Shillong: Ki ar tylli ki seng bhalang ki ba kynthup ia ka All Jaintia Hills Social Welfare Organization( AJHSWO) bad Hynniewtrep Student Union (HSU) hadien ba ki la ioh ki jing u jor na ki nongialeh Licence ( Licence Applicant) ha ka ba iadei bad ki Traffic Sign/ Road Signal ( Mandotary) ba buh da ka tnad ka balong kum ka signboard da ki kyntien English Traffic sign/ Road signal (Mandatory) ba kim lah ban sngew thuh bha bad ruh ka ba eh bha ia ki ban ioh kem ha ka por interview kat kum ka jing ong ka jongki kham tam kiba pli ki ba na nongkyndong, wat lada ka tnat ka buh Class Viii shaneng ban shah ban apply, sa ka wei pat wat lada ki la pass lypa ia ka Driving test ruh kim pass ha ka interview, ha duh arsien ne lai sien ka shim por ia ki ha duh 17 lane 18 sngi ha ka juh ka kam.

Te ha lor ka tei ka nongrim da ka mynsiem sngewkhia ki arseng ki la leit ia kynduh bad kyntu ia u khlieh jong ka ne ka tnad U Bah Tariang ban buh sa ka sei ka signboard ha kyntien khasi ( Multi- Lingual) bad iaka sheet baki pyndonkam haka por interview ruh dei ban pynkylla ktien khasi khnang ba ki nong leit interview licence ba kin kloi ban ioh kem ha ka por leit interview bad ruh kum shim bynta ban lait tuh ia ka por ka ba kordor ka jong ki kham tam ia kito ki ba pli ki ba wan na ki shnong ba jngai.

(MM Thaiang]

Jowai: Naduh ba ioh ia ka Diocese Jowai ha ka snem 2006, ki paidriewngeit ka Diocese ki ju pynlong shisien shisnem ka sngi burom jong ka Diocese, ha kane ka snem ka la long hynnin ka sngi ( 1st.Nailur 2019) ha St. Claret Parish Mooksiang ( phramer) West Jaintia Hills District ha kaba ki paidriewngeit na ki 18 tylli ki Parish jong ka Diocese, ki la ia wan shim bynta shongshit ha kane ka sngi burom jong ka Diocese.

Kum ka jingpynkhreh na ka bynta kane ka sngi burom bakhraw naduh ka sngi Saitjain 31 tarik Nailar 2019, palat shihajar ngut ki Nongmihkhmat na ki Kynhun Balang Barit (KBB) ki la wan sahmiet lypa ha ka juh ka por kum shibynta ban shah hikai ba kin nangpyntbit ban shemphang shuh shuh ia ka Ktien ka jong u Blei ban long ki Nongialam jong ka Kynhun Balang Barit hala ki shnong ki thaw jong ki naba ka jingskhem jong ka Balang Salonsar ka shong ha ka jingskhem jong ki Kynhun Balang Barit ong u Phadar Manbha Pakem.

Ha shwa ban pynlong ia ka jinglehkmen ha kane ka sngi burom Diocese, ha ka por 10 baje mynstep la pynlong ia ka jingknia Mass Iukharist bakhuid kaba la lamkhmat da u Phadar Hilarius Lamare, Vicar General Ka Jowai Diocese ha ryngkat ka jingsynran lang ki Lyngdohsohblei kiba la wan na ki 18 tylli ki Shnat niam jong ka Diocese Jowai. Ha kane ka jingknia Mass Iukharist bakhuid da ki hajar ngut ki paidriewngeit, ki Sister, ki Brother bad ki Nongialam ka Kynhun Balang Barit, ki la ia shim bynta da ka jingriewblei ha ka iabam ka iasib ia u Kpu bad ia ka Wain kiba la pynkyntang ka ba long ka Met bad ka Snam jong u Trai Jisu Khrist.

U Phadar Hilarius Lamare ha ka sneng ka kraw jong u ia ki paidriewngeit u la kren halor ka phangpdeng “ Ka jinghikai shaphang ka jingsngewrit” da kaba shim na ki kyntien ka jingthoh bakhuid “ Hba uno uno u khot ia me sha ka jingkhawai shongkurim wat shong ha ka jaka ba kor tam ioh don lehse uba kham donburom ban ia me ba la khot da u”( Lukas 14:8). U Phadar Hilarius u ong ba ha ka pyrthei ka juk mynta kane ka jingsngewrit ka la sdang ban duh bad ki briew kim nang shuh ban burom ia kiba la heh la san, ki para ki pyrsa kim nangshuh ban burom ia u Ma u Woh kum juh ki khynnah skul kim nangshuh ban burom iala ki Nonghikai lane ki khun iala ki kmie ki kpa kumta u ong ba lyngba kane ka sngi burom bakhraw jong ka Diocese, to ngin phai sha ka ktien ka jong u Blei kaba hikai ia ngi ban long kiba sngewrit bad kiba nang ban burom ia kiba laheh la san. Nangta u ong lada ngi long kiba sngewrit, ngi nang ban burom ia kiba la heh la san bad haba ngi la nang ban burom ia kiba laheh la san hangta ka paw ka jingsngewrit bad ka burom ka akor jong ngi hakhmat ka pyrthei pynkut u Phadar Hilarius Lamare.

Ha ka nohphaisngi hadien ka jingmane Sakrament bad ioh ia ka jingkyrkhu ba kyrpang da ka Sakrament bakhuid tam ka Duwan, la pynlong ia ka jinglehkmen sngi burom jong ka Diocese, da ki jingshad tynrai, ki jingruwai, ki Drama lyngkot na ki Parish bapher bapher jong ka Diocese, ha kaba u ma Kyrmen Shylla MLA uba long ruh u Myntri ka Sorkar Jylla ba dei peit ia ka Social Welfare Etc, u long u kongsan. U ma Shylla haba kren ha kane ka sngi, u la kren halor ka phangpdeng ki jingjyllei jong ki jingsniew kiba laiphewjait khamtam eh ba u Drok u la ioh phrungkhlieh hapoh ka Rilum Jaintia bad ha kaba u Drok u la pynngop ia shibun bah ki briew bad kiba la kyrni ha kane ka jingdih Drok, ka Kyiad bad kiwei de ki jingdih kiba pynbuaid kiba pynjot ia ka longbriew manbriew. U ma Shylla haba kren ha kane ka sngi u la pynpaw ia ka jingsngewdiaw mynsiem halor ka jingkynrei jong ki jingsniew kiba laiphewjait hapoh ka jaitbynriew khamtam eh ka jingjyllei ka jingdih drok, ka jingdih Kyiad bad kiwei de ki jingdih pynbuaid kiba pynhiardor ia ka longbriew manbriew jong ka jaitbynriew hakhmat ka pyrthei. U ma Shylla u pynkut ia ka jingkren jong u da kaba kyntu ia baroh ba lyngba kane ka sngi burom bakhraw jong ka Diocese Jowai bad haba ngi don katne da ki phew hajar ha kane ka lympung, to ngin shim ba lyngba kane ka sngi burom bakhraw jong ka Diocese, kaba long ruh ka sngi burom jong uwei pa kawei u ne ka riewngeit hapoh ka Diocese ba ka long ka sngi burom ionglang, to ngin shim ia u soh jong kane ka sngi burom jong ka Diocese ba ngin thaw ki lad ki lynti ha kaban rat diengkhong ia kane ka jingkynrei jong ka jingdih Drok ki briew hapoh ka Rilum Jaintia bad ia kiwei de ki jait jingsniew kiba pynhiar dor ia ka longbriew manbriew ka jait bynriew hakhmat ka pyrthei.

Shillong:Hadien ba ka Sorkar Assam ka la pynmih paidbah ia ka thup kyrteng jong ka National Registration of Citizens (NRC) kumba 19 lakh tam ki briew kim shym la ioh rung kyrteng ha ka thup NRC bad ba kine ki briew ki ba ym ioh kyrteng ki lah ban wan rung sha ka Jylla Meghalaya, kumta ban teh lakam ia ka jing wan rung jong kine ki briew, kumta ka Hynniewtrep Youth Council hapoh ka jing ialam jong U President, u bah Robert kharjahrin mynta ka sngi ka la leit ban kynduh ia u Director General of Police u R.Chandranathan.

Ha dien kane ka jing ia kynduh haba ia kren bad ki nongpathai khubor u la ia thuh “Hadien ka jingpynmih kyrteng da ka sorkar Assam bad kumba 19 lakh ki briew ki bym shem la ioh ban rung kyrteng ha ka thup jong ka NRC wat la ki dang don por kumba 120 sngi ban pynrung ia ki kyrteng ban ioh rung ha ka thup kyrteng,hynrei ngi kum ka jylla ka ba jan ia ka Assam bad ka Ri Bangladesh ngim lah ban shu shim sting ne ban shu shong kli kti namar ka jngeh ka long ba tang ka Jylla Assam ka ba dang pyntrei kam ia ka NRC bad lada u briew u bym shem la ioh pynrung kyrteng ne shah khein kum u nongIndia lada u leit ha kawei kawei ka jylla lada u wan rah noh ia ka tang ia ka epic ne ka driving laisen ka ba u la don lypa u lah ban dei biang u nong India kane kan wan rah ia ka jingeh ba ngim don ia ki ILP ne ki ain ki ban the lakam ia ka jng wan rung kyrthep jong kine ki briew bad kane ka long ka jing shongsyier ia ka jylla jong ngi.”

Na ka liang ka HYC ki la dawa ban pynkhlain biang ia ka Anti Infiltition Directorate da ka ba buh bun ki pulit ha baroh ka Jylla bad ban buh ruh ia ka khyrdop ban peit ia ka jng wan rung jong ki briew ki ba wan sha kane ka Jylla bad kumjuh ruh ha ki khappud ki ba ia jan bad ka Ri Bangladesh.ngi la kyrpat ruh ban ki buh ia ki number ba la da ki paidbah ki iohi ia ki briew ki ba I shan khmat ki lah ban phone ha ki number ki ba ki pulit kin ai bad ban pyntip ia ki .Ki la ai jingmut ruh ba ki dei ban buh ia ki Village Defence Party ha man ki jaka khnang ba ki lah ban lap ia ki ne ki briew ki ba I shan khmat ki ba wan shong shnong bad lada ki lap kn ai ti ha ki pulit

Na ka liang ka HYC ka la iaroh ia ka jingpynmih ia ki jingbthah jong k tnad pulit ha ki bnai ki ba la dep ia Ka jingdon ia ka jingpynmih ba ki shnong ki dei ban don ka soskular ban thoh ia ki nongshnong bad ki dei ban ai jngtip ia ki pulit khnang ba kin tip ia ki jingwan shong shnong jong kine ki ban a bar jylla.

Shillong: Ka Executive Committee jong ka Synjuk Ki Rangbah Kur kaba la long myn hynnin ka sngi, ha Khasi Nastional Dorbar Hall ka la pdiang ia ka jingtyrwa iehnoh kam jong u President Ka Synjuk Bah HS Shylla na ki daw ba shimet jong u.

Ha ka juh ka por ka EC ka la Thung ia I Bah Herman Nongrum (Retd Judge) kum u Interim President ba shipor tad haduh ban da long ka General Council.
Ka EC ruh ka la rai ban pyndep noh ia ka jingpynskhem ia ki nongkitkam jong ki district hapoh une u Bnai September 2019.

Shillong: U Dr Mukul Sangma u ba long Nongialam ka liang pyrshah u la kynnoh ba kala don ka jingbam sap ha kaba pyntrei kam ia ka skhim “Saubhagya” ka skim ka ba dei ban pynioh bor ding ieletrik sha ki 1400 tylli ki shnong ha ka jylla Meghalaya baroh kawei.

Ha ba ia kren bad ki nong pathai khubor u Dr Mukul u la ong “Ka dor ba la ai kontrak ka long haduh 50% ka jingkiew dor na ka dor bala buh. Ha dien kane kala don ka jingmudui da u wei na ki kontraktor sha High Court jong ka jylla Meghalaya bad ha dien kata u nongmudui u la weng noh. Hadien ba la weng ruh ia u CMD jong ka MeECL bad kala don ka shithi na ka ophis jong u CMD sha ki SDO ban pynkhreh ia ki Bill bad phah sha u Chief Engineer ban siew ia ka bill sha ki kontrator, kane ka jingleh ka la long kaba iaid lait ia ki rukom trei kam jong ka MeECL bad lada dei ban leh kumne mynno ka Board kala shong jingialang ban shim ia ka rai.”

U la iathuh ba ia kane ka skhim “Saubhagya” la phiah ha ki ar bynta, ka bynta kaba nyngkong ka dei sha Khasi Hills bad ha kaba la khot tender ha ka dor T.173.60 klur bad ha dien bala peit biang ia ka dor la pynkiew sha ka T.255.58 klur bad na ka bynta ka Garo Hills ka tender kaba la khot ka long T.179.00 klur bad ha dien ba la peit biang la pynkiew sha ka T.270.37 klur.

“Ban ia da kane ka jingshah lute jong ka jylla ha ki briew kiba ha ka bor, na ka liang ka party Congress kan shim ia baroh ki lad ki lynti bad ban pynthikna ba kiba ia don bynta ki shah pynshitom katkum ki kyndon ain.”u la ong.

Aizawl: Ka Mizo Zilrai Pawl (MZP), ka la shim ia ka rai kaba kham pher hynnin ka sngi bad kata ka long, ba ka la pynsmai ia ki khynnah samla ha Mizo, ba horkit hor dang, kim bit ban ia poi kha bad ki bym dei Mizo. Katei ka seng, ka pyn bam smai ia ki samla pule, ba ki dei ban ia poi kha beit tang para Mizo.

Katei ka dei ka jing pyn bam smai ha ki high school, ki higher secondary school bad katei ka long, kum shi bynta jong ka jing iakhun jong ka seng, ban iada ia ka jinglong kyrpang jong katei ka jaitbynriew Khristan.

“Naduh u snem 2015, ngi la iaid shakhmat ban hikai ia ki khynnah samla ba kim dei ban ia poi kha bad ki bym dei ki Mizo. Ngim lah ban ailad ban ia khleh bad kiwei pat ki jaitbynriew. Lada ngi ia poi kha bad ki briew kiba nabar, ngin sa duh jait noh. Ngi don tang uwei u dkhot sha Lok Sabbha” ong U Ricky Lalbiakmawia, u nongialam jong katei ka seng, haba iakren abd ka The Indian Express.

U Lalbiakmawia, uba dei ruh U Secretary ka tnat pla pisa jong ka Northeast Students’ Organisation (NESO), u iathuh ba ha ka Lah Sngi U Blei, la leit ban jngoh ia kiba bun bah ki skul ha ka nongbah Aizawl bad shawei ruh, ha kaba la pyn kynmaw ia ki khynnah skul, ba kim bit ban ia poi kha da lei lei ruh bad ki bym dei ki jaitbynriew Mizo.
“Ka dei tang ka jingkular kaba da ka ktien bad kam don jingthoh eiei ruh. Ngim pynbor iano iano ruh, hynrei ngi shu ai jingmut ia ki” bad ula ong ruh ba katba kum ka ain jong ki Mizo, kano kano kaba poi kha bad u ne ka, ki bym dei ki Mizo, ki duh noh ia ka jinglong kyrpang jongki, kum ki dkhot ka jaitbynriew Mizo.
Ha u snem ba ladep, kawei pat ka seng, ka Young Mizo Association (YMA), ka dawa ban pyn trei kam da ka ain, ha kaba kano kano ka kynthei Mizo, kaba ia poi kha bad ki bar Jylla, ka dei ban duh noh ia ka hok jongka, kum ka Scheduled Tribe.

New Delhi: Ka ain niah kali, kaba thymmai, ka la trei kam naduh ka 1tarik Nailur 2019 bad mar ia sdang, uwei u trai jong ka scooty activa, ula shah dain kuna T. 23,000 bad ka daw ka long namar ba ula kum klet ban rah ia ki kali jongu bad haba khein lang naduh ka jing bym deng helmet, ka jing bym don ki kot kali kum ka laisen niah kali, ka registration certificate, ka pollution certificate bad kiwei kiwei, ka poi sha ka T.23,000.

U Dinesh Madan, uba shong ba sah ha Gurugram, ula iathuh ba ula iakren ia ki pulit, ba un leit shim ia ki kot ki sla, namar ba u sah hi ha Delhi bad ba ka iing jongu, ka don hajan, na ka jaka ba u shah bat, hynrei ki pulit kim shym la sngap satia.

Mynta U Mahan, uba iathuh ba ka scooty activa jongu, ka shongdor tang T.15,000, namar ba ka dei kaba rim, kumta ula rai ban iehnoh ia katei ka scooty ha ki pulit bad ba un nym siew satia ia katei ka kuna.

Nongpoh: Mynta ka janmiet ha ka por 7 baje ei ei, ki pulit ka Anti Infiltration Check gate, ki la ioh ban bat haduh 6 ki briew kiba khlem kot khlem sla, kiba na Barpeta Assam da ka jingthmu ban leit bylla sha Lumshong.

Ka jingtip kaba la iohlum da u Nongthohkhubor, la iathuh ba kitei ki hynnriew ngut, kiba la thmu ban wan rungtuh sha Mehalaya, ki la wan ban shong da kawei ka trok 16 shaka kaba don ia u number AS-01-0986, da ka jingthmu ban iohphet tuh na katei ka jaka talasi mynder kaba don ha Byrnihat.

La ioh jingtip ruh, ba kitei ki la lait na katei ka jaka talasi mynder, hynrei haba ki nongtrei ki la I suba bad ishankhmat bha ia katei ka trok, ki la beh bad dei tad haba la poi ha Toll Plaza ha Pahamawlein, ki la ioh ban bat ia katei ka trok bad ki la iohbat ruh ia kitei ki hynnriew ngut, kiba la pyrshang ban phet tuh na katei ka jaka talasi mynder.
Ia katei ka trok la niah da u Keramat Ali 38 snem, katba kitei ki hynriew ngut ki kynthup ia uwei u khynnah ban dang 17 snem, nangta u Safigul Islam, u Azibul Islam, u Safigul Islam, u Abdul Khalim bad Nazimul Islam.

Nongstoiñ: Ki lai tylli ki Sengbhalang napoh ka thaiñ West Khasi Hills District kiba kynthup ia ka HYC, WYF bad HANM mynta ka sngi ba ar, ki la hiar sha ki thaiñ Shahalang na ka bynta ban pynlong ia ka jingkhynra ia ki dukan bar jylla kiba don ha katei ka thaiñ.

Ha katei ka jinghiar khynra jong kitei ki lai Seng ki la lap ba haduh mynta hi kiba bun ki dukan bar jylla kiba don ha katei ka thaiñ kim shympat la don satia ia ki kot ki sla kiba biang bad ka jingbymlah jong kitei ki bar jylla ban pynbiang ia ki kot ki sla ba donkam, na ka liang jong kitei ki lai seng kila phah khang khyrdep noh shwa ia kiba bun tylli ki dukan ha iew Shahlang.

Kitei ki lai seng ki la leit ban jurip ruh ia ki karkhana sain dewiong kiba dang mih thymmai ha ka thain Shallang bad ha ka jingjurip la lap ba nalor ki lai tylli kiba la don lypa naduh kine ki bnai ba la lah, mynta sa kumba 7 tylli kiwei pat ba kynthup kawei ha Swangre bad 6 tylli ha Kyllonmathei la sdang ban pynieng biang mynta.

Haba kren ha ki nongthoh khubor u president ka Hynniewtrep Youth Council ( HYC) WKHD u samla Lumlang Kharsyiemlieh u la ong ba da ka jing sngew khia halor ka jing tip ba ki ba bun ki dukan bar jylla, ki nongwan bylla bar jylla ha Shallang kim don ia kot ki sla ki ba biang kumta da la ki jong ki khmat ba hadien ka jing khynra da ki spah tylli ki dukan kim shym la don ia ki kot ki sla ki ba biang bad na kaliang ki lai tylli ki seng ki la khang noh ia ki dukan hapoh kane ka Iew Shallang .

Shuh shuh u tei u nongialam u la ong ruh ba kum ki lai tylli ki seng ki pynpaw ruh ia ka jing sngew tynnad ba kum ki nongshong shnong ka Shallang ki pynpaw ia ka mynsiem ia trei lang halor katei ka bynta bad kane ka dei tang ka jing sdang hynrei kum ki lai tylli ki seng kin nang iaid hi sha khmat ba ka jing thmu jong ngi ka long ba ka Iew Shallang kan dei noh Jong u para doh parasnam jong ngi ym shuh jong ki bar jylla kiba la mat mynta da ki phew snem.

Ha kaba iadei bad kitei ki karkhana, na ka liang jong kitei ki lai seng ki la ong ba kin sa leit ban iakynduh bad buh da ka jingthoh sha ka KHADC namar haduh mynta kim pat ioh ia ka NOC na ka KHADC.

Ha katei ka sngi la iadonlang ruh u samla Lumlang Kharsyiemlieh President ka HYC West Khasi Hills, Hamar Lyngkhoi President HANM WKH, Mawkordor Kharsyiemlieh President WYF, Sranly Rongrin President HYC Mawshynrut bad kiwei kiwei.

Shillong:Dangshen u Producer uba long ruh u Director jong ka Phlim 9-Lad u la pynmih ia ka jingrwai na kane ka phlim lyngba ka Youtube bad hapoh shibnai ki nongpeit ia kane ka jingrwai ki la don palat kumba 1 million ngut.

U bah Commander Shangpliang uba dei u nongpynmih bad Director jong kane ka phlim u la pynpaw ia ka jingaikhublei ia ki paidbah kiba la peit ia kane ka jingrwai. U la ong ba ka jingbun jong ki nongpeit ka pynpaw ba ki paidbah ki itynnad ia kane ka jingrwai.

U la iathuh ba ia kane ka phlim la dep pynbiang lut nadong shading bad kaba sah mynta ka long tang ban apply ia ka certificate n aka Central Board of Film Certifiation Guwahati.

U bah Commander Shangpliang u la kyrpad ia ki paidbah ba kin iai ap shuwa shipor namar ki dang don ruh ki phlim khasi kiba la dep ioh certificate ki ban pyni shuwa bad la ong ba shen yn sa pynmih bad pyni paidbah noh ia kane ka phlim.

U la iathuh ba ia kane ka phlim lah ban peit shiing shisem ruh kumjuh namar ka dei ka phlim ka ban ai jingsneng na ka bynta ban kiar na ki kam sniew. U la iathuh ruh ba ia kane ka phlim la ioh mynsiem ban shna lyngba ki katto katne ki jingjia kiba shisha kiba la lap katkum ka jingwad bniah na ki jingjia kiba shisha ha 9-Lad.

U la iathuh ba u kyrmen skhem ba ki paidbah ki ban leit peit ia kane ka phlim kin nym babe satia ynda ki la peit, hynrei kin sngewhun bad ioh jingmut namar la shna pynbha bad pynbeit ha kiba bun ki bynta bad dei na kata ka daw ka la shim por haduh 2 snem tam ban shna ia kane ka phlim.

Lah ban kdew hangne ba ia kane ka phlim la ak da ki actor kiba pawnam ha ka karkhana shna phlim khasi kata u bah Phira dohtdong, Kong Wanri Pyngrope, ka Tracy Basaiawmoit, bah Golderstar Suchiang (bahduh) bad kiwei kiwei ki nongiashim bynta.

Shillong: Ka jingïalehkai hapdeng ka Rangdajied United FC pyrshah ïa ka Nangkiew Irat SC naka bynta ka wat ba nyngkong ka lympung ïalehkai Shillong Premier League ka Shillong Sports Association, ba la long hynnin ka sngi Hatmajai ha JN Stadium. Polo, ka la kut noh ha ka jingïakhaid bym shym la don satia ba lah ban ïa pynkhih ïa ka jar.

Mynta ka sngi Balang ka jingïakhun kan long hapdeng ka Ryntih SC pyrshah noh ïa ka Nongrim Hills SC ha ka por 3:30 nohphai sngi.

Shillong: Ka Adventurous Hynñiewtrep off Roader (AHOR) kan pyllong ia ka jingiakop niah kali sha surok khlaw kaba ai kyrteng kum ka AHOR 4×4 Off Road Challenge. Kane ka jingiakop kan long lai sngi naduh ka 5 haduh ka 7 tarik mynta u bnai nailur, ha Kharsati Park, Ri-Bhoi District.

Ka khusnam pisa ba ka synjuk ka la thmu ba kan pynlut ha kane ka kynti kaba mynta ka long haduh 2 lak 30 hajar tyngka bad bynrap lang bad ka jingsam ia ki trophy bad ki syrnot iashim bynta.

Ha ka jingiakren bad ki lad pathai khubor hynnin ka sngi Hatmajai, na ka liang u President ka AHOR u bah D.D Umdor, u la batai ba kane ka jingiakob mynta ka kynti la rai ban pdiang ia ki nongwan iashim bynta hapoh ka 20 ne 22 ngut nalor katta la wer lang ruh ia ki samla kynthei ba don ka ka sap niah ia ki kali, ba ki lah ba kin wan ban iashim bynta, ha kaba ia ki kali naka bynta ka jong ki ban iakhun ha kane ka jingiakob yn pynbiang da ki bor pyniaid.
Ka daw kaba pynlong ia ki AHOR ban bteng ban shim biang ia kane ka sien jam kaba lai ka jong ki ban pynlong ia kane ka jingiakob ka long ba kiba bun na ki paidbah ka jylla kim pat tip ne shemphang bha haba iadei bad kane ka jingiakob.
Khyndiat shaphang kane ka iakob, ia ki lynti iaid jong ki kali kan long da kaba yn hap ban iaid lyngba ki khohruh khohram, ki lynti ba la la siang tang da ki maw, ne don ruh ki bynta ba ki kali kin hap ba kin jam lyngba ki nur um ne na ki kynja um ba wan tuid na ki wah ne don ruh ki bynta ba ki kali kin hap ban iaid lyngba ki lynti ba lam ktieh.
Kumta ka jingiakob hi ka long kaba eh bad ba jwat bha, ha kaba u/ka nongniah kin hap ban long kiba nep ba proh bha ka jabieng ka jong ki, da kaba kin donkam ban ia mir jingmut bha ruh hapdeng para maki, bad long ruh kiba nep ka bor pyrkhat lada ki thrang ban kynjoh sha ka thong ban jop ia kane ka jingiakob lyngba ki rai-eh ki raidam ba ki bor pyniaid ki la pynap shrip ia u/ka nongwan iashim bynta sha kane ka jingiakob.
Ka jingiakob ka long kum kawei na ki kynja rynsan kaban plie lad ia u/ka nongiashim bynta ba ki lah ban phrang ia la ka jingim sngewtynnad niah kali ka jong ki, da kaba kin leit iashim bynta ruh sha ki lympung iakob ba kum kine ba juh long man la u snem hapoh Goa.

Shillong: Ka kynhun ïalehkai football ka H. Elias Higher Seconradry School, ka la mih myn hynnin sngi sha ka lympung ïalehkai jong ka Diamond Jubilee U-17 International Subroto Mukherjee Cup Football Tournament, kaba dei naka bynta ka kyrdan jong ka U-17 ki khynnah shynrang ban long ha nongbah Delhi.

Ki kyrteng jong ki player ki long u Urbanity Makhroh, Wanteilang Malngniang, Henry Nongneng, Saveme Tariang, Iohborlang Lyngkhoi, Jefferson Kharbuli, Abhay Chettri, Gladdy Kharbuli, Sangti Shianglong, Hamemanbha Wahlang, Skilful Tariang, Wadajied Ryngkhlem, Tremiki Lamurong, Glenny’s Lynrah,Ioanis Suchen, Benjamin Diengdoh.
U Coach jong kane ka kynhun dei u bah Bobby.L. Nongbet bad Manager dei u bah Benjamin Lyngdoh.
Shwa ba kane ka kynhun kan mih na la ïing, la ïoh ïa ka jingïalang kitbok kit rwiang ïa ka kynhun ba la don lang u Deputy Director ka tant Sports & Youth A ffairs u JR Marak bad u District
Ha kawei ka khubor, ka lynti ïaid ïa ka kynhun ki thei ïalehkai jong ka Umthli Secondary School, ha ka lympung ïalehkai jong ka Diamond Jubilee U-17 International Subroto Mukherjee Cup Football Tournament, ka la poi noh sha kaba kut hynne ka sngi hadien ba ki la shah liem da noh da 0-1, hakhmat ka kynhun ki thei ïalehkai jong ka Assam, ha ka kyrdan ïakhun jopng ka quarterfinal.

Nongpoh: Ka la long ka jingkmen kaba khraw ia ki Nonghikai lem bad ki khynnah skul, jong ka skul St. Joseph HSS ha Umden, ha kaba hynnin ka sngi u Bah Mayraldborn Syiem, MLA ka Nongpoh, u la leit ban plie paidbah ia ka madan kaba dei ruh ka jaka ieng Assembly jong ki khynnah ha katei ka skul, ia kaba la ai da utei u MLA, na ka bynta ban pynsuk ia ki khynnah jong katei ka skul bad ba kin lait na kaba ieng ha ktieh, khamtam ha ka por lyiur.

Ha kaba plie ia katei ka phyllaw kaba la siang da ka Dewbilat, la sakhi da ka jingdon ki Phadar, ki Sisters, ki Nonghikai, ki riew rangbah lem bad kiwei kiwei.
Haba ai jingkren ha katei na sngi, u Bah Mayraldborn Syiem, u la pynpaw ia ka jingkmen ba u la ioh ban plie paidbah ia katei ka madan, kaba ma u hi u la ai jingiarap na ka bynta ban shna pynbha ia katei ka phyllaw, kaba long ruh ka jingdonkam tam jong ki khynnah kiba leit pule ha katei ka skul.
U Bah Mayraldborn Syiem, u la ong ba u kmen ban ioh iarap ia katei ka skul, namar ka dei ruh ka skul, kaba la ai jinghikai ia u ha ki por ba mynshwa, namarkata u la ai ka jingkular ba un nang iatrei ryngkat ryngkat bad ki nongpyniaid jong katei ka skul, khnang ba katei ka skul kan nangai ia ka jingshakri kaba janai ia ki khynnah skul ha katei ka thain hi baroh kawei.

Shillong: Ki trai jaka bad ki nongsumar ia ki jingkieng jri kila pynrem jur bad pyrshah ruh ia ka jingleh lyndet ka sorkar jylla ia ki kum ki trai hynrei ka la wanrah pynban da kita ki stad ne expert nabar ban wan batai ia ka jingthung jingkieng diengjri khlem da tip ia ka duh ka dang.

“Wat la ngim don ban pyrshah ia ka jingthmu ban pynlong kum ka Heritage Site ia ki them ba don ki jingkieng diengjri hynrei ka pyrshah ia ka lynti ba ka iaid ban leh ia kane da kaba leh hi khlem kano kano ka jingkynjoh ktien bad khlem da khot lang ia ki trai bri, ki nongsumar ia ki jingkieng jri hynrei la pyndonkam pynban da kita ki stad kiba nabar ki bym don jingtip eiei ia ki jingkieng dieng jri kiba la thung da ki kpa tymmen da ki hajar bad spah snem bad ba la sumar ha kane ka pateng ba mynta ruh”, la ong u bah Morningstar Khongthaw u nongialam ka Living Root Bridges Foundation.

U la iathuh ba u Chief Secretary ka sorkar jylla ha ka 25 tarik Kyllalyngkot, 2018, u la shu lum ia kita ki stad thung dieng jri bad ki shnong hynrei kaba sngew lyngngoh ka long ba ki trai jaka ki trai bri bad ki nongsumar nongthung dieng jri ba shisha kim bna eiei ia kane.

“Ngi la wan iakynduh ia u Chief Secretary hynnin ka sngi hynrei khlem ioh iakynduh ba um don ha ophis bad ngi la iakynduh ia ka Deputy Commissioner hynrei kam shym la tip eiei halor kane”, la ong u bah Morningstar Khongthaw.
Ki la rai ba kin nym treh ban soi ia kata ka jinghukum ka sorkar ba la phah sha ki shnong namar ba kane ka pyni ba ka sorkar ka la iaid lait ia ki trai bad ka burom ia ki kliar kiba shu wan ban shim kabu ia ki kam ba la leh da ki myn barim da ki spah bad hajar snem mynshwa.
“Ngim nym treh ban soi ia ka jingphah ka sorkar kaba la shu phah kylleng ki shnong ia kata ka jingthmu ban pynrung ha ka Heritage Site khlem don kano kano ka jingiasyllok shwa ia ki trai jaka, ki nongsumar ia ki jingkieng diengjri”, u la ong.
Kane ka jingpyrshah jongki ka long ba ka sorkar ka la shu wanrah da kita ki stad thung dieng jri ne consultant expert kiba nabar hynrei ki bym tip bad ki bym ju don bynta eiei ha kane ka kam ba la leh da ki myn barim da ki spah bad hajar snem mynshwa ba la hiar pateng ha kine ki pateng ban pynneh pynsah bad ban sumar ia kine ki jingkieng diengjri.

Haba kren sha ki lad pathai khubor myn hynnin ka sngi, u chairman ka Living Root Bridges Foundation, u bah Morningstar u la kam ba ka sorkar ka la leh stad ia kane ka kam da kaba wanrah ia kita ki consultant ne ki stad ban wan hikai ban wan batai ia ka jingthung ia ki jingkieng dieng jri kiba khlem da tip ki dei kiei namar ba ka jingthung ia ki jingkieng dieng jri, ka la dei ka jingstad bad ka jingnang jingtip ki kpa tymmen jong ki ha kane ka ri Khasi khamtam sha ki padun ka them riwar.
Ki jingkieng jri ki la don da ki spah snem bad ki briew ka padun them riwar ki dang pynneh bad sumar ia ki haduh kine ki sngi khlem don nonghikai nongbatai namar ba ka dei ka jingstad bad ka jingshemphang jong ki mynbarim kiba la lah ban leh ia kane.
Halor kane, kila dawa na ka sorkar ba kan ai jingtip kaba bniah halor kita ki stad kiba la thung kiba la wan lyngba ka Meghalaya Basin Development Authority (MBDA), kiba khlem don satia kano kano ka jingtip bad ka jingstad shaphang ki jingkieng dieng jri, kaba lah ban long kumba trei u sniang ioh nam ei u ksew.
Katto katne ki riew rangbah kiba sumar bad ri ia ki jingkieng dieng jri kum u bah Jobenstone Nongkrod na Pynter, u bah Damarseus Rani na Kongthong, u bah Hila War na Laitkynsew kila batai ba ki jingbatai jong kita ki stad ba la thung ka sorkar, kim iahap satia kum ka jingshemphang bad ka jingtbit jong ki myn barim kiba la thung ia ki jingkieng diengjri da ki spah snem mynta.

Nongpoh: U Bah Sosthenes Sohtun, MLA ka Jirang, myn hynnin ka sngi u la leit ban kynduh ia ka Kong RM Kurbah, Deputy Commissioner ka Ri Bhoi, na ka bynta ban kyntu ia ka, ba ka dei ban shimkhia halor ban pyrkhing ia ka jingwan rung ki briew kiba nabar ha baroh ki shnong kiba don ha Ri Bhoi.

Haba leit ban kynduh ia ka Kong RM Kurbah, utei u MLA ka Jirang, u la kyntu ia katei ka DC, ba ka dei ban phah jingthoh sha baroh ki Rangbah shnong kiba don ha Ri Bhoi, kaba long ruh kum ka jingkyntu ia ki nongialam shnong, ba ki dei ban pyntip sha ki bor ka District, haba ki iohi ba don ki briew kiba phylla kiba wan ha ki shnong ki thaw.
Ka daw kaba la pynlong ia u MLA ka Jirang, ba un leit kynduh ia ka DC, ka dei ruh hadien ba ka sorkar Assam, ka la pynbna ba ki la don haduh 19 lak tam ki briew, kiba briew kiba la shah khein nongwei bad ki bym don ha ka thup NRC.
Haba iadei bad katei ka jingleit kynduh DC, utei u MLA ka Jirang, u la kyntu ia ka DC ba ka dei ban phah peitngor ne kham shimkhia ha kito ki shnong, kiba don ha khappud ka Meghalaya bad Assam, namar lada ym don kiba shimkhia ne peitngor kum ha kane ka por, ki sa don bun na kitei ki briew ki bym don ha ka thup ka NRC, ki ban sa shimkabu ban wanrieh ha kito ki shnong kiba don ha khappud.

Shillong: U Dr Mukul Sangma u nongialam ka liangpyrshah u la kam ba ka jingpyntreikam ia ka National Register of Citizen (NRC) kam long kaba jop bad ka daw ka dei namar ba khlem leh shwa ia ka National Population Register (NPR).

“Ka dei tang ka India ka bym don ka NPR ha kane ka juk mynta. Ha ka jingshisha, shwa ba leh ia ka NRC, la dei ban leh shwa ia ka NPR khnang ban suk ban leh ia ka NRC”, la ong u Dr Mukul.

U la kynthah jur ia ka jingpyntreikam ia ka National Register of Citizen (NRC) ha Asam, ka long ka bym seisoh namar ba ki briew kiba dei trai shnong, ki dang shah kyntait pynban.

Kane ka jingkren jong u Dr Mukul Sangma ka long hadien ba ka la don ka jingkynnoh ba ki trai shnong kiba bun kila shah kyntait kum ki bar ri ha ka jingpyntreikam ka sorkar ia ka NRC ha jylla Assam.
Kumba 19 lak ngut tam ki briew ki la shah kyntait ban rung ha ka NRC ha Assam bad ia kine la khein ne niew kum ki bar ri.
U la ong ba kiba bun ki briew kim don ki kot ki sla ban pynshisha namar ba kiba bun ki dei kiba dang shu wanrah ka sorkar dang shen kum ka syrnot sngi kha, bad kiwei bad kane ka la buh jingeh ia ki briew ban ioh jaka ha ka NRC watla ki dei hok ki nongshong shnong ka ri.

Hyderabad: Ka sorkar jong U Jagan Mohan Reddy ha Andhra Pradesh, ka la rai ban siew bai bnai ia ki Pastor kiba don ha katei ka Jylla bad mynta ka dang iaid ban lum jingkhein ia kitei ki Pastor, la ki don katno ngut.

Halor katei ka rai, na ka liang ka seng BJP, ka la kren pyrshah jur, da kaba kynnoh ba utei u myntri rangbah, u kwah ban pyn myntoi politiks, da kaba iaid ha ka nongrim jong ka niam.

Katei ka hukum, kaba la pynmih ha ka taiew ba ladep, ka bthah ia ki Deputy Commissioner jong ki District, ba kin wad jingkhein bad iathuh ia ka jingdon ki Pastor ha kylleng ki bynta jong ka Jylla.

Kane ka dei ka jingthmu jong ka YSR Congress, ban pyn urlong ia ka kular ilekshon jongki, ha kaba kin ai tulop T.5hajar ia ki Pastor. Ka kular elekshon jong katei ka seng, ka rai ruh ban ai hapdeng T.10,000 haduh T.35,000 sha ki temple bad nangta sa T.15,000 sha ki imam bad ki muezzin.

“Kane kam dei ba ka sorkar kan siew noh ia ka pisa sha ki Pastor, hynrei ki Collector, kin wad jingkhein shwa lada don Pastor ne em ha Andhra Pradesh, lada ba la antad ba kim don satia. Ngi don jingkhein ia ki Imam, namar ba ki don ha ki mosque” ong ka Additional Secretary jong ka state Minorities Welfare Department, ka Usha Kumar.

Na ka liang ka BJP, ka shim ba katei ka dei ka jingthmu beit beit ban synshar ia ka Jylla, ha ka nongrim jong ka niam, ong u heh duh jong katei ka seng ha Andhra Pradesh.

Bengaluru: Ki la don ki bos kiba shah thang bad ki skul ki la khang lut mynta ka sngi ha Karnataka, na ka daw jong ka jingkhot pakhang shnong jong ka seng Congress mynta ka sngi ha Karnataka, ban pyrshah halor ka jingshah kem jong U DK Shivakumar, ha ka tnat Enforcement Directorate, halor ki kyndon ain Prevention of Money Laundering Act (PMLA), lane kaba ki ong ka jinglum pisa beain.

Hadien ka jingshah kem jong U MLA ka Kanakapura, uba dei U MLA jong ka seng Congress, ka la mih ka jing kulmar hynnin ka sngi ha Karnataka, ha kaba ka la odn ka jing ia thang kali, ka jing ia shoh ia dat ha Bengaluru Rural bad ha Ramanagaram district, kiba dei ki ktem ba khlain bah jong u Shivakumar.

Ki nong kyrshan ka seng Congress, ki la pakhang ia ka surok bah Bengaluru-Mysuru bad ki don saw tylli ki bos jong ka KSRTC, kiba la shah lun maw.

La iathuh ba hynnin ka miet, ki la don 10 tylli ki bos, kiba la shah thang ne shah ther maw ha Satanur bad halor katei ka jingjia, ki pulit ki la bthah ia ki bos jong ka Karnataka State Road Transport Corporation (KSRTC), ba kim dei satia ban iaid kamai mynta ka sngi.

Na ka liang ka seng Congress, ka pyrshah jur halor katei ka jingkem ia U Shivakumar, da kaba ka kynnoh, ba ka dei ka jingleh thombor bad ka jingshim kabu sain pyrthei bad la ong ruh ba ki kwah ban pyni kam ha katei ka rukom, namar ba ki la pheil ha ka jingpynkhie im ha ka ioh ka kot jong ka Ri hi baroh kawei.

Aizawl: Ka jing ia pyni bor hapdeng ka Mizoram, kan sa khie biang ha ki khyndiat sngi ba ladep, na ka daw, ba ka Assam, ka thmu ban tei ia ka mosque hajan ka nongbah Bairabi, kaba don ha u pud ka Assam bad ka Mizoram.

Na ka liang jong ka seng ba pawkhmat ha Mizoram, ka Mizo Zirlai Pawl (MZP), ka kren shai hynnin ka sngi, ba kan shna da ka jaka shongthait ha katei ka jaka, ba ka Assam, ka thmu ban tei ia ka iingmane ki Muslim ha Zophai.

U President ka MZP, U L Ramdinliana Renthlei, u iathuh ba ki samla pule, kin thawlad ban tei ia ka jaka shongthait ha katei ka jaka, lada jia ba kam don ka jingkhang lad ia ka jingtei iingmane Muslim ka Assam.