Ha u kyrwoh khubor ba la pyllait da u Bah Shiel Rejoic C. Ryngkhlem, u Bah Sleeping Rymbai bad u Bah Biker Rymbai kiba dei ki Polling Agents jong u Bah Piwell Shylla, u kyrtong shimet, ha kane ka Election MDC ba dang shu dep shen, haba pynshai halor ka jingmih khubor ha ka 28 tarik u Rymphang, 2019 halor ka phang “Mih jingkulmar bun jaka ha East Jaintia Hills…”. kitei ki lai ngut ki pynpaw ia ka jinglyngngoh haduh kata kata ban iohi ba ia ka kyrteng ka Polling Station, Govt LP School ha Wapungskur, ha kaba ma ki ki la long kum ki Polling Agents jong u Bah Piwell Shylla ha katei ka sngi thep vote, ka 27 tarik u Rymphang. 2019. Haba pynshai ia ka jingshah kynnoh jong katei ka Polling Station ha Wapungskur kat kum ba la paw ha ki lad pathai khubor ngi kwah ban sha ka sorkar jylla bad u paidbah kumne:
Ka DS Wapungskur, naduh ba sdang beh ka lyer Election MDC bad haduh ba kut, ka la trei shitom miet la bad sngi ban tehlakam ia ka shongsuk shongsaiñ jong ka shong khnang ba kan ym mih kano kano ka jingkulmar ha katei ka Election bad kane ka jingtrei shitom jong ka DS Wapungskur ha ryngkat bad ki bor jong ka aiñ, ka la long kaba jop bad ka la wanrah ia ka jingiaid beit jong kane ka election MDC ba dang shu dep shen ha katei ka shnong.
Ngi kum ki Polling Agents jong u Bah Piwell Shylla, ngi sakhi ba ka jingthep vote MDC ha ka Wapungskur, ha Government LP School ha katei ka sngi, ka la long kaba iaid beit iaid ryntih khlem kino kino ki jingthut, ne jingkulmar, ne jinglehbor, ne iuhroit ia ka hok jong ki paidbah da ki katto katne kat kum ba la kynnoh.
Ki nongthep vote baroh ki la ioh ban thep ia la ki jong ki vote ha u kyrtong u ba ki mon khlem da don ba pynwit, pynthud, ne pynbor ia ki ban thep ha u wei pat u kyrtong u ba kim mon. Ngi da peit ngor bha ia ka jingthep vote bad ngim la lap ia kita kat kum ba la kynnoh ha ki lad pathai khubor. Lada don shisha kiba kum kita, ngin jin da la ujor hangto hi bad ngin ym shah da lei lei ruh em ba kiba kum kita kin jia.
Ngi kum ki Polling Agents jong u Piwell Shylla, ngi don khnang hapoh Polling Station baroh shi sngi ban peit ngor la ka jingiathep vote bad ka jingthep vote ka la long kaba kaba khuid ba suba hynrei ym kum ba la kynnoh ha ki lad pathai khubor.
Kat kum ka jingiohi jong ngi, ha katei ka Polling Station, kam shym la don satia kano kano ka jingiashoh iadat, ne jingpyrshang ban ktah kti ia u Bah Piwell Shylla, kum u kyrtong jong ngi lane ia ki briew jong u. U Bah Piwel Shylla u wan suk sha ka Polling Station ar sien bad u ioh ban rung suk khlem kano kano ka jingpynthut ia u ban rung shapoh ka Polling Station ban peit ia ka jingiathep vote bad ruh ia ngi, bad hadien nangto ruh u mih noh da kaba suk baroh ar sien.
Ngi pynshai shuh shuh, ba kam shym la don satia kaba kum kata, ka byrngem lane patan ia ngi shabar jong ka Polling Station na lane ha uno uno ruh ha katei ka sngi thep vote kat kum ba la kynnoh ha u kot khubor. Hynrei, ngi don beit hapoh Polling Station bad pyndep ia la ki kamram naduh ba sdang haduh ba kut ka jingiathep vote.
Ki briew sorkar ba pyniaid ia ka election, lem bad ngi ki Polling Agents ngi ia don lut hapoh Polling Station naduh ba sdang haduh ba kut ka jingthep vote bad bad ngi ia sakhi lang ba ka jingthep vote ka la long kaba iaid beit iaid ryntih bad lada da jia ba don kiba kum kitei ki jingle bor kat kum ba la kynnoh ha ki lad pathai khubor ngim tharai ba kitei baroh kin shu ia shong kli kti khlem leh ei ei katg kum ka aiñ.
Kumta halor kitei ki jingkynnoh baroh, ngi pynshai sha ka sorkar bad ki paidbah ba ki long ki jingkynnoh ba khlem nongrim jong ki riew shim kabu kiba kwah ban pynjah burom ia ngi kum ki Polling Agents bad ruh ia ka shnong Wapungskur. Namar kata, ngi kyntu ia ki bor sorkar bad ki paidbah ba kim sei shah ialam bakla lyngba kitei ki jingkynnoh bad ngi ba ka ka jingdawa jong ki nongkynnoh ban pynlong biang ia ka jingiathep vote ha katei ka Polling Station sa shisien ka long ka ba khlem nongrim bad kaba bym lah satia ban pdiang.
Mr. Shiel Rejoic C. Ryngkhlem, Wapungskur, East Jaintia Hills.
Mr. Sleeping Rymbai, Wapungskur, East Jaintia Hills.
Biker Rymbai, Wapungskur, East Jaintia Hills.
