AIS Suja

U Blei u la ai ia u khun na Israel, ban pynim ia ki jaidbynriew ka pyrthei
baroh. U Blei u la mut ruh ban pyllong syiem ia ka Israel bad synshar halor ki ri ka pyrthei bad kan long ma ka ka syiem ha ka pyrthei, namar ha Israel ki don ki briew jong u Blei kum u Abraham, u Isaak bad u Jakob bad kiwei, bad dei namar ba u Blei u la dep kular ha u Abraham bad ki kaba ong – “Ha u symbai jong me yn kyrkhu ia ki jaidbynriew ka pyrthei baroh” ki kam Apostol 3:25.

Ka por ka la jia, “Haba la jia ka ia ba biang u Blei u la phah ia la u khun uba la kha na ka briew, ia uba la kha hapoh ka hukum. Galatia 4:4, mynba dang trei kam ki ain u Moses. U Blei u la phah ia u khun (Jisu Khrist) sha ka pyrthei lyngba kawei ka jaid bynriew Jiw ha Israel. Kumta ka ong ka ktien u Blei : “U la wan sha kiei kiei la ki jong (jaid bynriew Jiw), kita kiba dei la ki jong kim pdiang ia u” Ioannis 1:11.
La kha ia u Jisu ha Israel ha Bethlehem Judia, “U la don ha kane ka pyrthei ka pyrthei ka la don bad u pynban ka pyrthei kam shym ithuh ia u” Ioannis 1:10. Ki Jiw ha Israel kim ithuh ba uta u Jisu u dei u khun u Blei ba la phah da u Blei na bneng, kim shym pynbna ne ngeit ha ka kyrteng jong u, hynrei ki kyntait pynban ia u.
Ka jingkyntait jong ki Jiw ia u Jisu Khrist ka long ka jingduh bakhraw jong ki, namar ki la ialeh pyrshah ia ka jingpynim bakhraw. Na kata ka daw u Jisu u hap ban phai sha kiwei pat ki bynriew ka pyrthei ba kin pdiang ia u. ka ktien u Blei ka ong – “Hynrei kat kiba la pdiang ia u, ha kito u la ai bor ban long ki khun u Blei, kata kiba ngeit ha ka kyrteng jong u (ha ka kyrteng Jisu)” Ioannis 1:12. Kiba ngeit ha ka kyrteng u Jisu dei ban kha pat ia ki: “Kiba la kha ym na ka snam, lymne ka mon ka doh, lymne ka mon u briew, HYNREI NA U BLEI” Ioannis 1:13.
Kumta ka jingkyntait jong ki Jiw ia u Jisu, ka long pat ka lad ia ki Jentil (bym dei Jiw) ban pynim ia ki lada ki ngeit bad pdiang ia u Jisu namar ha u Blei te ym don Jiw ym don Jentil ym don Krik. Ka jingkyntait ki Jiw ka la pyllong ia u Blei ban sngewsih bad bitar halor kane ka jaid bynriew. Dei na kata ka daw ki Jiw ki la sakma sha kylleng ka pyrthei bad ki laduh artad ia ka Temple haba la thang ia ka khlem da iehnoh maw halor u maw ha ka snem 70 A.D.
Mynba u Jisu u dang don ha ka pyrthei, u la leh shibun kiei kiei, u la leh ki kambah kam phylla, ula beh ia ki ksuid u la pynim ia kiba iap, u la pyniaid ia kiba dkoh, pynpeit ia kiba matlah bad shibun kiwei pat ki kam phylla.
Bun na kine ki Jentil ki pdiang hynrei ki Jiw ki kyntait bad kren bein ia u haduh ka jingsah narphna. Mynba u Jisu u dang don ha pyrthei u la ong ba ia kine ki kam bah baroh u briew ruh u lah ban leh. “Shisha shisha nga ong ha phi, uta uba ngeit ha nga, kita ki jingleh kiba nga leh, uta ruh un leh bad kham khraw ia kine un leh” Ioannis 14:12. Ia kane u Jisu u la kren ha ki synran bad ha ki Apostol ha kito ki por, hynrei u kren ha ngi ruh mynta da ka ktien jong u.
Hadien ba u Jisu, u la kiew noh sha bneng, u la ai bor ha kito kiba ngeit kiba pdang ia ka ktien jong u lyngba u Mynsiem Bakhuid ban leh ia kine kiei kiei. Kumta ngi iohi ba hadien ba u Jisu u la kiew noh sha bneng ha u lyoh ki Apostol ki la leh shibun ki kambah bad jingphylla uwei na kita dei u Petros bad u Ioanis, u Petros u la pynkhiah ia uba dkoh, u Petros u ong – “Ha ka kyrteng u Jisu Khrist uba na Nazareth, to iaid. Uba dkoh te u la ieng u la iaid, ki Jiw bad ki Pharisi ki sngew phylla ia kane. U Petros u ong – ko rangbah Israel balei phi sngew phylla ia kane? Balei phi ia khmih phylla namar ym dei da ka bor ne jingriew blei jong ngi, hynrei uta u Blei jong u Abraham, u Isaak u Jakob, u la pyndon burom ia u khun jong u – U Jisu, ia uba phi la aiti noh, phi la len ia u hakhmat u Pilat, phi la len ia uba khuid uba hok, ia u Syiem ka jingpynim phi la pyniap noh ……. Ngi ngi long ki nongphla. Kata ka jingngeit kein kaba ngeit ha ka kyrteng u Jisu, ka la pynkhiah ia u hakhmat jong phi baroh” Ki kam ki Apostol 3:1-16.
Hangne ngi iohi ba ki Jiw ki peit lyngngoh ia ki kambah ba la leh da ki Apostol ha ka kyrteng u Jisu, namar ialade kim shym pdiang ia ki jinghikai u Jisu Khrist bad kim ioh ruh ia kane ka bor phylla. Dei ka jingbymngeit bym pdiang ia u Jisu Khrist ki la duh noh ia ki kambah bad ia kiei kiei kiba ki dei ban ioh. Na kata ka daw u Petros u ong ha ki Jiw “Nga tip ba na ka jingbymtip phi la leh ia kata, ki nongsynshar jong phi ruh ki leh” ki kam ki Apostol 3:17.
Namar kata uno uno uba kwah ban ioh ia ka bor na u Blei, u dei ban ngeit bad pdiang ba u Jisu u dei u khun jong u Blei da kaba ngeit ha ka ktien jong u Blei namar ha ka ktien u Blei, u don u Blei, u Apostol Petros u ioh ia kane ka bor ki kam bah dei namar u ngeit bad u pdiang. Kumta ha ki Jiw u la ong – “To kylla kaba mut to wan phai khmat ruh ban ioh pyndam noh ia ki pop jong phi” ki kam ki Apostol 3:19.
Kane kajuh ka ktien ka dang kren bad ka khot ia kito ki bym ngeit mynta, ba ki dei ban kylla kaba mut (repent) khnang ba u Blei un pyndam noh ia ki pop ia kiba u la thoh mynta ha ka kitab ka jingiap, da kaba pdiang kloi ba u Jisu u dei u khun jong u Blei uba la wan khnang sha kane ka pyrthei ban pynim, pyllait ia ki briew na ki bor ki ksuid bad u soitan bad ka pop. U Blei um dawa ei ei na u briew, hynrei tang ka jingngeit, tang ban ngeit ba u Jisu u long u khun u Blei, uba ka kyrteng jong u ka long halor ki kyrteng baroh, bad ha ka kyrteng u Jisu ki khohsiew kin dem khrup, u thylliej un phla ba u Jisu u dei u Trai” Philipi 2:9-11.
“U Blei um shym la phah ia u khun sha ka pyrthei ba un pynrem ia ka pyrthei, HYNREI BA YN PYNIM IA KA PYRTHEI DA U” Ioannis 3:17 – “Uta uba ngeit yn ym pynrem hynrei u bym ngeit u la rem lypa” Ioannis 3.
Ki dak ka por ki long hajan ba u Jisu un wan pat sha kane ka pyrthei. Un wan, un hiar ha u lum ki Olives pyrshah Jerusalem” Sekharaiah 14:1-4. Dei hangta kein ba ki Jiw ne Israel kin sa tip bad pdiang ba u Jisu u dei pleng u Messiah jong ki ia uba ki la kyntait 2000 snem tam. Ong u Jisu “Kin ia khmih ha nga ia uba ki la sum bad ki Jiw kin iam briew namar u Messiah jong ki ……. Ha kata ka ngi kan long kaba iam briew kaba khraw ha Jerusalem” Sekharaiauh 12:10-11.
“Kata ka ia ka la jan” Jingpynpaw 1:3.

Ka khynnah kaba dang 14 snem ka rta, ka la iap ei ha Kazakhstan, na ka daw ba ka bthei ka smartphone jongka, kaba ka buh ha syngkhlieh.

Katei ka khynnah, ka thiah ialade bad ka sngap jingrwai, ha ka shnong Bastobe, Kazakhstan. Ha ka step kaba bud, la lap ba ka la iap bad ka daw, ka long namar ba ka bateri jong ka phone jongka, ka la bthei ha syndah jong ka khlieh jongka hi.

La iathuh ba katei ka khynnah, ka sngap jingrwai bad ka pynbam ding syndon ia ka phone jongka. La ngeit ba ka jing mynsaw, ka jur bha ha ki bynta jong ka khlieh jongka, na katei ka jingbthei, kat haduh ba kan da iap syndon. La iathuh ba ka jingbthei jong katei ka phone, ka dei namar ba ka la khluit palat, na katei ka jing pynbam ding.

U Hrithik Roshan bad U Tiger Shroff, ki la pynkhluit tar ia ki iing cinema, lyngba ka phlim jongki, kaba kyrteng War, kaba kamai T.20 klur ha ka sngi ba ar, ba la pyllait paidbah ia ka.

Ia ka phlim War, la pyllait ha ka ktien Hindi, Tamil bad ka Telugu. Ka jingioh kamai jong katei ka phlim, ha kine ki ar sngi ba ladep, ka poi sha ka T.77.70 klur. U Taran Adarsh, uba khein ia ka jing ioh kamai jong katei ka phlim, u pyni, ba ka ktien hindi, ka kamai T.23.10 klur, ka ktien Tamil, ka ioh T.1.25 klur. La iathuh ba ha ka sngi nyngkong, katei ka phlim, ka ioh kamai T. 53.35 klur ha baroh ki jait ktien.

Ka phlim jong U Hrithik Roshan bad U Tiger Shroff, ka mih ha ka sngi Gandhi Jayanti bad ka dei kaba la thaw da U Siddharat Anand.

Katei ka phlim, ka pyni ia ka khana jong ka jing don bynta jong ki arngut ki snar runar, kiba iaid beit tang ban pyniap briew bad ka ia syriem ia ka jingialehkai hapdeng ka miaw bad ka khnai, ha kaba la ak da kitei ki arngut ki khlur ba khraw jong ka bollywood, U Hrithik bad U Tiger.

Shillong: Ka “Forum of Council under Sixth Schedule” (FOCUSS) kaba kynthup ia baroh shiphew tylli ki Autonomous Council kiba don ha kane ka thain shatei lam mih ngi jong ka Ri India ki la ia kynduh ha kane ka nongbah Shillong mynta ka sngi ban ia kren kumno ban iakren bad ka sorkar pdeng na ka bynta ki Council tang kawei ka sur sha ka sorkar pdeng kane ka jing ia kynduh ka long ka sien kaba lai naduh ba la seng ia ka.

Ha kane ka jingiakynduh ki la ia iatai halor ki lai tylli ki bynta kiba ktah lang ia baroh ki Autonomous Council ha kane ka thain shatei lam mih ngi jong ka Ri India.

Haba kren ha ki lad pathai khubor u Chairman jong ka FOCSS u bah Pynshngainlang Syiem Chairman jong ka KHADC, u la ong ba “Ki Autonomous Council ha ka ne ka thain ki don hapdeng ka jingeh ha ka liang ka pisa namar ba ka jingbei pisa na ka sorkar pdeng kam wan beit sha ki Council bad la ong ba ha ka jingkwah ka sorkar pdeng ban pynkylla ia ka Sixth Schedule kila buh ia ki Council hapoh ka artikle 280 haba ia dei bad ka jingbei pisa na ka sorkar pdeng ba hap ban iaid lyngba ki sorkar jylla.”

Kawei pat ka phang kaba ki la ia kren ka long ban phah ia ki jingai jingmut jong ki ha kaba ia dei bad ka jingkwah jong ka sorkar pdeng ban wanrah ia ka jingpynkylla ia ka Sixth Schedule hapoh mynta u bnai bad ha u Naiwieng u ban wah ki lah ban leit ai sha ka Parliamentary Standing Committee, ha ka juh ka por kin pan por ban pynjlan lada long kaba lah.

Naduh ba la seng ia ka FOCSS, ka la iaid mynta khlem don kino kino ki riti pyniaid ia ka kumta kane ka jingialang ka la rai ban don noh ia ka riti pyniaid ia ka namar kan long kaba iaid beit, haba ia dei bad kane la aiti sha ka sub committee ba kan peit bniah ban sain dur ia ki kyndon trei kam.

Haba jubab ia ki jingkylli na ka liang jong u Bah PN Syiem u la ong ba ka jingkwah jong ki Autonomous Council baroh ka long ba kin ia don ia ka juh ka bor trei kam, namar kumba ka long mynta ka bor trei kam ka iapher na kawei ka jylla sha kawei pat, ki kwah ba baroh ki Council kin don ia ka juh ka bor.

Shillong: Ka party BJP hapoh ka jingialam jong u Narendra Modi, ka long ka sorkar kaba lait na ki kam bam sap bad kata ka dei ka nongrim kaba ka BJP ka ieng bad kane ka la kdew shai ha ka kular ilekshon jong ka party.

“Ka jingkren ka jong nga ha kato ka sngi nga kren ia ka nongrim, nga khlem kren iano iano ruh nga kren ia ka nongrim ba ka party ka ieng”, balei u bah Hamlet u khynniuh, ka party jong nga ka don ia ka hok bad kum u MLA jong ka BJP nga don ia hok ban ia kynduh ia ki nongialam ne ki myntri ban kren ia ka jingeh ki briew ka konstitwensi bad jong ka jylla”.

“Balei ki tieng lada ki buddien ia ki skhim, balei u Bah Hamlet u tieng” kylli U bah Sanbor. La ong shuh shuh U bah Sanbor, ba ka dei ka jingshisha ba ka jylla Meghalaya kam dei jong ka BJP, ha ka juh ka por kam dei ruh jong ka PDF, ha ka por ba thaw ia ka sorkar dei jong ki paidbah ka jylla Meghalaya.

U bah Sanbor u la ong ba u Bah Hamlet um dei ban tieng, hynrei un pyntrei kam bha ia ki skhim bad u kloi ban iarap ban peit lem bad ki jingtrei ki dei ban long ki lad ai kam aijam bad lada don kano kano ka jingtrei dei ban ai shuwa ia ki briew na ka jylla, ym ban pynshlur ia ki briew ba na shabar ka jylla.

Shillong: Ka Dorbar Shnong Umkiang, ka pynpaw ia ka jingsngewkhia jur, halor ka jingbym shim khia ka NHAI /GRIL ban maramot ia u surok National Highway ha ki thain Umkiang.

Kane ka jingleh sting jong kiba dei peit ka pynlong ia ki paitbah ban shem jingeh ha ka leit ka wan khamtam ia ki khynnah skul. Ka Dorbar Shnong Umkiang ka pynrem jur ia ki nongtrei / company ki bym shym la maramot ia u surok NH – 6 katba ia ka pisa ki khrong thik thik khlem da map wat tang shi tyngka ruh ha ki khyrdop lum pisa.

Ka Dorbar Shnong ka maham ia ka Company GRIL ba lada kam lah ban maramot hapoh shitaiew, ka shnong kan shim da kiwei pat ki lad kiba tyngeh pyrshah ia katei ka Company, ong ka kyrwoh na U Ma Lasting Pala, Waheh Shnong Umkiang.

Nongpoh: Ha ka jingjia aksiden kaba la jia hynnin ka miet ha Nongpoh, uwei u samla uba la tip Jahangir Lyngdoh (21) snem uba sah ha ki thain Nongpoh, u la khlad noh hashen hadien ba katei ka Bike kaba u niah, la suba jur ba ka la shah rat ha ki kali heh, namar halor katei ka jingjia ym shem la don mano mano kiba la iohi.

Katei ka jingjia kaba la jia ha ka por 11 baje ei ei mynmiet, ha kaba ki nongleit nongwan ki la shu iohi ba utei u samla u la thiah lyngktar hapdeng surok bad ki tiar lyngkhot lyngkhai kiba la pra na katei ka Bike, hynrei ia ka metbah jong katei ka Bike kam shem la don satia ha katei ka jaka.
Hadien katto katne por, ba la wan ki Pulit bad kiba haiing jong utei u Samla, la pynkit noh sha Civil Hospital Nongpoh, hynrei haba la poi ha jaka sumar la pynbna ba utei u samla u la khlad noh.
Hapdeng ka jinglyngoh kaba khraw, namar ba katei ka Bike kam shem la don ha katei ka jaka, hynrei hadien katto katne por, ki la don ki nongleit nongwan kiba la lap ia katei ka Bike ba ka la don ha Pahamrioh, kaba la don ia ka jingjngia kumba 4 KM eiei na katei ka jaka, kaba la jia katei ka jingaksiden bad kaba la pynsuba ruh ba imat katei ka Bike ka la shah rat ha ki kali heh.
Haba iadei bad katei ka jingjia, ki Pulit ka Nongpoh Police Station, kin dang pynlong ia ka jingtokit, khnang ba lap ia ki jingshisha baroh.

Shillong: Ka Meghalaya Boxing Association (MBA) ka la pynbna ia ki hynñiew ngut ki nongiakura ki ban mihkhmat ia ka Jylla sha ka jingiakhun jong ka BFI Elite (Senior) Men National Boxing Championship ka ban long ha Baddi, Himachal Pradesh ka ban sdang naduh mynta ka sngi Palei.

Kumta na ka liang ka MBA ka sngew ban kitbok kitrwiang ia kine ki nongiakura baroh ba kin ialeh bha bad kyrmen ruh ba kin ioh ban khur takma ia ka Jylla.
Ki kyrteng ki nongiakura ka Jylla ki long Phiban Wallamkupar Soh – tun (46- 49kg), Shanborlang Marbaniang (52kg), Pynskhemlang L. Nonglait ( 57kg), Laitpharlin Hoojon (60kg), Subam Gurung (63kg), Arthur Cornelli N. Khongmawio (69kg) bad u Pinku Kalita (75kg).
Ia kane ka kynhun la ialam da u Daniel Marbaniang bad u Teibor Kharkongor. Kane ka lympung kan kut ha ka 10 tarik mynta u bnai.

Shillong: Ka Hynñiewtrep Youths’ Council Sohïong Circle myn hynnin ka sngi ka 4tarik Risaw, 2019 hapoh ka jing ïalam jong u President, Samla Purningstar Shabong ka la leit ïa kynduh ia u General Manager Telecom District, Meghalaya jong ka BSNL ha kaba ïadei bad ka jing ujor ki paidbah nongshong shnong ka Sohïong sha ka Seng ïa ka jing pynduh kynsan ka BSNL ïa ka network ha Sohïong mynta lah kumba shi bnai eiei.

Na ka liang jong ka HYC kala pynsngew ïa ka jingeh kaba ki paidbah kiba pyndonkam ïa ka SIM card jong ka BSNL ki ïa kynduh na ka jingkhang kynsan jong ka ïa ka network ha poh Sohïong. Bad haba ïakren ha kane ka sngi na ka liang u GMTD ula kubur ba ka don ka jing khang kynsan ïa ka Network da ka GTL Infrastructure Provider bad na ka liang jong u ula kular ba un shim ki lad ki lynti kloi katba lah ban pynïoh biang ïa ka network ha Sohïong. Halor kane, na ka liang jong ka Seng kala ai jingmut ba katba ym pat lah ban pyndep ïa ki jingdnkam ban pynbiang ïa u Tower uba don ha jan Sohïong, dei ban tan network noh shwa na Laitlulong kaba kham jan da kaba pynkiew ia ka bor(power) jong u Tower uba don ha Laitlulong, namar ba u don kham jan bad kham suk.
Haba ïadei pat bad ka pisa kaba la lah dep recharge da ki paidbah ha ka tei ka thaiñ, na ka liang jong ka HYC kala ong ba ïa ka pisa kaba la dep recharge da ki paidbah kiba pyndonkam BSNL ha ka tei ka thaiñ ym dei ban pynduh ei bad dei ban pynphai biang sha ki paidbah namar ba ka jingleh jong ka BSNL ka long kaba khlem da tip lypa. Halor kane na ka liang jong u GMTD ula kular ba un pynbteng biang ïa ka jingtreikam (services) jong ki kat kum ka sngi kaba kin kut (validity).
Kumta na ka liang jong ka Seng ka kyrpad ïa ki paidbah ha Sohïong ba kin buh jingthoh mynno la thep pisa (recharge) bad lano ne katno sngi kan kut bad ban phah sha ka Seng ryngkat bad u number phone khnang ba na ka liang jong ka Seng kan leit rah sha ophis jong ka BSNL ban pynbteng biang ia ka jingtreikam kat kum ka validity jong ki ynda la lah ban pynïoh biang ïa ka network ha ka tei ka shnong.

Shillong: U MLA ka BJP u bah Sanbor Shullai, u la ong ba un leit sah miet sha Shella na ka bynta ban ialap elekshon ia u kyrtong ka BJP u bah Joshua Warjri, namar ba ka BJP ka don ka thong ban rah ia ka jingjop ha kane ka elekshon shiteng samoi.

Haba kren sha ki lad pathai khubor myn hynnin ka sngi, u bah Sanbor u la ong ba ha ka taiew ban wan, un hiar ban sah miet sha katei ka thain Shella ban leit ialap elekshon.

“Ngan leit sahmiet sha Shella ban ialap elekshon ia u kyrtong ka party”, la ong u bah Sanbor.
U bah Sanbor u la ong ba ka party ka la iakren ruh ban khot ia ki katto katne ki nongialam na Delhi ba kin wan ban ialap elekshon ia u bah Joshua kum u Dr Jitendra Singh uba dei u myntri ka DoNER, u Himanta Biswa Sarma u myntri sorkar Assam, u Arjun Manda u myntri ba peit ia ki riewlum bad kiwei.

Haba kam ba ka BJP ka don ha ka thong ban jop, u bah Sanbor u la ong ba ka party ka don ki nongkyrshan kiba khlain.
Haba kam ba u kyrtong ka BJP u bah Joshua u don ka jingkyrmen ban jop, u bah Sanbor u la ong ba ha ka MP elekshon ba la dep, ma u uba la iakhun kum u kyrtong, u la khur haduh 4 hajar vote tam tang na Shella konstitwensi bad khlem pep, lada kine ki 4 hajar ngut kiba la kyrshan ia ka BJP ha ka MP elekshon kin ioh sa tang mar 2 ngut ki nongkyrshan, ka BJP kan don ha ka jingjop.
“Ha ka elekshon MP nga la khur 4 hajar tam tang Shella bad ngi don ka jingkyrmen ha kane ka elekshon MLA ban poi sha ka thong”, la kam u bah Sanbor.
Ha kane ka elekshon shiteng samoi, ka Shella kan sakhi ia ka jingiakhun hapdeng ki 6 ngut ki kyrtong ba kynthup u bah Joshua Warjri ka BJP, bah Balajiedkupar Synrem ka UDP, bah Batyngshain Laitmon Ryngnga ka Congress, bah Mosjo Rock feller Wanswett na ka PDF, bah Komen Laitmon bad ka Kong Grace Mary Kharpuri kum ki kyrtong shimet.
Ka elekshon kan long ha ka 21 tarik mynta u bnai bad ka jingniew kan long ha ka 24 tarik.
Ha kawei ka liang haba twad jingmut halor ka Citizenship Amendment Bill (CAB), u bah Sanbor u la ong ba ka BJP Meghalaya kan iasaid beit ha ka BJP seng kmie ba lada kan pyntreikam ia ka Citizenship Amendment Bill (CAB) ha ka ri, ka dei ban pynlait ia ka North East ban aiti ha ka mon jong kano kano ka sorkar jylla ba kan rai ban pdiang ne em.
“Dei ban ai ha ka mon laitluid ki sorkar jylla ban rai la kin pdiang ne em lada wanrah ia ka CAB”, la ong u bah Sanbor.
U bah Sanbor u la ong ba un leit ban iakynduh ia ki heh ka BJP ha Delhi shen ha kine ki taiew ban wan ban pynsngew ia kane.

Nongpoh: Ki nongialam ka Hynniewtrep People’s Federation (HPF) na Ri Bhoi, myn hynnin ka sngi ki la leit ban jurip ia kawei ka jaka kaba don ha syndah ka Madan Kurkalang, Bhoirymbong, kaba dei ruh ka jaka kaba ki briew jong katei ka thain, ki pynlong ia katei ka jaka kum ka jaka ban bret ia ki jaboh jabain, kiba la mih na ka Iew Bhoirymbong.

Haba leit ban jurip ia katei ka jaka, ki la don ki nongialam ka HPF, kiba kynthup ia u Bah Apbor Nongrum, President ha Ri Bhoi, u Bah Sylverious Masharing, President ka Eastern Zone lem bad kiwei ki dkhot na ki Unit ba Circle.
Ha katei ka jingleit jurip, la lap ba katei ka jaka ym tang ba ka don marsyndah bad ka madan Kurkalang, hynrei ka don ruh hajan jong ka shong Lumdaitkhla, ha kaba la lap ruh ba ka jingbret jaboh ha katei ka jaka, ka la long kaba pathar shaba palat bad kaba lah ruh ban ktah ia ka koit ka khiah jong ki paidbah kiba don ha katei ka shnong.
Haba kren sha ki lad pathai khubor, kitei ki nongialam ka HPF, ki la ong ba ka seng ka sngewkhia ban iohi ba ki briew, ki la pynlong ia katei ka jaka kum ka Marten ne ka jaka ban bret ia ki jaboh jabain, namar ba ka dang jan eh bad ka shnong bad khamtam eh bad katei ka madan ialehkai.
Ki la ong ruh, ba ka seng kan sa buddien bha halor katei ka jingbret jaboh ha katei ka jaka, da kaba iakren ia ki briew ka shnong bad lada donkam kin sa leit ban kynduh ia ki bor ba kham halor, na ka bynta ban khang noh shisyndon ka bret jaboh ha katei ka jaka, namar kan sa ktah ia ka koit ka khiah jong ki briew kiba sah hajan jong katei ka jaka.

Shillong: Ka bor ba dei khmih ia ka iaid beit iaid ryntih ki kali ha ka nongbah shillong ka la pynbeit ba na ka bynta ban um don ka jingdheng kali ha kane ka taiew ban wan na ka jingrakhe ki paid riewngeit Hindu ha ka jinglehniam Puja ka la buh da ka ‘NO ENTRY’ ha ki katto katne ki kyntoit ka sor shillong ka ban sdang naduh ka 5 tarik haduh 8 tarik u October, 2019. Bad kiba leh pyrshah ia kane ka jingpynbeit kin shah pynshitom katkum ka Ain jong ka section of Motor Vehicle (Amendment) Act 2019. Ki kyntoit ki long kumne harum:

Sardar Area: NO ENTRY: naduh Jail Road Petrol Pump ter ter shaduh ka Iew jail Road, na Forest Colony shaduh C.R.P.F Camp, najan Gandhi Bunyadi Higher Secondary School shaduh Pynthor rit, na lad Oakland shaduh Oakland Puja Pandal, na Bamboo Hut shaduh Keating Road.
Laban Area: NO ENTRY: na Lawsohtun/CID quarter shaduh Iew Bishnupur, na lad Oxford shaduh Railbong Beat House, na Office Shillong Times shaduh Railbong Beat House, na Last Stop shaduh lad Oxford, na Harrison bridge shaduh Office Shillong Times, na Batti Bazar shaduh Hari Sabha Puja Pandal, na MGCC sahduh lad Oxford.

Lumdiengjri Area: NO ENTRY: na District Council shaduh MES bad yn shah ia ki kali heh tang lada kylluid ka surok, na Trenching ground shaduh Round Building Jhalupara, na Kyrbom shaduh Mawbah,
Rynjah Area: NO ENTRY: na main road 1 shaduh main road 2, na Lumshngain shaduh Rynjah Dispensary, na Lumsohphoh shaduh Iew Nongmensong
Madanrting Area: NO ENTRY: na Garoline shaduh Ram Krishna Mission bad hakhmat ka P.S, na khmat ka P.S shaduh Puja Pandal, na Fire Brigade shaduh Puja Pandal, na Law College shaduh Main road, na New Colony shaduh lad Puja Pandal.

Shillong: Ha ka miet jong ka 2,3 tarik Risaw, ki riew runar, ki la rong tuh ia ka motorcycle (ML-05R-9828) kaba dei ka jong U Bah Kyntiewbok Lyngdoh Mawphlang na ka iing sah jongu ha Dongkadiang, Nongmensong, Shillong.

Imphal: Ki shipai Assam Rifles, ki la ioh kem ia ar ngut ki nong khaii droks lem bad ki WY tablet ha Khudengthabi Check-Post jong ka Tengnoupal District ha ka 2tarik Risaw jong ka Jylla Manipur.

La iathuh ba hadien ka jing ioh jingtip, ki shipai, ki la ioh bat ia kawei ka kali Eeco Van, kaba don ia u number DL 04 AS 4404, kaba la niah da u Jamminlian Vaipheu bad hadien ba la talasi, la lap ia u brown Sugar uba don 3.336 kilo bad sa 20000tylli ki WY tablet, kiba shongdor baroh sha ka T.7.2 klur.

Shillong: U President jong ka seng ki nongrep Hill Farmers Union (HFU), u bah Commander Shangpliang, u la iasaid halor bun tylli ki ishu kiba ki nongrep ka jylla ki iakynduh ha ka jingialang jong ka National Level Conference Consultative Group kaba la long ha Lucknow, Uttar Pradesh.

Ha kane ka jingialang ba la iadon lang ruh ki ophisar jong ka tnad ka rep ka riang jong ki Nongrep jong ka sorkar India bad ki heh jong ka National Bank for Agriculture and Rural Development, u bah Commander Shangpliang, uba mihkhmat ia ka jylla hatei ka jingialang, u la kren halor ka jingdonkam ia ki symbai kiba bha, ban pynpoi um sha ki jaka rep, jingthung uba koit ba khia bad kumjuh ruh ia ka Iew kaba biang.

U la kren ruh halor ka jingdonkam ban kyntiew ia ki symbai tynrai na ka jylla bad kumjuh ruh bna iarap halor ka rep kaba khlem pyndonkam dawai (chemical fertilizer) lane ka rep organic. U la kren ruh halor ka jingdonkam ban pyntreikam bha ia ki skhim ka sorkar India kum ka PM Kisan, ka skhim shongthait na ka bynta ki nongrep, ka crop insurance nalor kiwei kiwei.
Halor ka iew ka hat u Bah Commander Shangpliang u la pynsngew ia ka jingdonam ban ioh ia ka iew kaba biang bad ban lait n aka jingshah ban bein ha ki middle man bad u la ban jur ba dei ban plie ia ka Iew khappud bad ka Bangladesh kyrpang na ka bynta ki mar jong ki nongrep bad kiwei ki rukom pyniaid iew ia ki mar rep mar riang.
Na ka liang jong ka ka liang jong ki bor ba dei khmih jong ka tnad ka rep ka riang jong ka sorkar India ki la sngap halor kitei ki jingpynsngew kynthup ruh ia ki jingeh ba la kren da kiwei pat ki nognrep na kawei ki jylla bad ki la kular ban sa bishar bniah kawei hadien kawei pat bad khamtam ban pynsngew sha ki bor ba halor jong ka sorkar India ba dei khmih ia ka rep ka riang.

AIS Suja

Ngi im ha ki sngi ba khadduh tam eh, ki sngi jingpyndep ia ka ktien u Blei ba ia kaei kaei kaba ka ktien u Blei (Bible) ka la kren, ka la jia bad long ruh kumta. Kawei na kita dei ka jinglum lang pat ia ki Israel ba la kyntait. Ka Kitab Salm ka ong kumne: “U Trai u tei ia ka Jerusalem; u lum lang ia kiba la tait jong ki Israel” “The Lord builds up Jerusalem, He gathers the exiles of Israel” Salm 147:2.

U Blei kumba u la kren u la pyndep ruh ia kata. Isaiah 46:11. Mynta ka pyrthei hi baroh kawei ka tip bad ka iohi ia ka jinglum lang pat ia ki Israel sha ka ri lajong hadien ba u Blei u la pynsakhma ia ki sha kylleng ki ri ka pyrthei naduh 70 AD ha kaba wat ia ka Temple ka ba Ar ki la duh noh la pynjot thiaw ia ka bad ym shym la iehnoh maw halor u maw ia ka. Mynta pat ki la don ha la ka ri kumba 70 snem ei ei naduh ba ki la ioh ia ka ri kynti lajong bad la pynbna da ka UNO ha u 1948 AD.

Hapoh kine ki 70 snem. Ka Israel ka la kiew irat ha ki liang baroh bad ha ka jingstad science and technology jong kane ka juk. Ki ri shyiap jong ka kiba 65% ki la sei soh bad shong briew kumba u Blei u la dep kren. Kiei kiei ki long kiba pawnam bad phylla ha Israel mynta ha kaba kiba bun bah ki nongshangkai Tourist na kylleng ka pyrthei ki sngewtynnad bad leit jngoh ia ka ri Israel ia ki jingphylla ba maian ha ka. Ka long ka ri kaba khlain bor ha ka pyrthei mynta ha ki tiar thma baroh, bad ka lah ban iakhun ia kiwei pat ki ri kiba la biang ki bor shipai bad tiar thma kane ka juk. Lah ban ong ba ka la biang nadong shadong.
Hato kane ka shu jia ryngkhat? Em ka don ha ka jingthmu u Blei na ka bynta ka ri kaba u la kular naduh ki por u Abraham u Isaak bad u Jakob. La ka long ka ri kaba rit tam hynrei ka long kaba khraw tam namar ka don hapoh ka jingkular jong u Blei, na kata ka daw, la ong ia ka ka Promise Land ne ka ri jingkular jong u Blei naduh hyndai haduh mynta, bad ia kata ngin iohi mynta, ka pyrthei hi kan tip bad kan iohi. Ka jinglum pat jong u Blei ia ki Israel (Jiws) na sawdong pyrthei sha ri Israel, ka dei ka history kaba la shem bah slem san bad ka la jia hapoh kine ki 70 tylli ki snem, bad hapoh kine ki 70 snem ka Israel kam dei shuh ka mraw hynrei ka kynrad halor kiei kiei baroh. Ka jingwan phai pat ki Jiws sha ka ri lajong ka long ka dak jong ki por bakhadduh (end times) namar kin wan kin tei kin shna bad pynkhreh lut nadong shadong wat ia ka Jerusalem hi. Na kata ka daw la pynbna da u President ka America Donald Trump ba ka Jerusalem ka dei ka Nongbah Capital jong ka ri Israel. Ia kine kiei kiei baroh ka ktien u Blei ka la kren lypa – “U Trai un tei ia ka Jerusalem” Salm 147:2.
Hooid, la kin mih bun ki jingkynthoh ki jingkynad na ki ri ba marjan jong ka, ki ri Arab kum ka Iran, Syria, Lebanon, Egypt bad kiwei, hynrei namar ka ktien u Trai ba u la kren, yn pyndep ha ka ban tei pat ia ka Jerusalem. U Blei u ong – “Na ka bynta ka Seion (Jerusalem) Ngan ym sngap jar” Isaiah 62:1. “Haduh ba un da pynskhem bad un da pyllong ia ka Jerusalem ka jingiaroh ha ka pyrthei” Isaiah 62:7. Ka Jerusalem ha Israel kan neh haduh kata ka por ba yn iaroh ia ka da ki briew ka pyrthei baroh ha kaba u Jisu kum u Syiem u Nongsynshar un wan ban iuh kjat biang ha Jerusalem da kaba wan hiar halor u lum ki Olibs. Sekharaiah 14:4-5.
Mynta hi u Blei u la dep lum lang pat ia ki khun Israel na sawdong pyrthei bad ki la tei pynbha ia ka Nongbah Jerusalem. Hynrei kaba ki Jiw ki dang ap mynta ka long tang ban ioh noh ia ka hukum ban tei pat ia ka Temple kaba Lai, bad ia kane ka Temple ba yn sa pynieng, u Blei u khlem ong ei ei bad u khlem hukum ma u hynrei tang ka jingkwah jong ki Jiw hi ban ioh pyndep ia ka jingthoh jong kata ka por “ka shitaiew Bakhadduh ne ki 7 snem” ba la ong ha u Daniel 9:27.
Ka por kam jngai shuh ba kiei kiei kin urlong ha kane ka pateng ba mynta hi. Bad ngi long ka pateng ba iohi ia kine kiei kiei ia ka jingkhielung u Diengdumbur, kaba thew ia ka ri Israel. Mathaios 24:32-35.
“Kane ka pateng bynriew kan ym leit noh tad ynda la pyndep noh ia kine kiei kiei baroh” Mathaios 24:34. Yn pyndep ia ka tad haduh ba u Jisu kum u Trai bad u Syiem un wan ban synshar ia ka pyrthei na Jerusalem haduh ba un pyllong ia ka Jerusalem ka jingiaroh ha ka pyrthei” Salm 62:7. Hadien ka jingsynshar bad jingbishar jong u, un ai pat ia kata ka Bor ha u Blei u Kpa ba ha Bneng.
“Kata ka hima ka jong ka pyrthei ka la jia long ka jong u Trai jong ngi: Te un synshar kein sha ki bymjkut ki bymjukut” Jingpynpaw 11:15. Ha kata ka por yn ym don jingsynshar briew shuh yn ym don world Government shuh, kan dei noh ka por jingsynshar u Jisu Khrist ka pyrthei baroh kan kohnguh ia u. Daniel 7:27.
Kumta ka jinglumpat ia ki Israel bad ka jingkhie im pat jong ki ka long ka dak jong kaba la jan kut (The end of climax) jong kiei kiei kiba ha ka pyrthei, kumta ka donkam ia uwei pa uwei uba la ngeit ban pynkhreh namar ym lah lait na kane ka por kaba u Blei u la buh ia uwei pa uwei kawei pa kawei. Amen.

K. Kyndaid

Ha ka state Meghalaya don 3 tylli ki jait bynriew ri lum ba bun pait kata ka long u khasi, u Garo bad u Jaintia. Ia kane la ai jingpynbna la kham slem da ka sorkar Meghalaya.

Ha uwei na ki kot khubor Khasi la thoh dang shen da u Bah G. Sing Syiemlieh, uei u Khasi? Bad u la batai katkum ka jinglah jong u. Mynta pat la don kiba kylli, uei u Jaintia? U jaitbynriew Jaintia u la wan buhai shnong da ki hajar snem mynshwa sha kane ka thain ba mynta. La iathuh u la wan beit beit na ka Ri Pershia bad la tip ia u kum u Jaintia. U pher bak la bak na kiwei pat ki jait bynriew bad wat kiba marjan ruh. Hoid don katto katne ba la iasyriem ruh.

Ia ka jingiapher jong u la pynpaw iathuh shai kdar da ka Jerman commission. Ha ka Ri lum Jaintia don 3 (lai) tylli ki sub-tribes ia kba la batai shai ha ka kot Khasi Geography ba la thoh da u (L) Andromuney, Retired Inspector of School. Kaba long ka jingbatai kaba shisha bad kaba don nongrim. U batai kumne – “Ia ka Ri Jaintia la pyniabynta ia ka ha ki 3 (lai) bynta. Ka bynta kaba hapdeng la khot Pnar, ka bynta sha ka liang East Pakistan (kaba khot mynta Bangladesh) la khot ki War, kaba ngi tip mynta kum ka War Jaintia bad ka bynta kaba shaphang shatei la khot Bhoi (kaba khot mynta Karbi Anglong). Ia kine la khot ki Jaintia. Ki don hapoh u pud u sam ka Jaintia Hills Autonomous District Council. Kane ka ia syriem kum ka England, Scotland bad Wales la khot British.
Shuwa ban ioh ia ka Meghalaya State, ka sorkar Assam ka la ithuh ba u Jaintia u dei u jaitbynriew bapher na kiwei pat. Kumta la ai District Council ba kyrpang ia u ha u snem 1964 kaba ngi tip ha kato ka por kum ka Jowai Autonomous District Council hynrei la pynkylla noh da ka Sorkar Meghalaya sha ka Jaintia Hills Autonomous District Council. Mynshuwa ia ka ri lum Jaintia la pyniasoh lang bad ka Ri Khasi la ha ka synshar khaddar bad District Council ruh kum ka United Khasi and Jaintia Hills District lane District Council. Na ka ktien UNITED bad AND la sngewthuh hi. Ha ka por ba long u Chief Minister u (L) Purno Sangma la don ba dawa separate District Council hynrei um lah ban ai namar ba dei u juh u ri lum Khasi. Hadien ba ka sorkar Assam ka la ai separate District Council ia u Jaintia, u ma (L) E. Bareh, u Chief Executive Member, ka United Khasi and Jaintia Autonomous District Council Shillong u la ai case ha High Court pyrshah ia ka sorkar Assam ha ka nongrim ba u Pnar, War bad u Bhoi (kum la batai haneng) u long u juh u jait bynriew Khasi, u la apil sha ka Supreme Court hangne ruh kam sei soh ei ei ruh. Khadduh u la long pynban kum u C.E.M uba nyngkong eh ka Jaintia Hills Autonomous District Council kaba u la pyrshang ban pynduh. Kumta ka iing bishar ki la pynskhem ia u Pnar, u War bad u Bhoi ba ki long ki Jaintia bad la pynskhem ia ka jinglong Jaintia jong ki ha u snem 1970. Nangne ka District Council ka la treikam haduh mynta lyngba ki elekshon.
Kynmaw ho ba ym ju don jaitbynriew Khasi – Pnar kaba long tang ka jingbatai stad ki Pseudo Scholar.

Nongstoiñ: Ka Lyngngam Presbyterian College Mawthengkut hynne ka sngi ka 4 tarik u risaw ka la pynlong ïa ka jingrakhe pynkup burom kaba nyngkong eh ïa ki samla pule kiba la pyndep ia ki jingpule lane ka ‘1st Graduation Day Cum Celebration’ na ka bynta ki 23 ngut ki samla pule kiba la pyndep ïa ka jingpule na katei ka College kiba long ruh artad ki soh ba nyngkong jong ka College bad ia ka jingioh Affiliation jong ka College bad ka North Eastern hills University (NEHU) kata naduh ka Acedemic Session 2019-2020.

Ha katei ka jingialang rakhe pynkup burom bad lehkmen jong katei ka College ka Prof Ceclile Mawlong Dean of Social Science North Eastern Hills University I la kong kum I kongsan ha ryngkat ka jingiadonlang ruh I Dr. CAR Diengdoh Director College Development Council NEHU, Tbn B.K Laitflang Principal jong katei ka College, I Dr. I. Mawthoh Principal ka Nongstoiñ College, u Rev. B.K Shangpliang, Rev. P.R Marthong, ki nonghikai ki samla pule bad kiwei kiwei.

Haba kren ha ka jingïalang kaba la pynlong ha ka Hall jong ka Lyngngam Presbyterian HSS na ka liang jong u Tbn B.K Laitflang Principal jong katei ka College u la ai ka jingiaroh ia kitei ki 23 ngut ki soh nyngkong jong ka College da kaba u la ong ruh ba “Kane ka sngi kadei ka sngi jong phi ki 23 ngut bad ka jingiadon ka jong ngi baroh hangne kadei namar kane ka sngi ba kyrpang jong phi”.

Na ka liang jong U Dr. CAR Diengdoh Director College Development Council NEHU haba ai jingkren ha katei ka jingialang u la ai ka jingiaroh ia ki bor pyniaid jong katei ka College kata naduh u Principal ka Management bad ki nonghikai kiba la ialeh shitom ban kyntiew ia katei ka College kat haduh ba kala lah ban sei ia kitei ki 23 ngut ki soh nyngkong jong ka College bad ha kajuh kapor I la ai mynsiem ruh ia kitei ki 23 ngut da kaba ong ba kila plie ia ka jingkhang bah sha ka lawei kaba phyrnai ka jong ki.

Katba na ka liang jong I kongsan I Prof Ceclile Mawlong Dean of Social Science haba ai jingkren ha katei ka jingialang I la sam ruh ia ki katto katne ki jingai jingmut kiba kongsan khamtam na ka bynta kitei ki 23 ngut ki samla pule da kaba I la kyntu ruh ia ki ba kin long kiba ithuh shwa ia lade da kaba kin ïit bad peit bniah ia lade.

Shuh shuh u la ong ruh ba sa kawei pat ka mat kaba donkam ka long ban pyrkhat janai namar dei na ki jingmut jingpyrkhat kiba pynlong ia ki briew ba kin leh lada ki pyrkhat ia kaba bha kila leh ia kaba bha bad kumjuh lada ki don ha ka sawdong bad ki briew kiba ai ia ki jingmut jingpyrkhat ban kyntiew kin sa kiew kumjuh ruh lada ki don pat ia ka jingmut jingpyrkhat kaba sniew kin leh ia kaba sniew.

Ym tang kata I la ong ruh ba kaba kongsan tam kadei ban shong bad ruh ban bat ia ka jaka ñiah khnang ba yn lah ban tehlakam iala ka jingim da lade bad ym dei ban ailad ba kiwei kin pyniaid ia ka jingim jong phi bad phi dei ruh ban shim iala ka jong ka rai namar ba ka jingim ka bun bah ki rai ia kaba kan sdang na phi hi bad kan kut ruh ha phi hi bad phi dei ban shim ia ka lad ka kabu haba phi ioh namar ki lad bad ki kabu ki leit bad kiwan ban ban leh ia kata phi hap ban long kiba phikir bad ban long kiba phikir phi hap ban tip ia lade.

Na ka liang jong I I Prof Ceclile Mawlong bad I Dr. CAR Diengdoh kila la ioh ruh ban sam ia ki momentos sha kitei ki 23 ngut ki soh nyngkong jong katei ka College.

Ha katei ka sngi la pynphuh pynphieng ia katei ka prokram da ki jingrwai bala aishim bynta da ki samla pule jong katei ka College

Kawei ka trok kaba don ia u As-01 JC 0727 kala leit tynrah ia kawei ka
pulsar bike(brandnew) ha Nongthymmai Median Opening Bye pass road, Umsning Ri-Bhoi District.

Ha kane ka jingjia aksiden U Roycherter Narlong 35 snem ka rta uba dei u nongniah kane ka bike ula khlad noh ha shen katba ka kong Pdiang hun Maring 28 snem ka rta kaba dei ka kurim jong u kala mynsaw jur.

Kine arngut ki dei na ka shnong Mawlyngkhung kane ka jingjia kala jia kumba haka por 8:30 mynstep ei ei ha kaba kine ki arngut kila mih na ka shnong Mawlyngkhung ban leit sha Nongpoh bad ki la ngat noh hakane ka jingjia aksiden.

Ka skul bah jong ka Jylla ka North Eastern Hill University(NEHU) ha ka 3 tarik u Risaw 2019 ka la pynmih ia ka jingpynbna ban pynkylla kyrteng noh ia ka Old Guest House sha ka ” U Kiang Nongbah Guest House” bad ia ka New Guest House sha ka “Tirot Sing Guest House”. Kane ka long kum shi bynta ban ai burom bad pynsah nam ia ka kyrteng jong ki riewshlur jong ka bri u Hynniewtrep.