Shillong: Ka HYC War Jaintia Circle, hynnin ka sngi, hapoh ka jingialam u Vice President u Samla Rangbah J Khongiong, ka la leit ban ia kynduh ia ka tnad treikam ka Dawki Police Station bad Amlarem Police Station halor ka phang ban peitngor ban teh lakam ban nym ailad ia ki briew kiba shah kyntait na ka NRC ha Assam ba kin wan buhai shnong ha War Jaintia.

Kumta na ka liang kine ar tylli ki Police Station, ki la pynpaw ba kin iai peitngor bha ryngkat ka jingiatrei lang bad ka Seng.

Shuh shuh u President ula ong “Kum u nongialam ka circle nga kyntuh jur ia ki paradoh parasnam ha baroh ka War jaintia dei ban ieng tylli lang halor kane ka NRC khamtam kito ki shnong kiba jan eh ha ki border, Kharkhena, Sankhat, Muktapur haduh Dawki”.

Shillong: Ka HYC Nongthymmai Circle lyngba u President ka circle u samla Enlang Sawian ka la kyntu ia ka Synjuk jong ki Rangbah Shnong Nongthymmai pyllun ban long kiba peitngor ia ka jingrung jingmih jong ki bar jylla ha ki shnong bad kiba dong kiba don hapoh ka thaiñ Nongthymmai bad kumjuh ki shnong kiba marjan, hadien ka jingpynmih jong ka Sorkar Assam ia ka Final list jong ka NRC ia kaba katkum ki lad pathai khubor la iohi ba ki la don haduh palat 19lak ngut tam ki briew kiba la shah kyntait na kane ka thup.

Ka seng ha kajuh ka por ka maham tyngeh ruh ia ki Trai iing ba kim dei ban shu ai wai klumar ia ki iing wai jong ki sha ki bar jylla khlem da lah ban pynshisha shwa ia ki kot ki sla jong ki bad lada ki dkhot ka seng kin lap ia kum kine ki trai iing kan leh da kaba tyngeh.

Shillong: Ka Wah Umkhrah ka dei ka jaka ba la ju bret ia ki bleithaw man la u snem, ha ki aiom durga puja.

Ha ki khyndiat sngi ba ladep, u nongthoh khubor, ula leit ban jurip dalade ia ka Wah Umkhrah, ha kaba ula lap ba ki dang don da ki phew tylli ki bleithaw kiba sahkut ha ki jaka bapher jong katei ka wah, ha kaba hapdeng ka jingther u lapbah ha kine ki khyndiat sngi ba ladep, hynrei ka um kam pat shem la lah ban rong lut ia kitei ki bleithaw kiba sah kut ha lynter jong katei ka wah ha ka thain Polo.

La iathuh ba haduh ha kine ki sngi, na ka liang ka Shillong Municipal Board lane na ka liang ki Durga Puja komiti, kim shym la shim khia satia ban pynpra ne weng noh ia kito ki jingthaw bapher, hadien jong katei ka jinglehniam, ba kan don ka jingjaboh jong katei ka wah kaba kongsan, jong ka nongbah Shillong.

Shillong: Tang ha Infiltration Check Gate Ratachera palat spah ngut ki bar jylla ki ba la dep pynphai la iathuh u incharge ka Infiltration check gate .Kane ka long hadien ba ka sorkar Assam ka la dep pynmih ia ka final draft jong ka National Rigistration Citizen.

Ka jing peitngor ia ki mynder ha katei ka jaka ka iaid beit, na ka liang ka infiltration ka la ia thuh ba kane ka tnad ka la long ka ba phikir ia ka rung ka mih ki bar jylla bad ban ym lad da lei lei ia ki mynder bym don NRC ban ioh bsut khlieh shapoh ka jylla.

Na ka liang ka Khasi Student Union Narpuh circle, ka la haiar ban jurip bad ka la kyntu ia katei ka tnat ban phikir ia ka rung ka mih ki bar Jylla. Ka seng ka la ong ba ym dei ban shaniah tang ha ka NRC, hynrei ban don ruh ka epic ban pynshisha, namar ha ka NRC, ym don dur te kumno yn lah ban pynshisha ba dei ka certificate jong u.

Haba ia kren pat halor ka jingshim kabu ki bar jylla ban ioh rung tang da ka epic khlem don ka NRC, namar ki la kam ba ka sorkar Assam ka la ai por biang sa 120 sngi ban pynrung kyrteng ia kito ki bympat mih kyrteng, ka seng ka la ong ba kito ki bym shym la mih kyrteng kim don hok shuh ban aplai hynrei tang ban appeal sha ka Foreign Tribunal (FT).

Haba ia kren ia kane, u bah Nongsiej u ba long u Incharge katei ka khyrdop u la ong horkit hordang yn nym ailad da lei lei ba ki mynder bym don original NRC bad ka epic kin ioh rung. U la kam ba haduh mynta da ki spah ngut ki bar jylla ki la dep pynphai.

Shillong: U Dr Azad Zaman u ba dei u MLA jong ka Rajabala West Garo Hills District mynta ka sngi u la leit ban kynduh ia u Myntri rangbah ka jylla u Conrad K Sangma halor ka National Registration Citizens (NRC).

Ha dien ka jingiakynduh bad u Myntri rangbah ka jylla ha ba ia kren bad ki nong pathai khubor u la ong “Nga la wan ban kynduh ia u myntri rangbah ka jylla ba u don ka jingsngewkhia na ka bynta ki kynthei na kane ka jylla Meghalaya kiba shong shongkha sha Assam, kiba kynthup ia ki Khasi, Garo bad kiwei ki jaidbynriew namar lyngba kane ka NRC ki la shah niew nongwei hala ka jong ka Ri.”

U MLA ka Rajabala u la kyntu ia ka sorkar ba phah da ka jingthoh sha Supreme Court ban kyrpad ba ia ki kynthei ki ba long na kane ka jylla Meghalaya dei ban kynthup ha ka NRC ha dien bala pynbiang ia ki kot ki sla na kane ka jylla,ki don palat phew hajar ki kynthei na kane ka jylla Meghalaya kiba shongkha ha Assam, ka long kaei kaei kaba ym lah ban sngewthuh ba u para nong India ha Assam u dei u nongwei katba ha Meghalaya ki dei ki nong India.”

Na ka liang jong u Dr Azad u la iathuh ba ka NRC kam shym la pdiang ia ki kot ki sla kiba la ai da ki kynthei jong ka jylla Meghalaya kiba shong kha ha Assam. Kane ka jingbym pdiang ia ki kot ki sla kan buh ia ki jingeh ia ki kynthei na kane ka jylla.

Na ka liang jong u myntri rangbah ha kane ka jingiakynduh bad u Dr Azad, u la ai ka jingkular ba ka sorkar kan sa shim khia ia kane ka jingai jingmut ban peit ba ki nong Meghalaya kiba sah ha Assam kin nym ia kynduh jingeh.

Shillong: Saw ngut ki MDC ka Jaintia Hills Autonomous District Council (JHADC) ka UDP kim treh wan phai shuh sha la ïing, namar ba kila leit klim bad ka BJP dang shen.

Ia kane la sakhi ha kaba kine ki MDC kim shym la wan sha ka jingialang kaba la khot da ka seng kmie ha Shillong ba long ha ïing sah u MLA bad myntri sorkar uba dei na Jaintia Hills, u bah Kurmen Shylla.

Ha kane ka jingialang la wan poi tang 4 ngut ki MDC ka UDP katba kiwei 4 ngut kila jah bad 2 ngut kim lap wan namar ba ki dang donkam kyrkieh sha Delhi.

Haba kren sha ki lad pathai khubor, u bah Bindo M Lanong ula ong ka jingialang ka la pdiang ia ka jingphet seng ki 4 ngut ki MDC bad kam don kano kano ka jingiakren da kumwei pat.

U bah Bindo ula ong ba kito 4 ngut ki MDC kiba phet, kan long kumba ki pyniap hi ialade ha ka lawei ka sain pyrthei jongki.

“Uwei (bah Lakhon Biam) u MDC (UDP) uba bat chairman un shah pynhap noh na ka shuki”, la ong u bah Bindo bad bynrap, kane ka dei ka jingpynshisha ba kila pyniap hi ia ka lawei ka sain pyrthei.

U la kynnoh ba ki 4 ngut ka party kila shah ialam bakla ha ka BJP.

“Ngi don lang ha ka sorkar MDA bad ka BJP hynrei ngim iatreilang eiei ruh em bad ka BJP”, la ong u bah Bindo.

Ki MDC kiba dang don ha ka UDP ki long u bah Laski Rymbai, Winning Garland Sungoh, Dr Sanki Shangpung, Finelynes Bareh, Emlangki Lamare, Lomris Lyngdoh, Richard Lyngdoh (Ind) katba kiba phet na ka UDP ki long u bah Lakhon Biam, Krishon Langstang, Treilang Suchiang, Dawan Lyngdoh .

Sir M.B Hynniewta
D.N.S Wahlang Memorial Hr. Sec.

Ka 5tarik Nailur jong man la Ka snem kala kylla long ka sngi kaba Kyrpang hadien ba U President badonburom Ka ri India uba ar, U(late) Dr Sarvepalli Radhakrishnan uba ha kawei Ka por U la ong ” kan jin da la long kaba bha eh ba ha ka jaka ban ia lehkmen(celebrate) ia Ka sngi kha jong U, kan kham I don burom ne iahap eh (privilege) lada ia kane ka sngi yn rakhe noh kum ka sngi kaba kham Kyrpang na ka bynta ki nonghikai baroh ha kylleng Ka ri India jongngi ne kata kaba ngin tip bad khot “Teacher’s Day”.

Shipor shwa ba ngin ia ngam sha kane ka topik, To ngin ia pule khyndiat shaphang une u riewkhraw ka ri India jongngi, uba baroh ki khynnah pule bad wat Ki Nonghikai hikai ruh ki dei ban tip ei-ei shaphang jong U. Ia U Dr Radhakrishnan la kha ha kawei ka shnong rit kaba hap hapoh u pud u sam jong ka khappud jong ki jylla Tamil Nadu bad Andhra Pradesh kaba kyrteng Ka Tiruttani ha ka 5 tarik Nailur , 1888 .

U Kpa jong U Radhakrishnan, U Servapalli Veeraswami bad Ka Kmie jong U, Ka Sitamma ki dei kiba wan na ka long ing kaba duk ha kaba U Kpa u kamai ha ka tulop kaba rit eh . U Kpa jong U Radhakrishnan ula shem jong eh shibun ban kyrshan skul ia la U khun bad sa kiwei pat ki para jong u baroh wat la u Radhakrishnan u long u khynnah uba proh jabeing bad uba stad haduh katta katta.

Ha ka jingshisha u kpa jong U Radhakrishnan um da kwah eh ba U khun jong u un nang ban pule ne thoh phareng ne wat ban leit skul ruh hynrei u da thrang dik-dik eh ban pynlong iala u khun kum uwei u riewniam (priest). Hynrei ka jingstad bad ka Sap- ka talen ba U Radhakrishnan u don kala pynlong bad pynbor ia U kpa ban lenlade bad ban phah skul ha kawei ka skul kaba don hapoh ka shnong jong u hi.
U Servapalli Radhakrishnan kum U khynnah skul ula long shisha U bastad bad ka jingioh iarap jong u sa na ka scholarship kala nang iarap bad kyrshan ia ki jingangnud jong u ban bteng pat ia ka jingleit skul ha kane ka skul. Hadien ba ula pass bha kham shakhmat ia Ki klas ha ki Kyrdan pule kiba kham rit na ka skul shnong , ula leit ban bteng pat ia ki jingpule kiba kham shalor ha ka kyrdan High School ha Lutheran Mission School. Tiruttani. Haka rta Kaba 16 snem ula leit pat ban pule sa ha ka Voorhee’s College,Vellore bad dei ruh ha kane ka juh ka snem ba U kpa jong u ula pynia- thoh shongkurim noh bad ka Sivakamuamma.Kane Ka jingiathoh shongkurim jong u kam shym la pyndkut ne pyndkoh iaka pule puthi jong U Radhakrishnan namar nangne na Vellore ula leit ban kynriah pat sa sha Madras Christian College ha ka rta kaba 17 snem bad ula lah ban pyndep thop ia ka kyrdan B.A bad M.A haka subjekPhilosophy. Hadien ba U la pass ia ka M.A na Madras University,U Radhakrishnan U la ioh ia ka post kum U lecturer haka Madras Presidency College ha U snem 1909 tang dang ha ka rta kaba 21 snem. Une U Samla lud naduh ba U sdang ia ka kam kum U nonghikai, U long u samla uba baroh Ki khynnah pule ki ju iajuh-iajan bad kum U professor ha ka Presidency College, Madras ula long shisha U nonghikai uba don iaka mynsiem sngewlem bad iarap. U lah shah khot ruh ban long U professor ha ka Calcutta University kaba long Ka University kaba pawnam ha kito ki por ha ka rta kaba 30 snem bad U lah shah jied bad shah khot ruh ban trei kum U Vice- Chancellor ka Andhra University kaba tang ha ka rta kaba 40 snem bad ha kaba U la trei 5 snem hangta. Lai snem hadien kata la ibit ia u ban bynshet bad thung pat ia U kum U Vice-Chancellor ka Benaras Hindu University bad ha baroh artylli ki kam ba U la trei , ia U Radhakrishnan la ju tip kum U nonghikai uba tbit bad uba baroh Ki shaniah bad burom.
U Dr.Radhakrishnan kum U briew u long u briew uba beit bad uba ju kren beit tang ia ki jingshisha bad U long u briew U bym ju riej ban ong , ‘ U mohkhiew ia u mohkhiew ‘ haba ka dei ia u ban kren ia ki jingshisha . U long ruh U briew uba jynsur mynsiem bad uba laitluid bad um ju set tang ha lade ia kiei kiei kiba U kwah ban pynpaw shabar . Ka Jingstad bad Ka jinglong hok ba shisur-shidur jong u ka la plie lad plie lynti ba un shah jied kum U Ambassador sha ka ri Soviet Union ha U snem 1949. Ha ka snem 1952,hadien ba U la dap 64 snem ka rta ; la jied ia u ban long kum U Vice- President jong Ka ri India ba laitluid. Kum U Vice-President uba dei ban pyniaid ia ka dorbar thawaiñ jong ka Rajya Sabha , barabor ha ka jingiamir jingmut bad ka jingiathalaiñ nia kaba la i kum ban meh ding ; U Radhakrishnan uj u pynjaijai da k koi kyntien sngewieid bad ba syrpai – syrpud ia ka dohnud kiba bun ba la sot na ka kot niam Sanskrit bad na Ki jingthoh bakhuid na ka Baible bad barobor ki jingklang ka ding ha iing dorbar ki ran noh hangta-hangta hi . U paralok ba ia Jan bha jong u u dei U Jawaharlal Nehru uba ju iohi ia Ki jingleh jong U Radhakrishnan ha ka iing dorbar , U Nehru ula kynthoh shisien ia kine Ki kyntien kiba kordor , ” By the way in which Radhakrishnan conducted the proceedings of the Rajya Sabha , he had made the meetings of the House look like family gatherings…” . Ia U Radhakrishnan la pynkup burom da ka Bharat Ratna ha u snem 1954 bad ula bat ruh ia ka kam Vice- President ka ri India arsien kynthih bad ha U snem 1962 la jied pat ia u kum u President ba ar ka ri India haba ula dap 74 snem ka rta . Dei ha kane hi kajuh ka snem ba ia ka sngi kha jong une u ‘riewkhraw bad u ‘riewshemphang la rakhe noh kum kata Ka “Teacher’s Day” kaba long kum shibynta ban sngewnguh bad sngewburom ia Ki kam kiba ula leh bad kiba la pyniasyriem ia ka kam Nonghikai kum “ki dieng sharak kiba tbeh jingshai ia ki nongleit lynti ha ka por mynmiet ba dum ka mariang”.
Khatduh khatwai kum shibynta ban rakhe kyrpang ia kane ka sngi bakhraw bad ka ban sah jngkynmaw pateng-la-pateng, la sngew dei ban ai ka jingpyrto bad jingiaroh ia baroh Ki nonghikai na ka bynta ki matti babha ba kila bsut ha ngi . To ngin ym klet ba ki nonghikai ki don ka bynta kaba khraw haka imlang- sahlang bad na ka bynta ka lawei jong ngi bad horkit hordang ngim dei ban klet ia kine ki jingshisha harum :-

1. Ki nonghikai ki long kum Ki Kmie – Ki Kpa jong Ki khynnah skul khamtam ha ka pyrthei bunkam mynta- ha kaba ki khynnah ki kham don bun kynta ha skul bad la ki nonghikai jong ki.
2. Ba Ki skul Kilong ki shlem saiñdur bapaka naka bynta ban hikai ia ka akor- Ka burom , Ka jingnang – Jingstad , Ka pyrkhat – pyrdaiñ bad ka tipbriew – tipblei lyngba ki nonghikai.
3. Ba Ki khynnah skul ki kham sngewjan bad sngewkylluid mynsiem ban ia phylliew jingmut bad ki nonghikai haba ki don kino kino ki jingeh la ha kii jingpule ne ha ka jingim jong Ki .
4. U A.B.K.D… bad U 1.2.3.4.5… ki dei ki nongmuna kiba ngim dei ban haram da lei lei ruh em ia ki nonghikai watla ngi la sngew biang ialade nadong shadong hadien habud .
5. Ka lawei ba phyrnai jong Ka shnong Ka thaw bad ka ri ki sdang shuwa na Ki ‘ persara kiba long ki skul lyngba ki Nonghikai kiba shakri hangta.
   Ka sngi kaba Kyrpang iaphi baroh Ki nonghikai ha ki skul, college bad ki university la ka long ia ki nonghikai baroh kiba dang hikai ne wat kito kiba la shongthait ruh . U Blei un kyrkhu bad kyrshanbor ia phi baroh ha ki jingshakri jong phi iaka imlang- sahlang bad ka ri baroh kawei .Kum ki Nonghikai to ngin ia pyrthuh bud ia ki nuksa babha U Dr Radhakrishnan bad ban nang iai pyntyllun kham bha shuh shuh ia ki shalyntem jong ka jingshakri bashitrhem namar ka lawei baphyrnai ki khunlung- khynnah bad ki samla ka ri bad jylla jongngi.Ka Sorkar ruh ka donkam ban tip ba haba kala pynjynsur ia u diengsympat na ka bynta ki khynnah pule mynta;(kiba ki khynnah pule mynshwa ki tip khambha ia ka jingkordor u diengsympat ha ka por jong ki) hynrei kaba plewse mynta ula kyrtoh kylla bad long u shiah ba thar bad dung ym tang ia ka doh hynrei ia ka mynsiem kiba bun jong ki nonghikai bad kaba pynbor ruh ia ki wat ban mih sha surok teng teng tang namar ba ladam Syndah ki snier bad ba shah buddien ha ki khar pathan(pharshi ia ki Nongairam bad ki Bank) bym biang ka jingsiew(irregularities of monthly salary).. Ka Jingkynmaw ne rakhe ia ka sngi ki Nonghikai ne Teacher’s Day kan shu long tang ka jingpyndep rukom ne ka rongphong shisngi lada (1)ki khynnah pule kim sngewthuh ia ka kyrdan bad makor siewkylliang ia kiba la pynlong briewia ki(2) Lada ka imlang sahlang, ki kmie ki kpa, ki Sengbhalang Kim ia said lem ia ki jingeh ki Nonghikai bad ban ia snoh kti lang ban pynbha ia ki khun ki pyrsa lajong hi bad (3) Ki Bor bahalor bad Ka Sorkar(Ki ophisar, Ki Ministet, Ki MLA/ MDC kiba la mad ia ki sia saw ha ka por leit skul/ kolej) ki dang niewbein bad khein dewthala ia kita kiba la pynlong briew bad pynshong shuki ia ki hi..
   “Happy Teachers Day 2019”

Shillong:Ka sorkar MDA mynta ka sngi ka la pynbna ia u kyrtong jongka, ban ia leh ia ka ilekshon shongknor ia bah Metbah Lyngdoh ha kane ka dorbar synrai ka ban sdang ha kane ka sngi thohdieng.

Hadien ba la kut ka jngialang jong ka sorkar MDA, kaba la pynlong ha Secretariat u symbud myntri rangbah u bah Prestone Tyngson u la pynbna ia ka kyrteng jong u kyrtong u ban ia khun na ka bynta ka ilekshon speaker.

Na ka liang u bah Metbah Lyngdoh u la pynpaw ia ka jingsngewkmen bad u la ong ba kane ka dei ka burom ia u ba ka kynhun MDA kala ibit ia u ban pynieng kum u kyrtong ha kane ka ilekshon speaker kaban long ha kane ka dorbar synrai bad u la pdiang ia kane ka jingtyrwa.

U Bah Prestone u la ong ba ka MDA ha ka jingialang kaba la dep ka la thaw ia ka Core Committee ban jied ia u kyrtong bad kane ka committee ka la shong ban wad ia u kyrtong bad ha dien ka jingiashong dorbar ka la shim ia ka kyrteng jong u Bah Metbah ia kaba la wanrah ha khmat ka kynhun MDA ia kaba la pdiang lang da baroh.

Na ka liang ong u Bah Metbah, u la ong ba u sngew ba kane ka dei ka burom ia u ba ka kynhun MDA ka la ibit ia u ban pynieng kum u kyrtong ha kane ka ilekshon shongknor kaban long ha kane ka dorbar synrai bad u la pdiang ia kane ka jingtyrwa.

Halor kane ka jingjied ia u Bah Metbah na ka liang jong u myntri rangbah ka jylla u Cornad K Sangma, u la pynpaw ia ka jingsngewnguh ia baroh ki para dkhot hapoh jong ka MDA kiba la pdiang ia ka kyrteng jong u.

Shillong: Ka Congress ka la rai ban pyniakhun da u Winnerson D Sangma na ka bynta ka shuki Lamphang ka iing dorbar kaban sa long ha kane ka dorbar synrai ban sdang ha kane ka sngi Thohdieng ban wan.

Katba na ka liangsynshar ka la rai ban pyniakhun da u bah Metbah Lyngdoh na ka UDP uba long u myntri sorkar hynrei un hap ban iehnoh ia ka kam myntri.

Haba pyntip hadien ba la wai ka jingialang ka Congress Legislature Party (CLP) u nongialam ka party u Dr Mukul Sangma u la ong ba ka jingialang ka la mynjur da kawei ka sur ia ka kyrteng u Winnerson D Sangma ban iakhun ia ka shuki Lamphang.

“Ngi la rai da kawei ka sur ban pyniakhun da u Winnerson D Sangma ia ka shuki Lamphang”, la ong u Dr Mukul.

U la ong ba watla ka Congress kam don ha ka jingbun paid hynrei ha ka sain pyrthei ym lah ban tip namar ba ka lah ban kylla ruh ha kano kano ka por.

Lah ban kdew ba u Winnerson u la iakhun teng ruh ia ka shuki Lamphang pyrshah ia u Dr Donkupar Roy hynrei u la shah rem.

Bhubaneswar: U Haribandhu Kahanr, ula ngat ha ka kuna mynta ka sngi, kaba shongdor baroh T.47,500, na ka daw ba u pynkhein ia ka ain niah kali. U Kahanr, uba na Orissa bad uba niah auto rickshaw ha ka nongbah Bhubaneshwar, u iathuh ba um shym la bakla eiei, ha ka jingniah kali, tangba ula shu buaid kyiad bad u iathuh ba katei ka kali jongu, ka dei kaba u shu thied pateng kaba shongdor T.25,000.

Ha ka chalan, U Kahanr, ula shah dain kuna T.500, kaba dei ka kuna pynkhein ain, nangta T.5,000 ba u shah ia uwei pat u briew, ba un niah ia ka kali jongu, nangta T.5, 000 namar ba u niah kali khlem laisen, nangta T.10,000 ba u niah kali ha ka por ba buaid bad nangta sa T.10,000 ba u pynkhein ia ka kyndon ban pynduna ia ka jingsawa bad ia ka jingjaboh jong ka lyer, nangta T.5,000 ba u pyniaid ia ka kali, kaba khlem don don number bad khlem ka certificate kaba biang, nangta sa T.10,000 ba u kamai kali khlem da kaba pynkhein ia ka kyndon jong ka permit kaba biag bad nangta sa T.2,000 ba u niah kali khlem insurance.

“Nga dang shu thied pateng ia katei ka kali auto rickshaw ha ka dor T.25 hajar dang shi taiew mynshwa. Nga la pyndep ia ka kyrdan graduate, tangba ngam donkam donjam bad nga thied ban ioh kamai ialade da ka kam niah kali bad nga don ia baroh ki kot kiba donkam jong ka kali” ong U Kahanr.
La bthah ia U Kahanr, ba un siew ia katei ka kuna kaba T.47,500, ha ka Driving Testing Track ha Chandrashekharpur ha Bhubaneswar, hynrei, u iathuh ba un nym lah satia ban siew.
U Kahanr, ula shah bat ha ki pulit hapdeng ka surok Acharya Vihar bad Jaydev Vihar ha Bhubaneswar, kaba dei ka jaka ba ki talasi kali ha ka nongbah Bhubaneswar.
La iathuh ba ki pulit pyniaid kali, ki la kamai ha ka nongbah Bhubaneswar haduh t.2.13 lak ha ki ar sngi, naduh ba pyntrei kam ia katei ka ain thymmai lane ka Motor Vehicles (Amendment) Act 2019.

Shillong: Shiphew ngut ki briew kiba la shah kem ha kine ki ar sngi ki ba kynthup na Shillong bad Guwahati bad ki pulit ki la ioh ruh ban kurup droks haduh 1195 gram ki ba kot dor ha iew ka la kot sha ka T.15 klur tyngka la iathuh da ka Superibtendent of police jong ka East khasi hills District ka kong Claudia C Lyngwa.

Ha ba ia kren bad ki nongpathai khubor ka kong Claudia ka la iathuh ba ha ka 2tarik u nailur ki pulit ki la ioh jingtip ba u Alberto Raplang u ladon ka jingthmu ban wan khaii ia ki 40 tylli ki synduk sabon ki ba don u drug bad ba ka liang ki pulit ki la pynap shrip ha Viewpoint, hynrei kim shem la ioh ia u drug, hynrei lyngba ka mobile phone jong u Alberto ki la lap ksai ba u don jingiadei kaba jan bad ki nongkhaii drug,kumta ki la kem noh ia u.

Lyngba ka jingioh kem ia u Alberto, u la ialam sha Guwahati. Na Guwahati Ia ioh ban kem sa ia u Shasi u dei u ba na ka Jylla Manipur. Lyngba ka jingtip ba ioh na u Shashi u la leit ialam sha ing jong u Abhi Das bad na ing u Abhi Das la ioh ban kurup ia u drug heroin u ba 124 grm.

U Abhi Das u la ialam ha ka hotel, ba ki wei pat ki nongkhaii drug ki don bad na kane ka hotel la ioh ban kem sa lai ngut kiwei pat bad ia ka kali jong ki ruh la kurup lang.

Hadien kane u Sashi u la ai jingtip ruh shaphang ka Gracy ka ba dei na ka Jylla Manipur ha kaba ka sah ha logde ha Guwahati hi.

Ha ka jingleit khynra ha jaka ba sah ka Gracy la ioh kurup ia u heroin drug u ba 694 grm.Ha ba la wan phai noh sha Shillong ha ka sngi ba bud, ka ta ha ka 3 tarik ki la ioh ban kem sa ia san ngut ki briew na ka thain Laitkor bad la ioh ban kurup na kine ki briew ia u heroin u ba 277 gram.

Ha kane ka kynti ki pulit ki la kem ia 10 ngut ki briew ki ba donkti ha ka khaii drug bad ki la ioh kurup haduh 1195 grms u drug heroin na ki ne ki ba shah kem.

Ha kane ka jingioh kem ia kine ki nongkhaii droks, ki pulit ki la shem ba ar ngut ki kurim kim tip kaei kaba u kurim jong ki u leh kim don jingtip ei ei bad u wei na kiba ki leit ban kem na iing ki shem ba don lang bad khun ba dangrit bad kane ka la ktah hynrei ki hap ban kem.

Ha dien ba ki pulit ki la lah ban khang ia ka jingwan ki drok na ki thaiñ Manipur sha Meghalaya lyngba ka Silchar, ki nongkhaii droks kila wad ia ka lynti na Manipur sha Nagaland bad poi sha Guwahati bad ki nongkhaii na Meghalaya ki leit ban shim na Guwahati.

Ka kong Claudia ka la ong ba mynta ka jingthwet pyrshah ia ki nongkhaii droks kan kham pynsuk namar ia ka jingpeit bniah ha ki Laboratory la lah ban leh hapoh ka IFSL kaba don ha Shillong. Mynshuwa haba ioh kem droks la hap ban phah sha Kolkatta, Hyderabad bad Chhattisgarh kane ka shim por da ki bun bun bnai.

Shillong: Ka Ryntih SC ka la lah ba kan pynliem ïa ka Nongrim Hills SC da 1-0 bad ïa kane ka kol ba kordor tam ïa ka Ryntih SC la thep ïa ka da u Sheen Sohktung ha ka minit kaba 50.

Kane kan dei ka sien jop kaba ar ïa ka kynhun ïalehkai jong ka Ryntih SC ha kane ka lympung ïalehkai na ki lai sien ïalehkai ba ka la dep, ha kaba ka la mad pat ïa kawei ka nam rem ba long da 1-0 hakhmat ka Langsning FC.

Haba ïakren bad u T7 u Wallamkupar Kharpran coach ka Ryntih SC u la pynpaw ba naduh bas dang jong ka jingïakhun u la rai ban pynleit jingmut beit naka bynta ban ioh ban khur ïa ka lai poiñ bad nalor katta u la wanrah ruh ïa ki kato katne ki jingkylla ha kane ka kynhun hadien ba u Reson Malngiang ula wan ba un mih bujli noh ha ka jaka ka jong u Andy Mawthoh ha ka kylla miet bad bhynrap shuh shuh da ka jingpynrung sa ïa u Robert Khongjoh u la wan ban mih ha ka jaka u Allan Lyngdoh Nongbri, kum shi bynta ban pynkhlaiñ ïa la ka kynhun.
Nalor katta u Wallamkupar u la kam ruh ba ka rukom ïalehkai ka la sdang ba kan kham wan dur tangba ka jingeh ïa ka kynhun ka jong u ka long ka jingbym lah bha ka jong ka ban pynurlong sha ki kol na ki kabu ksiar ba ka la ïoh.
Ha ka kylla step ka Ryntih SC ka la ïoh ba kan shut ïa ka penalty ha kaba u Sheen la tur shakhmat ba un shut ïa ka hynrei sniew bok ba um shim la lah ban pynpar sha lyndet ka kol ka Nongrim Hills SC.
Ka jingïalehkai ban wan ia ka Ryntih SC kan dei pyrshah ïa ka Rangdajied United FC ba la buh ban long ha ka 10 tarik mynta u bnai.

Shillong: Ka Shillong College ka la pynliem ia ka Synod College da 4-3 kol da ka shut bol hadien ba la iakhaid ha madan ha ka jingiakhun ka 1st Semi Final ka NEHU Inter College Football (Women) Tournament 2019 ba long mynta ka sngi ha JN Stadium, Shillong.

Ha kawei ka jingiakhun, ka 2nd Semi Final ka Lady Keane College ka la pylliem ia ka Kiang Nangbah Govt. College da 4-2 ka shut bol hadien ba la iakhaid ha madan.
Lashai ka jingiakhun phainal kan long hapdeng ka Lady Keane College pyrshah ia ka Shillong College por 10.30 am.

Jowai: Myn hynnin ka sngi ki pulit ka West Jaintia Hills Infiltration Cell ki la hiar ban pynlong ia ka jingtohkit ia ki nongtrei bylla bar jylla kiba wan ban trei bylla ha Woodland Hospital kaba dang pyntrei shait shait mynta bad kaba don ha Soo-Mer, West Jaintia Hills District.

Ha kane ka jingtohkit ki pulit ki la pan ia ki kot ki sla bad ia ki ID cards jong ki ban pynshisha nangno ki wan bad ki dei ne em ki briew kiba shisha bad ki bym shym la wan bylla be-ain sha ka jylla.
Ki pulit ki la shim kyrteng ia baroh 64 ngut kitei ki nongtrei bylla bad ia saw ngut kynthup kiba ar ngut kiba dang rit ka rta, la pynphai noh sha ki jaka ba ki la wan kynthup na West Bengal bad na Assam.
Na ka liang ki pulit ki la tohkit tang ban pynshisha nangno ki la wan sha kane ka jylla bad ki biang ne em ki kot ki sla ban pynshisha ia ka jinglong trai shnong jong ki ha la ki jong ki jong ki shnong ba ki la wan.
Hynrei ha kawei pat ka liang, kitei ki nongbylla kim don satia ia ki kot ki sla na ka tnad Labour Department bad ruh kim don ruh ia ka Work Permit na JHADC.
Haba iakren bad u Ramji Rathur uba dei u Manager ba peit ia ka jingpyntrei ia katei ka Hospital, u la iathuh ba ha kaba iadei bad ka Labour Department ki la dep ban phah ia ki kot ki sla, katba ha kaba iadei bad ka Work Permit pat kim pat leit mih sha JHADC.

Shillong: Ka la mih ka jingiakren ha kine ki sngi, halor ka jingshah ujor jong uwei u pulit, namar ba u phah tar ia ka iit iong jong U MLA ka Rambrai Jyrngam.

Halor katei ka mat U Rupang, u iakren bad U bah Bevan Kynta, uwei na ki riewsaid ba rangbah jong ka Jylla, ha kaba ula pynsngew ba ki heh ki hain ruh, ki dei ban bud ia ki kyndon jong ka Motor Vehicle Act, ha kaba la shah tang ia ki jingtah iit, kiba la tah lypa da ka kompeni bad kaba dang hap hapoh ki kyndon ain.
U bah Bevan, u ong ba ki don ki riew sain pyrthei, ki heh pulit lane ki ophisar heh, kiba don da ki iit iong ha ki kali jingki bad ki pulit, ki dei kiba la aiti ba kin pyntrei kam ia ka ain bad lada jia ba kim leh ia la ka jong ka kam, kumta kan pyni, ba ki long pyrshah ia ka ain.
“Nga ai jingmut ia ki nongthaw ain, ba kin bud pyrkhing ia ka ain ba ki la thaw hi ma ki, ba kan nym mih ka jingshah kynnoh shah peit khmat” ong U bah Kynta.

Shillong: U James K Sangma myntri ba dei peit ia ka tnad kam bording jong ka sorkar jylla u la ong ia U Dr Mukul Sangma, ba ha ba u kynnoh u dei ban ai ia ki jingpynshai halor ka jingkynnoh ia ka jingbam sap haba pyntrei kam ia ka skhim sam bor ding sha ki nongkyndong ia kaba la tip kum ka “Suabhagya”.
U Myntri ba dei peit ia ki kam bording, u la ong “Ka jingkren jong u Dr Mukul kam don kano kano ka jingpynshisha, ia kane ka rukom kynnoh lah ban shu kynnoh, u sngewlyngngoh ba ha ka kyrdan u Dr Mukul un kren kumne.”
Haba ia dei bad ka jingïapher ia ka dor ha ka tender, u myntri ba dei peit ia ka tnad kam bording u la ong “Ka dor ha ka por ba khot tender ka dei ka dor kaba rim ha kaba kam ia hap shuh bad kane ka dor kaba mynta, hynrei kam shym don kano kano ka jingleh bakla na ka sorkar. Kane ka jingkynnoh ka long kaba khlem nongrim”.

Shillong: Ka seng JSU seng kmie hadien ba lah mih ki kyrteng NRC hapoh ka jylla Assam , ha ka 2 tarik mynta u bnai, ka lah hiar sha ki thain khapud ban talasi ban iada na ka jingrung kythlep ki briew na Assam kiba khlem kot khlem sla kiba lah shah kyntait na ka NRC jong ka jylla Assam.

Ka seng hapoh ka jingialam u President seng kmie U Lawyerson War bad U General Secretary u Jersom Shylla bad ki dkhot ka seng ki la hiar sha ka thain Khanduli namar kadei kawei na ki thain ha Jaintia ba ki mynder ki ju ioh lad ban rung sha ka jylla.
Ka seng ka lah lum ruh ia ka jingialang kaba kyrkieh bad ki waheh shnong ka thain bad ki VDP ban pynsngewthuh ia ki ban long kiba pynkhreh ban iada na ka jingrung ki dkhar na Assam lyngba ki shnong jong ki. Ka seng ka lah ioh ban kynduh ruh ia u OC u ma Siangshai, ka thain ha ka shnong Saitsama Police Outpost ,West Jaintia Hills District ban teh lakam bad ban peit siar bha ia ki kali kiba wan poi na West Karbi Anglong,Assam.
Na ka liang u OC ma Siangshai ,u lah ong ka police outpost ha Saitsama kan ym lah ban pynbiang ki pulit, namar ki duna palat ki nongtrei pulit ha kane ka outpost, hynrei u lah ong ka long shisha kaba sngewtynnad haba ka seng JSU ka lah wan sha khmat ban tyrwa ban ia trei lang bad ki bor pulit ryngkat bad ki VDP jong ka thain bad ka shnong Khanduli.U President u la ong kum ka seng kin pynlong ia ka jingkhynra ia ki kali kiba rung na ka liang Jaintia Hills bad lah phah ruh sha baroh ki circle jong ka seng, khamtam kiba don sha ka thain border Assam bad Bangladesh ba kin peit siar ia ka jingrung ki kali bad ki briew na bar jylla bad u lah bthah ruh ia ki President jong ka circle ba ki dei ban pyntip sha ki bor pulit lada lap ia ki mynder kiba suba kiba dei ki bym don NRC ne ki bymdon kino kino ki ID ban pynshisha ba ki dei ki nong India.

Nongpoh: U Bah Jayand Sylliang, Rangbah shnong ka Pahammawlein, hynnin ka miet ha ka por 10 baje ei ei mynmiet, u la shah ktah kti bad shah tied shah bom ha ki pulit ka Central Reserve Police Force (CRPF) kiba ap pahara ha Weigh Brigde kaba don ha Narang, Ri Bhoi, kata ha ka por ba u dang wanphai na Nongpoh da ka jingthmu ban leit sha iing kaba don ha Pahammawlein.
La ioh jingtip ba hynnin ka miet, utei u rangbah ha ryngkat bad ki paralok jong u, ki dang wan na Nongpoh, hynrei haba ki la poi ha katei ka jaka, ki la ngat ha ka jingsahkut kali, kumta haba utei u rangbah u la hiar na ka kali da ka jingthmu ban leit kylli ia ka daw jong ka jingsahkut kali, hynrei kitei ki pulit CRPF kiba don ha katei ka jaka, kim shem la jubab ia ka jingkylla, pynban ki la shu sangah bad bom khlem daw bad khlem da pynsngap wat haba u la pynithuh ialade ba u dei u Rangbah Shnong ka Pahammawlein, ka shnong kaba iajan eh bad katei ka Narang.
Tang mar ia jia katei ka jingshah shoh, utei u Rangbah Shnong u la pyntip mar mar sha ki bor pulit ka Nongpoh Police Station bad na ka liang ki pulit ki la shimkhia ban wan hiar sha katei ka jaka ban tohkit halor katei ka jingjia bad ban tehlakam na ki huri hura.
Watla utei u rangbah shnong, um pat da mynsaw jur, hynrei u la shitom tang malu mala, kata hadien ba u la shah tied da ki Lathi ha kitei ki Pulit CRPF kiba ap ha katei ka jaka.

Nongstoiñ: Ki paidbah nongshong shnong ka thaiñ Nongkseh bad ki shnong kiba marjan ki la ia kynduh jingeh kaba khraw, namar ka jingnang sniew bad jot rathai noh ka surok Patharlyndan haduh rud ka Wah Umtrew kaba don 18 KM eiei bad ka jingsniew jong kane ka surok kala pynlong ruh wat ia ki Ambulance ba kin salia ban leit kit nongpang sha kitei ki thaiñ.

Kumta hadien ka jingud jingnam jong ki paidbah nongshong shnong katei ka thaiñ na ka liang jong ka Seng HYC Mairang Circle, hapoh ka jingialam jong u Samla Macdonald Nongrang kum u President ha ka 4 tarik u Nailur kala hiar sha katei ka thain na ka bynta ban pynlong ia ka jingjurip ia katei ka surok ha kaba ka seng kala lap shisha ia ka jingsniew kaba la palat pud jong katei ka surok.

Ha kaba iadei bad katei ka jingeh ba ki paidbah nongshong shnong katei ka thain kila ia kynduh na ka liang jong ki nongthoh khubor kila ioh ruh ban iakren bad u sordar ka shnong Nongkseh u bah Kisolphrangsngi Kharsyntiew u ba la pynpaw ia ka jingsngew khia kaba halor ka jingsniew jong katei ka surok bad u la ong ruh ba naduh bala sdang ban shna ia katei ka surok ha u snem 2012 haduh mynta ym shym pat la don satia ka jingmaramot.
Shuh shuh u bah Kharsyntiew u la iathuh ruh ba ka daw jong ka jingsniew palat jong katei ka surok kadei ruh namar ka jingwan iaid ki trok kit dewiong ha kine ki snem bala dep kaba la pynlong pat ia ki paidbah nongshong shnong katei ka ka thain mynta ba kin mat ia ki jingeh ha ka iaid ka ieng khamtam ha ka pang ka shitom.
Ym tang kata u la ong ruh kaba pynsyllang palat ia ki paidbah kadei ha kapor ba don ki nongpang ha shnong bad u la ong ruh ban leit sha Dongkiingdieng ruh kala jngai ia ki katba sha Umsning jong ka Ribhoi District kaba la kham jan ruh phone haba phone ia ki Ambulance kim ju treh ban wan sha ka thain jong ki namar ki salia ba sniew palat ka surok kumta kim banse ban hap leit hi shaduh sha shiliang Wah Umtrew ban kit ia ki nongpang bad na katei ka jaka ki Ambulance kila treh ban wan.
Katba na ka liang jong u Samla Makdonald Nongrang President ka Seng HYC Mairang Circle pat u la ong ba Seng kan sa leit ban iakynduh ia ki nongmih khmat jong ka thain Mairang bad kumjuh ia ka tnad PWD kaba don ha Mairang na ka bynta ban dawa phah maramot noh mardor ia katei ka surok ia kaba ka Seng kala lap dala ki jong ki khmat ia ka jingsniew kaba la palat pud.

Bah Monarch Shabong

Ngim tip, la ka donkam ne em ban ong ba ka dei tang ka 5tarik Nailur, kum ka sngi kynmaw burom ia ki nonghikai, namar ba ha kine ki sngi, ngi la iai kynmaw man ka por bad ngi la iai pule ruh ia ki jingthoh jongki, halor ki mat bapher bapher; hynrei kiba kham kongsan, ki dei ki jingdawa jongki, ia la ki jong ki tulop, ia la ki jong ki arrear bad sa shibun bah kiwei kiwei, namar ba kitei imat, ki la shu sah pongding ha ka pla jong ka sorkar Jylla.

Ha ki sla jong ki kotkhubor, ngi iohi ia ki nonghikai Higher Secondary, ia ki nonghikai Upper Primary, ia ki nonghikai Adhoc, ia ki nonghikai SSA, ia ki nonghikai Lower Primary bad sa kaei pat, ba ngim iohi (lait noh imat tang ia ki nonghikai kolej); hynrei ngi iohi, ba kitei ki shu don beit ia ka jingpang iabit, ha kaba ki don ia kajuh ka jingeh, kaba ktah haduh katta katta ia ka trei ka ktah, ka kam ka jam bad ka ioh ka kot jongki bad ka iing ka sem jongki.

Ka sorkar Jylla, lyngba ka tnat pule puthi, ngi iohi, ba ka sei ia la ki jong ki nia bad ki jubab, kiba man ka por ban iada ialade bad kawei ka jubab, kaba ki shait ai, ka long ba ka sorkar kam don pisa bad katei ka dei ka jubab kaba da sngew mutlop haduh katta katta bad lada ka long kumta, ka la dei ba kan sangeh noh, ka jingthung nonghikai thymmai lane ba kan weng noh ruh ia kine kiba la don lypa, lane ban shu aiti noh ia ka kam pyniaid ia ki skul ha ki kynhun niam bad ki riew shimet.

Ka long kaba ijli tasam, ba U MLA, u minister lem bad ki ophisar ne ki nongtrei sorkar, kiba dei kajuh ka hok kum ki nongshong shnong jong ka Jylla, ki ioh tulop ha shwa ka 1tarik kut bnai, katba kiba pli kitei ki nonghikai, ki ioh tulop shisien ha ka 90 sngi, lane don ba ki ioh shisien ha ka 180 sngi bad katei ka dei ka jingleh pap kaba jubor tam lane kaba pyni, ba kim dei ki kynrad, hynrei ki dei ki mraw ha khmat ka sorkar Jylla, namar ba ia la ka jong ka bhah, ki hap ban leit pyndem ngon ha ki pohjat jong ki heh ki hain.
Ki don ar tylli ki seng jong ki nonghikai, kiba la rai ban pynher lama iong ha ka 5tarik Nailur, hynrei katei ka long tang kawei ka dak jong ka jingbitar jongki, ia ka jingleh pap jong ka sorkar jylla ia ki, hynrei ka jingshisha, ka long ba ki skul ne ki kolej jong ki riew shimet, kim ju don daw ban ia kajia bad ki nonghikai, namar ba ki siew, kat kum ka jinglah bor jongki bad kim ju kular ia ka bneng.