U Jisu u la kren da lade hi u ong – “Naba shisha nga ong ha phi, ba phin ym pat lah pyndep (ialap Gospel) ia ki shnong ka Israel, tad ynda un wan u khun u briew (Jisu) Mathaios 10:23. Kaei ka daw? Ka daw ka long ba ki Israel ne Jiw (Jewish) kim ngeit kim pdiang ym dang mynta hynrei naduh mynshuwa naduh ki hajar snem.

Ki Israel ki ngeit ha ka hukum jong ki kpa tymmen jong ki hyndai bad ha ki hukum u Moses de. Namar ha ka por ba la kha ia u Jisu la kha ia u hapoh ki ain ki hukum u Moses, bad ki Israel ne Jiw kim lah ban pdiang ba u long uta u Blei ne u khun u Blei uba la wan na bneng hynrei ki shu ong ba u dei u briew ba la kha na ka briew na ka Mary bad u dei u khun u Joseph u misteri, ha ki hi ki ngeit, ba uta u Messiah un wan hiar na bneng ym ban kha ia u, kane ka dei ka jingngeit jong ki Jiw ne Israel, bad ka long ka jingbiej ha ki lada kin pdiang ia kane.

Ki Israel ne Jiw kim iohi ia ka jingshisha jong kine kiei kiei kiba u Blei u la leh, kim iohi ia ki dak bakhraw ba la leh da u Blei ha Israel, u Blei u la leh shibun ki jingphylla wat haduh ba ki la iaid lyngba ia ka duriaw basaw (Red sea) hynrei kim sngewthuh. Dei na kata ka daw ba u Blei u la pynsakma kylleng ia ki naduh u snem 70 AD. Hynrei dei namar ba u Blei u ieit pat ia ki u la wallam ia ki sa shisien pat sha ka ri lajong namar u Blei u la kular naduh u Abraham u Isaak bad u Jakob bad u Blei um ju kylla um ju lamler ia kaba u la kular ha u Abraham, namar ba u dei u Blei. Jingkhein 23:19.

Haba u Jisu u la wan sha kane ka pyrthei ki Jiw (Israel) ki kyntait ia u kim pdiang ia u. Ioannis 1:11. Bad kane ka jingkyntait ka neh haduh mynta mynne.
Ka jingkyntait jong ki Jiw ia u Jisu ka long mynta ruh bad kim pdiang ia ka kyrteng Jisu ha Israel. Na kata ka daw u Jisu u phai sha ki Jentil sha Samaria. Haba u Jisu u la kren bad ka nong Samaria, ka nong Samaria ka ong – “Nga tip ba u Messiah u wan ia uba ki khot u Khrist …… ki nong Samaria ha kata ka shnong ki la ngeit ha u Jisu. Ki ong – Mynta ngi ngeit ym namar ka jingong jong pha hynrei namar ngi la iohsngew ma ngi hi ia u, ngi tip ba une u long shisha u Khrist u Nongpynim ka pyrthei” Ioannis 4:24-42
La pdiang ia u Jisu ha Samaria bad sha kylleng ki ri Jentil. Hynrei katba ha ki Jiw (Israel) lyngngai kim tip briew la pynmatlah ia ki, la katta ruh u Jisu u ong ha ka Samaria bad sha ka pyrthei – “Ka jingpynim ka long na ki Jiw, Salvation is from the Jews” Ioanis 3:22. Ka daw ka long namar a u Blei u la mon ba jied ia ka Israel bad na ka jaid Jiw ka Mary Theisotti kein ban kha ia u Jisu Khrist ha ka jinglongdoh.
Naduh mynshuwa hi u Blei u la ong ba ki Israel ki long ka jaid bynriew ba eh ryndang. Exodus 32:3-6. Ki long shisha kiba eh bad ki la tylli ruh kum ka jaid bynriew. La kyntait ia u Jisu da ki Jiw hynrei ka long ka lad jingpynim pat ia ki Jentil namar ki pdiang bad ngeit ba u Jisu u long uta u Khrist u khun u Blei.
Na kata ka daw, u Apostol Paul u ong – “Kumta shaphang ka Gospel, ki long ki nongshun na ka bynta jong phi (Jentil) hyrnrei shaphang ka jingjied (election) ki long ba la ieit ia ki, na ka bynta kita ki Kpa” Nong Rom 11:28. Ki Jiw kim pdiang ia ka Gospel u Jisu Khrist kein haduh mynta.
Na kata ka daw ka la wan ka jingpynim sha ki Jentil na ki Jiw (Salvation for the Gentiles from Jesus). Kumta ka pynksan ia ngi (Jentil) da ka snam jong u (Jisu). Yn pynim ia ngi da u na kata ka jingbitar u Blei” Rom 5:9. “Naba u Blei ula buh ia ngi ym ia ka jingbitar hynrei ia ka ban ioh jingpynim da u Jisu Khrist uba u Trai jong ngi” 1 Thessoloni 5:9.
U Jisu u iohi ia kane naduh mynshwa ia ka jinglong ki Israel kein. Dei na kata ka daw u iam na ka bynta ka Jerusalem uda ong – Ah Jerusalem Jerusalem! …… katno sien ba nga la kwah ban kdup ia ki khun jong pha kumba ka syiar ka kdup ia ki khun jong ka hapoh ki thapniang jong ka, PHI TE PHIM MON” Mathaios 23:37.
U Jisu u iam ym namar ba u isynei ia ka Temple u Solomon ym ia ki maw ki dieng hynrei ia ki Jiw kein ba kim pdiang kim ithuh ba u long u jong ki, kim tip ba u long u Syiem jong ki, u Messiah uba ki kwah la slem bah.
U Jisu u la hukum ban ialap ia ka Gospel ha ki kynja bynriew baroh – “To leit sha ka pyrthei baroh to ialap ia ka Gospel ha ki bynrew baroh” Loukas 16:15. Kane ka hukum ban leit ialap ka la sdang sha ki Jentil ha kylleng ka pyrthei lyngba ki synran bad ki Apostol. Ha Antiok u Paul bad u Barnabas ki ialap ia ka Gospel u Khrist, hynrei ki Jiw ki pihuin ia ki bad kren bein ruh. Kumta u Paul bad u Barnabas ki la kren shlur ha ki Jiw ki da ong – “La donkam ban ialap ha phi NYNGKONG ia ka ktien u Blei, hynrei namar ba phi la kyntait noh ia ka bad phi rai ialade ki bym bit ia ka jingim bymjukut, HA KHMIH NGI PHAI NOH SHA KI JENTIL” ki kam Apostol 13:44-46.
Ki Jiw ha lade ki sngew bahok badk i bud ia ki niam ki rukom ki kpa tymmen jong ki hyndai. Rom 2:19-24. Hynrei kim tip ba ki kyntait ia ka jing shisha (Truth) bad ia ka jingpynim (Salvation) kaba u Blei u la ai lyngba u khun jong u u Jisu Khrist.
Kumta ki Jiw ki la duh noh ban long ki Lyngdoh bad ka hima Lyngdoh (Kingdom of Priest) namar ka jingeh ryndang jong ki. Exodus 19:3-6. Bad kane ka jia haduh mynta ba ki Jiw ne Israel kim pdiang bad kim kwah ban sngew ia ka jingialap Gospel shaphang u Jisu Khrist. Ki kren bein pynban bad bynthiew lada uno uno u ialap shaphang u Jisu Khrist. Kane ka jia myta hi ha Israel ha Jerusalem.
Ia ka Gospel u Jisu Khrist la ialap bad dang ialap sha kylleng ka pyrthei lyngba ki Channel ki Media ba bun rukom bad lyngba ki Nongialap (Preachers). Katta ba ha Israel ki pdiang bad kim kwah ban iohsngew ia u Jisu Khrist, namar ia ka Gospel, ki long ki nongshun kein. Lah ban pyndep jingialap ia ka Gospel ha kylleng pyrthei hynrei ha Israel yn ym lah pyndep tad haduh ba u Jisu un wan pat sha kane ka pyrthei. Dei na kane ka daw ba u Jisu u la kren lypa u ong – “Phim ym lah pyndep ia ki shnong ki Israel, tad ynda un wan u khun u briew” Mathaios 10:23.
Te lano yn pyndep ban ialap ban pynsngew ia ki Israel? Dei tad haduh ka jingwan u Jisu, ban pyndep ban ialap ha ki da ki angel na bneng. une u angel u don ka Gospel bymjukut ha ka kti – U ong da ka ktien ba jam “To sheptieng ia u Blei to ai ka burom ha u, naba la wan ka por ka jingbishar jong u” Jingpynpaw 14:6-7.
Ki Jiw ne Israel kin ngeit bad kin iohi ruh ia uba ki la kyntait u dei uta u Jisu ia uba ki Jentil ki la ialap ia ki. U dei u Messiah jong ki. “Ha kata ka sngi ki kjat jong u (Jisu) kin ieng halor u lum Olive ha pyrshah Jerusalem” Sekharaiah 14:11 “Te ha kata ka sngi – ngan theh buk halor ka iing u David, halor ki nong Jerusalem ka mynsiem jingaiei bad jingkyrpad ……. Kin khmih ha nga ia uba ki la sum kim iam briew ia u Jisu ……. Ha kata ka sngi kan long ka jingiam briew bakhraw ha Jerusalem” Sekharaiah 12:10-11.
Dei ha kata ka por ki Jiw ne Israel kin shai ki khmat kin ong pleng une u Jisu ba la ialap hapdeng jong ki da ki Jentil, u dei u Messiah jong ngi.
Kin sngew dung ngak ha la ki dohnud ba ki la kyntait ia u ki la la leh bein ki la sahnarphna ruh. Na kata ka daw kin iam rangbah rangsan bad kan long ka sngi jingiam briew bakhraw ha Jerusalem ha ki sngi ban sa wan, ong ka ktien u Blei kein.
Kumta ban ialap mynta ha ki Jiw ia ka Gospel u Jisu Khrist, ka long ka jingbiej ha ki. Kin ong kine ki briew kiba biej. Na kata ka daw yn ym lah ban pyndep ia ka jingialap Gospel mynta ha ki Jiw ne Israel tad ynda u Jisu un wan hiar na bneng da lade hi, tad ynda kin tip ba u Jisu u dei u Messiah uba ki la ap la slem bah mynta, tad ynda kin sa ia iam rangbah rangsan na ka bynta u Jisu bad dei hangta ma ki pat kein pynkhraw ia ka kyrteng jong u ha kata ka por.

Shillong: Ha ki 24 kynta ki ban wan ka bneng, kan long kaba dum lyoh bad kan don ka jinghap slap ba malu mala ha Shillong bad ki jaka ba marjan.

Ha ka Jylla baroh kawei, kan don ka jing meh leilieh bad tied pyrthat ha ki katto katne ki jaka bad ha ki 24 kynta ba ladep, ka nongbah Shillong, kam don slap, ha Sohra ka long 0.8mm, katba ha Umiam ka long 4.8mm.

Ka jingshit jingkhriat ha Shillong ka long 19.7 la 14.0, ha Sohra 21.0 la 16.8 bad ha Umiam ka long 23.2 degree kaba shit duh bad 18.5 kaba rit duh.

Shillong: Ka Khasi Hill Autonomous District Council, ka la pynmih ia ka jing pynbna ba naduh ka 14 tarik u Risaw 2019, kan khang ia baroh ki bar jylla (non Tribal) ba kin shong die madan ha baroh kawei ka Ri Khasi.

Ia kane ka jingpynbna la shim kat kum ka Ain Trading by NonTribal Regulation ka long beain ia ki bar jylla (non Tribal) ban shong die jingdie ha madan ne ha ki jaka iaid kjat (footpath).

Na ka liang ka KHADC ka la hukum ruh ia ki syiem bad ki Rangbah shnong ne ki khlieh nongsynshar ba kin ujor sha ka KHADC lada ki lap ba don ki bar jylla (non tribal).

Shillong: Ka National Council of Churches in India, ka pynrem jur ia ka jingkren bakla jong U Mohan Bhagwat, uba dei U Sarsanghchalak ka RSS, ha kaba ula sot bakla ia ki kyntien jong ka Bible, ban pynshlur ia ka jing shoh briew bad katei ka dei ha ka jingkren bad ka India Today ha Mumbai.

“Ngi sngew kyndit jur ba ki mih kum kito ki jait jingkren, kiba thmu ban pynpait jaitbynriew ha ka kyrteng jong ka niam. Ka jing sot bakla ia ki kyntien jong ka Baibl, ka la dei ka kam thombor ia ki rit paid Khristan” ong katei ka kyrwoh kaba la pyllait mynta ka sngi.

Ka jingsot jong utei U Sarsanghchalak, ia ki kyntien ka Baibl, ka thew ia ka jingshah lehbein jong kawei ka kynthei bad la ong ruh ba U Jisu, um shym la pdiang satia ia ka kam shoh ne tied briew, hynrei la pyni ba U Jisu, u sngew lem bad u sngew diaw shibun halor kitei kam thombor. La ong shuh shuh ba U Jisu, ha ka jingshisha, ula shim ban iada ia katei ka kynthei, kaba shah ktah kti bad shah lehbein ha ki briew.
La ong ruh ba ki kam lehbor ne ktah kti ia ki rit paid ha kine ki sngi, ki dei beit ia ki rit paid bad kito kiba tlot ha ka long briew manbriew.
Ka NCCI, ka kyrpad ia ki bor sorkar, ki nongialam sain pyrthei jong ka sorkar India bad ki sorkar Jylla, ba kin pynrem ia kitei ki jingkren shim kabu, ba kan neh ka shongsuk shongsain ha kane ka Ri.

Shillong: Hynnin ka miet, ha ka por 11.15, ki pulit jong ka Ratacherra, kiba khynra ia ki nongwan rung beain, ki la ioh bat ia ki arngut ki nong Nigeria, kiba wan da ka Night Bus, kaba don ia u number ML 05 M 1899, kaba leit na Agartala sha Guwahati.

Ki pulit ki la bat ia kitei ki arngut bad haba la kylli ia ki kot ki sla jongki, hynrei kim shym la lah ban ai ia ki kot ki sla kiba donkam, halor ka jingwan rung jongki sha India. Kitei baroh arngut ki don tang ki Xerox copy jong ki passport jongki bad ki iathuh ba ki buh ia ki kot kiba donkam baroh ha Bangladesh bad ki wan rung sha India, lyngba ka Tripura.

Kitei kiba shah bat ki long U Victor Ujichukwu Okeke (30) bad sa uwei pat u dei U Ifechkwu Emmanuel Obi (34) bad kitei ki dei kiba Nigeria hi baroh arngut.

Na ka jingshah kem jong kitei, kumta ki la poi baroh 19ngut ki mynder ri, kiba la shah kem ha kane ka shi bnai ba ladep.

-B.M.Lanong
Ha ka sngi 1st October 2019, haba la pynbna ha ophis SDO Sohra, ba u Balajied Synrem ruh ula long uba biang ban ialeh napdeng 6 ngut ki nongialeh ha kane ka ilekshon shiteng samoi na ka 26-Shella Constituency, kaba don haduh 29542 ngut ki paid nongthep vote, nga la kren da kaba sngew thikna lypa ha ka jingialang ha ing jong u ha Sohra, ba u don ka daw ban jop beit namar kine ki daw harum bad namar u kpa jong u, nuima u la don-ka-kupar (Donkupar) hynrei une te u la dei lypa u Balajied (The chosen one).
Ki 3 tylli ki daw ba u Balajied un jop ki long:-

• Namar ba ki nongialam bad nongkyrshan UDP, kynthei bad shynrang bad kiwei de ki paid shemphang na baroh kawei ka Constituency baiar, ki la pangnud eh bad sngewlem halor ka jingkhlad shiteng ryta jong u nongialam jong ki, uba la shakri 7 sien kynthih kum u MLA, nangta katto-katne por kum u Chief Minister bad Speaker de, u rangbah Dr. Don Kupar Roy. Kumta tang da kawei ka sur ki la mon ban pynialeh ia u Balajied, u khun phrangsngi u Dr. Donkupar, ba un shimti ia ka lyngkor u kpa jong u.
• Namar ba u Balajied u dei u samla-rangbah uba na ka shnong Mustoh Shella, uba la biang bha ka ryta, ka jingnang-jingtip bad uba la don ruh ka kyrdan LLM (Master of Law), uba dei u nongiasaid ain ka Meghalaya High Court, un hap kit ia shibun ki jingeh ki paidbah jong u ha kane ka bynta, kynthup ruh ban iarap btin lynti ia kaSorkar ha ka liang ka ain.
• Namar ba u Balajied u dei ruh uba la jied bad mon lang da ka kynhun sorkar MDA Meghalaya ha kaba u Chief Minister, Dy. Chief Minister bad kiwei ki Minister NPP bad HSPDP ruh kiba la sngewlem bad kiba la kular ban burom ia u Dr. Don da kaba kyrshan ia u khun jong u, ki la ialeit lang sha Shella ban pan jingkyrshan ia u Balajied. Nalor kitei ki paralok ha ka Sorkar, la kyrshan lang de sa da ki 2 ngut ki MLA, kiba long ki paralok ha ka thup UDP, u Bah S.K.Sun MLA Mawphlang bad u Mr Samuel Sangma MLA ka Baghmara. La thom pat nakhmat sa da ki rangbah bad longkmie ka UDP, hapoh ka jingialam u President bathymmai, u Bah Metbah Lyngdoh, uba dang shongshit bha, khlem salia ia u slap ka lyer ne ia ka riat ka ram.
  Halor kitei ki 3 tylli ki mat badon nongrim (justification), lada shu kumno-re-kumno pat, u Balajied u shu jop salit kum u Dr. Don, (rem te, kabym ilah mutdur shuh hi), sa ia pyrkhat hi ki nongjied baroh, ia ngi ruh ha ka UDP, ka jubab aiu kein ngin ai sha u Mr Conrad Sangma CM bad sha kitei ki rangbah NPP, HSPDP bad sha ka pyrthei Meghlaya jong ngi, kiba ia lynga lang ha kum kane ka rukom suh kha MLA?

Shillong: Ka seng United Democratic Party (UDP) hapoh ka jingïalam jong u president ka party, bah Metbah Lyngdoh mynta ka janmiet ka la pan jingkyrshan ban pynjop ïa u kyrtong jongki u bah Balajied Kupar Synrem ha ki lai tylli ki jingïalang.

Kine ki jingïalang la pynlong ha ka janmiet jong ka sngi Palei bad ha ka shnong Saitsohpen, Nongsawlia bad Mawpun.

Haba ai jingkren ha katei ka sngi, u president ka UDP u la ong, ba u don ka jingngeit ba ka Shella kan sei biang ïa u nongmihkhmat ban long u Rangkynsai na ka bynta ka thaiñ kumba la sei mynshuwa kum ïa u Rev. JJ M Nichols Roy, Dr Donkupar Roy bad kiwei.
U la ong, ba u kyrtong ka UDP uba mynta ruh um duna ban long lang kum kiwei namarba u mih na ka ïing u Dr. Donkupar.
“Ha ki khyndiat por jong ka jingïaid lynti jong nga bad u bah Balajied, nga ïohi ba u ruh u skhem ban shakri ïa ki paidbah,” ong u bah Metbah.
Na ka liang u bah Metbah u la ong ruh, ka UDP kan ïai buddien ïa ki kam kiba sah jong ka Shella kaba kadei hok ban ïoh.
Nalorkata u la ong, ha kane ka ilekshon, ngim kwah ban kynthoh ne ban kren ban pynmong briew namar ka kam jong ngi kadei ban kren ïa ka jingshisha bad ban trei da ki kam kumba long u Dr. Donkupar.
Ha kawei ka liang, u general secretary ka UDP, u bah Jemino Mawthoh u la ong, ha ka jingïaid lynti jong ka jingïalap ilekshon, nga shem ba ngin ïoh ka jingjop na ka daw jong ka jingwan ai Jingkyrshan jong ki paidbah.
“Phi la duh ïa u nongïalam ba radbah bad kumjuh ruh ma ngi. U la don la ka bynta ha ka synniang bad u long u nongïalam uba khampher na kiwei namar ha u ka don ka nongrim kaba u leh ïa ka kam kumba u kren ym ban shu bun ñia,” ong u bah Jemino.
U bah Brolding H Nongsiej uba long u nongmihkhmat jong ka seng UDP, u la pan ïa ka jingkyrshan na ki paidbah ba kin pynjop ïa u bah Balajied kum ka burom ïa u nongïalam ba radbah jong ka Jylla uba la leh ïa ki kam bad ka synniang kaba u nongïalam u la leh.
U MDC ka Sohra na ka seng UDP, u bah Titos Chyne pat u la pynshai haba ïadei bad ka mat jingdawa distrik.
U bah Titos u la ong, ka jingdawa distrik kam dei ka mat elekshon ban pynbiej ïa u paidbah hynrei kadei ka mat jingdawa jong u paidbah kaba ki la angnud naduh mynshuwa.
“U Dr Don u long kum u nongïalam ban ïakren, ban pynbeit bad ban pynurlong ïa ka jingangnud jong u paidbah. Kumta kum ka seng kaba burom ïa la u nongïalam, ngin ïakhun ban pynpoi sha ka thong,” ong u MDC ka Sohra haba ïadei bad ka mat ban pynïoh distrik ïa ka Sohra.
Ha kine ki jingïalang kiba la ïadonlang ki kynthup ïa u MLA ka Ranikor, bah Pius Marweiñ, bah Ryngkat Lyndem MDC ka Laitlyngkot, u MLA barim na Garo Hills Sengman Marak bad kiwei kiwei.

Shillong: Ka Khasi Students Union (KSU) Narpuh Circle mynta ka sngi ka la leit ban ai da ka jingthoh sha u member secretary jong ka Meghalaya State Pollution Control Board (MSPCB), u bah J N Nengnong ban dawa ban pynsangeh ia ka jingpynbna paidbah ha kaba ia dei bad ka jing thymu ban pyniar jaka ka Star Cement Company Private Limited ha shnong Bri Chyrnot ia kaba yn sa pynlong ha ka 19 tarik mynta u bnai.

Haba ia kren bad ki lad pathai khubor mynta ka sngi, u Bah Kwilnis S Suchiang u ba long u President jong ka KSU Narpuh ki la ia thuh ba kim pyrshah ia ka ki kam pynroi, hynrei kaei kaba ki pyrshah ka long ba kane ka jingpyniar jaka jong katei ka kompeni pynmih dewbilat kala jan palat sha ka Lumar bad wah Lukha.

U la bynrap ba kumba ka long mynta ha ka wah Lunar ym don shuh jingthaw ba im bad kane kala ktah ruh ia ka wah Lukha ha kaba ka jingiap jong ki dohkha ka long man ka por. Ki paidbah mynta kim nud shuh ban ktah ia ka um ha kine ki wah bad kane ka long ka jingma ia ka jingim briew. Kane ka jaka ba ki mut ban shim mynta ka long 42.052 hektar ka jngai tang 500 metter na kitei ki wah.

Na ka liang u nongialam jong ka KSU Narpuh u buh ruh ia ka jingkylli balei ka tnad Wild Life jong ka sorkar jylla kam shym la ujor ei ei pyrshah ia kane, namar kane ka jaka ban shim ka Star Cement ka long ha jan jong ka Narpuh Wild Life Sanctuary ba lada don ka jingpynbthei maw, kumta kitei ki mrad na katei ka jaka kin sa phet krad.Katei ka jaka ka dei ka jaka khlaw bad lada ka sorkar jylla ka shah ban shim ka star cement, kan pynkylla long ia ka khlaw sha ka jaka shrah ha katei ka thain bad kane kan ktah ia ki briew bad ia ki mrad ruh kum juh dei na kane ka daw ba ka seng ka kyntu ia ka SPCB ba kam dei ban pynlong ia kane ka jingsngap paidbah ha katei ka sngi.Na ka liang jong ka seng ka la pynkhreh mynta ban phah ia ka jingujor sha ka Minsitry of Forest bad Environment jong ka sorkar pdeng ba kam dei ban ai jingbit ha kaba ia dei ban pyniar jaka jong ka Star Cement ban khlong ia u mawshun, na katei ka khlaw ka ban ktah ia ki paidbah.

La ong shuh shuh ba ki karkhana pynmih dewbilat ha katei ka thain kim don ia ki jingiada na ki jaboh kiba mih na ki karkhana, la ong u president ka KSU Narpuh Circle.

Shillong: La ioh khubor, ba U Archbishop Dominic Jala, uba dei U Archbishop ka Shillong Diocese, ula khlad noh ha ka jing ia tyngkhuh kali ha America.

La iathuh ba U Archbishop, ula khlad noh ha ka 10tarik Risaw 2019, katba u dang leit jingleit da ka kali ha Colusa county, Oakland, CA. La iathuh ba ka jing iatyngkhuh ka kali kaba u shong ka long bad kawei ka trok rit bad ka jingmynsaw, ka long jur shi katdei bad kaba la shim noh ia ka jingim jongu.

Ha katei ka jingleit U Archbishop, u don lang bad U Fr. Mathew Vellankal ha kajuh ka kali.

Ka khubor na U Fr John Madur Chancellor ka thoh ha ka ktien phareng “Please pray for the departed soul” and added “More news later”.

Nangta sa ka tweet jong U Andrew Raymond Wardswarth, ka thoh ba U Archbishop, ula khlad ha ka jing ia tyngkhuh kali.

Shillong: U bah Titos Chyne u ba long u Working President jong ka United Democratic Party (UDP) u la iathuh ba ka jing pynkhreh ia ka Elekshon shiteng samoi, ka long kaba iaid shait shait ha ka ba u nong ialam kane ka seng u bah Metbah Lyngdoh ki MLA bad ki MDC ki la tur kylleng kylleng ha man ki thain jong ka Shella Constituency.Ka party na duh ba dang don U Dr Donkupar Roy ruh ka khlain ha duh mynta ruh ka dang khlain hi kumjuh.

U la ia thuh ruh ba ka jing mih jong ki kyrtong bapher bapher ban ia khun ia ka elekshon shiteng samoi ha Shella Konstituensi ka dang pynmyntoi hi ia ka seng UDP. “Namar baroh ki don la ki jong ki vote bank kum ka Congress ha ka ba 2 ngut ki kyrtong ki ban ia khun ha kaba iwei ki ba khlem ioh tiket te i la mih ban ia khun marwei bad baroh ar ngut ki don la ka jong ka vote bank; ka PDF ruh ka don la ka jong ka vote bank hynrei kam khlain shuh kumba ka khain ha u snem 2018, hynrei na ka liang u BJP u dei u kyrtong u dei ba thymmai bad bun na ki paidbah kim ithuh ia u ha konstituensi bad kum ba ka BJP ka shaniah ia ki vote bank na ki non tribal, hynrei ki non tribal mynta ki la sngewthuh ba kane ka dei election MLA kam dei ka Election MP bad nangta ki ki sngewthuh ba ki donkam ia u nongialam ha poh Konstituensi bad u kyrtong UDP namar u dei u trai shnong nangtei bad ki sngewthuh hi ba ki dei ban kyrshan ia u briew u ba na ka thain.
Halor ka jing ong ba ka dei ka BJP ka ba lah ban ai ia ka roi ka par ha ka Shella constituency, U bah Titos, u la ong “Lada ki lah kumta te balei um lah ban leh ia ka jylla hi baroh ka wei”. Halor ki jingong ba baroh ki skim kiba wan na sorkar pdeng ki hap ban ia syllok shuwa ia ka jing mynjur na ka BJP jong ka jylla u la ong “Ngam tharai ba ka Sorkar pdeng kan trei kam kumta bad kata ka long tang ka jing sngew jong u bah Sanbor Shullai, namar ki ruh ki trei na ka bynta ka roi ka par hi lada long kumta ki jylla bym don ka BJP te kan duh noh ia ki kam pynroi, hynrei ka BJP central ka trei ban kyntiew ia ka roi ka par jong baroh ki jylla ha ka ri hi baroh kawei”.
U la bynrap ruh ba mynta ki kren shaphang ka jing sah dien ka jing sniew jong ka surok, hynrei kim kynmaw ia kaei ba u Dr Donkupar Roy u la trei, ha kaba ki don ki surok kiba bun ki ba la u la shna bad ban ong u khlem leh eiei ha kine ki 31 snem ka long kaba bakla.
U Bah Chyne, ula ong “La ngi shim ia ka surok na Mawmluh sha Mawshamok por ba jop U bah Don, kim pat siang rong, hynrei mynta ki la siang rong da ngi shim ia ka surok na Mawsmai sha Shella ka dei ka single lane hynrei ha ka por U Dr Donkupar Roy ki la ban pynheh.Ki jingkieng mynswa ki dei ki jingkieng dieng hynrei ha ka por U Dr Donkupar la lah lut ban pynkylla sha ki jingkieng ba la shna da ki dewbilat ka jing kieng ha ka Wahrew la dep shna da ka jingkieng hi ka ba itynnad ka la pynlut da ki klur tyngka, hynrei kumno ki ong ba khlem trei eiei ha ki 31 snem.”

Nongpoh: Uwei u rangbah uba la tip kyrteng kum u Dum Bokca (48) snem, na ka shnong Barigang ha ki thain Patharkhmah, Ri Bhoi District, la kynnoh ba u la bthat noh iala ka jingim ha u tyllai phasi, tang namar ba u la shah kyntait ha ka por ba u pan jingiarap na ki nongtrei hapoh ka State Bank of India ha Patharkhmah Branch, kaba dei ruh kaba utei u rangbah u la pan jingiarap na kitei ki nongtrei, na ka bynta ban sei ia ka Tulop, kaba u dei ban ioh.

Haba pyntip halor katei ka jingjia kaba la jia naduh ka 4 tarik mynta u bnai, u Bah Comfort Doloi, uwei na ki riew rangbah ha ka thain Patharkhmah, u la iathuh ba u tei u rangbah uba trei kum u muster roll ha ka tnat PWD.

Haba batai bniah halor ka daw kaba la pynlong ia utei u rangbah ba un bthat noh ia ka jingim, u Bah Comfort Doloi, u la iathuh ba ka la don ka sngi kaba utei u rangbah u la thmu ban leit sei pisa na katei ka SBI ha Patharkhmah, kata hadein ba ka tnat PWD ka la pynlait ia ka tulop jong u ha u ne u bnai.
U la iathuh ruh, ba ynda utei u rangbah u la poi ha katei ka Bank, u la thoh da ka withdrawal slip ban ioh ban sei ia ka pisa, hynrei dei hadien ba u leit mih ha ki counter u la shah kyntait ban ioh ia ka pisa, namar kitei nongtrei Bank ki la ai daw ba um lah ban sei pisa da ka withdrawal slip, hynrei u dei ban sei beit da ka ATM card.
Hynrei utei u rangbah, u la pynshai ba um don satia ia ka ATM bad kyrpad ruh ban pyniarap ban iohlad ban sei ia ka pisa jong u, na ka liang ki nongtrei katei ka bank ki la kyntait beit war, iathuh u Bah Doloi.
Kumta namar ka jingbyniaw halor ka jingbym ioh ban sei ia ka Tulop, utei u rangbah u la mih bak na katei ka bank da jingsngewsih kaba khraw bad ynda u la poi haing u la sdien phasi syndon ialade, pyntip u Bah Doloi.
Haba iadei bad katei ka jingjia ba sngewsih, u Bah Comfort Doloi u la kyrpad ia ki bor bahalor jong ka State Bank of India, ba kin phah ban tohkit halor katei ka jingjia bad ruh ban shim ia ki lad ki lynti kumno ban pynbha bad pynbiang ia ki rukom ai jingshakri da ki nongtrei jong ka SBI Patharkhmah Branch.

New Delhi: Ka jingiakren hapdeng ki heh ka NSCN (IM) bad ka sorkar India, ka kut hyn shisngi, ha ka jing ia ther tyngeh ba mar kylliang, ong ka khubor ba la ioh lum.

La iathuh ba ka jing ia patied nia, ka jur bha halor ka lama ia ki jaitbynriew Naga bad nangta sa ka jing iateh kaba pura, ban pyn kut noh ia ka jingiakren, kaba la iai bteng la da ki phew snem.
Ka jingiakren hynnin ka sngi, ka dei hadien ba la buhteng la ar bnai mynshwa.
U RN Ravi, uba dei u nongkren jong ka sorkar India bad u Lat ka Nagaland, u ialam ia ka jingiakren na ka liang jong ka sorkar bad U Th Muivah, uba dei U General Secretary ka NSCN (IM), u ialam na ka liang jong katei ka seng.
Ka jingiakren, la iathuh ba kam poi satia shaei shaei ruh, hadien ba la ia tai la bun kynta bha.
Namar ba ka jingiakren kam poi satia shaei shaei ruh, kumta ka la kut noh ka jingiakren khlem poi sha kano kano ka rai, ong ka khubor.
La iathuh ba U Ravi, ula iakren shwa hynnin ka sngi bad U Narendra Modi, myntri rangbah duh hynnin ka sngi, ha shwa ba un iakren bad ki heh ka NSCN (IM).

Shillong: Ka Khasi Hills Autonomous District Council (KHADC) ka la bthah ia ka Hima Nongstoin, ba kan leit lum jingtip ia ka jingdon ki bar jylla kiba leh kam khaïi bad kiba bylla ha ka thain Shahlang bad ha iew Shahlang khnang ban pynshisha naei ki wan.

U Executive Member ba peit ia ka iew ka KHADC u bah Jambor War, ula hukum ia ki nongsynshar ka Hima Nongstoin mynta ka sngi ha ophis treikam jongu hadien ba la ioh ia ka jingujor na ki sengbhalang kynthup na ka HYC, HANM bad WYF ia ka jingjyllei ki bar jylla ha ka thain Shahlang bad ka iew Shahlang.
“La bthah ia ka Hima Nongstoin ba kan leit ban lum jingtip ia ki bar jylla kiba leh kam khaïi bad trei bylla kiba don ha ka thain Shahlang bad ha iew Shahlang, khnang ban tip naei ki wan bad ki dei ban pynshisha na ka jaka ba ki wan ryngkat ki kot ki sla, ka jingpynshisha na ki pulit jong kata ka jaka ba ki wan”, la ong u bah Jambor.
U bah Jambor u la ong ba ka Hima ka kubur ba ka long kaba shisha ba ki bar jylla ki jyllei bha ha ka thain Shahlang bad ka dei kam kaba la slem bha ba ki don ha katei ka thain.
Halor kane, u EM u la iathuh ba ka Hima kan pyntreikam da ka Administration of Nongstoin Syiemship Rule 2006, kaba mana ba u dkhar ne bar jylla um lah ban shong ne trei bylla ne kylla nongshong shnong hapoh ka hima bad la aiti ha ka Hima ba kan leit ban ïit bniah ia ki briew ba ki dei ban wanrah ki kot ki sla ne jingpynshisha na ki pulit.
U la iathuh ba ia kane ka iew ha Shahlang la pyniaid da ka kur Sohbar bad ka kur Songsak kaba la don naduh mynshwa hynrei kam pat ioh bor ne permishon na ka Council. Ka Hima kan pan ia ka kaiphod na ka Market Committee kaba peit ia kane ka iew Shahlang bad kan sa ai ia ka jingtip pat sha ka KHADC.
Katkum ka jingong u EM, ka don ka jingeh na ka liang ka Hima namar ba katei ka thain ka dei kaba shong bun ki bym dei Khasi bad dei na kane ka daw, ka la kham jingeh khamtam ha kaba iadei bad ka jingmih katei ka iew ha ka thain Shahlang.
U la ong ba ka Hima ka dei ban bthah ia kito ki bar jylla kiba biang ki kot ki sla ba lada ki dei ban trei ki dei ban ioh ka Labour License na KHADC bad kiba leh kam khaïi ki dei ban ioh ia ka Trading license.
U bah Jambor u la ong ba lada ka Hima ka iakynduh ia kano kano ka jingeh ka dei ban pyntip ne rah sha ka Council.
Ha kajuh ka por, u Executive Member ba peit ia ka iew ka KHADC u bah Jambor u la pyntip ba ka Council ka la bthah ia ka Hima Nongstoin ba ka dei ban pynmih ia ka jingbthah sha baroh ki shnong, ki bor pyniaid iew ba ki dei ban pynjari da kaba tyngeh ban khang noh ia ka jingpyndonkam ia ka plastik.
Kane ka long hadien ba ka Council ka la sdang ban pynjari ia ka jingkhang plastik na Iewduh, Shillong ba la pynbud sa ha Sohra, kaba dei ka sienjam ba ka Council ka la leh ban iada ka mariang na ka jingktah ki plastik.
U EM u la ong ba ka Council ka la kyntu ia baroh ki iew naduh jong ki Hima, ki shnong, ki Raid ne ki riew shimet ba kin pyntreikam ia kane ka rai ka Council ban khang pyndonkam plastik noh ha ki iew.

Shillong: Ka KJP Synod Sepngi, ka pynrem tyngeh, ba ki don kiba pyndonkam bakla ia ka kyrteng jong ka Synod ha ki social media, na ka bynta ban pynbudnam ia ka kyrteng jong ka Synod, ha kaba pynmih ia ka jingsngew iapher jingmut, ka jingsngew iapher jaitbynriew bad ka jing ia bishni hapdeng ki kynhun niam bapher.

Ka KJP Synod Sepngi, lyngba U Rev KB Snaitang, Executive Secretary, ka KJP Synod Sepngi, ka la rai ban phah tohkit halor katei ka jing pynbudnam ia ka Synod bad ka la aiti sha ka Cyber Assistant Cell CIB, Shillong ba kan wad ia ka tyllong jong kitei ki nong thad khubor, kiba la pynjah burom ia ka kyrteng jong ka Balang.
La ong ba katei ka jingleh, ka pynmih ia ka jing iapher jingmut ruh, hapdeng ki nongialam bapher jong ka Balang.

Shillong: U President rangbah ka NPP u Conrad K Sangma uba dei ruh u myntri rangbah ka jylla u lah ban hiar sha Shella ban ialap elekshon ia u kyrtong ka UDP u bah Balajiedkupar Synrem.

Haba iakren bad u nongialam ka UDP u bah TW Chyne u la iathuh ba watla ym pynthikna ia ka sngi, hynrei la pynbeit ba u Conrad u lah ban hiar ha ka 19 tarik mynta u bnai sha Shella ban ialap elekshon ia u kyrtong ka UDP.
“U Myntri Rangbah u Conrad u lah ban hiar ha ka 19 tarik mynta u bnai sha Shella ban ialap elekshon ia u kyrtong ka UDP”, la ong u bah TW Chyne haba kren myn hynnin ka sngi.

La sngewthuh ba nalor u Conrad kiwei pat ki nongialam ka NPP kin hiar ban ai ka jingkyrshan ia u kyrtong ka UDP.
Ha kane ka taiew ba la dep ruh, u nongialam ka NPP u bah Prestone Tynsong uba dei ruh u symbud myntri rangbah ka jylla, u la iadon lang ha ka jingialang jong ki nongialam ka UDP bad ka NPP kiba hap ha ka thain Nongshken konstitwensi ha ka MDC, katba ha ka MLA ki hap sha Shella kum ka Umniuh-Tmar, ka Nongjri, Mawkliaw bad kiwei.
Kane ka jingialang ka la long ha Pynursla ha kaba la don lang ki nongialam ka UDP naduh u bah Metbah Lyngdoh uba dei u president, kong Banalari Khongwar, bah Balajiedkupar Synrem bad u bah Teinwel Dkhar uba long u CEM ka KHADC nalor kiwei ki nongialam ka UDP.

4 ngut ki samla shynrang ki la ngat ha ka jing jia aksiden ha ka ba 3 ngut ki  la khlad ha shen bad uwei u la mynsaw jur hadien ba ka kali ka ba dei ka local taxi ka ba don ia u number ML04-A-9678 ka la leit tynrah hi nadien  ka trok ka ba don ia u number NL01-G-6757 ha ka por 3 baje mynstep ha Umsning. Ki ne ki ba khlad ki long u Pynshai lang Ryntathiang, u ba 28 snem ka rta  bad u Banshanlang Ryntathiang,u ba 26snem ka rta ki ba dei shipara bad ki dei ki khun jong u bah  Yearly Khongwar na Lumshyiap, Shillong bad u wei u Alwinly Khongwar, 32snem ka rta u khun jong u  Demion Khongngia ba  Jaiaw, Lane Salane, Shillong.  Kat ba uwei napdeng jong ki pat u ba kyrteng u Wankitbok Kharmawlong, 28snem ka rta u la mynsaw jur ha kane ka jingjia ha kaba la rah noh sha Civil Hospital,ban sumar.

Shillong, Risaw 12:  ka khubor jong ka jing khlad kyndit  jong u  Archbishop Rev Dominic Jala    jong ka jylla niam bah Shillong ha ka jingtyngkhuh kali ha Colusa County ha California ,America kala wanrah ia ka jingiam briew ha ki paidbah riewngeit jong ka Balang Katholik.
    Ki khubor ba la ioh lum  na iing bishop kila iathuh ba ki dang ap jingtip namar haduh mynta kim pat ioh ia ka jingtip ba lano ka met jong  u Archbishop Rev Dominic Jala   kan poi sha Shillong.
      Ka jingtyngkhuh kali kala jia ha ka shnong Colusa, ha kaba kawei ka trok kala wan ban tynrah nadien ia ka kali kaba u Arcbishop shong,ha kaba U Archbishop Dominic Jala lem bad u Father Mathew Velenkal jong ka St Bonaveture ki la khlad ha shen kat ba i Father Joseph Parekkatt i ba don lang ha ka ne ka kali i la shitom jur bad i dang don ha hospital ha pdeng ka jingsumar.
      Ia u Archbishop Rev Dominic jala la kha ha ka 12 tarik u naitung 1951 ha Mawlai Phudmawri, u la rung sha ka jingiasyllok riewniam Silesian bad la pynkyntang lyngdoh ha u snem  19 tarik u Naiwieng 1997 bad u la shah jied kum u Bishop bad pynkyntang bishop ha ka 02 tarik u Iaiong 2000  ban peit ia ka jylla niam bah Archdioceses Shillong.

Shillong: U Conrad Sangma, myntri rangbah ka Jylla, u pynpaw ia ka jingsngew duh kaba khraw halor ka jingkhad U Archbishop Dominic Jala, uba la long kum U Lyngdohniam la 41snem kynthih bad kum U Archbishop la kumba 20snem eiei.

U Conrad u ong ba U Archbishop, u dei u paralok ba iajan bha bad u kpa jongu bad u dei uwei na kiba ai mynsiem bha ha ka por jong ka jingsngewsih ha ka iing jongki. “U dei u briew uba shemphang bad u ju ai jingmut ia nga ha ka kam ban shakri ia ki paidbah” ong U Sangma bad u phah ruh ia ka jingsngewlem ha ka kyrteng jong ka sorkar Jylla, halor ka jingkhlad U Archbishop.

U Bah DD Lapang, ula phah ka khubor sngewlem halor ka jingkhlad noh jong U Archbishop Dominic Jala , uba la khlad ha ka jing ia tyngkhuh kali ha USA. U Bah Lapang, u ong ba u dap da ka jingsngew kyndit, haba u ioh jingtip, mynta ka sngi halor katei ka jingjia.

“U Archbishop Jala, ula aiti ia la ka jingim, ha kaba shakri ia ki paidbah lyngba U Jisu Christ” ong U bah Lapang. “Ka jingkhlad jong U Archbishop Jala, ka dei ka jingduh ia ki balang bad ia u paidlang ka Jylla hi baroh lang” ong utei u rangbah.

Ha kawei pat ka kyrwoh ba la phah da u bah M.M.Thaiang, la ong ba ki paid khristan Katholik na Labang-Nongphyllut, Elaka u Doloi Nongphyllut, ki pynpaw ia ka jingduh ka bakhraw ha ka jingkhladnoh kaba ym poi pyrkhat jong u Most Rev. Dominic Jala SDB,u Nongsharai uba ju wan peit wan jngoh ia ki paid khristan ka thain na ka por sha ka por bad ha kaba um iohlad shuh ban pyndep bad pynurlong ia ka jingkwah bad ka jingthrang jong ki ( Labang-Nongphyllut) ban don hapoh ka jingpeit jingkhmih jong ka Diocese Jowai.

Ka kyrwoh ka phah ka jingsngewlem sha kiba ha iing hasem , sha baroh ki Phadar kiba trei hapoh ka Archdiocese Shillong bad duwai na ka bynta ka jingjahthait ka mynsiem jong u Archbishop Most. Rev. Dominic Jala.

U Mukul Sangma, nongialam liang pyrshah, u pynpaw ia ka jingsngew kyndit bad sngew diaw mynsiem halor ka jingkhlad noh jong U Archbishop Dominic Jala bad u ong shuh shuh “Manga bad ka iing jongnga, ngi phah ia ka khubor sngewlem sha kiba ha iing kiba iajan bad ia ki dkhot jong ka Shillong Archdiocese”.

Ka Meghalaya Pradesh Congress Committee (MPCC), ha ka jing ia kynduh ba kyrkieh jong ka mynta ka sngi, ka pynpaw ia ka jingsngew kyndit bad sngewsih jur halor ka jingkhlad jong U Archbishop Dominic Jala.

La pynlong ruh ia ka jingsngap jar kaba ar minit bad pynpaw ia ka jingsngew lem halor ka jingkhlad U Archbishop.

Ka MPCC, ka phah ruh ia ka jingsngewlem halor ka jingkhlad jong U Fr Matthew Velankal, U Fr ka St Vonaparte uba khlad lang ha katei kajuh ka jingjia bad ka seng ka kitbok kit rwiang ba un nang ioh bor noh U Joseph Parrekatt, uba don ha ka jingshah sumar ha Hospital.

U Myntri Rangbah Duh ka Ri u Narendra Modi u la pynsngew ia ka jingsngewsih kaba jur halor ka jingkhlad kyndit u Rev. Domnic Jala, u Archbishop ka Shillong.

Ha ka tweet kaba u la phah ha ka sngi Saitjain, u Myntri Rangbah Duh ka Ri u la ong ba u la dap da ka jingsngewsih halor ka jingkhlad noh jong u Archbishop. U Modi u la ong ba ki briew kin kynmaw shyrta ia u Rev. Domnic Jala “Namar jong ki kam jong u na ka bynta ka imlang sahlang bad ka jingniewkor jong u ia ka roi ka par ha ka jylla Meghalaya. To ai ba ka mynsiem jong u kan shong jahthait.”

U Archbishop ka Shillong u Rev Domnic Jala u la khlad noh ha ka jingtyngkhuh kali ha California, United States ha ka 11 tarik Risaw 2019.

La ithuh ia u kum u phadar jong ka Salesians of Don Bosco ha ka 19 tarik Naiwieng, 1977. U la long u provincial jong ka Guwahati province shuwa ba u la shimti kum u Archbishop ka Shillong ha u Nohprah 1999.