Kong Linda Kongwang

Ban ioh iaka met ka phad kaba koit ba khiah, kaba smat basting kadei ka jing kwah jong manla uwei pa uwei u briew.

Ka jingkilan met kadei kaba donkam eh. Lada phi kwah ban ioh iaka met kaba shait bakhlain, ka bor ban trei bad ruh ka rta ban imslem, tang ka jingkilan met kaba lah ban iarap iaphi.

Ka jing myntoi ba ngi ioh nakaba kilan met kalong ka bymlah ban len. Baroh kiba ioh jing myntoi suda la udei u rangbah, shynrang ne kynthei, khynnah ne wat kiba don jing duna haka dkhotmet.
Phi tip bha baka jingkilan met kalong kaba bha, hynrei phim tip pat haduh katno ka bha. Kane ka jing thoh ka kdew shai balei phi dei ban kilan met bad kumno ka ai jing myntoi iaphi.

1. Ban pynduna jingkhia – Ka jingkilan met nyngkong eh ka pynduna iaka jingkhia jongka met bad ka iada naka jing sngaid palat. Ka jing kilan met manka por ka ot noh iaka khlein ba sop haka met. Katba phi nang leh katta kan pynduna iaka khlein ba sop haka met kaba lah ban buh jingma haka jingim jongphi. Ban leit kilan met manka por shaka jaka kilan met kadei kaba bha tam eh, hynrei wat duh jingkyrmen lada phim iohpor than ban leit man ka por. Kano kano ka rukom pynkhih met ka kham bha ban iaka ba phim leh ei ei. Ban ioh iaka jing myntoi jong ka jingkilan met leh iakano kano ka kam kaban pyn smat pyn sting iaphi kum ka jing iaid kjat shaki jaka trei, kiew iaki mawkyndon khlem da pyndonkam iaka elevator lane trei iaki kam iing kam sem jongphi. Leh ia kine man ka por namar u dei u shabi jongka jing koit jingkhiah.
2. Ban iada naki jing pang jing shitom – Ka jingkilan met ne ka jingpynkhih met ka long kaba kongsam tam ban lait naki jing pang ba har rukom. Ka iada khamtam naka jing pang klongsnam, ka jingkiew ka snam bad kiwei kiwei de. Kam pher laphi don kano kano ka jing shitom kan pynjah lut iaki jing tlot jongka bor met.Hangne ka jingkilan met daka ba iakura (punch) ka long kaba donkam eh namar ka pyntuid bha iaka snam sha baroh ki bynta jongka met kaba lah ban pyllait naka jingma ban ioh iaka jing pang klongsnam. Ban lait naka jingshahktah ka koit ka khiah kum ka stroke, metabolic syndrome,high blood pressure, depression, anxiety, cancer etc.ka jingkilan met kadei ka lynti kaba bha tam eh namar ka iarap kham bha iaki dkhotmet ba shapoh bad ka iarap ban pyllait naka jingma jong ka jingiap kloi.
3. Ka pynbha iaka jinglong jingman – Kano kano Ka rukom kilan met kadon iaka bor ban pyn khih iaka jabieng batlot jongphi bad kaba lah ban pynsngewkmen, pyn shemphang bad pyn duna khuslai jingmut. Lyngba ka jingkilan met phin ioh iaka met kaba koit bakhiah kaba lah ban ai jingsuk bad jing kmen haba phi leh ne thew kano kano ka kam. Kan pynshlur bad kyntiew khamtam iaka jing burom ialade.

Shillong: Mynta ka sngi, ki pulit jong ka Khliehriat, ki la ioh kurup ia 76hajar tylli ki yaba tablet, kiba la ju tip da ka kyrteng World is Yours lane ki jingdih kiba pynbuaid jur ia u briew, kiba khia kumba 7.85 kilogram bad kiba shongdor antad kumba T.1klur, ha ka jingkhynra ba la don bynta da ka Anti Narcotics Task Force (ANTF), East Jaintia Hils lem bad ka tnat ANTF, East Khasi Hills lem bad ki pulit ka Khliehriat.

La ioh kurup ia kitei ki tiar na ki lai ngut ki kynthei, kiba wan na Silchar sha Shillong/Guwahati, da ka kali Sumo.

Ha kawei pat ka jingjia, ki pulit jong ka Anti Narcotics Task Force (ANTF), East Jaintia Hills, ha ka jing ia trei lang bad ki pulit ka ANTF, East Khasi Hills lem bad ki pulit ka Lad Rymbai, ki la 70.43 grms u heroin, na ki ar jaka ha Shillong.
La ioh kem ia ar ngut na katei ka jingjia bad haba khein lang ia baroh, kiba shah kem ki long 6 ngut bad ka jing kurup ia u heroin ka long 93.92 grams.
Ym shym la ai kyrteng ia kiba shah kem, namar ba ka jingtohkit ka dang iaid, ong U Vivekanand Singh, Superintendent of Police, East Jaintia Hills District.

New Delhi: Ka kashari, ka la rai ban set phatok ia U P Chidambaram, myntri pla pisa barim ka sorkar India, na ka bynta 14 sngi kynthih, kaba long haduh ka 19tarik Nailur 2019 bad katei ka dei hadien ba la pynkut noh ia ka jingtohkit jong ka CBI kaba ar sngi ia U Chidambaram, ha ka jingiadei bad ka kam bamsap INX Media.

U Ajay Kumar Kuhar, U Special Judge, ula phah ia U Chidambaram sha ka jingtohkit jong ka kashari, ha kaba la shah ba un rah ia ki dawai dashin jongu ruh sha phatok.

Namar ba U Chidambaram, u dei uba hap ha ka kyrdan Z level security, kumta la bthah ban pynsah ia U Chidambaram, ha ka kamra kaba kyrpang.

New Delhi: U P Chidambaram, myntri pla pisa barim ka sorkar India, un hap ban sah na ka bynta 14 sngi kynthih hapoh phatok bad ka patok, kaba un sah, ka dei ka patok number 7.

Katei ka patok number 7, ka dei ruh kaba ula ju sah u khun jongu, U Karti. Ka kashari, ka shah ia U Chidambaram (73), ba un rah ia la ki jong ki dawai bad ka jaka sah jongu, kan long ha ka kamra kaba marwei, namar ba u dei uba don ha ka kyrdan Z security.

Katei ka phatok number 7, ka dei kaba kiba shah set ki thiah ha madan, hynrei ia kito kiba la kham rangbah, la ai ba kin thiah ha ka jingthiah dieng, tangba ym don tusok satia. Yn ai ruh ia u, ia ka painkhana kaba ki pyndonkam sha ri sepngi, ba un pyndonkam.

Ka jingbam un hap ban bam da kaba ki pynkhreh na phatok, kaba kynthup ia shi bowl u dai, shi jait u jhur bad 4 lane san tylli ki chapatti. Lada jia ba U Chidambaram, u kwah ban bam da ki jingbam south India, u lah ban leh kumta, tangba u lah ban thied na canteen kaba don ha phatok.

La iathuh ba ia ki jain, u lah ban phong da kiba na iing. Lada don pat ka jingma ia ka jingim jongu, namar ba u dei u myntri kam poh iing barim ka sorkar India bad ba u dei uba don bynta ha ka jing iakhun pyrshah ia ki ehrang, hadien ka jinghiar thma ha Mumbai, ha ka 26/11, yn lah ban rah noh ia u, sha ka patok number 1, kaba dei ka jaka, kaba ki bun bha ki pulit kiba na Tamil nadu, kiba pahara hangtei.

Shillong: Ka Khasi Student Union, Federation of Khasi Jaintia and Garo people, Ri-bhoi Youth Federation bad ka Hynniewtrep National Youth Front mynta ka sngi ki la leit ban kynduh ia u Myntri rang bah ka Jylla u Conrad K Sangma halor ka jingthmu ban wan rah ia ka Meghalaya Residential Safety and Security Act.

Haba ladep ka jing ialang haba ia kren bad ki nongpathai khubor u president ka KSU sengkmie u Lambokstarwell Marngar u la ong “Da wan rah ia ka amenment ha ingdorbar thawain kam dei ban pyn tlot ia ka ain ka ba lah don lypa, ngi kum ki 13 seng ngim pat kynrandien ia ka jing dawa ILP ha Meghalaya.”

U bah Marngar la ong ruh ba kam pat ju iohsngew ia ka jing ia tai ha ingdorbar thawain ban wanrah ia ka ILP ha ka Jylla.

“Lada ka sorkar kam pdiang ia ki jingai jingmut jongngi, ngi ruh ngin ym pdiang ia ka rai jong ka sorkar bad ki seng kin mih madan biang ban dawa tyngeh ia ka ILP, haba na ka liang ka sorkar ka la kubur ia ka jing donkam ban pynkhlain ia ki ain tangba balei pat kam ia kren halor ka ILP ha ingdorbar” ong u nongialam ka KSU .

Shillong: Ka Privilege Committee ka ïing dorbar thaw aiñ ka jylla, ka la kyntait ia ka jingpan map u Deputy Superintendent of Police (Dy.SP) u W Momin, ba la wan bah khlieh da u DGP u R Chandranathan ha ka jingkhot hajir mynta ka sngi.

U chairman ka Privilege Committee u Saleng A Sangma u la ong ba ka Committee ka la shim bishar ia ka jingsaid nia u dy.SP ba la wan mihkhmat da u DGP hynrei kam pat hun bad ka la khot biang lashai ka sngi ba un wanrah da ka jingthoh bad yn sa peit lashai ban map ne em.

“U la panmap hynrei ngi la bthah ban wanrah da ka jingthoh lashai bad yn sa peit ban map ne em”, la ong u dkhot ka Committee u bah HM Shangpliang ba la don lang u chairman u Saleng bad kiwei.

Katkum ka jingong u Saleng, u MLA ka Rambrai u bah Kimfy Sydney Marbaniang u la ujor pyrshah ia u Dy.SP (Traffic), ym namar halor ka jingtah ïit iong ha ka kali hynrei pyrshah ia ka jingleh meng jong une u heh pulit pyrshah ia u MLA ba la jied da ki paidbah.

“Ka jingujor u MLA kam dei ia ka jingtah ïit iong hynrei ka dei namar ka jingleh baheh leh meng u Dy.SP”, la ong u Saleng.

Katkum ka jingiathuh u chairman ka Committee, la kam ba u Dy. SP ha ka por 11 baje eiei mynstep ha ka 7 tarik Nailar ha Motphran, u Dy.SP (Traffic) u la bat ia ka kali u MLA bad ka la mih ka jingiapyni nia katto katne por.

Ha ka jingujor, u MLA ka Rambrai u la ong, “ ha katei ka sngi katba nga dang iaid na Mawkhar sha Garikhana, por 11 baje mynstep, ha Motphran u Dy.SP (traffic) u W Momin, u la bat ia ka kali jong nga da kaba phah weng ia ka ïit iong hynrei haba nga la pynithuh ba nga dei u MLA bad nga lah ban tah ne weng ia ka ïit iong lada donkam hynrei u Dy. SP um pyndem satia bad namar kane, nga la ong ia u ban weng ia ka ïit iong hynrei um shym la leh”, .

Halor kane, u MLA ka Rambrai u la ujor sha ka Committee ba kan shim da ka kam kaba tyngeh ia ka rukom leh heh leh meng une u ophisar pulit pyrshah ia u nongmihkhmat paidbah.

Ha kajuh ka por, u Saleng u la ong ba ka jingkren u Dy.SP sha ki lad pathai khubor ba ka Committee ka la khot hajir ia u namar ba u phah weng ia ka ïit ïong, ka la long kaei kaei kaba bym dei bad u la pyrshang ban pynbakla ia ka jingmut jong ka kam.

“Na ka liang u DGP u la kular ban phah tohkit halor kane ka kam”, la ong u Saleng.

Nga ka Smt Irilda dhar ba shong basah hapoh Amlarem sub division ngam banse ban pynpaw ia ka jingsngewnguh kaba khraw ia ka jingsumar kylluid mynsiem bad ka jingpyniaid bastad jong u trai jong kane ka hospital, u Dr RS Thangkhiew u ba don ka mynsiem blei ban sumar ei khlem da shim wat tang ka bai rung emergency na ka bynta ka jing shitom ba kyndit jong u khun jong nga mynnin ha ka por 11.30 p.m, 4-9-19 u kampher dhar u ba dang pule hapoh NEHU.

Kane ka jing shitom jong u ka long namar ba u sah shyieng doh ha ka por ba u bam ja hapoh hostel . Te ynda nga la tip ia kane lyngba ka phone kumta nga phah direct ia u ban un leit sha Super Care emergency namar um lah shuh wat tang ban kren. Nga phah direct shata namar nga tip bad iohi da la ki khmat ba kane ka hospital ka shim khia haduh katta katta ia ki nong pang,kiba wan na nong kyndong. Ia kane nga pynshisha namar nga ruh nga la juh thiah pang 10 sngi ha u bnai January 19.

Te kane ka jinglehsbun jong kane ka hospital khamtam ia ki Samla pule kiba don ha ka jingshitom kaba kyndit malu mala ka pynlong ia nga ban pynpaw ia ka burom basbun jong kane ka hospital bad nga tharai lada shawei ki hospital private te ym lait na ka 2 ne 3 hajar.

Nga ai khublei ia ki nongtrei jong kane ka hospital lem bad ki Doctor .To Blei un nong kyrkhu shuh shuh ia kane ka hospital ba kan nang kiew shaphrang ha ka jingshakri ia ki paidbah ha kane ka jylla Meghalaya ka jong ngi.

Bengaluru: U myntri rangbah ka Karnataka, ula khluit tar ia u myntri ka tnat sam kyiad jong ka sorkar Karnataka, na ka daw, ba u iathuh sha ki kotkhubor, ba ka tnat jongu, ka don jingthmu ban leit pynpoi beit beit ia ka kyiad ha ka jaka sah jong kito kiba kwah kyiad.

U BS Yediyurappa, myntri rangbah ka Jylla, ula dumok tyngeh ia U H Nagesh, uba dei u myntri ba peit ia ka tnat Excise jong ka sorkar Jylla, ba u leit pynmih ia katei ka jingkren, khamtam ha kaba kum kane ka por, ba ka jingshlei um ka jur bha ha Karnataka.
La iathuh ba mynta ka step, U Yediyurappa, ula phone ia U H Nagesh, uba dei u myntri ka tnat kyiad, ha kaba ula dumok bad ong “Mano ba phah ba men kren kumta sha ki kotkhubor” Mem lah ong ban shu kren katba me sngew mon. Kaei kaba me mut, kun beit halade. Ka Karnataka, ka dang mat ia kat kane ka jingshlei um bad ka jingkren jongme, kan nang pynmih ia ka jingjyrwit jyrwat pynban”.
Kham hadien ba ula shah dumon, utei u myntri, ula jubab biang sha ki kotkhubor, ba ki la shim bakla ia ka jingkren jongu. “Nga shu pyni nuksa ia ka jingbun ki Jylla, kiba leit ai kyiad sha ki iing briew, hynrei ngam shym mut satia hangne ha jylla jongngi. Nga pan map ia ki longkmie kiba sngewsih ia ka jingkren jongnga”.
Ka jingmut tynrai ha U Nagesh, ka dei ba u kwah ban leit ai kyiad noh ha iing jong ki briew, ba kin ia dih hun ha la iing bad ba kin nym ia niah kali buaid shuh, ban nym mih ki jing ak siden bapher. “Lada ia ka dud lah ban leit ai sha ki iing briew, kumta ia ka kyiad ruh lah ban leit ai sha ki iing briew” ong u myntri.

Shillong: Ka Shillong Chamber Choir, kan rwai lashai ka sngi, ha ka por 11.30 mynmiet ia ka jingrwai Vande Mataram.

Katei ka jingrwai jong ka SCC, kan dei ha kaba pyni ia ka jingleit hiar ka “Chandrayaan Mission – 2” ha u bnai bad da ki million ngut kin peit kai lashai ka miet ha ryngkat ka rwai ka siaw jong ka Shillong Chamber Choir.

Yn lah ban iohi ia katei ka jingrwai naduh 11.30 mynmiet ha National Geographic, Hotstar bad Star Plus.

Shillong: Ha ka cabinet ba long mynta ka sngi U Myntri kam poh iing jong ka jylla u James K Sangma, u la iathuh kum shi bynta ban teh lakam ia ki skulbah jong ki riewshimet ka cabinet ka la shim ia ka rai ban wanrah ia ka jingpynkylla ia ka “ Meghalaya Private Univeristy(Regulation Establishment)” u la ong ruh ba hapoh ka jylla Meghalaya ki don phra tylli ki skulbah jong ki riewshimet bad la don kam ban pynkylla ia ka ain kaba la don ban tehlakam ia ki.

Katkum kane ka ain kaba thymmai ba ka sorkar ka kwah ban wanrah ka long ba ki Skulbah hadien ba la pdiang ia ka ain ha kaba ia dei bad kano kano ka Skulbah hapoh ka iing dorbar ka dei ban trei kam noh hapoh ka ar snem bad ki dei ban don ia la ka jong ka jaka pule ka jong ki lem kumta ka sorkar kan pynduhnoh ia ka jingbit.

Kiwei ki mat ki long ba ka Kabinet kan kyntiew noh ia ka bai shong dorbar bad shnong komiti ki MLA na ka T.600/- kaba sniew mynta sha ka T.1200/- tyngka , kawei ka long ban siew ia ka bai draibar jong ki MLA barim T.10000/- tyngka shibnai bad man u snem kan kiew da T.2000/- tyngka.

U Myntri kam poh iing la iathuh ba bun na ki rai kiba la pdiang mynta ka sngi hapoh jong ka Kabinet ki long ki ain kiba ka sorkar kan wanrah hapoh iing dorbar ha kane ka dorbar synrai ka ban sdang la shai ka sngi.

Shillong: Ka Lady Keane College ka la rah ia ka nam lahduh ka NEHU Inter College Football (Women) Tournament 2019. Ka Lady Kean College ka la pylliem Shillong College da 2-0 kol ha ka jingiakhun ha ka J. N. Sports Complex, Polo, Shillong.

Ia ki kol ka Lady Keane College da ka Deiphibamon Warbah ha ka 36 & 50 minit.

Ha kane ka sngi kut la sam khusnam da ka Coordinator, NSS, NEHU ka Dr. Deigracia Nongkynrih, na ka Department of Economics, NEHU kaba la sam khusnam ruh sha ka lahduh ba la don lang Dean of Students Welfare, NEHU u Prof. S. Umdor bad u Assistant Director of Sports, NEHU N. Das.

Shillong: U District Sports officer East Jaintia Hills, u khot iaki club bad skul kiba don hapoh ka East Jaintia Hills District ban iashim bynta ka jingialehkai kho kho, ia kaba ka ophis kan sa pynlong shen hapoh ka skhim Rural Sports.

Ka tarik ba khatduh ban pdiang ia kiba kwah iashim bynta kan long haka 20-09-19. Ia ki phom lah ban ioh naka ophis u DSO haki por treikam. Ka jingialehkai kan long na ka bynta ki kynthei bad shynrang.

Jowai: Ban pyntreikam ia ka kyndon ba 101 jong ka Meghalaya Police Act 2010, u SP ka West Jaintia Hills, u Sahep Lakador Syiem, mynta ka sngi u la pynmih ia ka hukum ban dain kuna haduh 5000 tyngka ia kino kino ki briew kiba leh jakhlia ne leh Taroi kumba ong ki Pnar ha baroh ki jaka paidbah, la ha surok bah, surok shnong ne jaka shangkai pynngad.

Kane ka long katkum ka kyndon ba 101 jong ka Meghalaya Police Act 2010 la ong u sahep SP ka WJH, u bah Lakador Syiem ha ka hukum ba la pynmih mynta ka sngi.

“Phim dei ruh ban pynwit pynthut lane pynmynsaw ia kino kino ki nongleit nongwan bad ban pynjakhlia ia ki jaka da ka bret pathar kat sha balap ba shem.
“Kiba pyrshah ia kane ngin kem ia ki bad ngi phah ia ki sha ka Iing Kashari badon Burom bad ki lah ban shah dain kuna haduh T. 5000 nalor ka shah set phatok”, la ong katei ka hukum jong u sahep Lakador Syiem.
Utei u heh pulit ka WJH u la kyntu ruh ia ki nongwan jngohkai pyrthei ba kin pynbiang ia ki jaka bret plastic, sop jingbam lane kino kino ki jingbret jong ki hapoh ki kali jong ki bad ba kin sa bret pat ha ki jaka ba la buh kyrpang ym ban shu bret pathar.
Kyntang iawai u la kyntu ia baroh ki nongshong shnong ba kin ai ka jingiatreilang khnang ba ynlah ban pynlong ia kane ka District kaba khuid kaba suba.

Nongpoh: Haba shimkhia halor ka jingeh ki Nongot doh masi ha Nongpoh, kiba la iakynduh jingeh ban pynpoi ia ki masi na ka bynta ban otdoh ha Nongpoh, hynnin ka sngi ki nongialam ka KSU, North Khasi Hills District, hapoh ka jingialam u President u Samla Ferdynald Kharmani bad u Lambok Rymbai Secretary, ki la leit ban kynduh syndon ia ka Kong RM Kurbah, DC ka Ri-Bhoi District, na ka bynta ban iakren halor katei ka jingeh ki nongot doh masi ha Nongpoh.

Ha katei ka jingleit kynduh DC bad SP, kitei ki nongialam ka KSU, nalor ka jingiakren hynrei ki la phah ruh da ka dorkhas bad kaba la pynpaw lutnia baroh kitei ki jingeh kaba la iakynduh da ki Nongot doh masi ha Nongpoh.

Kitei ki nongialam ka KSU, ki la pynpaw ba kitei ki nongot doh masi ha Nongpoh, ki la shem jingeh halor ka jingbymioh masi ha Iew masi kaba don ha Baridua bad nalor kata ki shem jingeh ban pynpoi ia ki masi kaba ki thied masi na Jagiroad, Nagoan, Ronghona bad kiwei kiwei ki jaka, namar haba ki la poi ha Byrnihat ki shait shah pynphai ha ki Pulit ka Byrnihat Outpost tang namar ka jingbymdon ia ki Certificate ban pynshisha ba ki dei ki masi ba koit ba khiah bad ba bit ban ot doh.
Halor katei ka jingeh ki nongot doh masi ka thain nongpoh naka liang ka KSU kala buh ka jingkyrpad sha ka DC ba kan shimkhia ban peit lem iaka jingeh kitei ki nongot doh masi ha ka thain nongpoh khnang ba kum ki nongot doh masi kin nym mad jingeh shuh hadien habud.
Haba iadei bad katei ka dorkhas kaba la phah da ka KSU lyngba kitei ki Nongot doh masi ha Nongpoh, katei DC jong ka Ri Bhoi, ka la ong ba kan sa shimkhia ba kan shimkhia ban pyntip sha ki bor ba kham halor, na ka bynta ban shimkhia bad ban weng ia katei ka jingeh da kitei ki nongot doh masi ha Nongpoh.

Shillong: Da ka jingthmu ban pynduna ia ka jingduh nong ka sorkar, kumta ka sorkar Jylla, ka la rai ban weng noh ia ka jing pynduna dor kaba T.2.50 pisa, kaba dei ka khajna kaba la weng ia ka petrol bad ka diesel.

“Ngi la rai ban weng noh ia katei ka jingpynduna ia ka khajna, ba ka ktah ia ka jinghiar kamai jong ka Jylla” ong U James PK Sangma, sha ki kotkhubor mynta ka sngi.

U Sangma, u iathuh ba ka sorkar India, ha U Risaw 2018, ka la pynbna ba kan pynduh ia ka excise duty da T.2.50 pisa ia ka petrol bad ka diesel.
“Halor ka rai jong ka sorkar India, ngi la pynduna ia katei ka dor jong ka petrol bad ka diesel” ong U James bad katei ka la ktah jur ia ka jingduh nong ka sorkar.

U myntri kam poh iing, u iathuh ba ka jingduna pisa, ka la poi sha ka T.61.60 klur haduh ka 31tarik Lber 2019, na ka jing pynduna ia ka khajna petrol bad diesel. U iathuh ba ka jingduh ia ka khajna ka poi sha ka T.47.55klur na ka diesel bad nangta sa T.14.5 klur, kaba dei ka khajna na ka petrol.

Shillong: Ka KSU South West Khasi Hills District myn hynnin ka sngi 5 tarik hapoh ka jingialam jong u samla Jiedskhem Nongsiej, General Secretary, ka la leit ban iakynduh ia ka Kong I. Laloo, DC South West Khasi Hills District ban pynkynmaw halor ki mat kiba ka seng ka la ju kren bunsien ia ki bor district bad kita ki long halor ka District Task Force ban tehlakam ia ki nongshongwai bar jylla khamtam hapoh ka thain khappud jongka District bad ruh halor ka Work Permit na bynta ki nongtrei bar jylla hapoh ka District. Ha kane ka jingiakynduh jongka seng la iadon ryngkat lang ruh da ki Labour Inspectors jongka District.

Halor ka mat jongka District Task Force ka seng ka la pynkynmaw bad kyntu iaki bor district ba namar ia kane ka committee lah thaw naduh u snem 2018 bad ki la pynpaw ruh ia ka jingsngewdiaw halor ka jingsuki pat ban pyntreikam pura ia kane ka ain, namar ka seng ka sngew ba ka long kaba donkam kyrkieh shikatdei eh khamtam ban kham teh lakam iaka jingwan rung ki bar jylla naka daw ka NRC ha Assam.

Na ka liang ka DC ka la iathuh ba ka la phah ia kine ki ain kum ka jingpyntip sha ki shnong bapher bapher khamtam ha ka thain border, hynrei ka jingsuki ka long namar kham hadien la hap ban pynkylla Khasi shwa ia kane ka ain na ka jingkyrpad jongki bor shnong.
Haba iadei bad ka Work Permit pat ka seng ka la pynpaw iaka jingsngewkhia halor ka jingsuki ban phah register ia ki nongtrei bar jylla da ki contractor bad ki malik mawshun ne dewiong, wat la ia ka District Level Team la dep thaw hapoh ka District naduh u snem 2016 bad wat haba ka District ka la don la ki jong ki Labour Inspectors ban peit ia ka Ranikor Block bad Mawkyrwat Block, ong ka kyrwoh na u samla Forwardman Nongrem, President KSU South West Khasi Hills District.

Shillong: Ki dkhot jong ka Hynniewtrep Achik National Movement Mawthadraishan circle myn hynnin ka sngi ki la leit ban khynra ia ka labour laisen ia ki bar jylla ki ba trei ban shna ia kawei ka Petrol pump ha Kynshi.

Ha kane ka jingkhynra ki la lap da ki phew ngut ki bar jylla ki ba trei hang ne ki bym don ia ka labour laisen kumta na ka liang jong ka seng ki la phah leit phai noh ia ki baroh sha ki jaka ba ki wan.

Jowai: U heh pulit jong ka WJH uba dei u Superintendent of Police, u bah Lakador Syiem u la ioh ia ka Union Home Minister Medal halor ka kam hikai (Training) ia ki para pulit jong ka jylla Meghalaya bad ka thain Shatei Lam-mihngi.

Ia ka khusnam la pynkup da ka Bureau of Police Research and Development (BPR&D) jong ka sorkar India kaba hap hapoh ka Home Ministry ia kaba la seng naduh ka snem 1970 halor ka jingthmu ban iai am jong ki pulit ha baroh kawei ka ri.
U bah Lakador Syiem u dei u Principal ba mynshwa jong ka Police Training School (PTS) bad u la ju long ruh u nonghikai ha ka North East Police Academy (NEPA) naduh u snem 2009 ha ka por ba u dang long kum Deputy Superintendent jong ka tnat pulit ka jylla.
Ha kine ki shiphew snem ba la leit ban ai jinghikai ia ki para pulit ha kylleng ki jaka ai jinghikai lane ki Training Centre ka Meghalaya Pulit bad u la ju leit ban ai jingkren ruh halor ki mat bapher bapher ha ki skul ki colleges bad ha kiwei kiwei de ki jaka.
Haba u leit ban ai jingkren, u bah Syiem u la ju kren barabor shaphang ka jingdih drugs, ka jingshah ban bein ki kynthei ki khynnah bad jingktah ki seng kaikhlaw ia ka imlang ka sahlang nalor kiwei kiwei ki mat.
Haba iakren bad u bah Lakador Syiem lyngba ka phone halor kane ka khusnam ba u la shah pynkhup, na ka liang utei u sahep u la ong ba ia kane ka khusnam ba la ai ha nga, ka jingiaroh ka long sha baroh ki nonghikai (Lecturer) kiba la ju khot kum ki Guruji hapoh jaka Training.
“Nga ai ruh ka jingkhublei sha baroh kito ki sahep rangbah ha shwa jong nga kiba la long ki Principal bad Lectural khamtam eh ia u Khliehduh ki pulit jong ka jylla, u DGP uba la shaniah ia nga ban long kum u Principal bad ruh kum u pulit uba shakri ia ka ri bad ka jaitbynriew”, la ong u bah Lakador Syiem.

Shillong: Ka jingrakhe ia ka sngi ki nonghikai ha ka nongbah kala kylla blad rong noh namar ba ki nonghikai deficit hapoh ka lama ka KJDSTA bad GHDSTEA kila pynlong ia ka jingdeng lama iong ban pynpaw ia ka jingsngewsih ba ka sorkar kam shym la pyllait ia ka tulop arrear kaba la 25 percent nalor ka jingioh tulop kaba shisien ha ka 3 ne 4 bnai.

Myn hynnin ka sngi katba ka sorkar ka iaroh da ki ktien sbai ktien rupa ia ki nonghikai ha ka jingialang hapoh ka hall ka State Central Library, Shillong ia ka sngi ki nonghikai ne teachers day, hynrei ki nonghikai deficit pat ki sngewsih ki khuslai namar ba kim pat ioh ia ka arrear kaba dei ka bynta ka tulop. Kine ki nonghikai ki ia deng lama iong habar ha phyllaw ka State Central Library.

Halor kane ka jingiakhih ki nonghikai, u myntri ka tnad pule puthi u bah Lahkmen Rymbui, u la ong ba ka sorkar kam shym la klet ia ki nonghikai hynrei ka shem jingeh bym don pisa. Ula ong ba ki nonghikai ki don ka hok ban dawa bad ka sorkar kan thaw ki lad kumno ban pynbeit ia ki jingeh jongki.
“Nga kyrpad ia ki nonghikai ba kin sngewthuh lang namar ba ngim kwah ba kaba ngi leh kan pynbeit ia ka jingeh tang shi por hynrei kan long junom”, ula ong u bah Lahkmen.
Ula ong ba kum u myntri um kwah ba ki nonghikai kin sngewsih hynrei ka sorkar kan shim ia ka jingkitkhlieh ban pynbeit ia ki jingeh jong ki nonghikai wat hapdeng ka jingeh ba ka iakynduh.
“Ngim kwah ba ki nonghikai kin sngewsih, hynrei ki dei ban sngewthuh ba ngi don ruh ka jingeh bad katba nga dang don ha kane ka shuki nga kwah ban pynbeit ia ki jingeh ki nonghikai” la ong u bah Lahkmen bad bynrap ba ki nonghikai ki don ka hok ban pynpaw ia ki jingeh jongki.
Ha kajuh ka por, u president ka KJDSTA u Babu Kular Khongjirem ula ong ba ki nonghikai hapoh ka lama ka KJDSTA bad GHDSTEA, ki la deng lama iong ban pynpaw ia ka dak jingsngewsih ia ka jingbym pyllait ka sorkar ia ka 25 percent ka arrear, nalor kiwei ki mat jingdawa.
U la ong ba ki nonghikai kim kwah ban ialeh pyrshah ia ka sorkar, hynrei ka dei ka jingkyrpad ba ka dei ban pyntreikam noh ia ki mat ba la pdiang bad phah da ka 5th Pay Commission ban pynioh ia kiba bun ki jingmyntoi ia ki nonghikai.
“Ka 5th Pay Commission kala pdiang ban pynrung ia ka jingsiew tulop thymmai ia ki nonghikai, ba la mynjur ruh ka cabinet”, la ong u Babu Kular.
U la ong ba ki nonghikai ki dawa ban pynheh ia ka DCRG, ban pynioh bai sumar, ban ai shuti ia ki nonghikai deficit ba ioh khyllung, ban pyntreikam ia ka ACPS, bad kiwei.
Hynrei kawei kaba kyrkieh ba ki nonghikai ki dawa ka long ban pynioh ia ka tulop kaba man u bnai ym shuh shisien ha ka 3 ne 4 bnai, la ong u president ka KJDSTA.
Ka Sorkar jong ka Jylla mynta ka sngi ka lah pyn kup burom ia kumba 20 ngut ki nonghikai jong ki skul na kylleng ka Jylla Meghalaya ha ka jing rakhe ia ka ‘State Level Teacher Day’ ha Shillong.
Ha kane ka sngi ka jing pynkup burom ia ki nonghikai lah wan shim bynta u myntri ka pule puthi u Ma Lakmen Rymbui lem bad ki nonghikai bad kynnah skul na kylleng ka jylla.

Shillong: Ka Seng HYC ka kren shai sha ka Sorkar MDA hapoh ka jingialam u Conrad Sangma kum u Chief Minister ba hadien ka jingiakren bad ia phylliew jingmut ba bunsien hapdeng ka kynhun naduh u Deputy CM bad u CM, la ioh ia ka jingkular ba ka sorkar kan wanrah ia ka jingpynkylla ia ka Ain MRSS Act ban thep ia ki kyndon jong ka ILP.

“Lada kane ka Sorkar kam leh kumba ka lah kular, na ka liang ka Seng ha ryngkat ka kynhun CoMSO ngim banse ban pynbna ia ki prokram iakhih ba khlem buh por ha kine ki sngi ban wan ban pynbor ia ka Sorkar ba kadei ban wanrah ia ka Amendment bad ruh ban thep ia ki kyndon jong ka ILP ha kane ka Act. La ong ka kyrwoh na u Roy Kupar Synrem, u General Secretary HYC.