Ka Ranu Mondal, ka dei kaba ju rwai bha ha kad rel ha Ranaghat jong ka West Bengal bad ki jingrwai jongka, kiba ih bad kiba shngiam shi katdei, ki la khring jingmut ia uwei u samla pule engineer, U Atinda Chakravorty, ha kaba ula ring ia ki jingrwai jongka bad ula buh ha ki social media.

Ha katei ka jingrwai, kaba ula ring, ka Ranu, ka la rwai ia ki jingrwai ba ka ieid eh, kiba la ju rwai da ka Lata Mangeshkar, kaba ai kyrteng “Ek pyaar ka Nagma Hai” bad ka jingsngew tynnad bad bang sur jong ka Ranu, ka la pynlong ia ki 500 million antad, ba kin sngap ia kitei ki jingrwai jongka.

Ka dei halor katei ka jingbang jong ki jingrwai jongka, kaba la pynlong ia U Himesh Rashammiya, ba un leit wad ia katei ka nongrwai bad mar kumta hi, ula sngap bad pyrshang ia ki sur ba ih jongka bad kumta, ula thaw jingrwai bad pynrwai noh ia ka.

Mynta la sngewthuh ba U Himesh, ula ring katto katne tylli ki jingrwai bad ula siew ruh ia ka, kumba T.6,7 lak na bynta kawei ka jingrwai.

Mynta ka Ranu, ka shong ka sah ha ki hotel kiba remdor, na kaba mynshwa, ka shong ka sah ha ki kad rel bad ka ju kamai ja kpoh, na kaba ioh pisa, na kito kiba sngap ia ki jingrwai jongka ha kad rel.

Ka Ranu, mynshwa, ka la sah ha Mumbai, ha kaba u tnga jongka, u dei uba trei kum u nongshet ha iing jong U Feroze Khan, uwei na ki aktor ba paw jong ka bollywood, hynrei ka jingim jongka, ka kylla noh, hadien ka jingiap jongu.

Ym tang katta, la iathuh ba ka Ranu, ka la ia shong khlad bad ka khun jongka, ka Swati la shiphew snem kynthih, hynrei mynta, lyngba ka jing pawnam jong ka Ranu, ka Swathi, ka la wan wad biang ia la ka jong ka kmie bad ka Ranu, ka sngewkmen shi katdei, haba ka ia kynduh biang bad la ka jong ka khun marwei.

Shillon: U Rang bah Shnong jong ka Ratachera ka ba hap ha ka East Jaintia Hills u bah D. Pohshna ryngkat bad ki rangbah na katei ka shnong ki la wan ban pynshai halor ka jing kynnoh jong ki 106 tylli ki long ing ia ka ia ka jing leh don bor jong u ne u rangbah ba u la pynkiew ia ka bai shnong sha ki saw kyrdan ha ka ba ki nongshong shnong kin hap siew kata ka long T.3000/- T.2000/-,T.1000/- bad T.500/ ha ka shisnem.

Ha ba ia kren bad ki nong pathai khubor, mynta ka sngi, U bah Pohshna u la iathuh ba ki don tang 75 tylli ki long ing ki ba pyrshah ia ka jingbuh dor ban siew ia kane ka pisa bad ryngkat baroh ka shnong hi ki la mynjur ia ka ne ka jing buh dor ban siew ia ka ne ka pisa namar kane ka pisa ka dei na ka bynta ban pyniaid ia ka skul shnong ka ba hap ha ka Higher Secondary school ha kaba ki bun ki khynnah na ka ne ka thain kim kot bor ban leit pule sha sor, ki ioh ban bteng ia ka jing pule jong ki ha kine ki skul ki ba don ha shnong.U la iathuh ruh ba ia ka ne dor kat kum ka jingioh jong ki ym ba ngi dawa.Ha jing ia dei kane ka jong ka fund shnong ruh ngi la buh ia u secretary ban lum ia ka pisa shi sien shibnai katba ki lah ei ban siew ia ka pisa.

“Nga kum u rangbah shnong ngam sngewthuh ia ka ei ka jingkhwan myntoi ka ba ki la kynthoh ia nga ha ba kaei kaei ka rai kaba ngi la rai kam dei tang ka jong nga hynrei ngi da khot da ka dorbar shnong bad ryngkat ka jing ia mynjur lang jong ki nong shong baroh hi ba ngi sa buh ia ka ta ka dor ba kin siew shisnem.Na ka liang ka shnong ki la shim ia ka rai ba kim ym ithuh shuh ia kine ki ki nongshong shnong ki ba dei 75 tylli ki longing lada kim lah ban pdiang kat kum ka ain jong ka shnong” u la ong.

New Delhi: Ka ain thymmai jong ka sorkar India, ka la trei kam naduh hynnin ka sngi, ha ka kam pyniaid kali, hynrei ki don ki Jylla, kiba pyrshah bad kitei ki kynthup ia ka Punjab, Madhya Pradesh, West Bengal bad ka Rajasthan. Nalor kitei ki jylla, sa ka Gujarat ruh ka kyntait ban pdiang ia katei ka ain thymmai lane ka Motor Vehicles (Amendment) Act 2019.

Ka sorkar Gujarat, ka shim ba katei ka kuna, ka heh palat bad kumta kan peit hi, ia la ki jong ki ain jongka, ia ki nong pynkhein ain niah kali.

Na ka liang jong ka sorkar Gujarat ruh ka kren shai ba kam lah ban pdiang ia katei ka aiin bad U Pratap Singh Khachariyawas, myntri ka tnat transport jong ka sorkar Rajasthan, u ong “Ka kam pyniaid kali, ka dei ka kam, kaba dei na bynta ka leit ka wan jong ki paidbah bad kumta, kam iahap ban dain kuna da kaba rem dor. Ki don ki katto katne ki kuna, kiba la kham rem ban ia ka dor jong ka kali ruh”.

Ka ain kaba thymmai, ka kren shai ba lada u nongniah, um deng seat belt, kumta ka kuna ka long T.1, 000 na kaba ju long mynshwa T.100. Kiba kren mobile kin shah dain kuna T.1,000 – T.5,000 na kaba ju long mynshwa T.1,000.

U nongniah, uba buaid un hap ban siew mynta T.2,000 haduh T.10,000 bad yn dain kuna T.10,000 lada ki nongniah kim pyllait lynti ia ki kali kit nongpang lane ki kali fire brigade.

Ban niah kali khlem laisen, mynta hap siew T.5,000 na kaba ju long mynshwa T.500. Ban niah kali, haba la shah khang hap siew mynta T.10,000 na kaba ju long T.500. Kiba niah stet, ki hap siew kuna T.1,000 haduh T.2,000 bad kham mynshwa ki kali rit ki siew T.400 bad ki kali heh T.2,000.

Ban niah kai khlem insurance, hap siew T.2,000 bad kiba niah kali khlem helmet, ki hap siew T.1,000 bad kin lah ban duh niah kali lai bnai bad ki kali kiba kit palat pud, kin hap siew T.20,000.
Kiba niah kali, da ki khynnah rit, kin hap bah khlieh ki trai kali bad ka kuna ka long T.25,000 lem bad ka jingshong patok kaba lai snem bad ka number kali ruh yn pynduh noh.

Shillong:Hadien ka jing pynmih ia ka jing bthah na ka liang ka District Council ia ka jng bym shah shuh ban pyndon kam ia ki plastik ha Iewduh mynta ka sngi la sdang da ka jingialang paidbah ha Iewduh ha kaba u Executive Member ba dei peit ia ka khaii pateng u Bah Paul Lyngdoh u la pynbna paidbah.

Haba kren ha kane ka jingialang, u Bah Paul u la ong “Kane ka jingkhang ban pyndon kam ia ki plastic ha iewduh kam dei na ka bynta ka jingmyntoi jongno jongno hynrei na ka bynta ka jingkhuid jingsuba jong ka mariang bad ka jingmyntoi lang ia baroh.”

“U Myntri rangbah duh jong ka Ri India u Narendra Modi ha ka 02 tarik Risaw u bnai ban wan yn sa pynbna paidbah ba la khang ia ka jingpyndon kam Plastik. Ka long kaba biang, ba shuwa ba kane ka jingpynbna kan wan na u myntri rangbah duh jong ka Ri ka KHADC bad ka Hima Mylliem kala sdang noh.”u la ong.

U la bthah ba wat ki ri ki ba la kiew ha ka pyrthei mynta ki shem jingeh ban ialeh pyrshah ia ka jingjaboh kaba mih na ki palstik, kumta ngi dei ban sngewthuh ba ka plastik ka dei ka jingma ym tang ia ka mariang hynrei wat ia ki briew ruh kum juh.

Kat kum ka Ain Environment Protection Act 1986 kan dain kuna kaba long shilak tyngka lada lap ia ki ba pyndon kam ia ki plastic, hynrei na ka liang jong ka District Council kam sngewtynnad ban ioh sngew ba la ioh ban dain kuna,hynrei kan khmih lynti ba na ka liang ki paidbah ba kin ia snoh kti lang ha ka ne ka rai jong ka KHADC.

La thung ruh ia ki hynriew ngut ki ophisar, lai ngut ki dei ki briew jong ka KHADC bad lai ngut na ki ki dei ki briew jong ka Hima Mylliem peitngor ia kane ka kam ban pynthina ba ka Iewduh kam dei shuh ban dang don ba pyndon kam plastic.

U Bah Jambor War EM ba dei peit ia ki Iew ki hat, ha ba ai jingkren jong u la ong ba kane ka jingleh jong ka KHADC bad ka Hima Mylliem kam dei kaba thymmai hynrei ka dei katkum ki kyndon jong ka ain.

Na ka liang u Pa,im Ainam Syiem u actingSyiem jong ka Hima Mylliem u la ong ba na ka liang jong ka Hima Mylliem kala shah ban pyndon kam ia ki plastik kiba hapoh ka 50 Micron tang ha u bnai ba la dep hynrei kata ka long tang shipor hynrei naduh mynta ka sngi la khang noh shi syndon ia ka jingpyndon ia ki plastik.

Ha kane ka sngi u la pynbna ruh ba ka KHADC bad ka Hima Mylliem ki dang ia peit iaka jaka na ka bynta ban shna ia ka jaka buh ia ki sla “Cold Storage” namar lada kam don ka jaka buh kan long ka jingduh ia ki nongrep.

Shillong: Ka shnong Mawryngkneng, kaba dang hap ha East Khasi Hills District ha ka dong Main Road u don uwei u heprit u ba kyrteng u Everbloom 10 snem ka rta.

U Heprit Everbloom i dei I khun ba ar jong i Kong Banrikerlin Nongrum bad u Bah Shanskhem Khongbuh, kiba don 3 ngut ki khun, kata 2 ngut ki khun kynthei bad uwei u khun shynrang.

Kumba long lem kiwei ki para khynnah, ha kane ka rta ba dang dei ban pynleit jingmut haka jingpule, u Heprit Everbloom Nongrum ruh dang pule haka Class – VI, ha Mawryngkneng Higher Secondary School,Mawryngkneng.

Haka jinglong khynnah, ha kaba ynda u la wan skul janmiet, hadien ba la pyndep ia ki kam ki jam bad khreh kot khreh sla, u ju ialap miet ruh bad ki para khynnah ban ia mastieh bad leit ialehkai shane shatai ha ki kylleng ki bynta jong ka shnong.

Kaei ka ba ngi pynpaw shaphang jong I heprit Everbloom ka long ia ka mynsiem ba shlur,namar ha ki 2 tylli ki jingjia, kiba lada ym dei da ka jingshlur bad ka mynsiem ba shynrang jong une u khynnah, ka la wanrah ia ka jingmynsaw bad ka jingjia ba sngewsih ia ki 2 ngut kiwei pat ki para khynnah kiba dang kham rit rta ban ia u.

Ha kawei ka bynta jong kane ka shnong, ka don ka jaka jong ka tnad Meghalaya Energy Corporation Limited, kaba dang pyntrei ia ka Sub Station, na ka bynta ban kham pynjanai shuh shuh ia ka jingshakri jongka sha ki paidbah jong ka thain Mawryngkneng ha kaba pynbiang bording Electrik.

Shi bynta na ka jingpyntrei ia kane ka project, ha kane ka jaka la tih ruh ia bun tylli ki thliew kiba heh ka jingiar bad kiba jylliew bad namar ka jng jur u slap ha kine ki bnai ka um ka la ioh ban lang ha kane ka jaka ha ka ba ka la long kum ka pung ka ba jylliew. Watla ia kane jaka la ker kynroh na baroh sawdong, hynrei haduh u Naitung mynta ka snem, ym shym don ban khang ka rung ka mih sha kane ka jaka, ha kaba ki briew khamtam ki khynnah ki ioh ban rung ban mih laitluid sha kane ka jaka.

Dei na ka jinglait lan kane ka jaka, ba bun sien ki khynnah ki ju rung leit ialehkai ruh ha kane ka jaka bad ha kawei ka sngi, kata haka 17 tarik u Naitung mynta ka snem 2019, ba katba ki khynnah shnong ki dang ialehkai hangne, ba uwei u khynnah ia uba la tip kyrteng kum u Devin Sohtun 9 snem rta ula hap ha kawei na kine ki thliew ba dap bha ka um bad ka ba jylliew, hynrei da ka jingshlur u Heprit Everbloom Nongrum, ula kynthih ha kane ka thliew bad pyllait ia une u khynnah na ka jingjia ka ba sngewsih.

Sa kawei pat ka jingjia kaba kum kane ka juh hi, ka la jia biang tang hadien shi taiew thik, kata sa haka 23 tarik jong u Naitung hi, ha kaba sa uwei u khynnah ia uba la tip kyrteng kum u Wanpynshai Kharbani 8 snem rata, katba u dang ialehkai ha kane hi ka juh ka jaka, ula hap ha kawei na kine ki thliew bad hangne ruh jia ryngkhat ba don u Heprit Everbloom Nongrum, ba ia une u khynnah ruh ula lah ban pyllait na ka jingmynsaw.

Wat hadien kine ki jingjia baroh ar tylli, na ka liang u Heprit Everbloom Nongrum, um shym la iathuh hala iing bad dei tad haduh ba un da shitom, na ka jingrung um jakhlia shapoh ka met, haduh ba un da poi Hospital, ba la phla ia kane ka kam shlur jong u ha ka kmie, da ka Hymmen Kynthei jong u.

Ka jingpyrshang jong ngi ban pynpaw pyrthei ia ki kam shlur jong ki katto katne kiba kum kine ki khynnah, ka sorkar kan ithuh ia kum kine ki khynnah da kaba ai burom ruh ia ki. Hynrei hangne ngi da maham tyngeh ruh pat, ba ngim pynshlur ia baroh ki khynnah ba kin bud ia ka nuksa jong une u Heprit, hynrei ka shong katkum ki jingjia bad bor kaba ki lah ban leh, namar ioh ka wanrah pat ia ka jingmynsaw ia u ne ia kata ka nongleit iarap.

Bynta balai

1. Kaba iaroh laitluid – kijingkren kum jingiaroh hok, ki jingai khublei bad kiwei kiwei ki jingiaroh babha lah ban pdiang sngewbha ha kano kano ka bynta. Kynmaw baka ktien ‘hok’ bad ka jingmlien ban iaroh hok ymtang ba kan jop iaka mynsiem ki paralok ne kiba ieid bathoin jongphi, hynrei ka hikai ruh kumno ban ban khmih naka bynta ka jingbha ki sawdong sawkun jongphi. Phin sa lyngngoh ba kumno kine kin kyntiew haka jingim jongphi. Katba phi nang kren hok ne iaroh hok katta LA thikna naki briew kin sngap iaphi bad haba ki briew ki sngap phin nang ioh bor bad shlur haka jingim jongphi.

Namar kata long kiba jai jai haka kren ka khana bad kiar naki tien sniew ne ki ktien khor namar kilah ban pynbun iaki nongshun sawdong jongphi, kan khyrwait iaka bor jongphi bad kan pynpang mynsiem ruh iaphi. Kadon ka jing ong ba u thylliej u dei u shakri babha hynrei u kynrad ba sniewtam. Namarkata ialeh ban teh lakam ia u thylliej jongphi, khlem artatien kane kan pyn kylla iaka jingim bad iaka jingmut jingpyrkhat jongphi. [la kut]

New Delhi: Ka jing kamai jong ki phra tylli ki karkhana kiba donkam bha ha India, ka hiar haduh 2.1 percent ha U Naitung ba ladep, ong ka khubor bad kitei ki kynthup ia u dewiong, ka umphniang bym pat khleh (crude oil), ka lyer shet lane natural gas and refinery products, ong ka khubor sorkar.
Kitei ki phra tylli ki tnat karkhana, ki long coal, crude oil, natural gas, refinery products, fertiliser, steel, cement bad electricity, kiba ka jing kamai jongki ka long 7.3 per cent ha U Naiutng ba ladep.

Kitei ki phra tylli ki tnat, haba nujor ia U Iaiong haduh U Naitung, ki kiew tang 3 percent, katba ha u snem ba ladep jong une hi u juh u bnai, ka long 5.9 percent.

Nongstoiñ: U wei u samla u bala tip kyrteng kum u Khrawborlang Pariong 16 snem ka rta na ka shnong Siangra West Khasi Hills u la duh noh iala ka jong ka jingim hadien ba u la ngam jyllop noh ha ka wah Kperkongklip kaba don ha katei ka thaiñ.

Katkum ka tyllong khubor bala ioh lum la ong ba katei ka jingjia ka la jia ha ka sngi u Blei ka 1 tarik u Nailur ha kapor kumba 8:00 Am eiei katba u tei u samla ha ryngkat ki parlok ki jong u kila leit ban sum ha katei ka wah.

Shuh shuh la ong ruh ba katba ki dang ia sum kyndit kynsan kynsan u tei u samla u la kum hap ha katei ka wah bad na ka liang jong ki paralok ki jong u hadien ba kila iohi ia katei ka jingjia kila ia pyrshang ban iarap ia u hynrei kim shymla lah bad u ttei u samla u la ngam jyllop noh.

La iathuh ruh ba hadien ba ki la lah ban sei ia ka met kila pynkit wut wut sha Civil Hospital Nongstoiñ hynrei la ong ba ki Doctor ki la iathuh ba u tei u samla u la dep khlad lypa.

Na ka liang jong ki ba ha iing jong u tei u samla ki la pyntip noh ia katei ka jingjia sha ki pulit ka Nongstoiñ Police Station da kaba kila pynpaw ruh ba kim shym la don ka jingsuba sniew eiei halor katei ka jingjia hynrei ka dei beit ka jing bakla jongu hi.

Ka jingiakynduh lang jong ki riewrangbah jong ka shnong Mawsaw kaba la ia kynduh bunsien ha kine ki sngi naduh ba ka la mih ha ki kot khubor, ki social Media ba la leit tur ki paitbah Nongshong shnong Mawsaw hapoh Office u Syiem ka Hima Nobosohphoh Syiemship ha ka 26-8-2019 halor ka jingong ba ki pyrshah iaka jingthung sordar shnong sop sop u Syiem Nobosohphoh Syiemship hapoh shnong Mawsaw khlem ka jingtip ki paitbah Nongshong shnong. Ngi dap da ka jingsngewkhia bad sngewlehrain ba ka ba kum kane ka jait kam ka mih na ka shnong jong ngi.

Kum ki nongshong Shnong kala pynlong ia ngi ba ngim banse ban pynshai lem ba baroh ngin sngewthuh iaka jingshisha, balei ka jia ka jingwengnoh shipor ka jinglong Sordar Shnong U bah Krally Iawphniaw hapoh Shnong Mawsaw .

Naduh ka snem 2016 ka jingjied ia u Sordar Shnong Mawsaw haka Dorbar Shnong la ia don lang u Syiem bad ki Officer ka Hima Nobosohphoh Syiemship bad ki paitbah nongwan Dorbar ki long 144 ngut. La jied bad pynskhem ia u Krally Iawphniaw kum u Sordar Shnong bad ia u Bistoran Iawphniaw kum u Secretary Shnong lem bad ki khyndai ngut ki dkhot ka Executive Dorbar Shnong. Halor katei ka jingjied u Syiem u la ai ia ka kot pynskhem (sanad) sordar shnong ia u bah Krally Iawphniaw kum u Sordar shnong ryngkat bad Ka Executive dorbar jong u. Kaba sngew phylla ka long ba u bah Krally Iawphniaw u la kyntait ia ka kot pynskhem (sanad) sordar shnong, bad u la pan pynban da kawei pat ka kot pynskhem (sanad) sordar shnong ba thymmai.

Ngi ki paitbah shnong ngi tip ba, U Syiem Nobosohphoh bad ka dorbar jong u ka la khot ia u bunsien ban ia pynbeit ia ka kam sordar shnong Mawsaw ban pynneh ia ka kot pynskhem (sanad) Sordar shnong haduh ban da kut ka samoi trei kam, hynrei um shym la don ka jingiatreilang bad ka hima.

Halor ka jingbym leit ban pynbeit ia ka kam shnong da u Bah Krally Iawphniaw u Syiem u la thung da u Sordar shipor (acting) haduh ban da pynbeit da kumwei pat, namar bun ki paitbah shnong kila leit ban ud ban nam sha u Syiem. Kumta ngim iohi ba u Syiem bad ka dorbar kila leh bakla eiei halor kane. Ngi kubur ba ka jingleit ban tur paitbah sha ka Office u Syiem khlem ka lynti, ka long kaba bakla.

Na ka liang jong ngi ki riew rangbah jong ka shnong Mawsaw ki bym don bynta ha katei ka jingleit tur paitbah ha Office u Syiem ngi pynrem ia katei ka jingleh bym tip ain jong ki, khlem tip ia ka jingshisha balei u Syiem u weng noh shipor (suspended) ia u bah Krally Iawphniaw na ka kam sordar Shnong.

Ngi pan map na ka burom jong u Syiem bad ka dorbar ka Hima Nobohsohphoh Syiemship ia ka jingleh bakla jong ki nongshong shnong ka Shnong Mawsaw ba ki la leh ia katei ka kam ha ka jingbymtip ia ka jingshisha da kaba shah ialam bakla.

Bah Khlurlamjingshai Lyngkhoi
Shnong Mawsaw Nobosohphoh Syiemship

Tura: Ka seng Anti Corruption and Human Development Organization (ACHDO), ka dawa na ka sorkar Meghalaya, ba kan kren sha ka sorkar Assam, ba kan ithuh bad pynrung kyrteng ha ka thup jong ka NRC ia kito ki kynthei kiba na Meghalaya, kiba ioh tnga sha Assam, ba kin dei ki nong Assam ba pura bad ba kim dei ban shah kyntait ha ka thup NRC jong katei ka Jylla.

Katei ka seng, kaba don sha ki jaka ri thor jong ka Garo Hills, ka kam baki don bun bah ki kynthei kiba na Garo Hills, kiba la shah kyntait ha ka thup jong ka NRC ha Assam.

Katei ka seng, ka iathuh ba ki don bun bah ki kynthei kiba dei ki nong shong shnong ba pura jong ka Meghalaya, kiba ia poi kha bad ki dkhar kiba na Assam, hynrei, ki la shah kyntait noh ha ka thup jong ka NRC, wat la ki la pyni ia ki kot ki sla kiba biang ba ki dei ki nong Meghalaya.

U President jong katei ka seng, U Israful Hoque, ula kynnoh ba kitei ki kynthei, ki la shah leh niewbein bad shah kyntait beain ha ka thup jong ka NRC jong ka Assam.

Shillong: Haba pynpaw ia ka jingsngew bynniaw ia ka jingphet seng ki MDC ha Jaintia Hills Autonomous District Council (JHADC), u nongialam ka UDP uba dei ruh u MLA na rilum Jaintia, u bah Lahkmen Rymbui, u la ong ba ka jingphet seng ki 4 ngut ki MDC ka UDP sha ka BJP, ka dei kaba sngewsih.

“Nga ong ia ki briew ba lada don mano mano ba kwah ban trei ha ka politik, ka Jaintia Hills Autonomous District Council ka dei ka University of Politic ne ka skulbah jong ka politik”, la ong u bah Lahkmen.

“Lada kwah ban tbit ha ka politik dei ban leit wad jingtip na ka JHADC namar ba ka politik ha JHADC ka pher bak ly bak na kiwei”, u la ong.
U la ong ba u la iakren bad ki MDC ka party kiba thmu ban phet hynrei kaei kaba ki paralok MDC ym lah ban tip hynrei kaei kaba donkam ka long ba kum ka party la kyrpad ia ki ban pyrkhat biang.
“Kaei kaba ki paralok MDC ki mut ym lah ban tip hynrei kaei kaba ngi kwah ka long ba ngi kyrpad ia ki, ba ki paidbah kila bynshet ban ialam ia u paidbah da kaba jied ia ki”, la ong u bah Lahkmen.
U la iathuh ba u la pyrshang ban iakren bad ki lyngba ka phun hynrei ym pat ioh iakynduh markhmat namar ba ha ka politik kam don ka jingduh jingkyrmen.
Lah ban kdew ba 8 ngut ki MDC na JHADC kiba la pynthikna ban rung BJP ki long u bah Lakhon Biam (UDP), Krishon Langstang (UDP), Treilang Suchiang (UDP), Dawan Lyngdoh (UDP), Andrew Shullai (INC), Arbor Hima (INC), Holando Lamin (INC) bad u bah Aiborlang Shadap (INC).

Shillong: Ka Meghalaya Privilege Committee jong ka iing dorbar Jylla, ka la khot hajir ia U W Momin, DSP Traffic, ha ka 5tarik mynta u bnai bad ka daw, ka long namar ba u bthah ia U MLA ka Rambrai, U Bah Kimfa Marbaniang, ba un weng noh ia ki iit iong na ka kali jongu.

La iathuh ba katei ka jingjia, ka la jia ha ka 7tarik Nailar 2019 bad U Bah Marbaniang, ula ujor sha U Deputy Speaker, ka dorbar Jylla, ha kaba ula kynnoh ba utei u pulit, ula kren tohmet ia u bad bthah ba un weng ia ki jingtah iong na ka kali jongu.

Shillong: Ka Shillong Lajong FC ka la pynliem ïa ka Laban Sports Club da 4-0, ha ka jingiakhun ka Shillong Premier League, ka Shillong Sports Association (ISSA) kaba la long myn hynnin ka sngi ha JN Stadium. Polo.

Ïa kine ki saw tylli ki kol, ka Shillong Lajong FC la thep ha ka kylla miet namar haduh ba la kut jong ka kylla step, ka ki ar kynhun ki la lah ba kin ïakhaid khlem pat don ba lah ban pynkhih satia ïa ka jar.
U nam tam ha kane ka jingïalehkai dei u Phrangki B uam, uba la lah ban lam khmat ia ka Shillong Lajong dei u Phrangki Buam uba la ïoh ba un thep artylli ki kol ha ka minit kaba 54 bad 82 minit.
Hynrei shwa ïa kane, ïa ka kol ba nyngkong ka Shillong Lajong FC la thep nyngkong ïa ka da u Noarem Mahesh Singh ha ka minit kaba 51, katba ïa ka kol ba saw bad ba khatduh la thep da u Donbok Lang Lyngdoh ha ka minit kaba 63.
Haba phai pat sha ka jingïakhun ka rukom ïalehkai ki ar kynhun, kam long satia kaba pynhun ïa ka mynsiem u paidbah nongwan peitkai, katno tam ïa ka kynhun ïalehkai ka Shillong Lajong FC namar ba sa shisien, ka Laban SC ka la rung madan da ka juh ka kynhun ïalehkai kaba la mad ïa ka nam rem hakhmat ka Rangdajied United FC, kaba ki rang ïalehkai trai ri trai muluk ba la rung ka kyrteng ka jong ki ha ka First XI ki long tang kumba lai ngut katta u Pynshong dor Shadap, u Eijingmut Lyngdoh bad u khynnah U-18 u Aplang Buam bad hadien la mih bujli pat sa u Bickyson Kharkongor bad u Kerionald Pyngrope.
Lashai ka sngi ka jingïalehkai kan long hapdeng ka Rangdajied United FC pyrshah ïa ka Nangkiew Irat SC kaban long ha ka por 3:30 nohphai sngi.
Ha ka jingiakhun ka 2nd divison, ka Riatsamthiah ka la shah pynliem ha ka Jongksha da 1-2 kol.
Lashai ha ka 2nd division, ka jingiakhun kan long hapdeng ka Laitkot bad ka Mawryngkneng.

Shillong: Ka NEHU Inter College Basketball (Men & Women) Tournament 2019 ban pyniaid da ka Sports Department ka North-Eastern Hill University kan sdang shen. Ki college kiba kwah ban iashim bynta ki lah ban phah ia ka jingpynthikna ban iashim bynta shwa ka 9 tarik Nailur 2019.

Shillong: Ka NEHU Inter College Football (kynthei) Tournament 2019 ka la sdang myn hynnin ka sngi ba la plie da u Assistant Director (Sports), u Prof. N. Das kum u kongsan ha madan JN Stadium, Shilong.

Ha kane ka sngi, ka St. Edmund’s College ka la shah pylliem ha ka Shillong College da 2-0. Ha kawei ka jingialehkai, ka Kiang Nangbah Govt. College ka la pylliem ia ka Nongstoin College da 4-3 kol da ka tie-breaker hadien ba iakhaid ha madan.
Mynta ka sngi, ka jingialehkai kan long hapdeng ka St. Mary’s College v/s Synod College bad ka Lady Keane College v/s Balawan College.

Da U Bah Philip Marwein

Mynta ka la wan biang ka jingtieng jong ka jingwantuid ki mynder ri kiba na jylla Assam sha Meghalaya namarba kumba 19 lakh ngut ki briew, kham bun ki dei ki muslim, kim ioh rung kyrteng ha ka National Register of Citizens (NRC) jong ka jylla Assam.

Ha ka sien kaba nyngkong kiba khlem ioh rung kyrteng ha ka NRC ha jylla Assam ki la don kumba 42 lakh ngut bad la ngeit ba kine ki dei kiba la wan na Bangladesh. Hadien ba ki khlem ioh rung kyrteng ha ka NRC haduh katne ngut ki briew, ka la don ka jingtieng kaba khraw ba kito ki bym ioh rung kyrteng ha ka NRC kin phet noh na Assam bad leit buhai shnong kat shaba lap, ba tieng ioh shah pynryngkang par biang sha Bangladesh.

Ka Meghalaya ruh ha kito ki por ka la tieng bha ba ioh wan tuid puk kito kiba shah kyntait rung kyrteng ha ka NRC. Kumno re kumno hadien ba la bishar bha ia ki kyrteng jong kito ki 42 lakh ngut kiba la shah kyntait mynshuwa, la lap ba kiba dei hok ban duh rung kyrteng ki dei tang 19 lakh ngut. Mynta lada baroh 19 lakh ngut kiba duh rung kyrteng ha ka NRC ki wanpoi ha jylla Meghalaya kan jia aiu ia ki trai shnong trai muluk.
Ka Meghalaya mynta ka don kumba 35 lakh ngut ki khlieh briew bad na kine ym tip katno ngut ki dei hok ki trai shnong namar tang ki khasi-Jaintia bad Garo ki don kumba 27 lakh ngut bad kiba tam ki dei kiwei pat ki jaitbynriew. Na kine kiwei pat ruh ngim tip kino kiba dei ki trai shnong bad kino ki dei kiba wan na Bangladesh ne na Nepal bad kumta ter ter.
Ka jingeh ha Meghalaya ka long ba ka dei ka jylla ba laitlan, ki jait pa ki jait ki briew ki ioh rung ha kane ka jylla bad ki shong ki sah katba mon, ym don kita ki rule ki ain kiba pyrkhing kumba long ha kiwei kiwei ki jylla. Khlem pep ka don ka jingtieng namar kane ka jinglaitlan. Nangta ha Meghalaya kam don NRC bad kumno kein phin bishar thik pa thik ia kino kiba dei ki nongshongshnong bad kino ki bymdei. Ka dei hok kein ban tieng ioh wan rung kito kiba shah kyntait ban rung kyrteng ha ka NRC ha Assam. Ka Assam ka long ka jylla kaba kham sniewbok bha namar ka la phaloh da ki mynder ri, khamtam na Bangladesh, haduh ba ha ki 16 tylli ki district jong ka jylla ki trai shnong ki la kylla ritpaid bad la ioh la ki jong ki nongmihkhmat paidbah wat ha Assembly ruh.
Ha Meghalaya ruh ka don ka jingtieng mynta ym tang namar ioh wan rung kyrthep kiba shah kyntait NRC na Assam hynrei ka jingwantuid ki Mynder lane ki khyllah jait ka la iai-jia long manla ka sngi. Ka jingdawa ILP ruh kam long kam ka jingdawa Entry bad Exit point ruh kam pat long kam ei ei. Ki Check Gate ruh kim trei kam ei ei ban check ia ki jingwantuid ki mynder ri bad kim don bor ruh ban bishar kino ki mynder.
Manla ka sngi ki jait-pa-ki jait ki briew ki wantuid shapoh Meghalaya, kham bun na ki, ki dei ki muslim. Ym don kano kano ka lad ban check ia ki, namarba ym pat ai bor hano hano ruh, wat ki pulit ruh kim lah ban check thik pa thik bad kim lah ruh namar, kim lah ban bud-dien ia uwei pa uwei u briew, nanngo ki wan shano ki leit bad ki wan ha ki dur bapher bapher. Ki briew kiba wan ruh ki dei kiba dang samla bha. Ki leit shongshnong ha kylleng ki bynta bapher bapher jong ka Meghalaya la ha Khasi, Jaintia ne Garo Hills. Ki saphriang kylleng kylleng bad ki trei ia ki kam bapher bapher, naduh ka khaii pateng, ki kam karkhana, kam rep kam riang, trei ha ki hotel, restaurant, ki dukan, ki long ki misteri, ki long ki nongdie second hand, khaii tin jot nar jot bad kumta ter ter. Kine ki nongwanpoi-ei ynda la kham katto katne por, ki iashongkha khleh bad ki traishnong, ki kylla ki paduh padeng, pakhynnah, pasan bad kumta ter ter. ym tang kumta, ynda la iashongkha khleh kylla sa ka niam ka rukom ka riti ka dustur bad suki suki ki traishnong kin kylla ritpaid bad la pher nadong shadong. Kane ka long ka jingma namarba la jia bad kan iai-jia ter ter katba nang mih ki sngi bad ki por. Kumta ka jingtieng na ka jingwantuid ki mynder ri sha kane ka jylla ka long shisha ka jingma bad donkam ka jingiatreilang na baroh khoit ban husiar bad teh lakam ia ka jingwan ki mynder ri.
Ka sorkar ruh ka dei ban pynkloi noh mar mar ban wanrah ia ka ILP, Enetry bad Exit point bad ia ki rule ki ain kiba lah ban pyrkhing ia ka jingwantuid ki mynder ri.

Bah Monarch Shabong

Ka mih ka jingkylli, kaba eh shi katdei ban jubab bad kata ka long ba ngi la bakla tasam ma ngi ne ba ka Assam, ka don daw eiei pyrshah ia ngi ba ka hap ban tuklar lut ia baroh ki kam jongngi, ha kane ka Jylla.

U dewiong ha u snem 2014, la ujor da ka seng kaba na Assam bad ula khang hi sbak san snem tam kynthih bad mynta sa u maw, la wan ujor da u nong Assam bad utei ngim tip un poi shaei, hynrei la shu antad, ba ka NGT, kam dei ka bor kaba rit bad lehse, kan lah ban tih tyllong ia katei ka kam tih maw beain ha Ri bhoi District.

Kam dei tang kata, hynrei ki don da ki spah bad ki hajar jait, ha kaba la tuklar lut da ki briew kiba na Assam, haduh ka ioh kam ioh jam, ka khaii pateng, ka die ka thied bad ter ter, kiba ka Assam, ka don ha ka bor kaba kham halor, ban pynbeit lane ban pynbor ia ki paidbah jong kane ka Jylla.
Kumta hangne kein, ka mih ka jingkylli, la ngi la bakla palat haduh katta katta ia ki ain ki kanun jongngi, ba ka la ijli tasam ka Assam lane ba ka shu dei hi, ka jing bishni ne wad daw, ba ki nong Meghalaya, kin ia tyngkhuh ia ki jingeh na ka por sha ka por.

Kito kiba shong ha khappud jong ka Jaintia Hills, West Khasi Hills, Ri Bhoi District, ki sngewthuh bha ia kata, namar ba haba shna surok ruh, hap ioh jingbit na ka sorkar Assam lane na ki nongshong shnong ka Assam, lada leit shna iing skul ruh, shah pynpra bad nangta, lada ai bor ding ruh ym long bad kumta kaba kut, ka pyni shai ba baroh ki kam ki duk bad ka iaid ka ieng jong ki nong Meghalaya, ka don ha ka iit kaba heh bha, kaba ki peit siar man ka khyllipmat na Assam.
Ngin dang ia peit ia kaei kaba ki nong Assam, ki dang pyrkhat lehse ban leh eiei ia ine i jylla iba shi troh, hynrei la iohi, ba ia mynta ki khar Assam, ki la tip bad ki la iohi lut ia ki shnong ki thaw, ki kyndong kynshrot jong ka Ri Khasi Jaintia, namar ba ki kali AS, kiba wan shang kai ki don byllai, kiba wan kit jhur kine byllai, kiba wan die tusok ruh dei ki khar Assam suda bad haba ki wan (imat) ki don ia ki khmat kiba nep ban peit ia ka jinglong ka ri Khasi.
La iohi shai namarkata, ba ka jingwan ki ophis sorkar India ha Shillong lei lei, ka dei ka lynti bah ia ki nong Assam, namar ba ki kam ki jam kiba bun bah, kiba don mynta ha ki ophis sorkar India, kiba trei ki dei na katei ka Jylla.

U Shiva Kewat, uba dei u nong bylla sngi ha Shivpura jong ka Jylla Madhya Pradesh, hynrei u dei u briew, uba im jynjar sat ha kine ki sngi. Ka jing jynjar jongu, ka dei namar ba u shah pyndik ha kawei ka long iing jong ki tyngab.

Mar ia mih na iing, ki tyngab ki la ap hi sia ia u ha khmat ka iing jongu ha Sumela, kaba ha Shivpura bad u hap ban rah da u diengduh ban bom ia ki, namar ba ki wan ban puh bad pynthut ia ka jingiaid lynti jongu, ong ka khubor jong ka Times of India.

La iathuh ba ka jingjia, ka dei naduh lai snem mynshwa, ha kaba kawei ka khun tyngab, ka sahkut ha ka jar bad haba U Kewat u leit lap ia ka, ula leit sei na katei ka jar, hynrei ka la iap noh ha kti jongu bad nangtei ka sah ka jing ia shun kaba khraw hapdeng jongu bad ki tyngab jong katei ka shnong.

“Ka iap ha ka kti jongnga bad ngam nang shuh ba ngan batai ia kitei ki tyngab kmie, namar ba ngam dei ba pyniap, hynrei nga pyrshang ba iarap” ong U Kewat, uba shah beh thong man ka sngi, ha kitei ki kynhun tyngab.

Naduh ba ka iap katei ka khun tyngab, kitei ki long iing tyngab, ki la bun shun hi sia ia U Kewat bad kim kwah hi ban map ia u bad ki iai ap man ka sngi, ha ka leit ka wan jongu.

La iathuh ba man ka sngi, un shah dait, un shah puh na kti, na khlieh, na ki khohwah jongu bad katba ki ioh kitei ki tyngab.

U Kewat, ula mong ki kti jongu, ki bynta jong ka khlieh bad kiwei ki bynta jong ka met bad u da lyngngoh shibun eh, ba kitei ki tyngab, ki iai kynmaw hi ia ka dur khmat jongu, wat hadien lai snem kynthih ruh.

Nongpoh: Ka District Magistrate, Ri Bhoi District, ka la pynjari da ka Section 144 Crpc ha ka District baroh kawei, kaba maham ia ka jing ia lum lang jong ki paidbah, kaba palat san ngut. Katei ka kyndon kam trei kam tang ha ki jaka ba long skul, ki kolej bad kiwei ki jaka pule.

La maham ruh ia ki sengbhalang bapher, ba kim bit ban talasi laisen khaii lane laisen bylla, khlem da iaid lyngba ki kyndon ain kiba biang.

Katei ka hukum, la pynjari, namar ba ki don ki sengbhalang, kiba khynra laisen ia ki bar jylla bad kumjuh ia ki nong bylla ruh kumjuh, kaba la pynmih ia ka jingtieng jingsyier jong kiba bun balang, ba kynthup ia ki nongkhaii, ki nong bylla bad kaba lah ban wan rah ia ka jingshong syier ka thain baroh kawei.

Ka kyrwoh ba la pynmih da U District Public Relations Officer, ka Ri Bhoi District, ka kren shai ba katei ka kyndon la donkam ban shim ia ka rai kaba kyrkieh, da ka bor jong ka District Magistrate.

Shillong: Ki dkhot jong ka All Meghalaya Dancer’s Association kiba la btin lynti ia I Kong Bateithymmai Nongrum, I khun u Bah Tharsing Syiemlieh bad Bah Biroda Nongrum, na ka Shnong Bynther ha ki por kiba la dep ban leit iakhun ia ka “Yes I Am” wat lada kane ka Channel kam shym lah ban pynlong haduh mynta ia ka Grand Final, hynrei kaba sngewtynnad pat ka long lyngba kane ka rynsan kiba pyniaid ia kane ka Yes I Am ki la plie lad ia I Kong Batei ban iohlad ban pyntbit ia ka kam rwai ha Nongbah Mumbai, ha kaba I la shah pyntbit ha u Director Mr. Dilip Dutta (Music Director jong ka Bollywood) bad mynta i la ioh ruh ban rwai ryngkat bad u Kumar Sonu ha ki Studio bad I dang pynkhreh ruh mynta ban rwai bad kwei pat ki Kaitor jong ka Bollywood.

Na ka liang u President, Bah Kitbok Thabah jong ka All Meghalaya Dancer’s u la ioh ruh ban iakren lyngba ka phone bad u Dilip Dutta, Music Director, ha kaba iadei bad I Bateithymmai ha ka kam rwai.

Na ka liang U Dillip u la ai jingiaroh shibun eh ia I Bateithymmai Nongrum ba I dei I ba don shisha ia u ryndang ba tbit ban rwai bad ban pynsngewtynnad ia ki nongsngap.

Na ka liang jong u Dilip u la plie ruh ka lad ban iarwai ryngkat bad u Kumar Sonu, u la kular ruh ym tang ban kut tang hangne, hynrei un ialeh ruh ban pynrung ha ka Bollywood Industries ban long ruh kum ka Indian Playback Singer ha ki Bollywood Film bad la pynbit pynbiang ruh ia ka jingrwai ha ka Fend Recording Studio.

Bad ka long kaba eh bad kaba shem jynjar ban ioh rwai lang kum jong u Kumar Sonu, uba la ju rwai ia shibun bah ki jingrwai Phlim Hindi, lada kim dei ki briew kiba ma u um sngewtynnad ia ka sur na ka liang u Kumar Sonu ruh u la ai jingiaroh shi katdei ia I Bateithymmai bad u la kmen ruh ban ioh iarwai lang bad ki Khasi.

U Dilip u la iaroh ruh ia ka Nongbah Shillong ba ki don shibun bah ki riewdon sap don phong, bad ka jaka kaba itynnad tam ha ka North East, bad u la kular ruh ha khmat u President ban wan jngoh ia ki riew donsap ha u snem ban wan ia ki programme ba la pynlong da ka AMDA. U la ong ruh ba bun ki nongrwai ki dei kiba tbit haba ngi peit hapoh You Tube jong ki nongrwai na Nongbah Shillong, hynrei ka donkam ban tip pat ia ki rules kumno ban rwai.

La ioh ruh ban iakren bad I Bateithymmai Nongrum halor ka jingsngew ka jong I, I Bateithymmai ia la ainguh nyngkong ia U Blei, ia ki kmie ki kpa, ki hynmen ki para, kumjuh ruh sha kito baroh paidbah kiba la noh synniang lem ban kyrshan ia I naduh ka Yes I Am haduh mynta, kumjuh ruh ia ka All Meghalaya Dancer’s Association, Batesi Channel bad ki nongthoh khubor kiba la pynphriang lem ia ka sap ba I don, bad ia u Nonghikai jong I u Mr. Dilip Dutta uba la trei shitom bad plie lynti haduh ban da poi sha ka thong.

Na ka liang ka AMDA kan dang trei shitom shuh shuh ban pynmih ia ki samla bad hep barit ha ki rynsan jong ka ri India T.V. Show ha kaba na ka liang u nongialam jong ka Seng u la dep ban iakren bad ki reality show kiba don shabar ka Jylla.