Shillong: Ka UHM-East Jaintia Hills District, ka bynniaw ia ka jing leh mynthi ki nongpyniaid ka NH 6 ia ka surok naduh Lumshnong shaduh Ratachera.

Ha ka jingleit lynti jong ka seng hapoh ka jing ialam u Yoomeki Kyndait President ka UHM (East jaintia Hills District) mynhynnin ka sngi, ka la lap ba ka jingleh ka NH6 ka long sha kaba palat, naba sniew u surok, sahkut sa ki kali baiaid baieng kumba 4kynta eiei. Ka kyrwoh jong ka UHM, ka ong shuh shuh “Kumno ka NH6 kam leh rain ban shna Toll Gate ban lum pisa ha man ki kali ba iaid baieng haba u surok u sniew ban ha ki por bym don Tollgate bad ka seng ka buh jingkylli ruh ba kumno kumne ha baroh ki District jong ki state ba pher bapher ka pisa ka poi na Delhi sha ki District, hynrei ha East Jaintia Hills District pat ki shim kylla na ngi u paidbah”.

Ka seng ka kyrpad ia ki bor kiba halor ban peit ia kane bad ruh ka seng ka maham ia ka NH6 ba kan khang shwa ia kaTollgate, katba ym pat biang u Surok.

Ha kine ki sngi, ka Priyanka Chopra, ka bunkam bha ban pyniaid iew ia ka phlim thymmai jongka, kaba ai kyrteng The Sky Is Pink. Ka Priyanka, haba ka don ha India, ha ki khyndiat sngi ba ladep, ka iakren bad U Kapil Sharma, ha ka prokram jongu, na ka bynta ban pynshai halor katei ka phlim ka ban sa mih shen.

Ha katei ka jing iakren, U Kapil Sharma, ula kylli ia ka Priyanka, ia kawei ka jingkylli bad katei ka long la u tnga jongka, U Nick Jonas, u nguh ne em ialade ha ki pohjat jong ka kmie jongka, ka Madhu Chopra lane u shu ai tang ka dak jingdoh lane air kisses.

Halor katei ka jing kylli, ka Priyanka, ka jubab, da kaba ong “Dono ke beech mei! Bechara hug karta hai mummy ko!” lane kaba long ba u leh da ka rukom kaba kham iahap bad kata ka long ba u kdup ia la ka jong ka kiaw kurim. Ka Madhu Chopra ruh, kaba don lang ha katei ka prokram jing iakren bad U Kapil, ka mynjur ia ka jingkren ka Priyanka, da kaba shu kohnguh khlieh.

Shillong: Ka North East Forum of Indigenous People’s (NEFIP) ha baroh kawei ka Jylla shatei Lammihngi mynta ka sngi ki la iasnoh kti lang ban pyrshah ia ka ka jingthmu jong ka sorkar pdeng ban wan rah ia Citizenship Amendment bill(CAB)

Ha Shillong ruh ia kane ka jingiakhih la ia lam khmat da ka kynhun jong ka Confederation of Meghalaya Social Organisation (CoMSO) ha ka ba ka la ia khih da ka ba shong kyllain myngngor ha parking lot jong ka Additional Secretariat.

Ha ba iakren bad ki lad pathai khubor na ka liang u bah Robertjune Kharjahrin u la kyntu ia ki nongialam jong ka Sorkar Jylla ba ki dei ban iasnohkti lang ban pyrshah ia kane ka jingthmu jong ka Sorkar pdeng ban wan rah ia ka CAB.

U la ong ba hadien jong ka jingialang ba la pynlong ha Kohima na ka liang ka NEFIP, la rai biang ban sdang ia ka jingiakhih pyrshah ia ka CAB ha baroh ki jylla jong ki thain Shatei Lam Mihngi namar ka jingthmu ba ka Sorkar Pdeng kan wan wan rah beit ia ka CAB ha ka Ri.

“Ngi kum ka Jylla ngin ym lah ban pdiang ia ka ne ka ain namar ka long pyrshah ia ka rukom synshar jong ka Ri India” ong U bah Robertjune.

U la bynrap ruh “Ka India lada don ka jingban bein ia ki rit paidHindu ha Banladesh balei ba kam lah ban ujor shah ka United Nation (UN) hynrei ka thmu pynban ban wanrah da ka CAB kadaw la lah ban long ba ka ha India ruh ka don ka jingshah leh bein jong ka RSS ka ba don jingthmu ban pynkylla Hindu.”

Shillong: Ka KSU South West Khasi Hills District ka phah ia kane ka kyrwoh ban pan jingshai na ka Garo Students’ Union Khonjoy Regional Unit ba ki dei kiei ba kin ai notice maham ia ki trai jaka bad ki trai shnong Khasi ban nym shna ing ha la ka jong ka jaka ne ban pynsangeh iaki jingtrei ba la trei da ki trai jaka ha ka jaka lajong naduh Khonjoy area haduh Maheshkhola. “Ngi maham jur iaka GSU ban nym wan tuklar than ia ka kam khyndew kam shyiap bad ngi sngewthuh ba kane ka dei ka jingsdang jongki ban wanrah iaka jingsngewiapher Jaitbynriew” ong ka kyrwoh.

“Ki dei kiei ma ki ban leh mynleh pyni iktiar. Ngi ruh ngi don ka iktiar ban ai hukum, hynrei ngi sngew ba ngim kwah ban wanrah ia ka mynsiem iapher Jaitbynriew hapdeng ki nongshnongshnong jongka jylla. Ngi dawa iaka GSU Khonjoy Regional Unit ba ka dei ban pyrkhat arsien bad weng noh ruh mardor ia kine ki hukum ha shwa ba ngi ruh kum ka seng ngin hap ban pyrkhat da kawei ka lynti” ong ka kyrwoh ba la phah mynta ka sngi.

Ka KSU, ka ong shuh shuh “Wat pyrshang tuklar ia ka kam khyndew kam shyiap, kumba ngim pat tuklar hi ruh ia ka kam khyndew kam shyiap jongki ha Ri lum Garo lem kumta ngim banse ban hap pynphai pat da ki kam halor kane ka jingleh jongki la ka long da kano kano ka kam ruh”.

Ka KSU, ka kyntu ruh ia ki trai jaka Khasi ba kumba ka dei ka jaka jongki, kumta kim dei ban tieng ne syier, namar ka seng ka shim ka jingkitkhlieh ba pura bad ka don ha syndah jongki. Ki trai jaka ba dei ki Khasi ki lah ban leh katba ki sngewbit ha jaka lajong khlem kano kano ka jingsngewtieng ne sngewsyier bad lada jia eiei, yn banse ban hap pynphai kylla bad ka GSU Khonjoy Regional Unit ka hap ban shim ia ka jingkitkhlieh namar dei maka kaba sdang ia kaba kum kane ka jingsngew Jaitbynriew.

“Kane ka dei ka jingmaham ba tyngeh ba ka GSU ka dei ban weng mardor bad wat sngewkhlain. Ka jingsngap jar jongngi baroh shi katta ka dei ba ngim kwah ban wanrah iaka jingsngew iapher Jaitbynriew hynrei lada phi sdang ngi ruh ngi hap ban pyni da ka kam” ong shuh ka kyrwoh na u samla Forwardman Nongrem President KSU South West Khasi Hills District.

Shillong: Ka Khasi Students’ Union Narpuh Circle bad ki paidbah ka thaiñ ki pynpaw ka jingsngewdiaw ia ka jingsma iwtung ha ki bynta u surok bah NH 44 (NH 6) ha ki bynta shaneng Myndir bad sha jan ka Sub Station jong ka MeECL ba don ha khlieh Kuliang.

Ki paidbah ba leit ba wan kim lah shah ia ka jingsma iwtung tang shu poi ha kito ki jaka. Haba pyrshang ban kylli kaei kata kaba sma iwtung haduh katta katta, ki paidbah ki kynnoh ba bret masi pyut kito ki nongkhaïi masi. Ki paidbah ki iathuh ba kito ki nongkhaïi shalan masi sha Bangladesh haba jia ba iap masi hapoh kali ba ki kit ki shu bret pathar sharud nala ne shapoh riat.

Kane ka wanrah ka jingsma iwtung bad ka ktah ia ka jingsngew ki paidbah namar mano hi ba lah ban iaishah ha ka sma iwtung, ka ktah ruh ia ka koit ka khiah jong ki. Ki nongleit nongwan tang shu poi ha kito ki jaka ki kyrthat namar kim lah shu ban ring ne pynhiar mynsiem, tang kito kiba iohsngew dalade ia katei ka jingsma kiba ngeit ia ka jingsma iwtung ba shyrkhei.
Ka seng ka buh ka jingkyntu ia kito ki nongkhaïi masi ban pyrkhat lem na ka bynta u paidbah nongleit nongwan bapli, ban kiar na kaba bret pathar ia ki jingri ba la iap jongphi, ha jaka ban bret pathar phi dei ban tep shapoh khyndew ba kan ym ktah ia ka jingsngew u paidbah, ong ka kyrwoh na u Ma WD Gympad Environment Secretary KSU Narpuh Circle.

New Delhi:Ka sorkar India, ka la pyn treikam ia ki 15 tylli ki kyndon bad kitei ki kynthup, ha kaba ker bha ia ki jaka bret blei bad ha kajuh ka por ban dain kuna T.50,000 ia kito kiba bret ia ki blei thaw ha ka wah Ganga lane ha ki shnat jongka, ha kino kino ki jinglehniam.

Katei ka dei ka kyndon, kaba la pynmih da ka National Mission for Clean Ganga (NMCG), ha kaba la bthah ia ki Chief Secretary jong ki 11 tylli ki Jylla, kiba don jing iasnoh bad ka wah Ganga.

Ka hukum, ka kren shai ba kam dei ban don ka jing pyn ngam um ia ki blei thaw ha ka Wah Ganga lane ha ki shnat jongka, ong katei ka hukum. La iathuh ba ha katei ka jingialang, la don lang ki heh sorkar kiab na Uttarakhand, UP, Bihar, Jharkhand bad West Bengal. Nalorkata, la phah ruh ia katei ka hukum sha ki Jylla ha Delhi, Himachal Pradesh, Madhya Pradesh, Chhattisgarh, Haryana bad Rajasthan.
La ong shuh shuh, ba kito kiba bret blei ha ka Wah Ganga, kin shah dain kuna T.50,000.
Katei ka hukum, kam trei kam satia ia kiwei pat ki wah, kiba don sha ka thain shatei lam mihngi, lehse kum ka Wah Brahmaputra kaba dei kawei na ki wah bah jong kane ka thain.

Guwahati: U Ranjeet Kumar Das, u heh duh ka seng BJP ha Assam, u ong ba ka ain Citizenship Amendment bill (CAB), ka donkam bha, namar ba ki don palat 19 lak ngut kiba la shah weng noh, na ka national register of citizens (NRC), kaba la pynmih ha ka 31tarik Nailar 2019.

U Dass, haba kren ha ka jingrakhe ia ka lyngkhuh sngi kha ba 150 jong U Mahatma Gandhi, u ong ba ki don bun bah ki nong India, kiba la shah weng kyrteng ha ka NRC bad ynda la pyn trei kam ia ka CAB, kane ka jingeh, kan nym mih shuh satia, namar ba ia kitei yn kynthup ha ka CAB.

U Bishop ka Garo Hills, U Rt. Rev Andrew Marak u ia kynduh ia u kpa ba khuid jong ka balang katholik, U Pope Francis mynta ka sngi, ha ka nongbah Vatican.

Shillong: U bah Hameshaniah Suiam, uba dei u nongjop ha ka jing ia kura ha Russia, ula wan phai mynta ka sngi.

La pdiang burom nyngkong eh da U General Manager Airport Authority Guwahati bad nangta sa ka Assam Kickboxing Association bad ka Deputy Commissioner Kong R M Kurbah IAS ha Nongpoh.

Nangta la pdiang burom ruh da U Technical Adviser MSKA bad President Muay Thai Association of Meghalaya Bah Angelus Sun ryngkat bad ki Nongialehkai MSKA ha Nongpoh.

Ha Hotel Assembly la pdiang sngewbha da U Bah Allantry Franklin Dkhar, Political Secretary & Adviser to Chief Minister uba la pynwandur ha kata ka rukom ban ai ka jingiaroh ba dei ia U Hame Shaniah Suiam da ka jingïaishah bad ïeng beit haduh ban da poï sha ka thong.

U Bah Allantry u la ai khublei kyrpang ïa ki kmie Kpa U Hame bad kiba ha ïing bad ki nongialam bapher bapher kiba la noh syñniang lem ban pyn poi ïa U Hame shaduh Russia ban ïoh Gold Medal ha ka below 57 Kgs Point Fighting bad Silver Medal ha ka Light Contact jong ka jingialehkai kilanmet Kickboxing X Diamond Cup WAKO World Kickboxing Cup 2019 ba long ha Anapa Russia naduh 24 – 29 Nailur 2019.

Shillong: Ha ki 24 kynta ba ladep, ka jinghap slap ha Sohra, ka poi sha ka 77.2 millimetre bad ka bteng biang hi ban long ka jinghap slap kaba jur tam ha Ri Khasi Jaintia.

Katba ka jinghap slap, ha ka nongbah Shillong, ha ki 24 kynta ba ladep, ka long tang 16.7 millimetre bad ha Umiam lei, ka long tang 3.0 millimetre.
Ka tnat peit mariang, ka iathuh ba ki 24 kynta ba ladep, kin dei ki kynta ba kan jur ka jingtied pyrthat kan jur bha bad kumjuh, kan don ruh ka jingtied leilieh.

Mawryngkneng : Ka Dorbar Shnong Mawryngkneng,Khyrim Syiemship ha ka 2 tarik ka la shim ka rai ban nym shah shuh ban pyndonkam plastik hapoh ka shnong Mawryngkneng baroh kawei kaba kynthup hapoh ka Iew Pomtiah Mawryngkneng naduh katei ka sngi.

Na ka liang ka Dorbar Shnong Mawryngkneng ka pynpaw kumba ka sorkar kmie ka la don ka thong ban pynduh noh ia ka jingpyndonkam ia ka single use plastik kaba la wanrah shisha ia ka jingeh ia ka mei mariang khamtam Ki um ki wah bad ban buh jingeh ia ka lawei jong ki longdien ka Dorbar Shnong duh ka shim ia kane ka sienjam ban khang noh ia ka jingpyndonkam ia ka plastik hapoh shnong ha ka dorbar hynnin ka step da ka jingiamynjur lang jong ki paidbah nongshong shnong.Bad ha ka Dorbar ki paidbah nongshong shnong ki lah shim ruh ka jingkular (pledge) ka jingkular ba la lamkhmat da u bah Peter J Lawai, Sordar Shnong ba kin nym pyndonkam plastik shuh.

Ha kane ka sngi la ioh ka pynshai bniah na u Secretary ka Dorbar Shnong Mawryngkneng u bah Wanlambok Kharsati ia ka jinpynsniew dur ka plastik ia ka mei Mariang bad ka jingkhuid jingsuba bad u la pynshlur ia ki paidbah ban pyndonkam da kiwei ki lad kum ki sla, ka pla iew bad ki pla organic bag ki bym ktah ia ka meimariang.

Hadien ba la wai katei ka Dorbar ka la don ka jinglum plastik da ki paidbah nongshong ka shnong Mawryngkneng ha shilynter ka surok Highway.
Bad ha kane ka sngi U BDO jong ka Mawryngkneng u bah Roney Wahlang,MCS ruh u la wan jngoh da lade ia kane ka jinglum plastik bad u pynshai ruh ia ki paidbah bad Ki nongdie dukan ia ka jingma na ka plastik bad ka jingpynshitom ia kiba ialeh pyrshah ia kane ka jingmana ban pyndonkam ia ka.
Na ka liang ka Dorbar Shnong Mawryngkneng ka khot ka iawer ia ki paidbah nongshong ba kin ai ka jingiatreilang bad ka Dorbar Shnong bad ha ka juh ka por ka maham ruh ia kito ki briew kiba nabar ba kimdei ba wan theh niut ne jaboh ha kino ki bynta jong ka shnong Mawryngkneng .
Ha kawei ka liang ka Dorbar Shnong ka kyntu ruh ia ki nongdie kiba dang don ki plastik song ba kin wan aiti noh ha ophis jong u Sordar khnang ba ka shnong kan aiti pat sha ka sorkar.

Shillong: Ka Lumshken SC ka la rah ia ka nam lahduh jong ka lympung 2nd division ba la pyniaid daka East Jaintia Hills District Football Association (EJHDFA) hadien ba ka la pynliem ia ka Pamra Paithlu SC ba la long ha kane ka sngi Balang.

Ka Lumshken ka la pynliem da 4-2 kol lyngba ka jingiashut bol hadien ba ka jingiakhun ha madan ka la iakhaid.

U Dr. Sankey Shangpung, MDC ka Bataw Lakadong Constituency u la long u Kongsan ha kane ka sngi.
Kine baroh ar tylli kin dei ruh kiba la iohlad ban kiew kurdan ialade sha ka First Division haka aiom kaba bud. Ia ki khusnam la pynsam da u Kongsan lem bad kiwei ki rangbah.

Shillong: Ka Meghalaya Football Association (MFA) ka la iashim bynta ha ka tamasa tam niut ba la pynlong da ka Meghalaya State Olympic Association bad ka bor synshar ka East Khasi Hills district ban rakhe ia ka lyngkhuh sngi kha ba 150 jong u kpa ka ri India u Mahatma Gandhi.

Ki nongtrei ka MFA bad ki nongtrei mon sngewbha ka Meghalaya Baby League nalor ki nongkitkam ka seng kila iashim bynta ha kaba tam niut plastik na Shillong Golf Course sha State Central Library ha ka step sngi Balang.
Ha kane ka jingtam, la ioh ban pyndap ia 20 byrni ki jaboh plastik.

Shillong: Ka Amlarem Sub Divisional Sports Association (ASSA) ka la pyntip ba shen kan sdang noh ia ka Amlarem Football League mynta u bnai ha Mini Stadium Ladjaplem, Amlarem.

Ka synjuk ka la pyntip ba ki kynhun ba kwah ban iashim bynta ki lah ban phone ia u General Secretary u Bah Dapmon Tariang -8974405178, bad ia u Bah Daniel Khongsit, Sports Secretary -7005906100.

Nongpoh: U Acting Syiem ka Hima Myllien lem bad ka Dorbar Hima Mylliem, Shillong, ka la pynbna ia ka hukum katkum ka No.MS/V-67/89-19/1936, July 2019, ia kaba la pynmih da ka Executive Dorbar bad ruh kaba la pynbud da ka hukum No.MS/V07/89-19/2368-74 u August 2019 ba ia ka Sanad No.MS/V-57/98-15/1836 u November 2015, ka la pynduh pyndam noh bad weng noh ia u Bah Ioanis Narleng ba un dang long kum u Rangbah shnong ka Baridua.

Ha ka shithi kaba ki la phah sha u Bah Ioanis Narleng, ka Hima Mylliem, ka la phah kopi lut sha baroh ki tnat treikam kiba peit ia ka shongsuk shongsain bad kiba peit ia ki kam shnong kam thaw, ha kaba katkum katei ka shithi la iohi ba ka Hima Mylliem hadien ba la weng ia u Bah Ioanis Narleng, ka la thung ia u Bah Augustine Nongrum ba un long kum u Acting Rangbah jong ka Baridua.

Ka Hima Mylliem, ka la kyrpad ia ki paidbah ba lada don kino kino ki kam, ba kin leit kynduh ia u Bah Augustine Nongrum bad ha kajuh ruh ka por la pynbna ruh ba ki kot ki sla ba soi da u Bah Ioanis Narleng, ki long kiba beain bad ki paidbah baroh kim dei ban leit shim kot shim sla na u Bah Ioanis Narleng, shuh shuh u Bah Ioanis Narleng, um dei shuh ban tuklar ia kino kino ki Skim sorkar hapoh jong katei ka shnong.

Jowai: Ki trai trok ki la dawa na ki nongialam ka JHTOA ban khot kloi kloi ka General Meeting na ka ka bynta ban ia kren halor ki jingeh jong trai trok bad ki driver bad ban pynthymmai ia ki nongkitkan jong seng.

Ki trai trok ki la maham jur ia ki nongialam ka JHTOA ba lada kim lah ban khot ia ka jingialang halor kane ka jingeh kim banse ban thaw lane wad dawei pat ka lynti.

Ki trai trok ki ka ai por 7 Sngi ia u President bad Secretary ka JHTOA ban lum ia ka jingialang namar la 5 snem ym ju ioh meeting shuh. Lada kim lah la kyntu ia ia ki ban iehnoh lane weng noh ia lade na kane ka kam ba la bat baroh shi katta.
“Ngi ki trai trok ngi la sah khun swet namar la 5 snem mynta ngim ju ioh meeting shuh”, ong ki katto katne ki trai trok.

Shillong: Ka jingiakhun na ka bynta ka elekshon shiteng samoi ha Shella kan long 6 ngut. Haduh mynta ka sngi, kaba dei ka sngi khadduh ym don ba weng satia ia ki kyrteng na ka lympung iakhun bad ia kane la pynthikna da u Returning Officer ka Shella u bah L Kynjing myn hynnin ka sngi.

Ki hynriew ngut kiban iakhun ki long u bah Balajiedkupar Synrem na ka UDP, Bah Batyngshain Laitmon Ryngnga na ka Congress, Bah Joshua Warjri na ka BJP, u bah Mosjo Rock F. Wanswett na ka PDF, bad 2 ngut ki kyrtong shimet bah Komen Laitmon, bad ka Kong Grace Mary Kharpuri.

Ka jingjied ia u MLA ba thymmai ia ka Shella kan long ha ka 21 tarik mynta u bnai bad ka jingpynbna kan long ha ka 24 tarik Risaw.
Ha kajuh ka por, u bah Kynjing u la iathuh ba haduh mynta, kam pat don kano ka jingujor ba ka don ka jingpynkhein ia ka ain elekshon.

Ka Election Department, ka la ai ruh ia ka kong Grace Mary Kharpuri, da ka Road Roller, kum ka shap jongka, katba ia U bah Komen Laitmon, da ka shang soh. Kitei ki long ki arngut ki kyrtong shimet.

Ka dur ba la dro ia ka iing dorbar jong ka England lane ka House of Commons, ba ki don da ki shrieh heh suda lane ki chimpanzees, ka iaid iew haduh £9.9 million lane T.9klur ha ka pisa India bad la shim ba katei ka dei ka jingdro kaba remdor tam haduh ha kine ki sngi.

Katei ka dur, kaba la dro ia ka Parliament, ka dei kaba heh 4 metre ka pyngkiang, la pyniaid iew ha ka Sngi Palei, ha London bad la die £9,879,500, tang hapoh ka 13 minit jong ka jing ia khlieh dor. Katei ka dur, la iathuh ba ka dei kaba la pynmih da ka kompeni Banksy, kaba ju pynmih ia kitei ki jingdro kiba itynnad bad ba la die ha ka dor kaba rem shibun, ong ka khubor jong ka Daily Mail.

Shillong: U Bah Hamlet Dohling, nongialam ka seng PDF, ula kren pyrshah jur, halor ka jingkren jong U bah Sanbor Shullai, ha ki khyndiat sngi ba ladep, ha kaba kyrshan ia U Bah Joshua Warjri, uba dei u kandidet jong ka seng BJP na ka elekshon shiteng samoi na Shella.

Ha ka jingkren hynnin ka sngi, U bah Dohling, u ong ba ka Meghalaya, kam dei ka hok nong kynti jong kano kano ka seng sain pyrthei.

“Ka Meghalaya, kam dei ka hok nong kynti jongno jongno ruh bad ki skhim, kiba la tyrwa da ka sorkar Jylla, ki dei hi ban iaid ruh lyngba ka sorkar Jylla” ong U bah Dohling, uba dei u myntri kam pynroi sor ka sorkar Jylla.

Ka jing kynthoh jong U Bah Dohling, ka long namar ba U Bah Sanbor Shullai, u ong ba ki skhim, kiba dei ban leit sha ka sorkar India, ki dei ban iaid shwa lyngba ka jing peit bniah jong ka seng BJP bad u iawer ruh ia ki paidbah ka Shella, ba kin jied ia u kandidet jong ka seng BJP, ha kane ka kynti, na ka bynta ba ki skhim jong ka sorkar India, kin iaid beit na Delhi sha katei ka Constituency.

Washington: U Kevin Howard, ula kordit sat ha ka jingim jongu, haba ka tnga jongu, kaba ki la ia shong 12 snem kynthih, ka la iehnoh jyndat ia u bad ka daw ka long namar ba ka ia ieid sop sop bad uwei pat, uba ka ia trei lang ha kajuh ka ophis.

Hynrei, haba u leit sha kashari, u nongbishar jong ka kashari ha North Carolina, ula ai ia ka rai, ba utei u shynrang, uba dei u paralok nongtrei jong ka tnga jongu, u dei ka daw, kaba pyn ia pait ia ka shongsha shongman jong U Howard bad ka tnga jongu bad kumta, ula rai ksan ia U Howard lem bad ka bai nong kaba $750,000.

“Ka iathuh ia nga, ba ka kwah ban ia pyllait sanshyieng noh bad nga bad ka ai daw, ba nga trei shitom eh bad ba ngam ju don ha iing” ong U Howard.

Hynrei haba la wad jingtip, la lap ba ka tnga jongu, ka don jing iadei bad uwei na ki para nongtrei jongka. “U shait juh bha ban wan kai sha iing bad ngi ju ia bam ja miet lang bad iathuh khana ruh shaphang ki jingim jongngi” ong U Howard.

Ka ain ban ujor ia ki shynrang pyrshah ia ki tnga jongki, ka dang trei kam, ha ki san tylli ki Jylla ha America bad kitei ki long ha Hawaii, Mississippi, New Mexico, South Dakota bad ha Utah bad ka daw ka long, lada ki shem ba ka jing ia pait ka shongkha shongman, ka dei na ki daw bym shongnia lane ki kam leh arsap.