New Delhi: Ka jingsei pisa tuh na ki Bank, ha u snem 2018-19, ka la poi sha ka 6,800 tylli bad kaba shongdor sha ka ₹71,500 klur, ong ka kyrwoh jong ka Reserve Bank of India.

Ha u snem 2017-18, katei ka jingsei pisa tuh na ki Bank, ka long 5,916 tylli bad ka jingduh jong ka pisa ka long 5,916 tylli bad kaba shongdor ₹41,167.03 klur.

La iathuh ba ki don 6,810 tylli ki jingsei tuh pisa na ki commercial bank, kaba poi sha ka ₹71,542.93 klur, ha kane ka snem mang pisa 2018-19, kaba kiew palat sha ka 73 percent, ong ka Reserve Bank of India (RBI), haba jubab ia ka jingwad jingtip jong uwei u nongthoh khubor.

Ki pulit ka Arunachal Pradesh, ki la kem ia U Manager Bank ha Siang District jong ka Arunachal Pradesh, namar ba u sei pisa tuh, na kawei ka account jong kawei ka nongbuh pisa, ong ka khubor pulit.

La kem ha ka sngi palei ia U Bikash Ranjan Hajong Ray, uba dei U Deputy Manager jong ka SBI Aalo branch,uba la jah rngai naduh u bnai ba ladep. U Ray, u dei u nongshong shnong ka Hawakhana ha West Garo Hills, jong ka Meghalaya.

Ka khubor jong ka North East Today, ka iathuh ba U Ray, ula sei tuh ia ka pisa kaba T.2.20,000 na ka accoung jong kawei ka nongthep pisa, ha ka 18tarik Naitung 2019.

Ka phlim jong U Prabhas bad ka Shraddha Kapoor, ka Saaho, ka mih iew hynnin ka sngi thohdieng bad katei ka dei ka phlim ba nyngkong hadien ka Baahubali bad katei ka phlim, ka dei kaba la pynlut T.350klur, ha kaba la ring ha ki kyntien Telugu, Tamil and Hindi.

Ka phlim la iathuh ba ka jing ioh kamai jongka, ka la pai sha ka T.104.8 klur, katba kaba shai ka jingkhein, kaba la wan haduh mynta ka long T.68.1 klur bad katei ka phlim, ka la tam ka jingioh kamai jongka, ia ka Avengers Endgame (Rs 53 crore) bad ia ka Thugs of Hindostan (Rs 52 crore).

U Prabhas, ula pawnam shibun eh, hadien ka phlim kaba la pynmih kham mynshwa, kaba la ai kyrteng Baahubali bad kaba nyngkong ka kamai T.650 klur ha ka pyrthei baroh kawei, katba kaba ar pat ka Baahubali 2: The Conclusion ka kamai T.1796.56 crore.

Kiba ak lang ha ka phlim Saaho, ki long U Chunky Panday, Jackie Shroff, U Neil Nitin Mukesh bad ka Mandira Bedi. La thaw ia ka phlim da U Sujeeth bad la pynmih da U Vamsi Krishna Reddy. Ka phlim ka pyni ia ka jing ia knieh bor jong ki nonglute kiba don ha kawei ka nongbah Waaji, hadien ka jingiap noh jong u nongialam jongki.

Shillong: Ki Ar seng kiba kynthup ka All Jaintia Hills Social Welfare Organization (AJHSWO) bad Hynniewtrep Student Union (HSU) hadien ba ki la ioh ka jing u jor naka kong Smt. Rose Salva Shullai kaba don Kharkhana shna jingbam (Manufacturer & Supplier of Chana) kaba don ha Salini Colony Mihmyntdu Village West Jaintia Hills naduh ka 3/06/2015 bad ka don ruh ia ka licence No. 11715001000133 kumba la 3(lai) snem kynthih tad haduh mynta 02/06/2019 kane ka licence jong ka ka dang treikam.

Kaba sngew phylla pat ha ka juh ka jaka Kharkhana Shna jingbam (Manufacturer & Supplier of Chana) don pat sa kawei ka Licence kaba dang treikam haduh mynta 09/10/2019 kaba kyrteng Smt. Suchitra Mochary kaba don u Licence No. 11717001000248 kaba dei ruh ka bar jylla, baroh ar ki ne ki Licence ki dang treikam haduh mynta ruh.

AIS Suja

Ong u Blei, “Ngan trei, uei ban khang? U Blei u long uba phylla bad uba khraw. Ki kam jong u kiba phylla. U long u Blei ka jingieit. U ong – Nga long u Trai ym don uwei pat nalor jong nga ym don da uwei pat u Blei” Isaiah 45:5-6.

Ym don mano mano ba lah ban khang ia u Blei ba un trei bad ym don ba lah ruh ban hukum ia u. Bad ym don ba lah ban pynbeit ia kaba u la pynkdor lane pynkdor ia kaba u la pynbeit. Eklesiastis 7:13.

U ong – Nga ma nga hi Nga long u Trai, bad nalor jong nga ym don. Ym don uba lah ban pyllait na ki kti jong nga” Isaiah 43:11-13.
Kane ka long ka jingshisha ba u Blei u long uba pylla u bakhraw bad u la leh ia kiei kiei kiba phylla ia kaba u briew um pei phang um nang ang.
Kawei na ki jingphylla ba u Blei bakhraw u la leh ka long ba u pynsangeh ia ka sngi (Sun) ba kan neh hajuh. Bad kane ka jia ha ka por u Joshua hadien ba u Moses u la iap noh, u Blei u la khot ia u Joshua ban ialam ia ki khun Israel. Joshua 1:2. U Blei u da kular ia u Joshua da kaba ong – “Kumba nga la don ryngkat bad u Moses, kumta ngan don bad me ruh; ngan ym iehnoh ia me lymne kyntait ia me. Pynkhlain bad pynshlur bha ialade” Joshua 1:5. Thik ka la long kumba u Blei u la kular, namar u Blei um ju lamler. “Namar u Blei um dei u briew ba un lamler” Jingkhein 23:19.
Kaei kaba la jia? Ki 5 ngut ki syiem Amor ki la kiew bad ki paidiapom jong ki baroh bad iashong dara ha Gibeon. U Joshua ruh ryngkat ki briew bashait bashlur ki la pynkhreh. Kumta u Trai u la ong ha u Joshua “Wat sheptieng ia ki Amor, namar nga la ai ia ki ha ki kti jong me bad ym don uwei ruh u ban ieng ha khmat jong me” Joshua 10:5-8.
Ka sngi (Sun) ka la ieng thik hapdeng ka bneng (Noon) bad kam shym la kyrkieh ban sep kum ba shi sngi biang. Bad ym shym la don ka sngi (day) kum kata, mynshwa jong ka lane hadien jong ka ia kaba u Trai u la sngap ia ka ktien kyrpad u briew: NABA U TRAI U IALEH NA KA BYNTA KI ISRAEL” Joshua 10:12-14.
U Blei u kular u Joshua u kohnguh ia u Blei, bad ia kaei kaba u Joshua u kwah ka long ba u Blei un pynjlan por da kaba u Blei u sngap ia ki kyntien u Joshua ban pynsangeh ia ka sngi bad ia u Bnai. “Bad ym ju don kum kata mynshwa lane hadien jong ka” Dei tang ha ka por u Joshua hi, namar ba u Trai u Blei u ialeh thma na ka bynta ki khun Israel. Joshua 10:13-14.
Hangne ngi iohi ba ym don ka bym lah bad u Blei lada u briew u ngeit bad kohnguh. Ym don ba lah ban khang ia u Blei namar ba u la pynsangeh ia ka sngi hamar shiteng sngi, bad u pynsangeh ia u bnai ha shiteg miet. “Ngan trei uei ban khang?” Isaiah 43:10-13.
Aiu la jia ia ki Syiem Amor? Ki ia leit phet rieh shapoh krem, la set ia ka krem da kaba pyntyllun ia u maw bakhraw” Joshua 10:17. La pyniap ia ki nongshun joing ki Israel baroh.
Une u Blei u long ujuh ha ki por jong u Moses mynba u Moses u la ialam ia ki khun Israel lyngba ka duriaw basaw (Red sea) mynba ki la mih na ri Egypt ha kaba ki la iashong sah kumba 430 snem. Exodus 12:40 / Exodus 13:18. U Blei uba khraw u la hukum ia u Moses da kaba ong – “To rah ma me ia u diengduh, to kner ia la ka kti halor ka duriaw (Red sea), to pyniakhlad ruh ia ka, te ki khun Israel kin ioh iaid ryngkew lyngba ka duraw ba saw” Exodus 14:16.
U Blei u trei, ym don ba lah ban khang. “Namar Nga long u Blei, ym don uwei pat” “Nga long u Blei uba iathuh ia kaba kut, naduh basdang” Isaiah 46:9-10.
Ki prophet jong u Blei ki la leh shibun ki kambah bad jingphylla, namar ki kohnguh ia u Blei bad ia ka ktien jong u. U Blei u kular mynta ruh ban trei bad ym don ba lah ban khang, namar u Blei u long u Blei uba ong “Nga long ba nga long” bad ba kane ka kyrteng jong nga ha la ka rta kan long ka jingkynmaw IA NGA sha ki pateng bynriew baroh” Exodus 3:14-15.
Ngan trei, uei ban khang? Isaiah 43:10-13.

Jowai: Ki Meghalaya People United Front (MPUF), East Jaiñtia Hills District, ha ka 30 tarik u Nailar hapoh ka jingïalam u samla Kyrshan Blah President Khliehriat Circle, ki la leit ai jingïarap da ki tiar bam bad kiwei sha kawei ka longkmie kaba la tip kyrteng kum ka Ibadamon Shylla kaba naka shnong Nongsning East Jaiñtia Hills District. La ïathuh ruh ba kane ka jing synñiang ka seng la leh da kaba kynshew pisa lang para dkhot ban thied ïaki tiar bam bad kiwei de ki tiar ïing ba donkam.

Katei ka longkmie kala ngat ha ka apot jong ka jingeh bad jingkyrduh hadien ba u lok jong ka ula khlad noh dang kumba hynriew bnai ei ei bad ieh noh shadien ïa ki saw ngut ki khun ba dang rit ka rta. Kane ka longkmie ka shem jingeh ban bsa ban pjah ïa ki khun jong na ba ki dangrit ka rta ban leit bylla ruh kam shem la ïoh lad satia bad lada leit ruh hap ban bah lang ïa iwei i khunlung ba dang 6 bnai ka rta.

Hashwa ban aiti ïa kine ki tiar la don ka jingïalang kaba lyngkot kaba pynïaid da u Thynda Sana, la ïoh ruh ïaki jingkren na u samla Kyrshan Blah, uba la ong “ka jingai jingïarap jong ngi sha kiba duk ngi khlem ïoh na kiwei hynrei dei tang ka jingïasnoh kti lang para dkhot bad ïoh ban ai kum kine ki jingïarap isynei ïa kiba duk”. Ula ïathuh ba ka seng kan ïai bteng ban ai ka jingïarap sha kiba duk kiba donkam hok ka jingïarap katba kot ka bor, hynrei ym dei ban shaniah tang ha ka jingïarap jong kiwei hynrei ki dei ban long kiba trei shitom ha kano kano ka kam kaba ki trei la ong shuh shuh u samla Blah.

Kiwei de kiba ai jingkren ki kynthup ïa u samla Michael Chyrmang President MPUF-EJH, u ma Raplang Dhar Ex-Waheh shnong Nongsning, bad ka kong Ibadamo Shylla, ha kane ka sngi la wan ban ïadonlang bad ki dkhot jong ka Khliehriat Circle bad East Jaiñtia.

Shillong: Hadien ka kynrum kynram ba la mih ia kawei ka jaka ha ka shnong Abri village Killing Ribhoi hapdeng ka shnong Abri village bad katto katne ki jait bynriew Naga ki ba mut ban knieh jubor ia ka wei ka jaka kaba don 46 biga ka dorbar shnong ka Abri village hapoh ka jing peit u Dilip Sangma, U Rangbah shnong ka Abir, mynhynnin ka sngi ki la sam noh sha palat ki 50 ing ki trai shnong ki ba duk, ha kaba la sam ia kumba 3000 sq ft ia ka wei kawei ka long ing.

Na ka liang u rangbah shnong u la iathuh ba ka ne ka ja ka kam dei shuh ka jongno jong no ruh hynrei kala dei jong ki long ing ki ba sah hangto bad u laana ruh ba kin ym lah bad die pateng lane ai wai shawei .

Lada don ba leh kumta ka shnong ka kin ym shah shuh ia ki ban sah bad ki shnong kin ai noh noh sha wei pat ki ba donkam iaka jaka,sah khlem kano kano ka jing siew hynrei ki dei ban biang ka kot ki sla bad yn ai ruh tang ia ki trai jylla.

Shillong: Ka HYC War Jaintia Circle, hynnin ka sngi, hapoh ka jingialam u Assistance Secretary u Samla Ededisuk Shylla lem bad ki dkhot ka seng ki la leit ujor sha Shillong, ka tnad office treikam ka Network Jio halor ka jingbymbiang ka Network Jio ha ka shnong Nongtalang.

Ha katei ka jingleit ujor, ka seng ka la pynpaw ba u tower Network Jio ha Nongtalang um lah ban ai metwork sha baroh ki dong ki kyntoit ka shnong, hynrei u lah ban ai network tang ia ki katto katne iaki dong ki kyntoit bad halor kane ka nongrim ka Seng ka ieng shkem khnang ba ka Network ha katei ka shnong kan long salonsar ia baroh ki dong ki kyntoit ka shnong, namar kumba long hi mynta ka long kumba leh shiliang khmat halor katei ka Network Jio ha Nongtalang.

Halor kane ka Seng, ka ai por shitaiew ia ka tnad Network Jio company bad lada kam lah ban pynbiang Network ia u paidbah ka seng kan sa leh ia kaba donkam, ong ka kyrwoh na u President ka Hyc War jaintia Circle.

Shillong: Ka HANM West Khasi Hills District, ka ia wer ia ki dkhot bad ki nongialam bapher jong katei ka seng, ba kin peitngor bha ia ka jingwan rung ki dkhar Assam sha ka Ri Khasi, namar ba ka jylla Assam ka pyntreikam khatduh ia ka jinglum jingkhein (NRC ) jong kiba hap hapoh Assam.

La ong shuh shuh da ka kyrwoh jong katei ka seng, ba kito kiba ym ioh jingkhein ki lah ban wan kiew ha ka Ri Khasi baieid jong ngi.

Shillong: Ka Khasi Students’ Union War Jaintia Circle ha ka 29 tarik Nailar, hapoh ka jingialam u General Secretary Samla Lurman B. Talang bad Samla Kyrmen Lamin Gayang ka la leit jurip ia ka surok ban leit sha Satpator bad Trangblang halor ka jingtrei torti u Contractor.

Ha katei ka jingleit jurip la wan ruh ki Rangbah Shnong Trangblang Bah A.B Pamksang bad Rangbah Shnong Satpator Bah Wanphai B. Amse, ka Seng hadien ba ka la iohpdiang ia ka jingujor na ki rangbah shnong jong ki artylli ki shnong halor ka jingtrei torti jong u contractor, ha ka bynta bad la iohi ruh ha ka Facebook ia kane bad ka long shisha ka bym juh iohi ba yn pyndonkam da ki maw bym iahap bad ba khleh lang bad ka khyndew ktieh ka seng ka la shimkhia ia kane da kaba sngew pyrshah jur ia ki jingleh bym khein snep jong ki bor ba dei peit, khamtam hadien ba la dep bthah ia kitei ki rangbah ban leit ujor mar mar sha u Executive Engineer PWD Jowai South. Ka la pynkyndit ia ka seng namar na ka liang jong kitei ki rangbah ki la jubab la dep ujor mar ia sdang trei ki nongtrei da une u maw, bad na ka liang jong u E.E ruh ula kubur ba u la dep ong ia u contractor ba um dei ban trei da une u maw.
Ha kawei ka liang ki arngut ki rangbah shnong bad secretary shnong ki iathuh ia ka seng ba hadien ba ki la wan ia kynduh ia utei u sahep, ki la sngewkmen namar kumba ka long ha katei ka sngi utei u EE u la hiar ha kajuh ka sngi ban jurip ia kane ka surok.
Na ka liang ka seng ka la lyngngoh haba ka la poi ha katei ka jaka ban iohi kumno ki bor ba dei peit naduh ki overseer, Meharal bad utei u E.E haba u la hiar hi ialade ba une u briew u ioh ka lad ban pyntrei ia une u maw uba iapher naduh ka rong , ka dur ban siang da une u maw nalor ba u la dep ong ba ula dep kren ia u contractor ba um bit ban trei da utei u maw kat kum ka jingiathub ki tei ki rangbah. Ka seng ka maham jur ba ym bit satia ban leh kum kine ki shim kabu ia ka pisa paidbah ban pyntrei torti tang ban myntoi ia lade shimet khlem da patiaw ia ka jingeh jong u paidbah.
Hadien ba la ap slem ia ki bor ba halor namar la ioh jingtip ba kin hiar sha une u surok namar ka seng ka kwah ban ioh iakren markhmat bad ki ka la long slem palat bad ruh namar ka don kawei pat ka kam ka seng kan leit, la khot ia u contractor ba don ha kane ka jaka bad haba la kylli u la jubab da kaba ai daw kumne kumtai bad ka seng ka bym juh ran dien ha kino kino ki bynta kiba ktah shisha ia u paidbah ka la maham ba un bthah ia ki nongtrei jong u ban kyntait ia ka khyndew ktieh, khnang ba kine ki maw barit bad ka khyndew kin hap bad un sah tang u maw ba ba iahap bad kane ka surok kan neh bad skhem kat kum ka plan jong ka sorkar. Bad la iakren ruh ia kaba la dep siang kumba 150 meter eiei kaba ula dep trei da kine bad na ka liang jong u, u la ong ba un sangeh shwa ia kato kaba u la dep trei namar ka seng ka la iohi da ka la ki khmat ba ka long shisha ka rukom trei ka bym juh lap ban trei kum ha kata ka rukom. Ka seng ka kyntu jur ia ki bor ba dei peit ban shimkhia ia ba kim dei ban ailad ia kiba kum kine namar na ka liang ka seng lada la ailad kum kine ki rukom trei kam leit ruh wat sha ki bor ka ain.

Badapjied Kurkalang

Ha ka juk jong ka social media bad internet mynta ngi lah ioh shibun ki khubor kiba ai jingmyntoi ha kiba bun ki bynta ha ka jingim jong ngi kaba man ka sngi. Hooid ki don ruh shibun ki khubor kiba ngi ioh lyngba ki social media bad internet kiba lah ban ialam bakla bad wat ia kaban pynjot ruh ia ka jingim jong ngi. Namarkata ngi dei ban long kiba husiar ia kaei kaba ngi iohsngew bad iohi lyngba ka social media bad internet.

Ka long ka jingshisha kaba ngi iohi bad kaba paw lyngba ka media bad internet ha kine ki sngi kaei kaba jia ha ki ri Iurop kiba pher bapher wat ha ka ri Amerika ruh. Ka jingwan rung jong ki briew kiba na bar haduh kaba ym lah shuh ban tehlakam bad ka daw jong ka jingbym lah ban tehlakam ka pynlong ia ki bor synshar ba kin shem jynjar ban buddien ia ki. Ki briew jong kine ki ri Iurop ki don shisha ka mynsiem kaba sngewlem kaba bha haba ki pdiang ia kine ki briew sha ka ri jong ki, hynrei kaei kaba kim lah ban iohi pat ka long ka jingshim kabu jong kine ki briew kiba wan ban tuid sha ka ri jong ki. Ka jingpynbthei bom ha ka nongbah Paris bad ha ki jaka bapher bapher, ka jingshahleh beijot jong ki kynthei ha ri Sweden bad ka jingkiew jong ka jingngeit Islam ha ka ri England, France, Germany, Norway, Sweden bad kiwei kiwei de ka nang pynshlur shuh shuh ia kine ki nongbuhai shnong ban pyntreikam shisyndon ia ka ain jong ki (Shariah law) ha kine ki ri Iurop katba ki nang ia roi bad ioh bor na kawei ka por sha kawei pat.

Kaba phylla pat ka long ba kine ki briew kiba leit buhai shnong sha kine ki ri Iurop ki leit sha kine ki ri namar ka daw jong ka jingshah pynshitom ha la ka jong ka ri bad kham bunsien ka dei ruh na ka daw jong ka jingpyntreikam ia ka ain jong ki (shariah law) kaba pynlong ia ki ban poi buhai shnong sha kiwei pat ki ri; bad kaba kham phylla shuh shuh pat ka long haba ki wan ban buhai shnong sha kine ki ri Iurop kiba long ki riew kiba laitluid, hynrei hadien ba ki la ioh ia ka jaka baskhem ki sdang pyrshang ban pyntreikam pynban ia ki ain jong ki (shariah law) ha kine ki ri Iurop kaba long kawei na ki daw kaba pynlong ia ki ban phet na la ka jong ka ri.

U David Cameron jong ka ri England, u Nicholas Sarkozy jong ka ri France bad ka Angela Merkel jong ka ri Germany ki kubur ba ki la bakla ban pdiang ia kine ki briew sha ka ri jong ki kaba khlem pud bad kiba kham bun napdeng jong kine ki nongwan buhai shnong ki dei na ki ri Muslim bad ki lap ruh ba kine ki briew ki long shisha kiba eh ban bud ia ka rukom pyniaid kiba don ha ka imlang sahlang. Ka long ruh ka kabu kaba khraw ia kine ki nongbuhai shnong sha ki ri Iurop namar haba ki poi sha kine ki ri ki ioh ei lut naduh ka iing ban sah, ka dawai dashin, ka bam ka dih haduh ka pule puthi bad ki trai shnong pat mynta ki don hapdeng ka jingshitom ban ioh ia ka jingmyntoi kaba ki dei hok ban ioh namar ba dei ma ki, ki trai shnong kiba siew khajna. Hynrei lada ki kren pyrshah ia kine kiei kiei baroh ki kylla long pynban ki nongshun bad ki khot ia ki, ki “racist” bad ki lah ban hap ha ka jinghshah pynshitom.

Ka long da shisha kaba sngewsih haba ki nongialam ha ka jaka ban iada ia la ka jong ka jaidbynriew, hynrei tang namar ka vote ki die pynban ia la ka jong ka jaidbynriew. Mynta ki briew kiba hap hapoh ka European Union ki la shu ia ang bad peit jawdud ia ka ri Poland namar dei tang ka ri Poland ka bym shym la pdiang wat tang uwei ruh u nongbuhai shnong na kine ki ri Muslim. Ka ri Poland ka kren pyrshah peit peit ia ka jinglong kylluid jong ka European Union watla ka dei kawei na ki dkhot jong ka European Union ruh. Bad dei namar kane ka daw ba ka European Union ka buh ia ka jingpyrkhing halor ka ri Poland ha ki katto kane ki bynta. Hynrei ha kaba kut pat ka long ka jingjop ia ka ri Poland ban iohi ia ka jingsuk bad ka jingshngain ha la ka jong ka ri. Ka ri Poland ka sngewthuh ia kaei kaba ka ieng namar ka la mad bad iaid lyngba ia ka jingdum kaba khraw tam ha ka thma bah kaba ar bad kaba baroh ngi tip bha ia kaei kaba jia ha Auschwitz, kaba hynriew million ki Jiw ki shah pyniap ha ka hukum jong u Hitler bad hadien ka jingsynshar jong u Stalin kaba la pyniap da ki phew hajar ngut ki nong Poland.
Hato katno ngi long kiba iapher na ki? Ngi long tang shitroh napdeng ki jaidbynriew kiba bun hapoh ka ri India bad lada kam don kano kano ka ain kaba lah ban treikam ban tehlakam ia ki briew kiba na bar kata mut ka la nang shem jingeh katba ngi dang iaid shakhmat.

Hooid nga lah ban ong ba, baroh ki Niam bad ki jingngeit bad ki jaidbynriew bapher bapher jong kane ka pyrthei ki don la ka jong ka jingthmu bad ngi dei ba long kiba husiar ban ioh jinghikai na kaei kaba ngi iohi ia kaba la leit bad ia kaba mynta bad ka jingbynsuidniew ia ka, ka pynlong ia ngi ban pynbud ia kajuh ka jingbakla.
Phi iohi lada ngi ki briew ngi pyrkhat ba ngi kham nang bad kham stad ban ia U Blei bad ia ka Ktien jong U, te ka la long lypa ka jingma. Haba U Blei U thaw ia ka pyrthei, U buh ruh ia ka kyndon khnang ba ka um kan ym ryngkang na ka hukum jong U (Pro 8:29). Haba U pyni ia u Abraham ia ka jaka kaba U mut ban ai ia u bad ka pateng jong u, U Blei U buh ruh ia ki kyndon ryngkat bad ka bynta khappud (boundary) kaba mut ba u Abraham bad ki pateng jong u ka Israel kam dei ban tam ia ka khappud kaba U Blei U la ai (Jen 15:18). Namar ka ri bad ka jaidbynriew (nation) ka dei ka jingmut kaba wan na U Blei, hynrei ka jingsynshar kaba khlem pud khlem sam ne kaba tam ia u pud u sam ba la buh ka dei kaba wan na u Bymman (Empire). U Blei U ai ia ki ri bad ki jaidbynriew ia la ka jong ka bynta ban synshar bad kaba kwah rhah na kaei kaba la bynta ka wanrah ia ka jingjot jingpra bad ka jingsngewsih. Ngam donkam ban pynshisha ia kata ka, hynrei ka histori hi ka pynpaw ia ka sakhi.
Kaei kaba nga kwah ban ong ka long, ka ri bad ka jaidbynriew jong ngi ka long ka ri kaba la shon muhor da U Blei. Haba ka long kumta ka long kaba donkam ia ngi ban iakhun ia la u jong u pud u sam ban pynsah ia la ka jong ka ri bad ka jaidbynriew. Ka ri Israel ka hap ban iakhun tyngeh ban ioh bad pynskhem ia la ka jong ka ri bad bun ki Khristan napdeng jong ngi ngi peit ia kane ka ri kum ka ri kaba kyntang bad ngi kren shaphang ka jinglah jong kane ka ri la i kumba ba lada ka ri Israel ka khlain bad ka kiew ha ka ioh ka kot ngi ruh ngi long kiba khlain bad kiba kiew ryngkat bad ki. Ngi shu ia mutdur ia kaei kaei kabym lah ban long suda. Ngi donkam ban iit ialade bad ioh jinghikai kumno ban tei ia kane ka jaidbynriew kaba kyrpang jong ngi ba kan long kaba skhem bad kaba khlain naduh kaba hapoh bad shaduh kaba shabar. Ngim don da kawei pat ka jaka ban buhai shnong, kane ka long ka jaka kaba ngi hap ban iakhun tyngeh ban pynsah lada ym dei na ka bynta jong ngi, hynrei na ka bynta jong ki hep kiba rit kiban dang wan.

Ngi la khmihlynti ia ki nongialam jong ngi ban pynbeit ia u pud u sam bad ban pyntreikam ia ka ILP la bun bun snem, hynrei kam i poi shano shano ruh. Balei ka long kaba eh ia ki nongialam Khasi jong ngi ban iakhun ban pyntreikam ia ka ILP bad pynbeit ia u pud u sam haduh mynta? Ka lah ban long tharai, lada ki pyntreikam ia ka ILP ka ioh ka kot ka nang hiar nang hiar bad ka lah ruh ban dei na bynta ka vote? Hato kaei kaba kham kordor ka ioh ka kot, ka vote ne ka ri bad ka jaidbynriew? Ne ka jingbym lah ban pynpeit ia u pud u sam ka long ka eh namar ngim don kot don sla bad ka sorkar Assam kan nang leh katba mon namar ka biang lut ia ki kot ki sla? Namarkata ki hap ban shu ap haduh 50 ne 100 snem ia ka sorkar Assam ban iakren hadien ba ka lah ban pyllait por. Kaba mut hadien ba ka ioh ban klun bad pynsah bad pyndap lut da ki nongwei kibym dei ki nong Assam ha ki jaka khappud kan sa shong ban iakren halor ka issue khappud.

Ka jaidbynriew jong ngi ka donkam ia ka jingithuhpaw bad ngi donkam ruh ban pyrkhat janai halor kine kiei kiei baroh bad ym tang ban pyrkhat hynrei ban pyrshang ban leh eiei ruh halor kine ki bynta. Kam dei shuh ka por ia ngi ban ia kdew kti iwei ia iwei, hynrei ban pynleit jingmut kumno ban trei shitom bad pynsgewthuh ia iwei pa iwei khnang ba ngi lah ban iohi ia ka jingsynshar kaba don ia ka jingkitkhlieh ia ka ban pynurlong ia ki jingeh kaba ka ri bad ka jaidbynriew jong ngi ka mad.
Kaba sngewtynnad ban pyrkhat shaphang ka jingsynshar laitluid ne jingsynshar paidbah ka ba U Blei U la ai ha ngi kum ka ri bad ka jaidbynriew ka long ba, ka bor ka shong ha ngi ki paidbah, ngi ki paidbah ngi shim ia ka rai ia ka ban pynbha ne pynjot ia la ka jaidbynriew na kawei por sha kawei por. Ka jaidbynriew jong ngi ka la iohi shibun bad ka dang ap khmih lynti ia ki nongialam kiba lah ban iaid ryngkat ban pynurlong ia ka jingthrang jong ki.
Khadduh khadwai ka histori kaba kumno ngin pynsah bad ngin ai ia ka lawei kaban dang wan? Hato kin iaroh ne kin tim ia ka jingleh jong ngi?

Nongpoh: Ha kawei ka jingjia pluhiing kaba la jia hynne dang step phyrngab ha shnong Baridua, Ri Bhoi, ha kaba kawei ka Kudam kaba buh ia shibun ki jait marbam, ka la kem ding bad pluh kynsan bad kaba la wanrah ruh ia ka jingjulor kaba la kot sha ki klur tyngka.

La ioh jingtip ba katei ka jingjia, ka la jia hynne ka step ha ka por 3 baje ei ei mynstep, ha kaba khlem da tip ia ka daw, katei ka Kudam ka la shu kem ding bad pluh kynsan kynsan bad baroh ki tiar kiba don ha katei ka dukan ki la julor lut.

Haba ioh ban iakren bad ki briew kiba long kum ki nongpeit ia katei ka Kudam, ki la iathuh ba ia ka daw jong ka jingpluh katei ka Kudam kim lah ban batai, namar ba ka la shu kem ding kynsan kynsan, hynrei ki la shu suba ba la lah ban dei na ka jingkem ding na ki phliah ding duma bad sikret.

La iathuh ruh, ba katei ka Kudam ka buh ia shibun ki jait marbam, kaba kynthup naduh u Khaw, u Dai, ka Umphniang bam, ki Refine, Atta, Moida lem bad kiwei kiwei, ki la ingkhong khait bad kylla dpei, namar ba ki la shah bamduh ha katei ka ding kaba shyrkhei.

La iathuh ruh, ba halor kateii ka jingjia, ki la don haduh 15 tylli ki kali pynlip ding na Assam bad 2 tylli na Meghalaya, kiba la wan ban pynlip ia katei ka iing bad kiba la lah ruh ban pynlip ia katei ka ding kaba la klang shyrkhei bha, namar jin lada kham slem ki kali pynlip ding, katei ka ding ka lah ban pur sha kiwei pat ki iing kim ba don marjan bad katei ka kudam.

Ha katei ka jingjia, watla ka la wanrah ia ka jingduhnong kaba shyrkhei bha, hynrei donbok pat ym shem la don ki briew kiba mynsaw, na katei ka jingpluh jong katei ka Kudam buh marbam.

Riki Mukhim

Ka khuid ka Suba ka dei ka bynta ka jingim ka dawai bah dawai san hakaba iadei bad ka jingkoit jingkhiah haka jingim jongngi ki briew namar lada ngim nang ban lehkhuid ngi lah ban ioh shibun jait ki jingpang khyllah ki ba buh jingma iangi ki briew.

kumba la iohi hakine ki sngi mynta, ngi ki briew ngi nang ban lehkhuid tang hala iing lade hynrei shabar ka phyllaw iing pat, ngi long pynban ki nonglehsih nong pynjakhlia iaka Mei Mariang namar kat kum ka jingshisha ym lah ban len iakata naba jan baroh ki rud surok bad ki lum ki wah ladap tang daki jakhlia suda bad ki plastic, bilor plastic ba har rukom.

Haba puson bha Mano ba pynkhlia bad Bret jaboh kulmar, hato ym dei manga maphi?

Myntoi aiu ban leh khuid tang ha phyllaw iing lajong haba la ker sawdong daki jakhlia suda.

Hato ngi ju pyrkhat ne em kumno ban leh ban iada ban ioh ban ring Mynsiem daka lyer ba paka kaba khuid ba suba bad ka umbam umdih kaba khuid.

Ka Jingjaboh ka Mei Mariang bala leh da u khun bynriew kala buh jingma iaka jingim ba man ka sngi namar ki tyllong um bad ka lyer bangi ring Mynsiem haba ia nujor bad ki por ki kmie tymmen pa tymmen jongngi bad kane ka juk mynta ka iapher bak lybak namar hakine ki sngi ba mynta katba dang stad u briew katta ka jingjakhlia ka nang jur. Myntoi aiu ban ioh iaka jingstad haba ngim lah ban pyntrei kam hok iaka? Namar kata kat kum ka juk pyrthei stad mynta, ngi dei ban pyntreikam hok iala ka jingstad jingshempheng khnang ban lah ban pyllong iaka Mei Mariang kaba khuid ba suba lym kumta kam don jingmut iangi ban wad jingstad kylleng pyrthei katba ki jingmut jingpyrkhat jongngi pat ki dang iai sah dum hajuh shi hajuh.

Haba wad tynrai iaka daw ka nangiai kiew ka jingjaboh ka Mei Mariang kadei na ngi ki nongshong shnong hi namar ba ngim kitkhia iaka imlang sahlang ban pyllong iaka shnong ka thaw ban pyllong iaki sawdong sawkuin ka Mei Mariang ban leh khuid.

Hakawei pat ka liang haba wad tynrai iaka daw dei halor ka nongrim ba duna palat ki Dustbin bret niuh la ha Nongkyndong ne nongsor ruh kumjuh.

Kane ka pyni lehse ka lah ban long naka jingtlot ki bor aiñ shnong ne aiñ sorkar ruh kumjuh.

Kumta kumba la jied u Paidbah iaki nongmih Khmat daka jing kyrshan u Paidbah ban leit mihkhmat ban shna iaki aiñ ki ki rule ban wanrah iaka miat ka bha haka imlang sah lang bad hakane ka por, la sngewdei ban kyntu jur iaki nongmih khmat ban pynkhlaiñ ne thaw thymmai daki aiñ kiba don bniat ban teh lakam khnang ban wanrah iaka khuid ka suba haka imlang sah lang bad ha baroh ki sawdong sawkuiñ ka Mei Mariang. Kumjuh ruh la sngewdei artad ban iai kyntu iaki nongmihkhmat ban iai synniang da ki Dustbin sha ki shnong ki thaw sha ki Dong ki kyntoit shnong bad Kumjuh ruh ban pynbiang iaki jaka theh niut haka rukom kaba dei khnang ba kan ym ktah iaka koit ka khiah haka jingim ba man laka sngi.

Shillong: Ka North East Roller Sports Association ka lah pynlong ia ka North East speed skating championship ha Dispur roller skating rink ka lah kut noh ha ka 31 tarik u Nailar ha ryngkat ka jingiadon lang u President ka North East Roller Sports Association u Pawan Kapoor, General Secretary u Bhumidhar Barman bad u Joint Secretary (uba dei ruh Head coach ka Meghalaya Roller Skating) u Bah Suklang Dkhar.

Na ka jylla Meghalaya, u Paominlun gangte (under 10), Lame-Naphrang Mawroh (under 8), Elanson I. Minsil (under 10) bad I Jasmine Lamare (under 12) ki la iashim bynta ha Kane ka lympung. Napdeng kine, I Jasmine Lamare na ka skul Little Angle Higher Secretary school I lah ioh ia ka kyrdan ba 3 ha kane ka jngialehkai.

[ba bteng]

Ban pynduh iakane ka jingmlien ban kren khlem da pyrkhat shuwa, nyngkong eh phi hap ban pdiang ia ka jingshisha kata ka shong haphi kumno phin tehlakam ia u thylliej jong phi. Phin hap ban bahkhlieh naka bynta kaei kaba mih naka shyntur jongphi haba phi kren. Sa kawei pat, phi dei ban minot bha ban hikai kumno ban tyngkai iaka shyntur jongphi shuwa ba phin plie iaka. Lada phi don iakane ka jingeh kamut phi ialeh pyrshah iaki briew bad ia kiei kiei kiba don sawdong jongphi daka jing kren tohmet jongphi.Hynrei lada phi pyrkhat shuwa kamut phi pyni iaka nuksa babha bad phi aipor ialade ban jied iakiei phi donkam ban kren bad hakano kapor. Ka balai pat phi dei ban kren ne ong tang ia kawei kaba phi thmu ban ong. Kalong kaba jynjar hynrei phi hap kylli shuwa nalade ruh lada phi sngew iahap ban leh iakane. Kalong kaba suk ban shu kren tohmet bad panmap pat hynrei phim sngewthuh baphi lah dep pynmong iakiwei. Baroh kine ki jia namar ba phi jaituh ban pyrkhat shuwa. Ban panmap iakaba phi lah kren bakla ka don jingmut tang lada phi pyn kylla iaka rukom pyrkhat jongphi. Ka Dr Shirley Vandersteen ka riew shemphang na ri sepngi ka ong ‘ka ktien kalong thik u khnam, shisien baphi lah pyllait kin ym wan phai shuh’. Namarkata shuwa phin kren eiei pyrkhat bha ioh ka lah ban pynmong ia kiwei. Hangne kidon katto katne ki jingai jingmut kumno ban kren ban ym pynmong iakiwei bad ban kiar naki jing kren sniew:

1. Wat nym kren palat – Ban kren tam iakaba dei ban kren ka dei ka dak jong ka jingkyiuh lane ka jing kren bieij. Shuwa phin ong eiei sngapthuh iaka jing kren jong kiwei, kaei ki kylli bad sa pyrkhat nalade ‘hato kadei kaba shisha’, ‘ Kadei kaba bha’ lane Ka long kaba donkam ne em?. Jubab tang iakaba dei ban jubab. Wat nym kyllain namar kalah ban pynjlep noh iakiwei. 2. Kiar nakaba kren sniew – Ki ktien sniew ne ki ktien bymsngewtynnad ki pynduh jingkyrmen shikatdei eh. Bun nakine ki jing kren ki mih naki jinglorni suda, kilah ban dei shaphang ki paralok jongphi ne shaphang ki jing jia ka pyrthei. Ban lait naki jinglorni phi lah ban kren shaphang kiei kiei kiba bha kiba phi iohi ne Shem. Lada phi donkam ban kdew ia kiei kiei ki bymsngewtynnad, pyndonkam daka buit ne jing stad jong phi lyngba ki ktien jemnud. Wad ia kiei kiei ki jingshisha kiba phi lah ban thew pyrshah iaka jingthok bad ialeh ban kren lyngkot ia kum kine katba phi lah.

Ym dang bteng

Kolkata: U Himanta Biswa Sarma, u myntri ka sorkar Assam, ula pynpaw ba ka sorkar India, kan iakren bad ka Bangladesh, ba kan shim noh ia kito ki briew, kiba la shah khein mynder ri, katba kum ka jingkhein jong ka National Register of Citizen.

Halor katei u myntri kam poh iing ka Bangladesh, U Asaduzzaman Khan, ula kam ba um ioh jingtip satia ban don mano mano ban leit rung sha India, hadien u snem 1971.
Haba kren sha ka new channel News 18 na Dhaka, u myntri ka Bangladesh, ula kren shai, da kaba ong “Ka sobjek jong ka NRC, ka dei beit ka kam poh iing jong ka India”. Ha ka jingkren jong U Khan, u ong ba kitei kiba leit poi sha Bangladesh, ki la ban dei ki Bengali, kiba wan na kiwei ki bynta jong ka India ban shong ban sah ha Assam, tangba kim dei kiba na Bangladesh.

New Delhi: U Manmohan Singh, myntri rangbah duh barim ka India, ula ther tyngeh mynta ka sngi, ia kane ka sorkar jong U Narendra Modi, ha kaba ula kynnoh ba ki la bakla lut nadong shadong bad ka la mih ka jinghiar kaba jubor jong ka ioh ka kot ha ka Ri. U Manmohan, ula kam ba ka jinghiar ka ioh ka kot, ka dei kaba pyndiaw mynsiem shi katdei, wat la ka don ka lad ban kyntiew stet bha shajrong.

“Ka jinghiar ka ioh ka kot, ka dei kaba pyndiaw mynsiem shi katdei bad kane ka quarter ba ladep jong ka GDP, ka hiar sha ka 5 percent, kaba pyni ba ngi don hapdeng ka jinghiar kaba shim por bha”ong U Singh.

“Ki samla, ki nongrep bad ki nongri jingri, ki nongtrei kam lajong bad ki nong bylla sngi ki dei ban ioh ia ka jingim kaba kham bha. Ka India, kam lah ban iai bteng ha kane ka rukom. Nga pynsngew sha ka sorkar, ba kan buh noh sharud ia ka jingiapher sain pyrthei, hynrei kan leit sha ki riew shemphang, ban pynkhie im biang ia kane ka kutlad kaba khraw” ula ong shuh shuh.
Ha kawei pat ka phang, U Dr Manmohan Singh, u la ong ba ka ioh ka kot kam pat khie im satia, hadien ka jingleh thawnang na ka jing pynduh pisa bad ka jing pyntrei kam kyrkieh ia ka GST.

Guwahati: Ki pulit ka Assam ki la ioh ban sei ia ka met jong kawei ka khynnah samla kaba kyrteng ka Namera Sangma ka ba dei na Rongjeng,Danal Southwest Garo Hills District na ka wah Hagrapara,Assam.

Kat kum ki khubor ba la ioh lum la ia thuh ba ka Namera Sangma ryngkat bad ki arngut ki longkmie ha ka 30 tarik u nailar, ki la leit sha ka wah Hagrapara ban leit tong doh shamuk (snail).hynrei kumba 4:45 baje eiei kyndit kane ka khynnah samla ka la shah rong noh ha ka um.

Dei haduh ka 31tarik u nailar kumba 5:15 eiei ba ki pulit ka Assam ki la ioh ban sei ia ka met jong ka.

Ia ka met jong ka Namera la pynkit noh da ki pulit ban leh ia ka post mortem ki bahaing hasem jong ka ruh ki la poi na Rongjeng ban shimti ia ka met jong ka.

Shillong: Ka Executive cum zonal meeting jong ka KJDSTA bad GHDSTA, kaba la long ha ka 31tarik Nailar 2019, ha Shillon ka la shim da kawei sur ban pynpaw ka jingsngewsih(dark teachers’day) halor ka sngi ba khraw ki nonghikai kaba ju long man la u snem ha ka 5tarik U Nailur 2019 bad kum ka dak ka jingsngewsih, ki nonghikai skul hapoh ka lama jong ka KJDSTA bad GHDSTEA, kin pynlong ka jingia deng lama iong ha baroh kawei ka Jylla, kum ka dak ban pynpaw ia ka jinglong kuman bad jingbym khein step ka sorkar ia ki jingdawa bad jingeh ba nonghikai ki ju ia kynduh bad shem jynjar naduh mynshwa haduh mynta.

Ki jingdawa ba kongsan jong ki nonghikai ki long ban ai bai bam tymmen lem ia ki hadien ba ki lah shong thait(pension benefits scheme), ka jingsiew tulop noh manla u bnai ha ka jaka shisien 3/4 bnai, ki jingmyntoi kum ka ACPS,New pension scheme,uniform leave kum ka maternity leave, ka limit jong ka DCRG kaba long 10 lak, medical re-embursement etc.

Ia kine baroh lah dep recommend da ka Megh Fifth Pay Commission bad lah dep mynjur ruh da ka Cabinet ban pyntreikam lang kumjuh solonsar ia ki nonghikai deficit naduh u snem 2018, hynrei haduh mynta,ka sorkar ka shu pyntreikam tang da kaba shu siew ne kyntiew tang ia ka tulop khlem pat pyntreikam satia ia kiwei kiwei benefits katkum ka jingmynjur jong katei ka 5th pay commission. Hynrei, kaba kham hakhmat eh ba kin deng lama iong ha katei ka sngi ki nonghikai, ka dei ka jingbym lah ka sorkar ban pyllait ia ka 2nd installment jong ka arrear jong ka revised pay shwa ka teachers’day kumba la iai pynkynmaw bad iai dawa man la ka por, lyngba u Director of school Education and Literacy(DSEL)bad khadduh eh ha u Chief minister ha ka 14tarik Nailar 2019, hynrei haduh mynta ym i don dak ei ei bad ka sorkar kam patiaw bad kam khein snep satia ia kane ka jingdawa(immediate demand)jong ki nonghikai skul.

Kumta la bthah ia baroh ki nonghikai non-govt/deficit naduh ka kyrdan primary haduh ka kyrdan Hr sec level ba kin ia mih ryntih da kaba deng lama iong ha kaba leit sha ki jingialang bapher, la ki dei hapoh skul la jong bad khamtam eh ban ia leit ryntih ruh sha kino kino jingialang, ki ban long ha ki District ne Sub Division headquater ha ryngkat ki jingdeng lama iong ban pyni ia ka jinglong ba sngewsih jong ki nonghikai ha katei ka sngi, ong ka kyrwoh na U Babu Kular Khongjirem, President KJDSTA, Shillong.

Shillong: San ngut ki briew ki la duh ei ia la ka jingim bad 18 ngut, ki la mynsaw ha ka jinghap ka Sumo shapoh riat ha Tyngnger.

Kane ka jingjia ka ba sngewsih ka la jia ha ka por kumba 7baje mynstep ha kaba ka sumo kaba la thmu ban kiew sha Shillong ka la kylla noh ha Tyngnger ka ba don ha ka thain Mawsynram.

Ia ki ba la mynsaw ha kane ka jingjia ki la pynkit noh sha ka Mawsynram PHC ban ioh ia ka jingsumar ka ba ki donkam.

Ha ka jingiakren bad U SP City, East Khasi Hills District, Bah Stephan Rynjah, u iathuh ba kiba iap ki dei lai ngut ki kynthei bad uwei u khynnah shynrang, uba dang 12 snem. Ka jinghap ka kali, ka dei mar ia mih hi na shnong, ha kaba ka hap ha ka jingjylliew kaba kumba 100 phut eiei.

Ka jingtip ba dang shu ioh, ka iathuh ba ki don haduh 5 ngut ki briew ki la duh ei ia ka jing im bad kumba 18 ngut kiwei pat ki la mynsaw ha ka jinghap ka kali Sumo, ka ba mih na ka shnong Dewsaw bad thmu ban kiew sha Shillong, ha kaba ka Sumo ka la hap noh shariat ha ka shnong Tynger ka ba don sha rum ka Mawsynram.

Kiba la khlad ha kane ka jingjia ki long kong Nancy Laithma 38 snem, Aitidabon Jeengaph 70 snem, Sillamery Katrai 52 snem,u Hawanpynshalilang Laithma 12 snem.Kine baroh ki dei na ka shnong Dewsaw bad Bisilo Rodborne 37 snem na ka shnong Tynger.