Shillong: Ki la mih ha ki kotkhubor bad ki news portal, ba ka Legal Rights Observatory (LRO), ka la ujor sha U Chief Secretary, U Secretary ka tnat ka koit ka khiah bad kumjuh U Deputy Commissioner, ha kaba ki dawa ban weng noh ia ka Bible na Civil Hospital, Shillong.

Katei ka jing dawa, ka dei haden ba ka Jaintia Students’ Union, ka la dawa ban weng noh ia ka dur blei Ganesha, na ka ophis jong ka National Institute of Technology (NIT).

La dawa da ka LRO, ba dei ban weng noh ia ka Bible, ba kan don ka jing laitluid ka synshar paidbah halor ka kam ai dawai dashin.

“Ha kaba bteng ia ka phang jong ka jingweng dur blei thaw na NIT, ngi dawa ia ka sorkar jylla, ba kan weng noh mardor ia ki kot bah, kiba la ju buh hajan jingthiah jong ki nongpang ha Shillong Civil Hospital, ong ka LRO.

“Ban buh ia ka Bible, hajan ka jaka thiah u nongpang bad ban pynbor ia ki bym long Khristan ba kin pule, ka dei ka jingthombor ia ka hok laitluid u briew shimet” ong ka LRO. La ong ruh ba katei ka long pyrshah ia ka article 18 jong ka UN, kaba dei halor ka Universal Declaration of Human Rights.

Ha kajuh ka por, la dawa ruh ban khang noh ia ka jingleit jong ki riew niam sha Hospital, namar ba ki ju pynbor ia ki bym long niam ban pule Bible, ba kin ioh khiah.

“Ngin sa dawa na ka tnat ka koit ka khiah jong ka sorkar India, lada ym shym don kano kano ka rai halor kane ka phang” ong shuh ka LRO.

Shillong: Ka Meghalaya ka la khur ia ka nam jop ba-ar hadien ba ka la pynliem ia ka Manipur da 3 wickets ha ka jingiakhun Vijay Hazare Trophy plate group ha ka sngi Saitjain ha Dehra Dun.

Ka Meghalaya ka la pynmih madan ia ki juh ki pleiar jong ka thup XI, u Dipu Sangma ula mih ha ka jaka Wallambok Nongkhlaw.

Ha ka jingialehkai ba 40 over ka Manipur ka la kam ban tyied nyngkong bad ka la kamai 90 run bad shah pynhap baroh ki wkt ha ki 25.1 over.
U Sanjay Yadav ula khur 3 wkt ha ki 19 run. u Abhay Negi (2/14) bad Akash Kumar (2/24) ki la khur mar 2 wkt katba u Aditya Singhania ula khur 1 wkt (1/16).
Haba ban wan beh nadien ka Meghalaya ka la iakhun tyngeh bad poi sha ka thong ba buh da 94 run bad shah pynhap noh 7 wkt ha ki 18 over.
Haba kaba sdang ka Meghalaya ka la duh jingkyrmen haba ka la shah pynliem 3 wkt bad kamai tang 2 run, hynrei rangialehkai ba kynsai u Punit Bisht (29) bad Ravi Teja (19) ki la ialehkai suki bad kamai ar ngut 42 run.
Hadien ki la shah pynliem noh bad lyngba u Amiangshu Sen (15 not out) bad u Negi (16 not out) ka Meghalaya ka la lah ban poi sha thong jingjop.
Ka Meghalaya kan pynkhreh ia ka jingiakhun ban wan pyrshah ia ka Mizoram ha ka 8 tarik.

Shillong: Ka Nongrim Hills Sports Club ka la pynliem noh da 2-1 ia ka Nangkiew Irat ha ka jingialehkai Shillong Premier League ka SSSA ha ka sngi Saitjain ha madan JN Stadium Polo.

Ia ki kol na ka Nongrim Hills la thep da u B. Swer ha ka 13 minit ka kylla step bad u N Bina ha ka 54 minit jong ka kylla miet.

Ka Nangkiew Irat ka la pynphai shikol lyngba u D.Syih ha ka 18 minit jong ka kylla step.
Ka jingialehkai mynta ka sngi (07/10/19) ka Langsning FC pyrshah ia ka Rangdajied United FC ha ka por 3 baje.

Shillong: Ki nongialam ka NPP na ka jylla bad kumjuh U President rangbah u Conrad K Sangma uba long ruh u myntri rangbah jylla, kin hiar sha Shella ha ka taiew ban wan ban ialap elekshon ia u kyrtong ka UDP bah Balajiedkupar Synrem ha kane ka elekshon shiteng samoi na Shella.

Katkum ka khubor, nalor u Conrad, u symbud myntri rangbah bah Prestone Tynsong bad kiwei ki nongialam kin hiar sha Shella ban pynthikna ba u kyrtong ka UDP un ioh ia ka jingjop.

Ka NPP kam shym la pyniakhun kyrteng na Shella ha kane ka elekshon shiteng samoi bad ka la rai ban kyrshan ia u kyrtong ka UDP kum ka jingburom ia u Dr Donkupar Roy uba la khlad kyndit noh.
Ki nongialam ba hakhmat jong ka seng HSPDP ruh kin leit ban ialap elekshon na ka bynta u kyrtong ka UDP.
U President ka UDP East Khasi Hills u Bah Titosstarwell Chyne u la iathuh ba u Myntri Rangbah ka jylla u Conrad K Sangma, u Symbud Myntri Rangbah ka jylla u Bah Prestone Tynsong, ki MLA, ki MDC bad ki nongialam bahakhmat ka HSPDP kin leit ban ialap elekshon na ka bynta u Bah Balajiedkupar Synrem ha kine ki sngi ban wan.
“Ka jingiakhun ha Shella kala long kaba shai kdar ba u kyrtong ka UDP yn jop suk iaka elekshon katba kiwei kiwei ki kyrtong kiba iakhun ki iaknieh iaka kyrdan ka baar ha katei ka elekshon” ong u Bah Chyne.
Ha kawei pat ka liang, ula iathuh ba 40 ngut ki nongialam jong ka seng Congress bad PDF kila leit ban pyniasoh bad ka UDP ban ai jingkyrshan ia u Bah Balajiedkupar Synrem ba yn jop iaka elekshon.
U Bah Chyne u la ong, kitei ki 40 ngut ki nongialam kidei na ki Unit bapher bapher jong ki shnong kiba don ha Shella Constituency bad la pdiang ia kine da u kyrtong ka UDP u Bah Balajiedkupar ha kaba la iadonlang ki nongialam bahakhmat jong ka seng UDP.

Nongpoh: Uwei u samla uba la tip kyrteng kum u Augustine Shadap (25) snem, u la mynsaw jur hadien ba u la hap sha kawei ka riat kaba jylliew bha, kaba don ha u wei u lum u ba ju tip kum u Lumknia ha Nongpoh.

Ka jingtip kaba la iohlum, la iathuh, ba u tei u samla u dei uba shong basah ha ki thain Down-Gate, Nongpoh Proper bad katei ka jingjia ka la jia ha ka 3 ne 4 baje ei ei hynnin ka janmiet.

La iathuh ruh, ba halor katei ka jingjia, ki briew na ka Fire Service (Rescue Team) ki la leit mar mar sha katei ka jaka na ka bynta ban iarap ia utei u samla, ha kaba ki la lap ruh, ba u tei u samla u don hapdeng ka jingshoh jong u khawiang, kumta na ka liang ki Pulit ki la pynkit noh marmar sha Nongpoh Civil hospital, hadien kata pat la rah noh sha ki jaka sumar sha Shillong, namar utei u samla u la mynsaw jur na katei ka jingjia.

Shillong: U Director ka phlim Iewduh u bah Pradip Kurbah bad u tyngshop jong ka phlim Iewduh u bah Albert Mawrie ha ka 5 tarik u Risaw 2019, ki la leit mihkhmat ha Busan International Flim Festival 2019 ka ba la pynlong ha ka ri South Korea.

U bah Pradip kurbah bad u Albert Mawrie ki la shah khot sngewbha ban leit ban mihkhmat na ka bynta ka phlim jong ki “Iewduh”.

U bah Pradip Kurbah u ba dei u director jong ka phlim Iewduh, u la shah jied ia ka kyrteng kum u wei na ki director u ba lah ban ioh ia ka Kim Jiseok Award ha Busan International Flim Festival 2019.
Ia ka phlim Iewduh yn sa pyni ha ki 11 tylli ki Jylla ha ka ba nalor ka Jylla Meghalaya,ia ka ne ka phlim yn pyni ruh ha Delhi, Mumbai, Pune, Bangalore, Kolkotta, Assam, ArunachalPradesh, Nagaland, bad ha Manipur.
Ia kane ka phlim, yn pyllait paidbah ha ka 15 tarik u Naiwieng 2019.

Jowai: Ka Star Cement ka la ioh ia ki jingkyrshan na ki seng baher baher na ri lum Jaintia, East Khasi Hills bad kumjuh na ribhooi halor ka jingthmu jong ka ban tih marshun na ka par kaba heh haduh 42 hacter kaba don ha ka shnong Brishyrnot ka thain Lumshnong.

Kitei ki Seng kiba la ai ka jingkurshan da ka jingthoh ba la phah sha u Member Secretary ka Meghalaya State Pollution Control Board ki la don haduh 19 tylli kiba kynthup ia ka Youth and Unemployment Organisation, West Jaintia Hills, Jowai Citizenship Association, Poor People Conference Organisation, Jaintia Hills, Khasi Jaintia Farmers Association, Umphyrnai, East Khasi Hills, The Dorbar Shnong Bamkamar, WJH, Thadlaskein Sub area Marketting Society, Phra Shnong Association (Mukhla, Ummulong, Wahiajer, Moodymmai and others), Muskut Mookyndur FMC.

Nalor kine ka North East India Environment Association, Jaintia Hills Branch ha ka shithi sha u Member Secretary ka MSPCB ka la pynpaw ba ka Star Cement ka la wan ha katei ka jaka bad ka la ai ruh ki jingmyntoi ia kiba bun naduh ka ioh kam iohjam ki samla haduh ki kam pynroi ia ki shnong ba don marjan khamtam ia ka shnong Lumshnong. “Halor kane ka nongrim ngi ieng ban ai ka jingkyrshan ia ka Star Cement halor ka jingthmu jong ka ban tih mawshun na katei ka jaka kaba ka la thied na ki paidbah nongshong shnong”, la ong u Secretary ka seng u ma W. Thubru.
Ka Land and Forest owner Association, East Jaintia Hills ruh ka la rai ban ai ka jingkyrshan ia ka Star Cement bad ha ka juh ka por ka la kyntu ia ka bor pyniaid jong ka ban thaw ki lad ban pynioh kam kham bun ia ki briew jong ngi khamtam ia ki samla ba la nang la stad bad ruh ban wanrah ia ki kam pynroi khambun.
Ka Labour Union West bad East Jaintia Hills ruh ka la ai ka jingkyrshan ia katei ka kharkhana bad ha ka juh ka por ka la ai jingmut ban pynioh kam 60 percent ia ki Khasi Pnar. Bad ka la kyntu pat ia ka sorkar ba kadei ban peit ngor ia ka jingjakhlia ka mariang.
Nalor kine ki seng, kane ka karkhana ka la ioh ruh ia ka jingkyrshan ba pura na ki trai trok kiba shalan cement halor ka seng bapher bapher (Transporters Associations) bad ruh na ki Cements dealers Association jong ka East Khasi Hills, Ribhoi bad Jaintia Hills.

Ka jingbuhteng ban maramot ia ka surok bah na Kiratpur Sahib sha Una, ka la pynlong ia ka tnat Public Works Department (Central Works) ban dain kuna T.1.05 lak shi sngi ia ka kompeni Rohan Rajdeep Tollways Limited.

Katei ka kompeni, ka trei ia ka surok halor ka jing iateh, kaba la tip kum ka build, operate and transfer (BOT) bad ka la buh ia ka jaka lum khajna hajan Kiratpur Sahib. Katei ka kompeni, ka dei ban shna pynbha ia ka surok ha U Naiwieng jong u snem ba ladep, hynrei namar ba kam shym la leh satia kumta, U Executive Engineer (XEN) jong ka PWD (Central Works), ula dain kuna ia katei ka kompeni T.1.05 lak shisngi.

U Jaswinder Singh jong ka PWD XEN, u iathuh ba ka kompeni, ka dei ban shna pynbha ia ka surok man la ka san snem bad kaba nyngkong, ka dei ha u snem 2012, hynrei ha katei ka por ruh kim shym la shna pynbha satia. Nangta, ka la dei biang naduh U Naiwieng jong u snem ba ladep, hynrei kim shym la sdang bad hadien ka jing iai pyn kynmaw, kumta ki la sdang maramot ha ka 22tarik Jylliew 2019, hynrei ha katei ka sien, ki la shna tang 500 metre, na kaba dei ba kin shna pynbha haduh 38 Kilometre bad kumta halor katei ka jing pynslem jongki, ka tnat PWD, ka la dain kuna T.1.05lak shisngi, kaba sdang naduh ka 1tarik Jylliew 2019, ong ka khubor jong ka Tribune.

• [ba bteng] Ka jingkhie step ka aibor iaphi – Ki briew kiba duna kapor thiah ki shem baki tlot bad khuslai jingmut. Ki shem ruh baka jinglong jongki ka kylla naka por sha ka por bad bun sien hi ki long khluit khlieh bad kane kam long kaba bha naka bynta ka jingkoit jingkhiah. Da kaba thiah dang shai bad khie dang step kan aibor bad pynjahthait iaka met ka phad ban treikam baroh shi sngi.
• Ban kilan met mynstep – Mynstep kadei kapor kaba biang tam eh ban kilan met. Bun hi kim donpor ban kilan met mynstep namar ka jingkhie slem naba thiah. Namarkata phi dei ban khie kloi mynstep ban ioh kham bun ka por ban kilan met bad ban bud ia ki jingbit jing biang ki kam haka rukom kaba dei.
• Ka jingmyntoi bakhraw haka jing nang jingstad – Katkum ka jing wad bniah daki nongpule jongka Texas University, ki khynnah skul kiba mlien ban khie step ki long smat longsting bad ki kham poi sha khmat ha ka liang ka jing nang jingstad ban iaki khynnah kiba khie slem. Ki khynnah skul kiba mlien ban pule kot mynstep ki long kiba stand bad ki pah ban pynleit jingmut bha namar ka jing jar jar bad hakaba kut jongka sngi ki lah ban pyndep lut ia ki jing pule baroh. Kaba thiah dang shai bad khie dang step kan pynjahthait iaka jabieng bad pynsting iaka jingmut jing pyrkhat jongki. Bad haba ka jabieng ka khuid kan treikam bha bad iarap ban lah pule bha ban poi sha ki kyrdan ba kham halor.
• Ka jing iohthiah bha– Ban thiah dang shai bad khie dang step dei ban don ka por kaba biang haka jaka ban thiah kylla por man ka sngi. Haba phi thiah biangpor hangta phi lah ban khie step bad Kane ka jingmlien khlem pep kan ialam shaka jingiohthiah bha mynmiet namar lada phim thiah biangpor kan pyntlot iaka met bad duh noh iaka bor ban khie step.
• Ka ai jingkoit jingkhiah – Baroh nakine, ki briew hi kiba mlien ban khie step ki kham ioh iaka met ka phad kaba koit bakhiah ban ia kiba mlien ban thiah sngi. Kane kalah ban long namar ka jing khie step, ka jingbam bha mynstep bad kilan met bad ka lah ruh ban dei namar ki duna jing khuslai ban iakito ki ba mlien thiah sngi.
• Ka ai jingkmen – Kham bun naki briew ki beh sha la ki kam ki jam mynstep da ka jingdom, Kane kadei namar ka jing slem ban khie thiah. Ban khie thiah kloi ka ai jingkmen shikatdei eh dei namar jong baroh ki jingmyntoi kiba iadei bad ka jing khie step, ka rukom pyniaid kaba biang, ka jing dep kam kloi, ka jing pyngngad jabieng bad ka koit ka khiah ka ialam sha ka jingkmen kaba kham palat.
• Ka jingbiangpor ha baroh ki liang – Kalong kaba shisha ba ki briew kiba khie step ki kham biang ka por bad lait naka jingjaipdeh la kadei haka liang ka kam ka jam, ka jingbuhpor ne ban shong klas, Ban khie step ka ailad iangi ban poi biang por kaba dalade ka ai jingmyntoi iangi shi kadei eh. Te namarkata to ngin iabud iakine ki nuksa babha kiba ai jingmyntoi iangi baroh shirta ban koit ban khiah bad ban imslem ka rta.

Shillong: Myntan ha ka por 6.06 janmiet, ka la don ka jingkhie jumai, kaba la pynkhih malu mala ia ki iing ki sem ha Assam, Meghalaya bad ha Manipur ruh kumjuh.

Na ka liang ka National Centre for Seismology and the Indian Metrological Department kam pat ai jingtip satia, halor ka jingkhih jur jong utei u jumai.

Guwahati: Saw ngut ki nongtrei ka NEEPCO, ki la shu iap ei, haba ka um kaba khlain bor jong ka Kopili hydro electric project kaba don ha Umrangsu jong ka Dima Hasao District jong ka Assam, ka la bthei mynta ka sngi, ha ka por 6.30 mynstep.

La iathuh ba na kitei ki 4ngut, ki kynthup ia arngut ki junior engineer bad nangta sa arngut ki nongsar iing, kiba la duh ei, ia la ka jingim, ha katei ka jingshah rong ha ka um saw mynta ka sngi.

Katei ka projek, kaba la pyntrei da ka North Eastern Electric and Power Corporation (NEEPCO), ka la pynshlei lut ia ka jaka sam bor ding, ong ka khubor.

Ki bor pyniaid jong ka NEEPCO, ki la pan jingiarp na ka National Disaster Response Force (NDRF) bad na ki shipai Assam Rifles, ba kin iarap ban teh lakam ia katei ka jingshlei um kaba triem.

Ka jingkhlain jong ka jingkynshait jong ka um, la iathuh ba ka long haduh 14hajar litar ha ka shi sekhon bad ka jingkyan jong ka um, ka kynting jrong sha suin, ha ka por jong ka jingbthei mynta ka step, ong ka khubor. Ka jingjur jong ka jingshlei jong ka um, ka la pynshlei mam ia ki katto katne ki bynta jong ka nongbah Umrangsu.

Ka Kupli projek, ka dei kaba don 275 MW ka bor ding bad ka dei kawei na ki projek bor ding ba khlain bha ha Assam. Katei ka projek bor ding, ka sdang trei kam ha u snem 1976.

Mumbai: Ka Mumbai Metro Rail Corporation (MMRC), ka pynshai mynta ka sngi, ba ka la dep pom ia 2,141 tynrai ki dieng, ha ki bynta ba shatei jon gka Mumbai, ha Aarey Colony bad kaba heh 33 hectare bad ka daw ka long na ka bynta ban shna ia ka sem kali bad katei ka jing pyntip, ka dei hadien ka hukum, ba la pynmih da ka Supreme Court, mynta ka sngi, kaba khang ban dang iai bteng ka jing pom dieng ha katei ka jaka.

Ha ka jing pyllait khubor, ka MMRC ka iathuh ba kan nym pom shuh ia ki dieng nangne shakhmat, kat haduh ba ka Supreme Court, kan ai ia ka hukum jongka, hynrei la ong shuh shuh ba ka jingtrei kan iaid shakhmat, ha kito ki jaka, ba la dep pyn ngat ia ki dieng.
La iathuh ba ka jingthmu jong ka MMRC, ka long ban pyn ngat ia 2,646 tynrai ki dieng bad ka jing pyn ngat ia kitei ki dieng, ka la sdang naduh ka miet sngi thohdieng bad katei ka dei hadien ba ka Bombay High Court, ka la kyntait ia ka jing dawa ban pynsangeh.
Katei ka jing pyn ngat dieng, ka la pynmih ia ka jingiakhih pyrshah, ha kaba ki la don 29ngut ki briew kiba la shah kem, namar ba ki khanglad ban pyngngat ia kitei ki dieng.

Shillong: Ka Shillong ha ki 24 kynta ba ladep, kam shym don slap eiei satia bad kumjuh ha Sohra ruh, katba ha Umiam, ka jinghap slap ka long kaba bniop bniop.

Ka jingshit ha ka nongbah Shillong, ka long 23.5 degree kaba shit eh bad 14.5 degree kaba khriat eh.

Ha Sohra kaba shit eh ka long 25. 7 degree, katba kaba khriat eh, ka long 16.4 degree, katba ha Umiam, kaba shit eh, ka long 27.3 degree, katba kaba khriat eh, ka long 18.7 degree.

New Delhi: Ki kot ki sla kiba pyni ia ka jingbuh pisa ha ka fixed deposit kaba long T.8.77 lak ha ryngkat bad ki pisa khutia kiba don baroh 1.5 lak, la lap da ki pulit na ka iing sah jong uwei u nongkhrong, uba la iap ha ka jinshah lymbub kali ha Mumbai.

La iathuh ba u pulit, uba leit sha ka iing sah jong utei u nongkhrong, U Birju Chandra Azad, u hap ban shong hi khui ban niew ia ki bun tylli ki pla, ba la dap ki pisa khutia kiba don haduh T.1.5lak.

Utei u khar khrong u shong u sah hi marwei ha Govandi jong ka Southeast Mumbai.
Ki pulit ki dang wad ia kiba ha iing ba kin shimti ia katei ka pisa jong U Birju bad ia kiwei de kiba don ha Bank. U Birju, ula iap, katba u dang iaid lynti ha ka lynti rel hapdeng ka Govandi bad ka Mankhurd steshon, ha ka 4tarik Risaw 2019, ong ka khubor pulit.

Nongpoh: Kiba ha iing jong uwei u pulit ba la shongthait, uba la tip kyrteng kum u Harka Bahadur (78) na ka shnong Umdihar, Ri-Bhoi District, hynne ka janmiet ki la leit ban ujor sha ki Pulit ka Nongpoh Police Station, namar ba utei u Rangbah ba la noh ka rta um shem la wanphai iing shuh hadien ba u la mih na iing naduh dang step phyrngab.

Ki bahaiing ki la iathuh, ba u tei u rangbah u la mih na iing naduh ka por 5 baje ei ei mynstep, da kaba shong da kawei ka Tourist Sumo khlem da rah eiei ha met, hynrei haduh janmiet ki bahaiing kim tip shano u don bad kaba la pynlong ruh ia kiba haiing ba kin ujor syndon sha ki Pulit.

Ki la iathuh ruh ba u tei u rangbah, u don hapdeng ka jingshitom bad ym pat tip haduh mynta shano u leit bad naduh ba u mih na iing u phong ia ka patlun lyngkot ba rongiong, ka t-shirt ba ronglieh bad ka slipar jri ba rong jyrngam.

Tura: Uwei u khynnah rit, uba 10 snem ka rta, U Sachin Koch, ula iap ei, haba ka trok, kaba u shong, kaba dang leit bret blei ha Purakhasia, West garo Hills, ka la tylliat noh ia u.

U Sachin Koch, u dei uba na ka shnong Borjhora bad u shong hadien jong ka trok, kaba kit blei thaw ha ka shnong Purakhasia hynnin ka sngi, hynrei, ula bakla bad ula hap na ka trok, ha kaba ka la tylliat, da ka shaka kaba na dien, ha kaba ula iap syndon ha shen.

Hynnin ka sngi ha Shillong ruh, U Atul Arora (42) uba na Nongmynsong, ula iap ei, haba ula shah tylliat hi ha ka trok kit blei thaw. La iathuh ba utei u hap na ka trok, kaba don ia u number ML05 C 3959, kaba dang iaid sha ka jaka bret blei ha Polo.

La ioh khubor ba ki shipai ka Turkey, ki la rung mynta sha Syria, na ka bynta ban hiar thma bad pynjem toin ia ki kynhun jong ki Kurds, ha kaba la shim ba ki dei ki ehrang kiba dei ban pyndem noh mardor.

Kitei ki shipai, ki la poi ha ka nongbah Tell Abaid bad Sari Kani, hynnin ka miet, ong ka kyrwoh na ki Kurds.

Na ka liang ka Turkey, ka kyntait ba ka la dep rung sha u pud u sam ka Syria, hynrei la iathuh pat ba ka jingther bom na suin, ka la sdang naduh hynnin ka miet, ha kaba katei ka ri, ka khot ia katei ka jingiakhun, da ka Operation Peace Spring.

Ki shipai jong ka Turkey, ki la ther hynnin ka miet ia ki surok, kiba dei ki lynti iaid ba kongsan jong ki Kurds bad ki jaka ban kit mar bam mardih bad la iathuh ba ka jingther bom, ka la iai bteng hynnin ka miet ha ka nongbah Ras al-Ain, ha kaba ki tup ki man ka Turkey ki ther tyngeh ha katei ka thain.

U Donald Trump, U President ka America, ula pynpaw, ba um pdiang satia ia katei ka jingleh jong ka Turkey bad u khot ba katei ka jinghiar thma, ka dei ka jingmut kaba sniew.

Ka jinghiar thma jong ka Syria, ka sdang tang hadien khyndiat sngi, ba ka America, ka la rai ban mih noh na katei ka Ri.

Ki shipai Kurds kiba la tip kum ka Syrian Democratic Forces (SDF), ki iathuh ba ka jingther bom jong ki liengsuin iapom ka Turkey, ha ka miet jong ka Sngi Balang, ka la pynher mynsiem ia ki nongshong shnong ha katei ka nongbah.

Ka juti, kaba dang shu mih thymmai, ka dei kaba la ai kyrteng Jesus shoes bad katei ka dei ka juti, kaba la buh khyndiat ka um khuid, ha kaba la pyn kyntang da u lyngdoh niam bad ka dor jongka, ka long $3,000 lane kaba shongdor T.2lak tam ha ka pisa India.

La iathuh ba ki don bun bah kiba kwah ban phong ia katei ka juti bad ka dei kaba la pynmih da ka kompeni MSCHF, kaba na Brooklyn.

La iathuh ba katei ka juti, ka don ka um kaba la tong na ka wah Jordan bad nangta la ai rong ban ithuh ba ka don hapoh juti. Ha katei ka juti, la thoh ruh ia ki kyntien jong ka Baibl na U Mathaios 14:25 bad la buh ruh ia shi jaw ka snam, kaba pyni ba ka dei ka snam U Jisu Khrist, kaba don ha ka thylliej jong ka juti.

Ym tang katta, la buh ruh ia ka dur diengphna ha katei ka juti.

La iohi ia uwei u shrieh, uba kiew ha tyrpeng u pulit bad uba bunkam ban iit ksi. Katei ka dei ha kawei ka thanat ha Pilibhit jong ka Uttar Pradesh. La iohi ruh ba katba u pulit, u dang trei kam, utei u shrieh ruh u nang bunkam ban iit ksi bad kam don satia kano kano ka jingsngew wit hapdeng jongki.

Katei ka video, ka dei kaba don 53 sekhon bad ka dei ka jong U Shrikant Dwivedi, uba dei u pulit Inspector, uba dang trei kam, katba u shrieh u dang shong ha tyrpeng bad trut ia u shniuh jongu.

Ym shym la tip pat, la katei ka video, ka dei kaba la ring mynno, namar ba ym shym la don ba batai satia.

Shillong:Mynta ka sngi ki dkhot jong ka Hynniewtrep Youth Council (HYC) NEHU unit ryngkat bad ka HYC Central body ki la leit ban kynduh ia u SP city u Bah Steve Rynjah ban ia kren shaphang ka jingshah shoh jong uwei na ki dkhot jong ka HYC mynnin ka miet 9 u risaw 2019 ha ka por 11 baje eiei.

Haba ia kren bad ki lad pathai khubor u General secretary ka HYC NEHU Unit u Endlang Sawian u la iathuh “Hadien ba la dep ban pynskhem ia ka jingpyn kit kam kum ba 11 baje eiei myn miet, ki briew kiba don 10 ngut eiei ki briew ki bym lah ban ithuh ha ka ba ki la sop la spain ki la leit ban shoh ia u wei na u dkhot ka HYC NEHU unit ha ka kamra number ba 18 ha hostel kupli NEHU.”

U la ia thuh ruh “Kine ki briew ki la wan rah da ki tiar ki tar bad rung beit beit sha kamra bad kylli beit ia ki mano ba dei u dkhot HYC te ki la shu shoh shu dat bad byrngem ruh ia u ba u dei ban weng ia lade na ka HYC.”

Ym tang une u khynnah, hynrei u wei u khynnah u ba dei na ka jait bynriew Assamese ruh u la shah shoh lang ha kine ki briew.

Na ka liang ka HYC ki la ujor da ka ejahar ha Mawlai Police Station pyrshah ia kine ki briew mynnin hi ka mied bad mynta ka sngi ki la wan ban kyrpad ia u SP city ba un shim khia ia kane ka jing jia ha NEHU.

Na ka liang u bah Steve Rynjah u la kular ba un shim khia ia kane ka jingjia khang ban ioh kem noh ia ki ne ki runar ki ba don kti ban shoh pynmynsaw ia kine ki khynnah pule ka skul bah NEHU.