Shillong: Ki lad khubor ba dang shu ioh lum ki iathuh ba kin don phra ngut ki MDC, ki ban pyn iasoh ialade sha ka seng BJP lashai ka sngi.

Kitei ki MDC, ki kynthup ia 4ngut na ka seng UDP bad nangta sa 4 ngut na ka seng Congress.

Kitei ki saw ngut, ki kynthup ia u lamphang ka dorbar JHADC U Ma Lakhon Biam, U Ma Dawan Lyngdoh, Krison Langstang bad U ma Treilang Suchiang, kiba dei ki dkhot jong ka seng UDP.

Na ka seng Congress, ki long U Ma Andrew Shullai, uba dei U CEM barim ka JHADC, nangta U Ma Arbor Hima Darnei, Holando Lamin bad U Ma Ai borlang Shadap.

Mawkyrwat: Kumba ju long man la u snem ka Maharam Govt Higher Secondary School, Mawkyrwat ha une u snem 2019 ruh ka la pynlong ia ka lympung iakob pynisap ne ka Talent Fest ha ka 28 bad 29tarik mynta u bnai da ka jingthmu ban pynlong ia ki khynnah skul ban don ka mynsiem kaba shlur ha ka jingiaid lynti kum ki samla pule bad ruh ban lait na ka jinglehrain hadien habud ban leit sha ki interview bapher bapher ha ki jingpule kiba kham shajrong bad ruh ha ka wad kam wad jam.

Ha kane ka jingiakob pynisap ki khynnah skul ki la iashim bynta shitrhem ban long ki nongjop ha ki sap bapher bapher.

Katto katne na ki nongjop ha ka kyrdan ba nyngkong ha ki sap bapher bapher ki long Salad Arrangement :Naphisuklin Lyngdoh, Flower Arrangement :Kmenhunshisha K. Wanniang, Sketching :Pyndapborlang Tongwah, Drawing :Banrilaakor Wanniang, Painting :Ninestar Thongni, Slogan Writing :Banshemjingkmen Shangdiar, Quiz :Sevenstar Shangdiar bad Bryan Lewis Jyrwa, Dancing (Junior) : Yellow House, Spelling Bee Savelyness Iawphniaw (Senior) bad Madonna Nongsieij (Junior), Singing :Yellow House (Senior) bad Kandarilang Iawphniaw & Philawanpli Jyrwa (Duet -Junior), Debate :Mirable Blah, Essay :Sunita Lyngdoh, Fancy Dress :Deimaya Lyngdoh, Skit :Yellow House, Extempore Speech :Banteidor Sohshang.

Ia ka nam lahduh napdeng ki khynnah kynthei bad shynrang kiba tbit tam ne Most Talented Girl la iohrah da i Mirable Blah bad Most Talented Boy da u Ninestar Thongni. La sam ia ki khusnam sha ki nongjop bapher bapher da u Babu P.Wanniang i /c Principal ka skul ha ryngkat ki nonghikai.

Ka North East Speed Skating Championship kaba la pyniaid da ka North East Roller Sport Association kan sa long ha ka 31 tarik u August 2019 ha jylla Assam, Dispur Roller Skating Rink kaba kynthup lang kynthei bad shynrang hapoh ka rta 8, 10, bad 12 snem.

Ka jylla Meghalaya kan sa iashimbynta ha kane ka lympung bad ki players kiba la shah jied na ka liang jong ka Meghalaya Roller Skating bad Meghalaya Roll Ball Association ki long harum;

1. Jasmine Lamare na Little Angle Higher Secondary School, Lapalang, Shillong, hapoh ka rta 12 snem.
2. Elanson I. Mihsil na Nora Evalyn Higher Secondary School, Qualapatty, Shillong, hapoh ka rta 10 snem.
3. Paominlun Gangte na St. Thomas Higher secondary School, Rynjah, Shillong, hapoh ka rta 10 snem.
4. Lam-me-Naphrang Mawroh na Mrs N. Hill’s Tiny Tots’ East Ville School, Shillong, hapoh ka rta 8 snem.
5. Head Coach i Suklang Dkhar.
6. Assistant Coach i Caldysteward Nongsiang.

Shillong, 30 Nailar: Ha kawei ka jingjia ba sngewsih kaba la jia ha ka shnong Rtiang ha Ri Bhoi, ha kaba haduh lai ngut ki mynsiem briew kiba kynthup ia kawei ka Longkmie, uwei Rangbah, bad uwei u samla shynrang, ki la duh noh, hadien ba ki la shah bom ha Pyrthat uba la ther kynsan hynnin ka sngi ha ka por 3:42 baje ei ei janmiet ha katei ka shnong.

                Ka jingtip kaba la iohlum da u Nongthohkhubor, la iathuh ba kitei ki lai ngut kiba la khlad noh, ki dei kiba la tip kyrteng kum ka Kong Hirdalit Kurbah (40) u Bah Ronstar Rympeit (33) bad utei u samla ba dang 18 snem la tip kyrteng kum u Stomdar Kurbah, ha kaba ki la khlad noh hadien ba ki la shah tied u Pyrthat ha ka por ba ki dang don ha sem Syiar, kata ha ka por ba ki dang bunkam ha sem Syiar, namar ki dang sei ia ki Syiar na katei ka sem ban thep sha kali.

                La ioh jingtip ruh ba katei ka jingjia, ki la don sa arngut kiwei pat kiba la mynsaw jur na katei ka jingbom Pyrthat, namar ba ki don ha iing kaba don marsyndah bad katei ka sem syiar, ha kaba kitei ki arngut ki dang don hapdeng ka jingshah sumar.

                Haba pyrshang ban kylli na ki briew jong katei ka shnong, la iathuh ha ka por ba tied utei Pyrthat, ka dei ka por mar ia rang u Slap, ha kaba khlem poi pyrthat u la tied kynsan beit jrain, tad haduh ba kitei kiba la khlad noh ki la shu thiah beit khop ha katei ka sem Syiar.

                Tang mar ia jia katei ka jingshah pom pyrthat ia kitei ki lai ngut, ki briew ha katei ka shnong kim shym la leit ban ktah ia ki, namar ki don ia kata ka jingngeit kaba ia ki nongshah pom pyrthat ym lang ban leit ktah, hynrei dei ban ap beit ia ki haduh ba kin sa kyndit hi, pynban katei ka jingiai ap jong kam shym la poi shano shano ruh, namar hadien ba ki la ap haduh 6 lane 7 kynta ei ei, kata hadien ba la poi shaduh 11, 12 baje mynmiet kim shym la kyndit bad kaba la pynlong ia ki briew ha katei ka shnong ba ki rah noh sha ka jaka sumar kaba don ha Umsning, hynrei ynda la poi sha jaka sumar, ki Doktor ki la pynbna ba kitei ki lai ngut ki la khlad noh.   

Mawryngkneng: Ki paidbah nong shnong shnong jong ka shnong Mawryngkneng ki kwah ba ka MeECL ka dei ban pyndep noh ia ka jingtei ia ka Power Sub Station 33.11 Kilowatt ia kaba la sdang ban pyntrei hapoh katei ka shnong ha u snem 2017 ia kaba la pynsah khoreng haduh kine ki sngi khlem pat pyndep.

U Bah Peter J Lawai sordar jong ka shnong Mawryngkneng pyllun haba ialam ia ki lad pathai khubor sha ka jaka ba la shna ia ka Power Sub Station 33.11 Kw, u la iathuh ba na ka liang jong ka shnong baroh kawei kala pan na ka sorkar ban pynkhlain ia ka bor ding ilektrik hapoh katei ka shnong.

La iathuh ba ha ki snem kiba la dep ia ka bor ding hapoh jong katei ka shnong la shim na lad Nongkrem bad Laitkor bad haba ka don ka jingthut ha kitei ki jaka ka shnong Mawryngkneng ruh ka thut lang ban pynkhlain ia ka bor ding ka MeECL kala pdiang ban bud ia ka Power Sub Station ha Mawryngkneng.

U Sordar shnong u la iathuh ba ia kane ka skhim la shna lyngba ka jingbei pisa jong ka Asian Development Bank bad na ka liang jong ka MeECL kala aiti sha ka Power Grid ban shna ia kaneka Power Sub Station, ia ka jingtrei la sdang ha u snem 2017 bad ka kam kala iaid haduh shiteng jong u snem 2018.

Kaei kaba pynlyngoh ka long ba naduh shiteng jong u snem 2018 haduh mynta kane ka jingtrei kala sah khongreng haduh mynta bad u Bah Lawai u la ong ba u la ia kren ia ki bor ba dei peit ia ka jingtrei hynrei kaei kaba ki jubab ka long ba kin sa sdang noh shen ban pyntrei ia ka.

U bah Lawai u la ong ba ka jingring light jong ki briew hapoh ka shnong Mawryngkneng kala kot sha ka 800 tylli ki tnum iing bad da ka jingwan ka skhim ba duk kala pynbun shuh shuh ia ka jingpyndon kam ki paidbah ia ka light hapoh shnong, na ka liang jong ka shnong ka kyntu ia ka MeECL ba kan pyndep noh ia kane ka jingtrei na ka bynta ka jingmyntoi jong ki paidbah ka shnong.

Khana babteng

U Bahdeng u kdup iaka ha la shadem bad u kyndeh tuk tuk ka mynsiem, u kiew khluit tar ka met. Kumjuh ka Lanosha ka nang ksoh skhem trait ha ka met u baieid khop kum kaba la aiti lut ha u.

Haba um sngew lah shah shuh, ka jingkiew khluit jong u, hang ta u pasiaw ha la ka baieid..

“Ngin leit thiah noh…. Ialam ia….” U la doh artat iaka

Ka Lanosha ka ieng joit na ba shong bad ka tan na ka kti jong u sha la jingthiah. Hang ta ha ka jingshlei miar ka jingieid ki la jngi ha ka thwei bajylliew tam ban theh la ka jingieid bajanai hang ta.

“Mynta ngi la ia long kawei ka doh…. ” La pynbna hi u Bahdeng

“Lano phi dei ka Hima jong nga ngan synshar halor jongphi…” La ong biang u Bahdeng

“Kat no ka jingsngew hun shisha pleng….. Baroh shi katta nga shu mutdur mynta te nga la ioh shisha…” La ong biang u Bahdeng

Ka Lanosha pat hadien ba la dep ka kam ka la ud ia lade na mar ka jingmynsaw ha ka met ba la pynmong u baieid.

“Bahdeng ni nga te la pang palat…. Namar ngam pat ju mlien…” Ka la iathuh ha u

“Lano ai jaka thiah noh ianga hawei pat.. Ioh kin ong kumno kumno ha iing jongphi…” La ong u Bahdeng

“Em wat sheptieng ym lei lei.. Thiah beit hangne la sngewthuh hi ma nga…” La phai ktien ka Lanosha bad ka kdup bha ia u khop

U Bahdeng ruh haba la ioh ka jingpyntngen na ka baieid kumta u hun noh kumta hi ban thiah beit ha ban da step.

Dang step phyrngab baroh ar ngut ki la ia khi. Haba la khie baroh ha iing bad hadien ba la dep bam dep dih u Bahdeng u sa mih nangta. [yn dang bteng]

New Delhi: Ka sorkar U Narendra Modi, mynta ka sngi, ka la rai ban pyn iasoh ia ka Oriental Bank of Commerce (OBC) bad ka United Bank of India (UBI) ha kaba kin ia soh lang noh kawei sha ka Punjab National Bank (PNB).

Ym tang katta, la rai ban pyniasoh ia ka Syndicate Bank sha ka Canara Bank, katba ka Andhra Bank bad ka Corporation Bank, kin iasnoh noh sha ka Union Bank of India.
Nangta ka Indian Bank, kan iasoh noh bad ka Allahabad Bank.

New Delhi: Ki nongtrei jong ki Bank bapher, ki la rai ban pynlong ia ka jing ia khih lashai ka Sngi Saitjain, ong U Debasish Basu Chaudhury, general secretary ka Bank Employees Federation of India (BEFI) ban pyrshah halor ka jing pynmih ia ki Bank kiba heh bad ban pynduh lut khoit ia ki Bank kiba rit. U Choudhury, u ong ba ki dei kine ki Bank kiba rit, kiba la pyllait ia ka India, na ka jingkyrduh pisa, ha ka por ba ka ioh ka kot jong ka pyrthei ka hiar shi katdei.

Ka Nirmala Sitharaman, myntri pla pisa ka sorkar India, ka la pynbna ia ka jing pyniasnoh jong ki 27 tylli ki Bank bapher, ha kaba la pynmih noh mynta sha ka 12 tylli, kaba kynthup ia ka jing pyn iasoh ia ka Oriental Bank of Commerce bad ka United Bank sha ka Punjab National Bank nalor kiwei kiwei pat.

Shillong: Ym tang ki 8 ngut ki MDC na JHADC kiba la pynthikna ban rung noh sha ka BJP hynrei katkum ka jingkam nongialam ka BJP u bah AL Hek, ki dang don sa kumba 2 ngut kiba la wan ban pynthikna kham hadien ban rung sha ka BJP.

Haba kren mynta ka sngi, u bah Hek u la kam ba ki la don ruh 2 ngut ki MDC na GHADC kiba la pynthikna ban rung bad uwei na KHADC kiba la pynthikna ban rung sha ka BJP.
“Kine ki dei ki MDC na ka Congress, UDP, bad na ka NPP ruh”, la kam u bah Hek.
Ka BJP ka bym pyniakhun MDC ha ka elekshon ba la dep, hynrei mynta ka la ioh ban pynbaptis ei hadien ka elekshon bad kane ka la jia long shisha kumba la kam u bah AL Hek shwa ka elekshon.
“Nga la dep ong mynshwa ba ngin shu pynbaptis ia ki MLA, MDC”, la ong u bah Hek
Ki 8 ngut ki MDC na JHADC kiba la pynthikna ban rung BJP ki long u bah Lakhon Biam (UDP), Krishon Langstang (UDP), Treilang Suchiang (UDP), Dawan Lyngdoh (UDP), . Andrew Shullai (INC), Arbor Hima (INC), Holando Lamin (INC) bad u bah Aiborlang Shadap (INC).
“Nalor kine ki 8 ngut, sa ar ngut (bym pat kwah pynpaw kyrteng) mynta kila dep ban iakren ban rung BJP bad baroh kin don 10 ngut kiban rung BJP na JHADC”, la ong u bah Hek mynta ka sngi.
Ha ka jingshisha ka BJP ka la pynbeit ban pdiang burom ia kine ki MDC lashai ka sngi ha ophis ka seng ha Shillong hynrei namar bym lait u Himanta Biswa uba bunkam namar ba kut ka jingpyndep ia ka national register of citizen (NRC) lashai ha Assam, la pynkynriah noh sha ka sngi Saitjain ban wan.
Ha kane ka jingpdiang burom yn wan ruh u Nalin Kohli uba peit ia ka BJP Meghalaya.

Ka Gross Domestic Product (GDP), ha ka quarter ba nyngkong jong u snem 2019-20, ka hiar haduh san percent, kaba hiar kumba 0.8 percent, haba ia nujor bad kaba la kut noh ha U Lber jong ka kut snem jong u snem 2018-19. La shim ba katei ka GDP, ka dei kaba la hiar palat than, haba ia nujor ha ki hynniew snem ba ladep.

Ka snem mang pisa jong u snem 2018-19, ka kut ha ka jingkiew ka GDP kaba 6.8 percent, kaba kham hiar na ka snem ba ladep, katba ha kane ka mang kaba sdang jong u snem 2019, ka hiar sha ka 5.8 percent.
La shim ba ki don katto katne ki daw, kiba pynhiar ia ka ioh ka kot bad kawei na kitei ka dei ka jing artatien halor ka thma jong ka US pyrshah ia ka Chian bad nangta sa ka jingthmu jong ka England ban mih noh na ka kynhun ki ri Europe lane ka Brexit bad nangta sa ka jinghiar ka die ka thied bad ka kamai kajih ha ka iew ha la ka jong ka Ri.
Ka don sa ka jingeh bad kata ka long ba ki Bank, kim treh ban pynhiar ia ka sut sha ki nongshim ram pisa, kumba la bthah da ka Reserve Bank of India.

Shillong:Ki nongkyrshan ka National People’s Party (NPP) Shella Constituency ki la pynmih kawei ka sur ba ki kwah ba ki nongialam ka NPP hapoh ka jylla ba kin pynieng kyrtong ha kane ka ilekshon shiteng samoi ha Shella constituency.

Kane ka rai jong ki nongkyrshan ka NPP Shella constituency ka dei ha ka jingialang kaba la long myn hynnin ka sngi ha Saitsohpen, Sohra, East Khasi Hills District ha ka jingiadonlang u bah Pynthymmaibor Chyne, Working President ka NPP Shella constituency, Bah RM Shabong na ki thain Umniuhtmar ryngkat ka jingdon ki nongpeit parman kiba kynthup ia u bah Jied Kurbah, President ka NPP East Khasi Hills District, Bah Aibor Tynsong nongialam NPP na Pynusla, Bah Jansing Tynsong, MDC barim ka Pynursla.

Haba ailad man uwei pa uwei u nongkyrshan kiba la wan ha kane ka jingialang ki la pynpaw beit ba ki nongialam ka NPP ki dei ban pynieng kyrtong ha Shella constituency namar ka dei ka kabu ia kane ka seng ba kan ioh ia kajingjop hadien kajingkhlad noh u Dr. Donkupar Roy, MLA barim.

Ki la pynpaw ba lada ka NPP kaba bat ia ka bor synshar ha ka sorkar jylla kam pynieng kyrtong kaba sheptieng ka long ba kane ka seng kan sa jah rngai noh namar ki paidbah kin sa leit kyrshan noh ha kiwei ki seng sain pyrthei.

Haba ai jingkren ha kane ka jingialang, u Bah Pynthymmai Chyne u la ong lada ka NPP kam treh ban pynieng kyrtong mynta ha Shella constituency ka pyni ba ka la pynjem daw ialade.

U la ong kane ka jingpynduh mynsiem ia ki nongkyrshan jong ka NPP ka dei namar ba hadien ka jingkhlad ba kyndit u Dr. Donkupar Roy ki nongialam ka NPP ki la pynpaw ba kin nym pynieng kyrtong hynrei ha ka sain pyrthei ym ju dei ban sngew paralok than.

“U Messi bad u Ronaldo ki dei shi paralok hynrei haba la dei ka por ban ialehkai ki hap ban mih beit ha madan ban iakhun ban rah ia ka jingjop” u la ong.

U Bah Chyne u la pynpaw ba ka NPP kam dei ban sngew paralok than ia ka UDP namar tieng ioh khyllem ka sorkar hynrei u pynthikna ba lada jop ka NPP ka sorkar ka dang skhem arshah.

“Lada ka UDP ka burom ia ka NPP kam dei ban pynieng kyrtong ha ka ilekshon shiteng samoi ha Ranikor constituency kaba long mynshem snem haba u MM Danggo u la ieh ia ka kam MLA na ka seng Congress ban iakhun na ka seng NPP hynrei ka UDP ka pynieng beit ia u kyrtong wat ha Selsela” u la ong.

Kumta u la ong ban ioh ia kajingshai mynta ka sngi kum ki nongialam ki la lum ia ka jingialang jong ki nongkyrshan ka NPP ban shim ia kane ka rai khnang ba ki nongialam kiba hajrong kin sngewthuh.

Na ka liang u bah Jied Kurbah, President ka NPP East Khasi Hills District u la kyntu ia ki nongialam ka NPP Shella constituency ba kin phah syndon da kajingthoh ba kane kaj ingialang ba mynta ki la rai ban pynieng kyrtong khnang ba ka District kan phah ia kane ka rai sha ki nongialam ka NPP jong ka jylla.

Katba u bah RM Shabong u la ong ba lada ka NPP ka rai ban pynieng ne ym pynieng kyrtong ruh ka dei ban da khot biang ia ka jingialang khnang ban iashai baroh ki nongkyrshan ym ban shu rai tang najrong.

Shillong: Ka jingialehkai phutbol kaba la long myn hynnin ka sngi ha Wapung skur iakaba la pyniaid daka Moopynieiñ Socio Cultural & Sport Organisation ( MSCSO) iakaba latip kum ka 9th Cash Prize 2019 Football Tournament ka la long kaba ia thain bha bad itynnad bha.

Kane ka jingialehkai ka long hapdeng ka Wapungtre FC pyrshah iaka Wallam FC. Marsien sdang ka jingialehkai naka liang ki player ka Wapungtre FC kila ioh ban pynkhih nyngkong iaka jar haka miniy kaba 5 lyngba u Anloi Dkhar. Marsien shah thap, ki player ka Wallam FC ruh khlem ailad ki la iakhun dohiap ban ioh pynphai iaka shikol kaba la shah thep, bad tang hapoh 18 minit jong ka kylla step hi, ka la ioh ban pynphai kylls iaka kol lyngba u Predi Siangshai.
Kane ka jingiaioh thep ba marshi kol kala neh haduh kaba kut jong ka jingialehkai tad haduh ba naka liang u referee u la rah shaka jingiashut tie breaker.
Haka jingiashut tie breaker naka liang ka Wapungtre FC kala jop da 5:3 pyrshah iaka Wallam FC.

Shillong: U nongialam seng riewlum barim bha ka jylla, uba long ruh u president ka HSPDP East Khasi Hills, u bah Martle N Mukhim u la pynpaw ka jingsngew khia ia ka jingmih ka kynrum kynram ha kaba iadei bad ka shuki Lamphang hadien ba la khlad kyndit u Dr Donkupar Roy dang shen.

Haba kylli halor kane, u bah Martle uba dei ruh u Executive Member (EM) ka KHADC, u la ong, “Ka kam kaba bha tam ha kaba iadei ka kam lamphang, ka dei ban neh kumba la sdang ia ka sorkar Meghalaya Democratic Alliance (MDA)”.
Lah ban kdew ba ia ka shuki Lamphang la bat da ka UDP naduh ba la thaw ia kane ka sorkar MDA ha kaba u Dr Donkupar Roy u la long u Lamphang na ka UDP haduh ba un khlad kyndit noh dang shen.
U bah Martle u la ong ba na ka bynta ka jingbit jingbiang lang jong baroh ki paralok ha ka MDA, ka kam Lamphang ka dei ban neh ne bat da ka party kaba la bat naduh ba sdang.
U la ong ba ka UDP kaba don lang ha ka RDA ka dei ban wan shakhmat ban pynthikna ba ka kam Lamphang kan neh kumba ju long naduh ba sdang kane ka sorkar.
Katkum ka jingong u bah Martle, lada ka UDP ka donkam, ka dei ban iashong lang da ka RDA (Regional Parties Alliance) ba don lang bad ka HSPDP.

Shillong: Ka Seng KSU Mawlyntriang Unit mynne ka 30tarik, nailar ha ka por mynstep ha jingialam u President u samla Wanbiangstar Rani bad u Asst Organising u samla June Ryntathiang ka la hiar ban ap ha ki surok shnong na ka daw ka jing jyllei ki barjylla ba wan khaiï beaiñ, ha kane ka jingleit ap la ioh ban bat noh ia kawei ka kali Assam kaba don ia u number AS18 C 9645 kaba mut ban leit khaiï sha Nongstoiñ.

Haba ka seng kala pyrshang ban tohkit ia ki tei ki nongkhaiï barjylla kiba la ioh ban bad na ka tei ka kali hynrei la shem ba kim shem la don satia kino kino kot ki sla kiba biang. Hadien ba ka seng kala lap ba kim don ki kot ka la phah leit phai noh ia kitei ki barjylla sha ka jaka kaba ki wan.
Ka jing leit khynra ia ki tei ki tei ki kali barjylla kadei halor ka jing mih shibun ki jing ujor na ki paidbah katei ka thaiñ sha ka Seng, kumta ka seng haba ioh sngew ia kane khlem da pynslem ka lashim da ka synjam ban buddien bha ia ka jingwan kiew ki kali ba nabar jylla ha ki bynta ka tei ka thaiñ. Shuh shuh kat kum ka kyrwoh bala phah da u President ka KSU Mawlyntriang Unit la iathuh ba kitei ki barjylla ki ju wan barabor dei namar badon ki Khasi kiba ju ialam ia ki bad bunsien haba ka Seng ka pyrshang ban khynra ia ki kot ki sla mih hynrei mih pynban ki Khasi kiba iada da kaba kamtrai ia ki mar ki mata jong ki tei ki barjylla.
Khatduh ka seng ha ka kyrwoh ba la phah da u President KSU Mawlyntriang unit ka la maham tyngeh ba lada nangne shakhmat ka dang lap ia ki barjylla ba wan khaiï ha ka tei ka thaiñ khlem ki kot ki sla kiba biang na ka liang ka seng kan sa leh da kaba tyngeh, bad ka seng ka maham lypa ruh ia kito ki Khasi kiba ju mlien ban leh ia ki kam benami da kaba ialam lynti ia ki barjylla sha ka tei ka thaiñ ba lada ka seng kan dang lapksai biang nangne shakhmat kan leh da kaba tyngeh, namar kum ka Seng kam kwah ba ka ki mynder kin wan knieh noh ia ka pliang ja jong ki khun ka bri Hynñiewtrep bad na ka liang ka seng ka la kyntu jur ruh ia ki Dorbar Shnong bapher bapher kiba don hapoh West Khasi Hills ba kin long kiba peitngor bad husiar bha ia ka jingwan tuid ki briew kiba nabar hapoh ka dong ka thaiñ, bad ka pan ruh ia ka jingiatrei lang ia ki Dorbar Shnong khnang ban wanrah ia ka Khaiï ka Pateng ki Paradoh Para snam kaba skhem ha ka dong ka thaiñ ban long ruh ka jing iada ba khlaiñ ba ki mynder kin ym ioh iohlad ban bsut khlieh.

Nongpoh: U Bah Sanbor Shullai, MLA ka Laban Constituency bad uba dei ruh u Chairman jong ka Meghalaya Tourism & Development Cooperation (MTDC) mynta ka sngi u la leit ban plie paidbah ia ka ‘Loghut’ ne ki iingbasa, kaba la tei da ka MTDC ha Orchid Resort kaba don ha Umiam, Ri Bhoi District.

Ha kaba plie ia kitei ki iingbasa, kiba dei ruh ki iing kiba la pynmang kyrpang na ka bynta ki nongwan shangkai pyrthei, mynta ka sngi na ka liang ka MTDC ki la ioh ruh ban pyllait ia la ka jong ka Website kaba la tip kum ka www.mtdcmeghalaya.com, ia kaba la pyllait paidbah da u Bah Sanbor Shullai.
Kitei ki iing shongbasa, kiba la don 5 tylli iing dieng bad ha kitei ki 5 tylli ki iing, ki la don 10 kamra, ia kaba la shna ha kata ka rukom kaba iadei bad kane ka juk kaba mynta bad ruh kiba la iaryngkat ruh lem bad kiwei ki iingbasa (Hotel) remdor hapoh ka jylla.
Haba iadei bad ka jingplie paidbah ia kitei ki iing shongbasa ka MTDC, u Bah Sanbor Shullai, u la ong ba ka nongrim kaba la pynlong ia ka MTDC ban plie paidbah ia kitei ki shongbasa bad ruh ia katei ka Website, ka long ban kyntiew ia ki kam jngohkai pyrthei bad kumjuh ruh ban khring ia ki nongwan shang pyrthei, kiba wan na ki jaka bapher bapher, namar lyngba ka jingbiang ki iing shongbasa, ka pynlong ia ki nongwan shang pyrthei ba kin sah slem bad ka ban pynmyntoi ia ka jylla.
U la ong ruh, lyngba katei ka jingplie paidbah ia katei ka Website, ym dei ba kan pynmyntoi tang ia ki nongwan shang pyrthei ba kin ioh jaka sha, hynrei ka pyniohnong ia ka MTDC bad ia ka sorkar jylla, namar lyngba katei ka Website, ka pynlong ba baroh ki khajna kim dei ban sepei, hynrei baroh ka khajna kan leit lut sha kaba dei ban poi.
Kiba la donlang ha kane ka sngi, ki kynthup ia u Bah Sanbor Shullai, u Bah Ricky Shullai, vice chairman ka MTDC, u Bah Cyril Diengdoh, Managing Director ka MTDC, u Bah Micheal Kharhunai, uwei ba ki Director ha ka Board Director ha ka MTDC.

Shillong: U myntri ka sorkar jylla u Bah Lahkmen Rymbui u la pan 10 % na katei ka pisa T163.31 klur kaba ioh na ka sorkar pdeng ban pyndon kam ban sumar ia ki khlaw paidbah.

U ma Lakmen hadien ba u la wan phai na Delhi,u la iathuh ba na ka T.163.31 klur kaba la ioh na ka sorkar pdeng ka dei ka kumno ka ba la lum na ka jingshah pynjot jong ki khlaw ha kane ka jylla da ki karkhana bad ka jingshna ia ki surok bah,
Haba kren ha ki lad pathai khubor mynta ka sngi ha ophis trei kam, u myntri kam khlaw jong ka jylla u la ong ba ha Meghalaya ka sorkar ka don tang 5% ki khlaw ki ba peit da ka sorkar bad kumba 76%. Ki dei jong ki riew shimet ne ki jong ki shnong ne jong ka raid. Ban pynneh ia ki khlaw u la ai da ka jingthoh sha ka sorkar pdeng ban shah ia ka jylla Meghalaya ban ai 10% ban ioh pyndonkam ha kaban pynbha ia ki khlaw jong ki riew shimet.
Haba pan ia kane ka 10%, u myntri u la ong ba ha kane ka jylla ki dang don ki khlaw shnong, jong ki hima ha kaba ka sorkar kan shim wai ia ki na ka bynta ban pynneh pynsah ia ki khlaw kham tam ia ki khlaw ki ba don ia ki tyllong um. Haba ia dei bad kane ka jingpan na ka liang jong ka sorkar jylla ka dang ap ia ka jubab na ka sorkar pdeng.
U myntri u la iathuh ruh ba ia kane ka pisa T.163.31 klur kaba la lum na ki karkhana, na ka jingshna ia ki surok ha kine ki shiphew snem kiba dei na kane ka jylla Meghalaya, ban pyndon kam ia kane ka pisa ka sorkar ha ka 20 tarik u Lber 2019 mynta u snem kala thaw ia ki lai tylli ki kommittee katkum ka jingbthah jong ka sorkar pdeng.
Kine ki lai tylli ki kommittee ki long, ka Governing Body ha kaba la khlieh da u myntri rangbah ka jylla, ka Steering Kommiti, kaba la khleih da u Chief Secretary bad ka Executive Committee kaba la khlieh da u PCCF jong ka tnad khlaw ka sorkar jylla na ka bynta ban pyndon kam ia katei ka pisa ha kaba thungdieng biang ha ki jaka shrah.
La iathuh ba la buh kyndon ba ka sorkar jylla kam lah ban pyndon kam ia kane ka pisa kum ka jingthied kali, ban leit shabar Ri bad ban siew ia ka bai nongtrei kine ki long ki kyndon kiba la buh ba ka sorkar kam lah ban pyndon kam ia kane ka pisa, la ong u myntri ba dei peit ia ka tnad khlaw.

Shillong: U nongialam ka BJP uba long ruh u myntri sorkar jylla, u bah AL Hek u la kam ba nalor 5 ngut ki MLA ka Congress kiba la iakren ban rung sha ka BJP, sa kumba 3-4 ngut mynta kiba la wan shuh kiba kwah ban iasoh bad ka BJP.

Haba kren myn hynnin ka sngi, u bah Hek u la ong, “Ha u snem 2023, ka sorkar ha Meghalaya yn ialam da ka BJP ha kaba ka BJP kan ioh ia u myntri rangbah”, la ong u bah Hek.
Haba kyntait ban iathuh ia ki kyrteng jongki MLA kiba iakren ban rung BJP, u bah Hek u la ong, “Em, ngam pat lah ban iathuh namar ba ka lah ban sniew noh ka game (jingialeh)”.

U la ong ba ka jingiakren ka la iaid mynta bad kine ki MLA hynrei ym pat poi sha ka thong ban iapynpaw pyrthei haduh ban da shim ia ka rai kaba kut.
Lah ban kdew ba ka khubor hamsaia ka la her bha mynta ba ki don ki MLA ka Congress kiba la thmu ban phet noh da ka kynhun hadien ba ka party kam don shuh ha ka bor ha ka Delhi bad ha kiba bun ki jylla na ka jingshah syllad ha ka lyer u Narendra Modi jong ka BJP.
Halor ka jingkylli ia ka jingmih khubor ba u Dr Mukul Sangma un rung BJP, u bah Hek u la ong ba um pat ioh kano kano ka jingiakren iapynsngew halor kane bad um tip eiei.
Katkum ka jingong u bah Hek, ki MLA kiba u la iakren ki dei na ka Congress hynrei ki dang ap sa tang ia ka por ba kin mih noh na ka Congress.

Khliehriat: Ka Seng ki Samla Pule Ka Khasi Students Union Jaintia Hills District Unit ka la pynpaw ia ka jingsngewkhia halor ka jingpynslem ka Sorkar jylla ban ioh iaka jaka naka bynta ban pynieng iaka Khyrdop rung bad mih (Entry & Exit Points ) kaba don ha Malidor East Jaintia Hills.

Haba buddien iakane, ka KSU mynhynnin ka sngi kala leit iakynduh ia u Deputy Commissioner ka East Jaintia Hills u Bah FM Dopth naka bynta ban leit wad jingtip halor ka jingiaid shakhmat ka kam kaba iadei bad ka jingpynieng iaka Khyrdop hakatei ka Jaka.

Haba iakren bad u khliehduh ka District, ula ong ba ladon ka jaka kaba ka jingheh ka jong ka ka long jaduh 60000 sqft hynrei ka jingpynslem ban shimti ia katei ka jaka ka daw namar ka jingrem palat ka dor kaba la kot palat 2 klur tyngka.

Ha kaba iadei bad ka District Task Force pat ula ong ba kane kan treikam ynda ladep ban shna iaka Entry and Exit Points.
U DC ula ai jingmut ruh iaki dkhot ka Seng ban leit ia kynduh ia u Director ka Tnad Tourism namar kadei ka Nodal Office ka ban peit iaka jingbei pisa naka bynta ban thied iaka jaka ban pynieng iaka Khyrdop.

Ki Nongialam ka seng haba ai jingkren haki nongthoh khubor ki la ong ba ki la dap da ka jingsngewdiaw ban iohi ba ka jingpynieng iaka khyrdop ha Malidor ka la iaid suki shaba palat ha kaba wat tang iaka jaka ban pynieng khyrdop ruh ka sorkar kam pat lah ban pynioh.
“La bunsien ngi la wan ban buddien ia kane ka kam, hynrei ngi la lap pynban ba kajuh beit ka jingeh kata ka long ka jingbym ioh pisa ban thied jaka” la ong u Samla SS Niangti Finance Secy KSU JHDU.

” Lashai ka sngi kadei ka sngi kaba khatduh ba ka Assam kan pynmih khatduh iaka Final Draft jong ka NRC, khlempep kan sa don ka jingrung tuh jong ki mynder shapoh ka Jylla jong ngi” la ong shuh shuh u nongialam ka Seng.

Ka Seng ka kyntu iaka Sorkar ban pyniaid noh wut wut iaka kam shakhmat khlem pynslem khnang ba ka jingrung jingmih jong ki mynder shapoh ka jylla kan nymioh laitlan palat.

Kiwei pat ki nongialam kiba ia donlang hakane ka sngi ki long u Samla K. Suchiang Publicity Secy KSU JHDU, Samla Satly Ryngkhlem Vice President KSU Khliehriat Circle, Samla Cherity Suja General Secy KSU JHDU bad kiwei kiwei pat ki nongialam ka Seng.

Guwahati: Ki don 3,11,21,004 kiba la ioh rung ha ka thung jong ka National Registration of Citizenship jong ka Assam.

Katba sa 19,06,657 ngut kim shym la ioh rung satia, ong ka kaiphod kaba dang shu pynmih mynta ha Assam.