Shillong: U Bah Tlanding Wahlang u rang mareh na kane ka jylla, u la shah jied ban iashim bynta bad ka kynhun nongiamareh ka ri ban iakhun sha ka 2019 International Association of Ultrarunners (IAFU) Trail World Championships, kaban long ha Miranda Do Corvo, Portugal, ha ka 8 tarik u bnai Jylliew mynta ka snem.
Ia kane ka kynhun ki nongiamareh ka India yn lam khmat da u Ullas Narayana ba dei u nong mareh thong ba nyngkong ka ri ban khur ia ka takma ha ka ïakob jong ka ultra-running.
Nalor u Tlanding, kiwei pat ki nongmareh jong ka ri ban ïashim bynta sha kane ka jingïakob ki kynthup ïa u lahduh ha ka pyrthei u Kieren Dsouza u rang ïa mareh ba nyngkong ka ri ban pyndep ïa ka thong mareh kaba 246km Spartathlon ha u snem 2016, bud pat sa u Radhey Kumar bad u Rajasekar Rajendra.
Ban kynjoh shaduh kane ka kyrdan ban ïakhun ha kane ka jingïakob, ka Atheltics Federation of India (AFI) ka la buh ïa kiba bun tylli ki kyndon ba ki nong ïamareh kin hap ban pyndep ïa ki.
↧
Yn mareh u bah Tlanding sha Portugal ha u Jylliew
↧
Plie u myntri ia ka tnat sam bor ding ba T.21klur ha Lakroh
Jowai: Myn hynnin ka sngi u Myntri ka Pule Dangle, u ma Lahkmen Rymbui u la wan ban plie paidbah ia ka Lakroh Mini Hydro Projet kaba shongdor haduh 21 klur tam.
Kane ka project ka don ha ka shnong Lakroh, Amlarem Subdivision, West Jaintia Hills District bad u CM ka jylla, u Conrad K Sangma u la dei ban wan her naduh Tura ban wan plie ia ka, hynrei namar ka jingsniew ka mariang ka Helicopter jong u kam lah satia ban her madan hynnne ka sngi bad ia ka kam ban plie paidbah ia katei ka project la aiti noh ha u Local MLA uba dei ruh u Myntri ka tnad Pule Dangle.
Kane ka project jong ka MeECL ka lah ban sam bording haduh 1.5 Mega Watts bad ka jingthmu ka long ban pynbiang bording ia ki paidbah ka thain Khappud ha Muktapur.
U Chairman bad ha ka juh ka por kum u Chief Managing Director ka MeECL, u bah H Nongrum haba kren u la ong ba kane ka Project ka la shimpor haduh 18 snem ban pyndep ia ka.
“Ngi la sdang ban leh ia ka Survey naduh u snem 1996 ha kaba la phah ia ka PDR sha ka Sorkar India bad na ka liang ka sorkar India lynba ka MNRE mynta pat ka MNES ka la mang haduh 11.76 klur ban pyndep ia ka bad na ka liang ka NEC ruh ka la ai haduh 500 klur bad namar ki jingeh kiba bun, la hap ban pyllut haduh 21 klur tam nalor ka jingslem kaba haduh 18 snem”, u la ong.
Ki heh ka MeECL ki la iathuh ba ia kane ka project la sdang naduh u snem 2001 hynrei ka la slem haduh November dei na kawei ka daw ba ka JHADC kam shym la ai NOC ia ka tnad.
Nalor katta, sa u trai jaka ruh u khlad noh bad la mih ka kynrum kynram haduh ba la hap ban leh biang ia ka jingjurip bad sorjamin.
Na ka liang u ma Lahkmen Rymbui ia u la ai ka jingiaroh ia ki Sahep ka MeECL kiba la trei shitom khlem randien ban pyndep ia katei ka project kaba ai jingmyntoi ia ki shibun ki shnong kiba marjan bad kaba kyntiew ruh ia ka longbriew manbriew ka thain.
Ha kane ka sngi, kiwei pat kiba la ai jingkren ki kynthup ia u Deputy Commissioner, u bah Garod LSN Dykes, u Dolloi ka Satpator Elaka nalor kiwei kiwei.
↧
↧
Thung biang ka KHADC, ia U Syiem ka Hima Sohra, ong U bah Shylla
Shillong: U Chief Executive Member jong ka KHADC u bah HS Shylla myn hynnin ka sngi u la iathuh ba ka ophis ka la weng noh ia ka jingsospon shipor ia u syiem jong ka hima Sohra, u Paiem Freeman Singh Syiem ha dien ba la pyndep ia ka jingtohkit pyrshah ia u ha kaba ia dei bad ka jingjia ha raid Majai.
Haba ia dei bad kane ka jingthung biang ia u Syiem jong ka Hima Sohra ban long u Syiem ba pura la leh ha ka 1/03/2019 mynta u bnai bad da kane ka jingweng noh ia kane ka jingweng ba shipor mynta ka Hima Sohra ka la ioh ia u Syiem ba pura jong ka hima.
Ha ka juh ka por na ka liang jong ka KHADC ka la buh ruh ia ki kyndon ia u Syiem jong ka Hima Sohra, haba ia dei bad ka Raid Majai ym dei ban phah tang ia ki myntri hynrei dei ban peit da ka hima, ka hima kam lah ban thung ia ki “Molor” namar ka don ka dorbar shnong.
Dei halor kitei ki kyndon ba la thung biang ia u Pa,im Freeman Singh Syiem ba long biang u Syiem b a pura jong ka hima bad ia kane ka hukum kan sa mih na kine ki sngi na ka liang jong ka EC ka la dep ban thung biang kaba sah mynta ka long ba kan mih ka jingpynbna na ka KHADC. (SP News Agency)
↧
Sdang ka eksamin matrik, palat 50 hajar kiba ialeh
Shillong: Ka eksamin jong ka Secondary School Leaving Certificate (SSLC) ne matrik ba pyniaid da ka Meghalaya Board of School Education (MBoSE) ka la sdang myn hynnin ka sngi bad kan kut ha ka 18 tarik.
Mynta u snem, ki don baroh 51, 321 ngut kiba ialeh ia kane ka eksamin ba kynthup ia 23,505 ngut ki shynrang bad 27,816 ngut ki kynthei.
Kumjuh ki don ruh 140 tylli ki jaka thoh eksam (SSLC Centre) hapoh ka jylla baroh kawei ba kynthup ia 80 tylli ha ka thaiñ Shillong (Shillong Region) bad 60 tylli ha ka thaiñ Tura (Tura Region)
Ki don 22,007 ngut kiba iakhun ha ka ‘Regular-1’ ba kynthup ia 9738 ngut ki shynrang bad 12,269 ngut ki kynthei katba ki don 11,594 ngut ha ka ‘Regular-2’ ba kynthup ia ka 5218 ngut ki shynrang bad 6376 ngut ki kynthei.
Kiba iakhun ‘Private’ ki don 2118 ngut ba kynthup ia 1105 ngut ki shynrang bad 1013 ngut ki kynthei. Ha ka liang ki ‘Non-Regular’ pat, ki don 10,112 ngut, kata 4993 ngut ki shynrang bad 5119 ngut ki kynthei.
Kumjuh ki don 5487 ngut ki ‘Compartmental’, ba kynthup ia 2451 ngut ki shynrang bad 3036 ngut ki kynthei katba 3 ngut pat ki kynthei ki leh ia ka ‘Improvement’.
Haba ia nujor, ka jingdon jong ki samla pule kiba la iakhun ia katei ka eksam ha u snem ba la dep ka long 50,007 ngut bad ka ‘Pass Percentage’ ka long 56.76%.
U Joint Director ka MBoSE, Bah M. Marbaniang u la ong ba la pynkhreh bha ia kane ka eksamin ban lait na kano kano ka jingjia.
La iathuh ba ka eksamin jong ka HSSLC, ki don 31,104 ngut ki samla pule kiba iakhun ha katei ka eksam ha baroh ki tnad pule, kata ‘Arts’, ‘Science’, ‘Commerce’ bad ‘Vocational’.
↧
Lait phet U bah Jyllud na kti ki pulit ha khmat ka kashari U DC Shillong
Shillong: U Bah Jyllud, ula lait phet mynta ka sngi, na ki pulit kiba pahara ia u, ha ka lynti ba un leit shah bishar ha ophis U Deputy Commissioner, East Khasi Hills, Shillong. Katei ka jingjia, ka la jia ha ka por 12baje shiteng sngi, ong ka khubor.
U Bah Jyllud, uba dei uwei na ki runar kiba triem bha, ula shah kem ar snem mynshwa, ha kaba la kynnoh ruh, ba u ju leit jyllud ia ki kynthei ha ka por ba u ioh rung ha ki iing sah jongki, ha ka por mynmiet. La wan ialam ia u sha Shillong, na Nongpoh mynta ka sngi bad ula lait phet bak, katba ki pulit ki dang ialam sha kashari.
Kham mynshwa ruh U Bah Jyllud, ula lait phet na ki pulit ha ka por, ba ki leit ialam shim dawai ia u na Civil Hospital, Shillong.
↧
↧
Bam smai 29ngut ki MDC ka Khasi District Council
Shillong: Ka Deputy Commissioner, ka East Khasi Hills, ka kong Matsiewdor War, ka la pynsmai mynta ka sngi, ia ki MDC thymmai jong ka Khasi District Council. Na ki 29ngut ki MDC, ki don ar ngut kiba bam smai ha ka ktien Khasi bad kitei ki long U Bah Pyniaid Sing Syiem MDC ka NPP na Sohryngkham bad U bah Teibor Pathaw, uba dei U MDC shimet, uba la pyniasoh ialade sha ka seng UDP.
U Bah Teinwell Dkhar, uba dei u kyrtong ka seng UDP, un jop suk kum U Chief Executive Member ba thymmai jong ka KHADC bad U bah Pynshngain N Syiem ruh un jop suk kum u lamphang dorbar ba thymmai jong ka Council, namar ba ka Congress, kam buh kyrtong satia ban ialeh pyrshah.
Kitei ki arngut, ki la dep thep kyrteng mynta ka sngi, ha khmat U Secretary ka tnat Legislative jong ka Council bad ka jingjied ia kitei ki arngut, kan long ha ka Sngi Palei.
↧
Bam smai ki MDC ka JHADC ban shakri hok ia ki paidbah U Thombor kum u CEM bad Lakhon Biam kum u Chairman
|
Jowai: Mynta ka sngi baroh 29 ngut ki MDC ka JHADC, kynthup ia ki 19 ngut kiba dang thymmai bad 10 ngut kiba rim ki la bam smai ban ai ka jingshakri kaba khuid kaba hok kumba ki paidbah ki la shaniah ia ki bad ki la pynjop ia ki.
 U Deputy Commissioner ka West Jaintia Hills u ma Garod LSN Dykes u la pynbam smai ia kitei ki 29 ngut ki MDCs bad ha kaba kut u la ai ka jingkhublei halor ka jingjop jong ki ia kane ka Election ba dang shudep bad u la kyntu ruh ia ki ba kin trei shitom na ka bynta ka roi ka par jong ka District baroh kawei.
Ka dorbar ka la sdang ym kum ha ka por kaba la buh bad la iohi ba u DC kum u Chairman u la hap ban ap ia ki dkhot haduh ym duna ia ka 20 minit eiei naba ki la wan khlem biang por uwei hadien uwei pat.
U MDC ka Saphai, u ma Habahun Dkhar u la wan rung hapoh iing Dorbar hadien 40 minit ba la iaid ka dorbar. Donbok ba hamar ba u DC u la khot ia ka kyrteng jong u, u la wan rung bad u la hap ban iaid beit beit sha jaka shnong u DC ban bam smai ia lade khlem da ioh ban shong shi se-khon ruh.
Napdeng kiba la bam smai mynta ka sngi ki kynthup ia ar ngut ki MDCs kiba la jop saw sien kynthih, u ma Richard Sing Lyngdoh na Sutnga NOngkhlieh bad u ma Hollando Lamin na War Central nalor kiwei pat ki MDC kiba rim kiba kynthup ia ar ngut ki CEM barim u ma Thombor Shiwat bad u ma Awhoi Andrew Shullai nalor u Phasmon Dkhar bad Lasky Rymbai kiba la jop na Musniang Rangad bad Tuber.
Napdeng kiba thymmai kiba la bam smai ki kynthup ia u ma Lakhon Biam uba la jop na Nangbah, u ma Saron Pasweth uba la pynliem ia u ma Moonlight Pariat bad u ma Lakhon DKhar uba la pynrem ia u ma Madonbai Rymbai.
Ha kane ka kynti la iohi ba ki MDCs ha JHADC ki la don U Doctorate, u Dr. Sanki Shangpung, u Engineer bad SDO barim ka tnad PWD u ma Lakhon Biam bad u ba la pyndep ia ka LLB, u samla Krison Langstang na Sumer.
Ka Jingiajied ia u Chairman bad ia u CEM ka JHADC kan long lashai ka sngi ha ka por 10:00 mynstep ia u Chairman bad ha ka por 2:00 pm pat ia u CEM.
U ma Lakhon Biam na ka UDP u lah ban shah jied kum u Chairman katkumka jingmynjor ki ar party (NPP bad UDP) katba u ma THombor Shiwat na ka NPP un long kum u CEM ka JHADC.
|
↧
Jop ka Lawsohtun bad ka Seven Brothers ha ka phutbol shipai Assam Rifles
Shillong: Ka Lawsohtun bad ka Seven Brothers ki la ioh ia ka jingjop ha ka jingiakhun myn hynnin ka sngi ha ka lumping 4th Assam Rifles Invitational Football Tournament ba la long ha madan Assam Rifles ha Laitkor.
Ha ka jingiakhun kaba mynstep, ka Lawsohtun ka la pynliem ia ka Eastern Pirates d 3-1. Ia kine ki kol la thep da u Riborlang Dkhar ha ka 6 minit ia ka Lawsohtun hynrei la shah pynphai hadien 2 minit ha u Samuel Shadap ka Pirates.
Hynrei hadien kane, ka la Lawsohtun ka la ioh biang ban thep sa ar kol da u Roikhih Nongtdu (61′) bad u Dibinroy Nongspung (63′).
Ha ka jingiakhun ha ka por janmiet, ka Seven Brothers ka la pynliem ia ka Sawmer da 3-2.
Ka Seven Brothers ka la thep ha ka 22 minit da u Donlad Diengdoh hynrei na ka Sawmer la pynphai da u Teiban Khongkai ha ka 42 minit. Hynrei ha ka 51 minit, ka Seven Brothers ka la thep biang da u Khongkai 51 minit.
Mynta ka sngi, ka Smit kan iakhun ia ka Kith United por 10:30 AM, bad ka Assam Rifles pyrshah ia ka Umphrup por 1:30PM. Baroh ki jingialehkai kin long ha Laitkor.
↧
NNSSCC: Mynta ka sngi yn iakhun ka Lajong pyrshah ia ka Umiam
Nongstoiñ: Ka jingiakhun quarter final kaba lai jong ka lympung 2nd Invitation Knock out Football Tournament 2018-19, bala pyniaid da ka New Nongstoiñ Sport Social & Cultural Club (NNSSCC) kan long biang mynta ka sngi ha kaba ki ar tylli ki kynhun ki ban iakhun ha katei ka quarter final kin long hapdeng ka Shillong Lajong FC pyrshah ia ka Umiam FC.
Katei ka jingiakhun ka ban long hapdeng kitei ki ar tylli ki kynhun la khih lynti ruh ba kan long kaba itynnad bha namar ba baroh ar tylli ki kynhun ki long kiba khlain bor bha bad kiba don ruh ia ki rangialehkai kiba kynsai bad kum ban shu pynkynmaw ba ka Umiam Fc kala lah ban pynliem noh ia ka Kith United kaba dei ruh kawei ka kynhun ba pawnam bha hapoh ka thaiñ WKHD.
Na ka liang jong ki nong pyniaid kila pyntip ba katei ka jingialehkai quarter ka ban long ha pdeng kitei ki ar tylli ki kynhun kan sdang ha kapor 1:30 PM ha ka madan ialehkai jong ka shnong New Nongstoiñ kumta na ka liang jong ka NNSSCC ka khot ka wer ia ki piadbah ka thaiñ ba kin wan ban sakhi dala ki jong ki khmat ia katei ka jingiakhun hapdeng kitei ki ar tylli ki kynhun.
↧
↧
Ai jinghikai ha ka thaw ka thain ha shnong Mawlong
Jowai: Ka NYK Jowai, ka la ioh ban pynlong ia ka jingai jing hikai ha ka shnong Mawlong halor ka kam thain jingthain, kaba la sdang naduh ka 7tarik Nohprah 2018 haduh ka 7tarik Lber 2019.
Ia kane ka prokram la ioh ban pynlong man la ka sngi naduh ka por 7.00 haduh 8.00 baje mynstep, ha kaba la pynlong ha Community Hall jong ka shnong Mawlong. Ki nongiashim bynta ki ki long 50 ngut, ha kaba 30 ngut ki shynrang bad 20 ngut ki kynthei. Ki nongai jinghikai ha kane ka prokram ki don 6 ngut bad ki long ki briew kiba la tbit bha ha ka kam thaiñ. Ia kane ka prokram la pynlong kum shi bynta ban ai jinghikai ia ki samla ki bym don kam don jam ba kin nang ban thaiñ ia ki jait jingthaiñ khnang ba kin lah ban kamai jakpoh na kane ka kam bad kumjuh ban pynneh pynsah ia ka rukom thaiñ jong ki barim bajah. Lyngba kane ka prokram la wanrah shibun ka jingmyntoi ia ki samla kiba la nang ban thain jingthaiñ lyngba ka jingioh jinghikai jong ki.
↧
Ka Jingiaseng Samla KJP Synod Mihngi ba 17 ha Wapung
Jowai: Mynta ka sngi Thohdieng kan sdang ka jingiaseng samla kaba 17 jong ka KJP Synod Mihngi ha Balang Wapungskur, East Jaintia Hills bad ki dkhot ka Balang baroh ki la dep ban pynkhreh nadong shadong ban pdiang ia katei ka jingiaseng kaba heh jong ka Balang Presbyterian.
Ka khubor kaba la ioh na u Pastor T Dkhar, uba dei u Pastor In charge ka Balang Wapung, u la iathuh ba kane ka jingiaseng samla ka KJP Synod Mihngi kan kut ha ka sngi U Blei bad ha kane ka sngi, ki nongiathuh khana lane nongkren ba kyrpang ki long u Pastor BD Shangdiar u ban ai ka jingkren ha ka jingiaseng paidbah haka por 10:00 mynstep bad u Pastor SG Ryngksai ha ka jingiaseng nohphai sngi kaba 1:30 pm katba u Pastor EL Kharmawphlang pat un ai ka jingkren halor ka subject ba la buh ha ka jingiaseng por 6:30pm.
Na ka liang ka Balang ka la mana ia kino kino ki ba wan die jingbam sha katei ka jaka.
Ha kajuh ka por ka Balang ka khot ka wer ia baroh ki para ba ngeit na kiba lang bapher bapher bad kiba na kiwei pat ki Balang sha katei ka jingiaseng ba kin ioh ka jingkyrkhu na u Trai.
Kane ka long katkum u Kyrwoh na u Tymmen Basan, Tbn S.Ed Rymbai ka Balang Wapungskur.
↧
Donkam shwa ki ain Riti Dustur, ka VAB hadien, ong u Bah Teinwel
Shillong: U Chief Executive Member (CEM) ba thymmai ka Khasi Hills Autonomous District Council (KHADC) u Bah Teinwel Dkhar u la ong ba ia ka Village Administration Bill (VAB) yn sa peit hadien hynrei kaba donkam eh mynta ka long ban pynlong ain ne codify ban ithuh ia ki riti dustur jong ki shnong, ki Hima, ki Raid.
Haba kren myn hynnin ka sngi sha ki lad pathai khubor hadien ba la shah jied kum u CEM, u bah Teinwel u la ong ba, “Ngi la phah ia ki bill ha ki por ba la dep hynrei ki sah teng bad kane ka dei kaba donkam bha ban pynwan dur ia ka jingtreikam jong ka Council”, u la ong.
U la ong biang, “Hap ban pynbeit ia kane bad ngin shim khia ia ka Village Administration Bill, ban eksamin biang hynrei kaba donkam eh ka dei ka jingpynlong ain ia ki riti dustur jong kito ki Hima ki bym pat leh ia kane”.
Katkum ka jingong u CEM, ka jingbym pynlong ain ia ki riti dustur, ka la pyntlot ia ki shnong ki thaw, ki raid ki hima.
“Ngin phah pynbiang ia ki shnong ki thaw ban pynlong ain ia ki riti dustur namar ba khlem pynlong ain ne codify, ka shong tlot ka synshar ka khadar, ia VAB ia mynta shi por, ngin eksamin bha hynrei ka kham donkam shwa ka jingpynlong ain ne Codify ia ki riti dustur”, u la bynrap.
U Bah Teinwel u la ong ba kaba kongsan mynta ka donkam ban pynwan dur bha ia ka rukom treikam ka Council khnang ba ki Bill kiba la phah kin nym shah kyntait kumba la jia ha ki por ba la dep.
“Ngi donkam ban pynwan dur bha ia ki tnad ha Council khnang lada ngi rah ia ki mat shabar, ngin long kiba jop, balei ki phiel ki mat jong ngi haba phah sha ka sorkar ka long namar ba khlem da pyrkhat, hato lada ki Bill ki poi sha ka sorkar ki long khaw ne kiban jop ne kiban rem, namar ngi dei ban iaid ha ka lynti kaba dei. Ngin leh ia kaba bha tam bad ngin iashong da ka Executive Committee khnang ba ngin ioh ia ki nongtrei kiba lah”, u la ong.
U la ong ba lada donkam wat ban wanrah da ki ophisar MCS, ban pynwan dur bha ia ka tnad Engeneering ban pynkhlain ia ka Council.
“Lada sngew donkam lah ban shim da ki ophisar na ka jylla, ngin pyrshang ngin sa eksamin ia kane”, u la ong bad bynrap, “Ngin buddien ia ki kam ba la leh ka EC barim ka kam Them Iewmawlong jong ki kharmetor, ka jingai license khaïi ia ki bar jylla, ka Bill ILP, Clan Bill, Lineage Bill bad kiwei.
↧
Ka jing iakob shad ha Rilum Jaintia
Shillong: Ka seng All Jaintia Dancers Association, ka dei kawei na ki seng kaba wad ia ki riew donsap ha ka Shad hapoh Rilum Jaintia ka pyntip paidbah ba kan sdang noh shen ia ka jing iakob shah ba heh duh hapoh Rilum Jaintia kaba tip kum ka Dance Jaintia Dance Dance Little Champ Season-1.
Ka Seng ka pyntip shuh shuh ba ia ki audition lah ban send lyngba ki video ha ka Whatsapp number ba ka seng ka la dep ai lyngba ki jing pynbna bad shuh shuh ia ki video ym dei ban edit bad ruh ym ban tam ia ka 2 minit bad dei ban pynpoi ia ka hapoh ka 22 tarik mynta u bnai (March). Lyngba kine ki video yn sa jied mano ki ban ioh rung sha ka Semifinal ka ban long ha ka 30 tarik mynta u bnai ha District Libraty, Mynthong Jowai. Ia kane ka jing iakob, yn shim bynta tang da ki khynnah kiba dang hapoh 14 snem ka rta. Na ka liang ka seng ka khot ka iawer baroh ki khynnah hapoh ka Rilum Jaintia kiba don ka sap ban shad ban mih shakhmat ban kum ia kane ka kabu ba ki ioh kaba biang tam. Na ka liang ka seng ka pyntip shuh shuh ha kane ka jingiakob, na ka audition yn jied direct sha ka Semifinal, ong ka kyrwoh na u President, samla K. Rymbai.
↧
↧
Mynjur ka MPCC ia U Ma Vincent bad ka Deborah kum ki kandidet MP 2019
Shillong:La iathuh ba ka Meghalaya Pradesh Congress Committee, ka la tyrwa ia ka kyrteng jong U Ma Vincent Pala bad ka Deborah Marak, kum ki kandidet ban iakhun na bynta ka elekshon Lok Sabbha na Shillong bad Tura Constituency.
Ha ki khyndiat taiew ba ladep, ka la don ka jing iakren ban pyn iakhun da U Mukul Sangma, na bynta ka Tura Constituency, hynrei la sngewthuh ba U Sangma, um shym la mynjur satia, namar ba u kwah ban dang iai bteng, ha ka sain pyrthei ha ka Jylla bad kumta ha ka jaka jongu, la tyrwa noh da ka kyrteng jong ka Deborah Marak.
U Ma Vincent Pala, ha kane ka sien kaba mynta, kan dei ka sien kaba lai, ba un ia khun kum u kandidet jong ka seng Congress, na bynta ka Shillong Lok Sabbha seat, ha kaba ula jop ar sien kynthih ha ki sien ialeh ba ladep ha ki snem 2009 bad 2014.
↧
Byrngem pyniap u khun ia ki kmie ki kpa
Shillong: U bah Stedlang Wahlang bad ka kong Ribha Dkhar, ki la ujor sha ki pulit ba u khun jongki, U Augustine Dkhar, ula leit ban pynkulmar ha ka iing shong iing sah jongki ha Moolang bad ula byrngem ruh ban pyniap ia la ki jong ki kmie ki kpa, ong ka jing ujor jongki sha ki pulit myn hynnin... Pule Shuh Shuh»
↧
Haba u Jisu u iaid lyngba ia ka shnong Jerikho, wat u dieng u isynei ia u Nongpop
Ex-Rev. K. Langrin
Lada ngin pule ia ki dkhot ha ka Gospel katba kum u Loukas 19:1 ter ter ngin shem ba u nongthoh u la thoh ia ka jingjia kaba shisha mynba u Jisu u dang don ha kane ka pyrthei. Kata ka long ba haba u Jisu u la iaid lyngba ia ka shnong Jerikho ki paidbah jong kata ka shnong ki la pdiang sngewbha ia u. Ha kata ka sngi da ki hajar hajar ki briew ki la bud ia u Jisu, namar ki niew ia u kum u riewkhraw. Nga kynmaw ha ka snem 1984 haba u Rajiv Gandhi u la wan poi ha Shillong da ki lak ngut ki briew ki la ialeit peit. Wat ma ngi naduh Riangdo ngi la leit tang namar ba ngi kwah ban iohi ia uta u Prime Minister ka ri India.
Ha ka por ba u Jisu u la leit rung ha ka shnong Jerikho, ki paidbah ki la pdiang sngewbha ia u da ki jingrwai, ki jingshad ryngkat bad ki jingriam (jain) thymmai ba ki phong. Napdeng ki hajar ki briew kiba bud ia u Jisu, don kiba bud tang ban ioh jingbam, don kiba shu leit peitkai, don kiba kwah ba u Jisu un iaroh ia ki bad don pat kiba kwah ba u Jisu un kyrkhu ia ki bad ia ki iing ki sem jong ki.
Nalor jong kiba kum kita ki briew, u la don sa uwei pat u briew uba la im marwei khlem lok khlem jor, namar ym don shuh wat uwei ruh ha kata ka shnong uba dang ieit ia u. ka kyrteng jong uta u briew ka long u Sakhaios. U Sakhaios u la im marwei namar baroh ki la isih ia u. ka Baibl kam shym iathuh la u Sakhaios u la don khun ne em. Tangba la iathuh ba u don la ka iing. Don bun ki daw ba ki briew ki la isih ia u Sakhaios. Kawei kaba kham ha khmat eh ka dei na ka daw ba u la bam klop ha kaba khrong khajna. Une u Sakhaios haba u iohsngew ba u Jisu u la wan iaid lyngba ia ka shnong Jerikho, ma u ruh u la kwah ban iohi, kum uno uta u Jisu. Hynrei kata ka jingkwah iohi jong u Sakhaios ia u Jisu ka pher bak-ly-bak na ka jingkwah iohi jong kiwei. watla u Sakhaios u kwah eh ban iohi ia u Jisu, pynban um nud ban tur shajan. ka daw ka long namar u sngewlehrain ia kita ki paidbah, ba kin tang shu iohi ia u kin kynnoh ‘U Nongpop’ bad kin bynthiew bein.
Kumta marwei u la shu peit na jngai. Hynrei kata ka jingpeit jong u na jngai kam pynhun ia u namarba um iohi. Don artylli ki daw ba u Sakhaios um iohi ia u Jisu. Kaba nyngkong ka long namar u Jisu u don hadeng jong u paidbah. Kaba ar pat ka long namar u long uba lyngkot ka rynieng.
Hynrei hapdeng jong ka jingbuhkhoh ha ka mynsiem jong u, kawei ka lad ka la plie wang ia u kumno un leh khnang ban iohi ia u Jisu. U don uwei u diengdumbur uba ieng harud kata ka lynti ba iaid u Jisu. U Sakhaios u la iohi ia uta u dieng bad u la mareh sha u bad u la kiew joit ban shong ha ki tnad jong u. Hangta kein u Sakhaios u la kmen namar ba u la lah ban iohi ia u Jisu uba um pat ju iohi mynno mynno ruh. Dei hangne ba ngi sngewthuh ba wat u dieng u isynei ia u nongpop ia uba ki briew ki la isih. Ia u briew uba ki para briew ki la isih, ka mariang pat ka peit isynei ia u. kata ka la paw shai ha kaba u diengdumbur u Ia iarap ia u Sakhaios ban iohi ia u Jisu. Khlem uta u dieng u Sakhaios um lah ban iohi ia u Jisu.
Katba u Sakhaios u dang shong halor u diengdumbur, ki tnad bad ki sla ki la khih. Hangta u Jisu u la peit sha uta u dieng bad u la iohi ia u briew. U Jisu mar ia iohi u la tip syndon ia ka kyrteng ‘Sakhaios’. U Jisu ym tang ba u iohi ia ka dur khmat bad tip ia ka kyrteng, hynrei u la iohi ruh ia ka dohnud bad ka mynsiem jong u nongpop uba la thrang eh ban kylla bamut. Na kata ka daw ba u Jisu u la ong , “Ko Sakhaios, to da hiar noh kloi kloi ruh naba ha kane ka snni ka dei ia nga ban sah ha iing jong me”. U Sakhaios u la hiar na uta u dieng da ka jingkmen bad u la ialam ia u Jisu sha iing.
Ka khubor ba nga don ban ai ia phi ki nongpule hangne ka long, “Hajar hajar ki briew ki bud ia u Jisu, hynrei la don tang uwei uba kwah ban kylla bamut”. Bad ka la jia kumta ia ki nong Jerikho. Dei na kata ka daw ba ki la ia kren khnium ia u Jisu bad ki la ia ong, “U la leit hapoh iing ban thiah basa bad u nongpop”. Ka daw ba ki paidbah ki la khnium ia u Jisu ka long namar haba ki la pdiang sngewbha ia u pynban um shym la iaroh bad um shym la kyrkhu ia ki.
Kita ki paibah ki nang khmih lynti ba u Jisu un iaroh ia ki jain thymmai jong ki, ia ki jingleh hok bad jingkhuid jong ki; bad ba un kyrkhu ia ka shnong jong ki baroh kawei. Hynrei kam long kumta kumba ki la khmih lynti. U Jisu u la iakren pynban bad u briew uba pop, U la leit rung pynban ha ka iing jong u nongpop uba la shah ibein ha ka shnong ka thaw baroh.
Balei ba u Jisu u leh kumta? Namar u Jisu um ju bishar ia ka riam ka beit bad ia ki jinglehrong ba kynja pyrthei, hynrei u peit bad bishar ia ka dohnud bad kaba shapoh. Napdeng kita ki hajar ki paidbah kiba la bud ia u, u Jisu um shym la iohi wat tang uwei ruh uba don ka mynsiem ban kylla bamut na ki pop. Ki brew ha kato ka por ki kwah ban pynpaw tang ia ki rongphong ba kynja pyrthei, katba ka dohnud jong ki ka jngai na u Blei. Dei tang u Sakhaios uba la kwah ban kylla bamut. Kumta ruh dei tang ha u Saskhaios ba u Jisu u la ong, “Ha kane ka sngi ka jingpynim ka la wan ha kane ka iing, namar u ruh u long u khun u Abraham”.
Halor kane ka jingjia to ngin ia kylli – lada u Jisu un wan iaid lyngba jong nga jong phi kaei mo ka ban jia? Baroh ki briew kin pdiang sngewbha, tangba kata ka jingpdiang jong ki kam pynhun ia u Jisu. Namar bun kin pdiang da ka jingarsap, kin pdiang ryngkat da ka jingbishni briew, da ka jinglorni para shnong, da ka jingsarong, da ka jingbymkhuid bad da ki rong ba kynja pyrthei. Lehse ha kata ka shnong Jerikho ki don 700 ne 800 iing, ba baroh ki la pdiang ia u Jisu, pynban dei tang ha ka iing jong u Sakhaios ba u Jisu u la leit rung, kaba long ka iing kaba baroh ki la isih ban peit. Lada u Jisu un wan rung ha ka shnong jong ngi ne jong phi u Jisu un sa jied hi ha ka iing jongno un leit rung. Ngi dei ban sngewthuh ba ha ka jingleit rung ha ka iing jongno jongno kam dei ka jingjied jong ngi.
Dei ma u hi u ban jied. Ngi ki briew ngim lah ban pynbor ne ban buh program ba u Jisu un wan rung ha ka iing jongno jongno watla ngi la khreh ka bam ka dih kaba biang ne lada ngi la decorate itynnad ia ka iing.
Naduh kata ka por ba u Jisu u la kyrkhu ia ka iing jong u Sakhaios la pyndap miar da ka jingkmen, da ka jingsuk, da ka burom bad ka jingkhuid watla ki briew baroh ki la isih ia u. nongpule baieit, ma nga bad ma phi ngin leh aiu ha kane ka snem kaba thymmai na ka bynta ialade, na ka bynta ki para briew bad na ka bynta u Blei uba la iai ri sumar bad iai kyrkhu ia ngi? To ngin shim ia ka nuksa ba la pyni da u Sakhaios lada ngi kwah ba u Jisu un wan jngoh ia ki iing jong ngi.
To u Blei un kyrkhu ia phi baroh katba kiba la pule ia kane ka khubor kaba lyngkot jong nga. Amen.
↧
Wat iam kongthei
|
[khana ba bteng]
Haba la mih nangta ka Lanosha pat ka khlem iawer lang shuh ia ka Kongthei Daplin namar ba la dum ka bneng. Ka Kongthei Daplin ka la ioh lad ban on lynti tang ha la ka jong ka khmat iing ia u Bah Malki. Lait nangta bran ka Lanosha bad u Bah Malki ki la iaid hi noh ban rung sa ha iing ka Lanosha. Haba la poi ha iing ka Lanosha la phah rung iaki sha kamra shongkai . La wan pdiang burom ruh da u kpa jong ka. Hadien ba la wan shongkai u Kpa kham shiphang la wan mih sa I Kmie jong ka. Ki ia shongkai lang hangta khrui . Hadien shiphang ar phang ba la dep is pynbeit ithuh ithaw ka Lanosha ka sa nang leit buh um sha noh ha kamra shet ja. Kumjuh ruh ka la nang pynsyaid lypa sa ka ja bad jyntah.
U Bah Malki u la nang ia shongkai lyngngai bad u Kpa kumjuh ka Kmie ka Lanosha. Hangne ki ia kylli pyrthew bniah ban tip bha shaphang ka kur ka jait bad ka iing ka sem. U Kpa ka Lanosha uba long shisur u la kmen eh ban iohi ruh ia u Bah Malki namar u long u briew uba kynjai.
“Nga sngew tynnat bha ka jingwan mih kai jong phi kumne…” La ong u Kpa ka Lanosha
“Hooid kein la slem ba I Lano I khot tang ba nga khlem ioh por bad buh teng man ka por…” La bynrap ktien sa u Bah Malki
Katba kine ki dang ia bun ktien la wan mih ka Lanosha bad ka sha ha ka tre, ka wan buh top ha lor ka miej ka ba don hangta ha khmat jong ki.
“Ade kumno shuh ngan dih namar dang shu dep eh kumto kumto mynta ha iing I Daplin…” La pynpaw u Bah Malki
“Dih phi…. Peit mo ka ja ruh nga khreh kyrpang ia phi… Phi dei ban bam ..” la phai ktien pynban ka Lanosha
“Hooid kein … Naduh mynne ka bapli I Lanosha I la bunkam ban shet hana ba phin bam maphi…” La pynbud ktien lem sa I Kmie ka Lanosha
U Bah Malki um don ktien shuh ban ong da kumwei, u la shu rkhie noh.
“To shu leh noh kumne, lada phi long te shu wan rah lang noh kein bad kata ka ja ruh ba ngan ban syndon khnang ban kham kloi…” La ong pat u Bah Malki
“Em phi to sa bam pat ynda la dep dihsha bam ja miet syndon kein.. balei ban kyrkieh ha ba mynta la miet hi te…” Phai ktien ka Lanosha
Ha kane ka jingkren ka Lanosha u Bah Malki u la hap ban pyndem noh toin.
Kumba la ai jingmut ka Lanosha u Bah Malki u la hap ban bamja pat hadien shi kynta ynda la dep dihsha. Ka jing bang jong ka ta ka jingiashong hangta u la mih na iing ka Lanosha haduh khyndai baje ha kata ka miet. U Kpa ka Lanosha u la hap ban leit on lynti ia u haduh ba un da jan poi ha la iing sah.
Haba u kpa u la wan phai sha iing u la ong kyndit ia la ka khun
“Lano nga te nga da I hun ia uto u briew. Phi da phikir bha ia lade. Peit ioh phi lehkai ia u. U briew uba da I kynjai bad uba I lah ban shaniah…” U da shong bhek ha ka knot kaba don harud dpei.
“Phi mut ban ong kumno Pa…” La buh jingkylli ka Lanosha….
|
↧
↧
Kren shai U bah Jemino, ba ula pynkhreh ia ka elekshon MP 2019
Shillong:U bah Jemino Mawthoh, u nongialam jong ka seng UDP, ula pynthikna myn hynnin ka janmiet, ba ula pynkhreh, ba un iakhun beit ia kane ka elekshon Lok Sabbha 2019, ka ban long ha ka 11tarik Iaiong 2019.
Haba u nongthoh khubor, ula kylli, la un iakhun kum u kandidet jong ka seng UDP, U bah Mawthoh, ula ong “Yn ia kynduh ia ki paralok kiba don ha kane ka sorkar synrop MDA, ban poi sha u kandidet monlang jong baroh ki seng, kiba don ha ka kynhun sorkar”. Ha kajuh ka por, ula pyntip, ba na ka liang jongu, ula iaid shakhmat, na ka bynta ka jing pynkhreh ia kane ka elekshon 2019, hynrei wat la katta, u don ka jingkhmih lynti ia ki paralok, kiba don ha kane ka sorkar MDA, ba kin poi sha ka jing ia beit jingmut, ban ioh ia u kandidet monlang.
U Bah Mawthoh, ula pynkynmaw ruh ba ha u snem 2014, ki seng trai ri, ba kynthup ia ka UDP, HSPDP, KHNAM, ki la tyrwa ia u, ba un iakhun kum u kandidet synrop jong ki seng trai ri, hynrei, ula ong biang “Nga khlem treh” katba ula ong shuh “Ka por ka lah ih bad nga lah kloi mynta”. U bah Mawthoh, u pynpaw ruh ba ka jing ia sngewjan, ka don bha hapdeng ki paralok MDA bad ka don ruh ka jing ia sngewthuh jingmut bad kumta u shaniah, ha ki nongialam jong ka MDA, ba kin rai ia u kandidet monlang.
U bah Mawthoh, u iathuh ruh, ba ha ka elekshon MDC, kaba la dep, ula ioh lad ban iaid sha ki 16,17 tylli ki Constituency ha Khasi bad Jaintia Hills bad ka jingthmu jongu, ka long ban ioh ban iarap ia ki kandidet MDC bad kumjuh ruh, ban pynkhreh ialade, na bynta ka elekshon MP 2019.
↧
Tuid ki phew hajar ki riew ngeit sha ka jingiaseng samla KJP Synod Mihngi
Jowai: Da ki phew phew hajar ki paid riewngeit ka Balang Presbyterian na kylleng ka rilum Khasi Jaintia ki la wan tuid sha ka Jingiaseng Samla ka KJP Synod Mihngi kaba la long ha ka Balang Presbyterian Wapung ha East Jaintia Hills District.
Ha kane ka jingiaseng kaba heh tam ki khun samla ka Balang Presbyterian la wan ban sakhi ruh da ki MDC, ki Sahep Sorkar kynthup ia u Khliehduh ka District, U Deputy Commisoner, bah FM Dopth.
U MDC, ka Tuber, Lasky Rymbai, Local MDC, Phasmoon Dkhar, MDC ka Nongjngi, Eveningstar Teron, MDC ka Bataw u Dr. Sanki Shangpung ha ryngkat u MLA ka thain bad uba dei ruh Minister ka tnad Revenue bad u Daloi ka Elaka Jowai, u ma Puramon Kynjing ki la wan ban sakhi ia katei jingiaseng.
Haba kren ha ka jingiaseng nohphai sngi, u Pastor SG Ryngksai u la ong ba ki Balang Kristian ki la don ha tmier ka jingduhnoh ia ka burom ka jong U Blei bad ia kane u la pynshong nongrim na ka Kitab u Esakial 10:18-19.
“Kum ki khun samla bad ki para bangeit, ngi ia kynduh ym tang ia ki jingeh, nga sngewsih ban ong, ba ngi shah kynnoh wat lada ngi leh ia kaba dei ha ka jingim, ngi iohi ha kine ki sngi ka jingsniew ka la kharoi bad kaba la sdang naki rympei iing Kristan bad haba ngi iohi ia kine kiei hato ka Balang ka jong U Blei ka la sdang ban kynriah noh mo nga? La buh jingkylli u pastor.
U Pastor Ryngksai u la kren halor kiba ba bun kiei kiei kiba iadei bad ka imlang ka sahlang naduh ka shong kha shongman tang kaba shu aksident la longkmie longkpa, halor ka jingpynjot ia ka Mariang haduh ba la um ki lum thah bad kiew ka jingshit, ka jingeh ha ka iohkam iohkam bad ka jinghiar ha ka ioh ka kot, ka jinghiar dor ka jingkoit jingkhiah.
“Ki samla kiba kwah jingsuk, da khongpong ki leit sha khlaw ban ioh jingsuk da ka suloi AK -47”, la bynrap utei u Pastor.
Ha ka jingiaseng kaa 10:00 pat la ioh ka jingkren na u Pastor BD Shangdiar. Ha kane ka sngi la ioh ruh ia ki choir na ka kynhun jingiaseng samla Balang Umpling, Pynursla, Nongkrem bad Nongtalang bad ha ka jingiaseng ba-ar la ioh ia ki jingrwai choir na ka jingiaseng samla balang Sadew, Choir na ki Delegates, Balang Wapung bad na ka Standing Choir jong ka JSKJP Synod Mihngi.
Ka JSKJP Synod Mihngi ka la air uh ia ka Proficiency Award halor ka jinglah bha jong ki samla ka Balang ha ka pule pulthi. Kiba ioh kane kane ka Award ki kynthup ia u Synrangskhem Nongbsap na ka Balang Lawmei, Shillong Riwar Presbytery kaba la ioh ia ka kyrdan ba 17 ha ka Top 20 list jong ka SSLC, Ka Phindari Shisha Kharbangar na Balang Mylliem, Mylliem Presbytery kaba la ioh ha ka kyrdan ba 19, U Sardonix Herald Mylliemngap na ka Balang Nongkren, Lumrapleng Presbytery ha ka kyrdan ba 20 bad u Wankerlang Sohtuh na ka Balang Laitumkhrah, Laitumkhrah Presbytery uba la ioh ha ka kyrdan ba 7.
↧
Sei pistol u Commandant ka 4th Battalion ia ki riew paidbah ha Kynshi, ka dei tang ka jingbym ia sngewthuh jingmut:SP
|
Nongstoiñ: U wei u rangbah u bala tip kyrteng kum u bah Wallambok Pyngrope na ka shnong Lyngkien Mylliem u la kynnoh ba u la shah pynap da ka pistol ha u wei u heh pulit u ba dei u Commandant jong ka 4th Battalion u ba la tip kum u bah S. Thamar.
Katkum ka jingiathuh jong u bah Wallambok u la ong ba katei ka jingjia,ka la jia hadien ba u bah Pyngrope u la leit ban iakren bad u tei u heh pulit namar ka jingshim pas ka jong u tei u heh pulit ia ka kali kaba ki shong ka long kum ba u thmu ban rat kat haduh ba ka kali ka jong ki kala jan hap sha riat.
Shuh shuh u la iathuh ruh ba katei ka jingjia k ala jia myn hynnin ka janmiet ha kawei na ki jaka jong ka shnong Kynshi WKHD katba ma u lem bad ka Iing ka sem ki dang wan na ki jingleit don kam na Tura bad u la ong ruh ba donbok ba ha katei ka por ka dang dei ar tad ka por wai jingiaseng kumta la wan ialum ki paidbah.
“Lada ym wan poi ki paidbah ha katei kapor tip shuh kaei ka ban jia ia ngi” Ong u bah Pyngrope bad hadien katei ka jingjia u la leit Sha Mairang Police Station ban ujor pyrshah ia u tei u heh Pulit.
Ha kaba iadei bad ka jingjia na ka liang jong u Superintendent of Police ka West Khasi Hills, u bah B.Laloo u la pynshai ba kadei tang ka jingbym ia sngewthuh jingmut namat ba ha katei ka por ba jia katei ka jingjia u bah S. Thamar u don tang marwei ha ka kali kaba u niah hynrei u bah Wallambok Pyngrope pat u iadon bun ngut.
Ym tang katta u SP u la ong ruh ba ha katei kapor uwei na kiba iadonlang bad u bah Pyngrope u la kynjat ruh ia u bah Thamar, kumta u la sei ia ka pistol tang ban shu iada ia lade ym ban kob ia ki.
|
↧