Ba la bun bun snem la ju iohi ha ki kot khubor ba la mih ki kynhun bapher bapher ban pynpaw ia ka jingshong syier jong ngi ki trai Ri namar ka jingjyllei ki bar jylla wat ki bar Ri kumjuh hapoh ka Ri jong ngi Khasi bad Jaintia. La iohsngew ruh ba naduh ka por ba synshar ka congress ia ka jylla hapoh ka jingialam u Dr. Mukul Sangma ka la don ka jingdawa da ki kynhun bapher bapher ba ka sorkar (Congress) kan pyntrei kam noh ia ka ILP ban khanglad ia ki mynder. Hynrei ka Congress lane u Dr. Mukul Sangma um patiaw wat la katta ki paidbah ne ki seng bapher bapher ki iai pynpaw na ka snem sha ka snem haduh ba kin kyntait noh ia ka Congress bad ki jied ia ka sorkar thymmai ka MDA ba la ialam da ka NPP da ka jingsynrop lang ki seng riewlum bad BJP. Hynrei hamar ka lyngkhuh snem jong ka MDA la mih kata ka Ain CAB na ka sorkar BJP kaba nang pynkhraw ia ka jingshong syier jong ka Ri jong ngi. Hooid ka NPP ka pynpaw ia ka jingpyrshah jong ka ia katei ka Ain jong ka paralok – jong ka ka BJP, hynrei ngim iohi satia ba kan kren ia ka ILP kaba la thrang da ki paidbah ka Ri kaba – kynthup naduh u rit u ria ki riew nang riew stad jong ka Ri Hynniew skum Hynniew trep. Na kane ka liang ka imat ba ki dkhot ka MDA kim sngew ialade ba kin dei ki khun ki ksiew ki Hynniew Trep. Namarkata – une u Nongthoh u kyntu ia ki paid ka Ri long katba long ngi la dei ban kyrshan ia ka Congress ha kane ka MDC Election wat haduh ka Election MP ruh kumjuh. Ym tang katta hynrei ia baroh ki kyrtong jong ki Party ba iatreilang bad ka NPP kynthup ia ka BJP. Ngi dei ban kyntait ha kane ka MDC Election.
R. Kyied Sing Tangsong, Nongtyngur

Editor,
Mynta ba la kut ka jingialap elekshon, bun na ki paidbah ki kwah tip noh mano ban jop, hynrei ka long kaba eh ban tip thikna kano ka party bad mano ban jop katno seat lada khlem pat niew ia ki vote. Hynrei kumba ka long ha madan ialeh ilekshon ha Jaintia Hills ka jingiaknieh ban ioh kham bun ki seat ka dei hapdeng ka NPP bad ka UDP. Kine ar para ba iatbeh. Ka INC kaba ju jop bha mynshuwa, mynta ka la duna lyer. Kumba ka long ka UDP bad ka NPP ki iaknieh ban long banyngkong, tangba ka shong mar katno seat kin ia-ioh. Lada jia ba ki duna ki lah ruh ban poi sha ka jingiathaw sorkar lang ha JHADC. Kiwei kiwei ki party kum ka PDF, Independent bad HSPDP ki i tlot palat. Hynrei la katta ruh ka PDF bad Independent ki lah ban pynkyndit ha shi jaka ne ar jaka.
Ha Khasi Hills kumba ka long mynta ka INC ka kham khlain ha ki bun jaka hynrei, tang na lade, kan ym pat poi sha ka thong ban thaw sorkar. Ka donkam ia kiwei ban iarap ia ka. Hynrei ym lah ban khein snep ia ka UDP bad NPP namar kine ruh ki khlain ha bun ki constituency. Marwei marwei lehse kin ym lah ban thaw sorkar, hynrei lada ki iasynrop lang ki lah ban poi sha ka thong. La jar katta ruh, ym lah ban kheinsep ia ka PDF bad HSPDP. Kine ki lah ban pynkyndit ha ki katto katne ki jaka, hynrei marwei marwei kin ym poi shano shano ruh. Kine ki lah ban bynrap lang ban iathaw sorkar ha KHADC. Kumba ka long ka lyer, ka lah ban poi sha ka jingiathaw sorkar lang hapdeng ka UDP, NPP, PDF bad HSPDP. Hynrei ka HSPDP kam khlain shuh kumba long mynshuwa. Wat ha Mawthadraishan, Nongstoin, Rambrai-Jyrngam bad Mawkyrwat ruh ka iaksaid tyngeh ban poi sha ka thong, tip ka lah ne em ban jop.
Khublei shibun.
Bah Philip Marwein, Via-Email.

Nongpoh: Hynnin ka janmiet ha ka por 4:30 baje ei ei, ki la don haduh lai tylli ki kali kiba la kylla khongpong ha kajuh ka jaka kaba shait kylla kali surokbah NH-6 kaba hap hapoh ka shnong Quinine, Ri Bhoi District.
Kitei ki kali kiba la kylla ha katei ka jaka, ki kynthup ia ar-tylli ki Swift Dzire, kiba don ia u number AS-11-H-4322, ML-08/D-1916 bad kawei na Renault Kwid ka bym pat don number.

Ha ka jingkylla kitei ki kali ha katei ka jaka, ym shem la don kiba mynsaw jur, hynrei ki shu don tang kiba mynsaw malu mala. La ioh jingtip ba ka daw kaba la pynlong ia ka jingkylla jong kitei ki kali, ka lah ban dei na ka jinghap slap.

Shillong: Hadien ba ki pulit pahara, kiba peit ia ka kong Agnes Kharshiing, ki la ai jingmynjur, kumta ka kong Agnes, ka la kynriah noh mynta sha ka jaka sah jongka ha Laitumkhrah, naduh ka 21tarik Rymphang 2019.
Ka kong Agnes, ka la mih na ka jingshah sumar ha NEIGRIMS, ha ka 10tarik Nohprah 2018 bad ka la sah ha iing jong u para jongka, haduh ka 21tarik Rymphang 2019. La iathuh ruh ba mynta, ka kong Agnes, ka lah ban ia kynduh briew hapdeng ka por 10baje mynstep haduh 1baje nohsngi.

Shillong:Ka jingniew vote, na bynta ki elekshon ha Khasi bad Jaintia Hills, kan long ha ka 2tarik Lber 2019, ong U Bah T Dkhar, Commissioner & Secretary District Council Affairs, ka sorkar Jylla.
Ha Khasi Hills, ka jingniew vote kan long ha madan Polo, katba ha Jaintia Hills, ka jing niew vote kan long ha ophis U DC ha Khliehriat bad ha Jaintia College. Ka jingniew vote kan long ruh ha ki Civil Sub Division ha Amlarem, Sohra bad ha Mairang ruh.

Nongstoiñ: Wat hapdeng ka jingpynthut jong u slap, ka jingjied ia ki nongmih khmat sha ka iing dorbar jong ka District Council ka la long kaba iaid beit iaid ryntih hapoh Nongstoiñ bad ha baroh kawei ka District jong ka West Khasi Hills bad ka jingwan poi jong ki nongthep vote ha baroh kawei ka District ka la kot shaduh ka 80.20%.
Ki paidbah ki la ia mih ryntih naduh ka por 7:00 baje mynstep, ban leit thep ia ki vote jong ki ha manla ki Polling Station bad la sakhi ruh ha ki katto katne tylli ki Polling Station ba ki paidbah ki la ia ieng da u lain u ba jrong na ka bynta ban leit ai ia ka vote ka jong ki
Haba phai sha Nongstoiñ ki nongthep vote na ki baroh ki Polling Station kila don haduh 29629 kaba kynthup ia 10751 ki shynrang bad 14878 ki kynthei bad kiba la poi ban wan thep vote baroh ki long 22679 kaba la kot shaduh ka 76.543%.
Ki kyrtong kiba la ia ieng ban ai reng ki la don baroh haduh saw ngut kiba kynthup ia u MDC ba mynta, u bah L.G Nongsiej kyrtong ka HSPDP, u bah Gabriel Wahlang kyrtong ka Congress, u bah Apsharailang Syiem kyrtong ka NPP bad u bah Tonington Tyrsa kyrtong ka UDP bad katkum ka khana paidbah la ong ba ka jingiakhun ha Nongstoiñ ka long hapdeng u kyrtong ka Congress bad u kyrtong ka NPP.
Shuh shuh haba phai pat sha Mawshynrut Konstitwensi, ki nongthep vote baroh ki don haduh 17399 kaba kynthup ia 8874 ki shynrang bad 8525 ki kynthei katba kiba la poi ban wan thep vote baroh ki long 13755 kata 79.056%.
Ki kyrtong na Mawshynrut baroh ki don baroh haduh 4 ngut, kiba kynthup ia u bah Gigur Marthong na ka NPP, I kong Badariti Lyngdoh Nonglait na ka HSPDP, u bah Morning Mawsor MDC ba mynta, na ka PDF bad u bah Srally Rashir na ka Congress bad napdeng kitei ki 4 ngut ki kyrtong ka khubor bala ioh lum ka ong ba lai ngut ki kyrtong ki don hapdeng ka jingiakhun kata ka HSPDP, Congress bad NPP.
Haba phai pat sa sha Rambrai Jyrngam Konstitwensi ki nongthep vote baroh ki don haduh 9981 kaba kynthup ia 4699 ki shynrang bad 5282 ki kynthei katba kiba la poi ban wan thep vote baroh ki long 7228 kata 72.418%.
Ha Rambrai Jyrngam ki kyrtong ki don 3 ngut kiba kynthup ia u bah K.P Pangniang na ka HSPDP, Bajop Pyngrope na ka Congress bad u bah World Champion Paliar na ka NPP bad hangne ka jingiakhun ka long beit ha baroh lai ngut ki kyrtong.
Katba sha Mairang Konstitwensi pat ki ki nongthep vote baroh ki don haduh 39554 kaba kynthup ia 19451 ki shynrang bad 20103 ki kynthei katba kiba la poi ban wan thep vote baroh ki long 32891 kata 83.155%.
Ki kyrtong kiba ieng na Mairang ki long para marwei kata hapdeng u sitting MDC u bah Equator Nongrang na ka UDP bad u bah Batskhem Ryntathiang Congress.

Nongpoh: Ha ka sngi kaba ki paidbah kin ioh ban leit jied ia ki nongmihkhmat sha ka Khasi Hills Autonomous District Council, la ioh jingtip ba ka Umroi Constituency ka la wan shakhmat halor ka jingdon ki paidbah kiba la leit ban thep vote bad kata ka long hadien ba ka la kiew haduh 81.58%, hynrei kaba duna tam ka dei ka Jirang Constituency, hadien ba ka la poi tang 70.91%. Haba khein kyllum halor ka jingwan ki nongthep Vote ka Ri Bhoi ka la poi 76.87%.

Hadien ka Umroi, ka Umsning Contituency ka la wan ha ka kyrdan kaba ar ha ka jingpoi ki nongthep Vote, kata hadien ba ka la poi sha ka 79.46%, bud nangta sa ka Nongpoh Constituency kaba la poi 78.18%, katba ha Mawhati Constituency ka jingwan ki nongthep vote ka la poi 74.39%.

Jowai:Ki shipai ngam um ka Indian Navy kiba don ha Khloo Ryngksan ki la ioh ban sei ia ka met jong uwei na ki 15 ngut ki nongbylla kiba la shah tep um ha kawei na ki krem dewiong kaba don ha Lumthari Khloo Ryngksan naduh 13 tarik u bnai Nohprah u snem ba la dep.

Ka khubor na ka kynhun pyllait um, ki Navy bad NDRF ka la iathuh katei ka met kaba la pyut bad ka bym lah shuh ban ithuh la aiti sha ki pulit bad na ka liang ki pulit la kit ia katei ka met sha Khliehriat CHC ban pyndep iaka Post Mortem.
Ki Doctor ki la shim ruh ia ki katto katne ki dkhot met ban aiti sha ki pulit ban phah sha Forensic Lab – sha Hyderabad lane sha Calcutta ban leh ia ka DNA bad ithuh ia katei ka met ba kadei jong no.
KI Shipai iarap ki la lap bad iohi haduh saw tylli ki met bad ha ka 16 tarik u bnai ba la dep ki la ioh sei ia ka met jong u Amir Hussain bad mynta pat sa kane ka met bym lah ban ithuh satia.
Sa ar tylli pat kiba la iohi lyngba ki kor, ka kynhun ka Indian Navy ki dang trei shitom ban iohsei ia ki sha bar na katei ka krem.
Ia kane ka khubor la pyntikna ruh da u DC ka East Jaintia Hills, ha kaba u la ong ruh ba ka kynhun ki shipai Navy bad NDRF ki la trei shitom tyngeh halor kane ka jingjia ha Khloo Ryngksan

Shillong: Lada kam kylla da kumwei pat, ki MLA thymmai ha u snem 2023, kin sa ioh ban shong dorbar ha ka iing dorbar thymmai.

Mynta ka High Power Committee (HPC) kaba khlieh da u shongknor ka iing dorbar u Dr Donkupar Roy, ka la rai ban pyndep ia ka jingshna ia ka hapoh lai snem ha Mawdiangdiang.

Ka iing dorbar thawain ka Meghalaya ka la pluh ha ka 9 tariik Kyllalyngkot 2001 bad haduh 18 snem, ka sorkar kam pat lah ban tei ia ka haduh kine ki sngi.

Haba kren sha ki lad pathai khubor hadien ba la wai ka jingialang, Myntri rangbah ka jylla u Conrad K Sangma u la  ong ba la dep rai ban pyndep ia ka jingshna ia ka iing dorbar thawain ha Mawdiangdiang, Shillong hapoh lai snem kaban sa sdang noh shen.

“Ngi la dep rai ban sdang noh ia ka kam bad yn pyndep hapoh lai snem. Ka Uttar Pradesh Rajkiya Nirman Nigam limited, kaba dei ka kompeni ka sorkar kan pyntrei ia kane ka iing dorbar”, la ong u Conrad.

U Conrad u la ong ba ka jinglut ban tei kan long T.127 klur kaba la khein da ka kompeni.

Haba kylli, nangno ka sorkar kan ioh pisa ban shna ia kane ka iing, u Conrad u la ong b aka sorkar kan sa pan pisa n aka sorkar pdeng, nalade bad kumjuh kan shim da ka ram na ki shlem ai pisa bapher bapher.

“Ngin wad pisa na ka sorkar pdeng, ngin sei nalade bad ngin sa pan ram ruh na ki shlem ai pisa bapher bapher”, la ong u Conrad.

Ha kane ka jingialang ka HPC la wan iashim bynta ki dkhot ba kynthup ia u Myntri Rangbah u Conrad K Sangma, u Lamphang ka ing dorbar, u Dr Donkupar Roy, u nongialam liangpyrshah u Dr Mukul Sangma bad kiwei.

Lah ban kdew ba ka iing dorbar ka Meghalaya ka la kylla dpei ha u snem 2001 bad ka la iaid 18 snem mynta ba ka jylla ka la shu shong dorbar ha iing wai namar ba kam pat don ka iing la kajong.

Ha kawei pat ka khubor, U Conrad Sangma, myntri rangbah ka Jylla, u thoh ha ka twitter “La buh ia ka por ban pyndep ia ka jingtrei ia ka iing dorbar thymmai ha Mawdiangdiang, Shillong”.

Katei ka jingthoh jong U Conrad, ka dei hadien ka jing ia kynduh jong ka  High Power Committee (HPC) mynta ka sngi, ha kaba la khlieh da u lamphang dorbar Jylla, U  Dr.Donkupar Roy.

Islamabad:U shipai suin, uba la shah kem ha ki shipai Pakistan hynnin ka sngi, yn pyllait noh ia u, ha ka sngi thohdieng, ong U Imran Khan, myntri rangbahduh ka Ri Pakistan mynta ka sngi.

Haba kren ha ka iing dorbar jong ka National Assembly, U Khan u ong ba ka jing ia dei ka India bad ka Pakistan, kam dei satia ban iaid sha ba palat pud, ha kaba ula kren shai ruh ba lada ka long kumta, ka Pakistan, ka hap ban ialeh pyrshah. “Ki Ri ki jot thiaw, na ka jing ia khein jingkhein bakla” ong shuh U Khan bad ula ong shuh ba ka jingkwah ialeh thma ka don ha India bad u ong shuh “Nga tieng, ba ioh ka dei ka jing bakla khein jingkhein”.

“Ka thma kam dei ka lynti bad lada ka India, ka shim ia kano kano ka jing ia pyni bor, kumta ngi hap ban ialeh pyrshah”. Katei ka dorbar jong ka Parliament jong ka Pakistan, ka dei kaba la khot khnang, namar ka jing ia kynad hapdeng ka India ha ki khyndiat sngi ba ladep.

“Ka jinghiar thma kylliang jongngi, ka dei ban pyni ba ngi lah bad ba ngi don ia ka thong ruh” ong U Imran Khan.

Ki shipai Pakistan, ki la ioh kem hynnin ka sngi, ia U Abhinandan Varthaman, Wing Commander jong ka Indian Air Force, hadien ba ka liengsuin ia pom jongu, ka la hap sha Pakistan ha ka jing ia khun jongu bad ka liengsuin kaba wan tur na Pakistan.

KA MEGHALAYA LEGISLATIVE ASSEMBLY lane kata kaba ki Khot ka Meghalaya  Legislative Assembly (Meghalaya White House). Imat haduh ki Khun jongngi ruh kan long tang ka jing phoh sniew ne kumno ??? Katta phew snem Lah dep ban pynpra ia kato ka barim ha Khyndaillad haduh mynta ruh ym pat dep ban Thaw Ia kaba thymmai. Hato iathuh ma phi katno lah don Snem mynta? Imat ki kwah thew tara jur  bad ka Crowbourough namar ba ki iadon mar pyrshah lumto. Katno sien ki lah dep ban wanrah hapoh iing Dorbar ia kane ka phang? Katno sien ka Budget ka lah kiew namar bym lah ban pyn trei biang por? Hato kin thaw thymmai ne kumno paitbah ia kata iing Thaw Ain jong ka Sorkar Jylla ? Lah dei ban leh RTI ban tip naduh ba ki wanrah nyngkong ha iing Dorbar ka shongdor katno bad mynta ka shong dor katno ban pyn lut Pisa ki paitbah ban Thaw ia ka iing shna ain jongnga jongphi. Phra snem synshar ka Congress ruh khlem pat dep ei ei.

Wanlem Langchiang

Shillong: U  Commissioner & Secretary jong ka sorkar  Meghalaya, District Council Affairs Department, ula pyntip ba ka jingniew vote na bynta ka elekshon MDC 2019, kan long ha ki jaka ba la pynbeit harum.

Na bynta ka  6-Sohryngkham, 7-Mawkynrew, 8-Nongkrem, 9-Lyngkyrdem-Laitkroh bad ka  10-Nongshken, yn pynlong ha Training Halls (hajan ka Dalang Stage), ka jaka niew vote na bynta ka  12-Mawsynram, 14-Mylliem kan long ha Dalang Open Stage Polo 5^th Ground, Shillong. Ha Indoor Stadium, JN Sports Complex, Shillong yn niew vote na bynta ka  15-Laban-Mawprem, 16-Nongthymmai, 17-Laitumkhrah-Malki, 18-Mawkhar-Pynthorumkhrah, 19-Jaiaw, 20-Mawlai, 21-Mawphlang-Diengiei bad ka 22-Nongspung-Sohiong.

Ka jingniew vote, kan long ha ka 2tarik Lber 2019, hynrei kawei kaba ngi tip shai, ka long ba ki Executive Committee ha Khasi bad Jaintia District Council, kin synshar ki kynhun synrop, kiba don ha ka sorkar Meghalaya Demo cratic Alliance (MDA) bad kaba sniewbok ha kane ka kynti, kan dei hi ka Congress, namar ba ka don ha ka liang pyrshah ha ka dorbar Jylla bad kumta kan nym lah da lei lei ruh ban thaw Executive Committee ha kitei ki ar tylli ki District Council bad namar ba kan nym lah hi dalade ban poi sha ka jingkhein kaba long 15ngut tam ki MDC ha baroh ar ki Council.
Na ki jingkhein, kiba la sdang ioh jingtip haduh mynta, la iohi, kumba kan nym don kawei ruh ka seng, ka ban ioh phew ngut ki MDC ha baroh ar tylli ki District Council, hynrei kin don tang kiba ioh shi dak jingkhein lane kaba long hapoh ka 10ngut bad katei kan plie lad ia ka jing ia lum lang jong ki seng trai ri, kiba don ha ka seng synrop MDA bad nangta wat ba kin pyrshang ban kdiah phruk ia ka ktem jong ka Congress, mar ia dep niew vote ha ka 2tarik Lber 2019 bad hadien kata, kan sdang sa ka jing kynshi kyneh bad ka jing ia tim ia tla, ia la ki jong ki nong mihkhmat, ha kaba kan don ka jing kynnoh ba ki phet seng lane ki kynthih dieng kper; hynrei katei ka jingkren kam don jingmut eiei ruh em, namar ba kam pat don ka ain kaba khang ia ka jing kyntiap seng ha ki iing dorbar ha District Council.
Ha ki san snem ba ladep, ngi la iohi ia ki bun ngut ki Chief Executive Member ki Executive Committee bad ki jing ia kynthih jong ki MDC, ha kaba wat kiba thymmai ruh, kiba dang shu dep jied ha u snem 2016, hynrei ki la ia kynthih bunsien, na kawei ka seng sha kawei pat bad ha kane ka kynti ruh, khlem pep, kum kitei ki jingjia kin iai bteng ban jia, khamtam lada dei ki bym don ha syndah jong ka kynhun kaba synshar ha ka sorkar Jylla.
Katba ka jia ha ka jing tyllun jong ka sain hima sima, hynrei ngi hap ban khmih lynti, ba ka Council kaba thymmai, kan lah ban leh eiei ia ki mat kiba ka jait bynriew ka khmih lynti bad kata ka long ba ka Council, kan ieng halor ka nongrim ban pynneh ia ka jing long kyrpang jong ka jaitbynriew Khasi Pnar bad ka dei hi tang katei kaba ha khmat duh. [rms]

U heh shipai suin, uba la shah kem ha ki shipai Pakistan, U  Wing Commander Abhinandan Varthaman, ula wan phai sha India ha khappud jong ka  Wagah-Attari bad katei ka dei hadien ar sngi, ba ula shah set ha Pakistan, hadien ba ula kynthih na ka liengsuin jongu. Kiba ha iing jong U Abhinandan, ki la wan poi sha Delhi na Chennai hynnin ka janmiet, ong ka khubor.

Kham mynshwa ka Pakistan, ka la kyntait ban pynphai ia U Abhinandan, da ka liengsuin bad ym na khappud jong ka  Attari-Wagah. Ki lad khubor ki iathuh ba ki heh sorkar India, ki la kren ia ki heh sorkar Pakistan, hadien ba U Imran Khan, myntri rangbahduh, ula pynbna ban pyllait noh ia U Abhinandan bad la ai jingmut ia ka Pakistan, ban ailad ba un wan phai da ka liengsuin, hynrei ka Pakistan, ka la kyntait bad ka la pyntip, ba un wan phai lyngba katei ka khappud jong ka India-Pakistan.

Ka sorkar America, ka tyrwa ban siew shi million dollar ia kino kino kiba lah ban ai jingtip, na ka bynta ban ioh kem mardor ia u snar lehnoh ba satar, uba dei u khun jong U Osama Bin Laden.

Ka tnat kam poh iing jong ka sorkar America, ka pynbna ba katei ka dei ka khusnam, na ka bynta ban lap ia U  Hamza bin Laden, wat lada u don ha kano kano ka Ri ruh, na ka bynta ban pynshitom halor ki kam pyntriem jongu.

La ong da ka tnat poh iing ba U Hamza bin Laden, u dei uwei na ki snar jong ka seng ehrang  al-Qaeda, uba dei uwei na kiba don ha khmat eh jong katei ka seng. U kpa jong U Hamza, U Osama Bin Laden, ula shah pyniap ha ki shipai Pakistan ha U Jymmang 2011.

U Hamza bin Laden, u don 30snem ka rta bad u dei u ehrang ba snar bha, ha kaba la ai ia u, ia katei ka nam ha U Kyllalyngkot 2017.

Utei u khun U Bin Laden, ula pynphriang ia ki khubor ha ka internet, ha kaba u pynshlur ban hiar thma ia ki ri sepngi, na ka bynta ban pynhiar kput, halor ka jingshah pyniap jong u kpa jongu ha u snem 2011.

La iathuh ba U Hamza, u ia poi kha bad ka khun jong U  Mohammed Atta, uba dei uwei na ki snar ehrang, uba don bynta ha ka jinghiar thma ia ka US ha ka 9/11.

Haduh mynta, ym shym la tip satia haei ba u don U Hamza, wat la ki don kiba ong ba u shong u sah ha Iran bad ka kmie jongu, hynrei katei ruh ka long ka mat ka bym shai satia, namar ba ka Al Qaeda, kam iahap satia ia ki riew niam Shiite, kiba don bun bah ha katei ka Ri.

Jammu: Arngut ki pulit CRP bad arngut ki heh pulit jong ka  Jammu and Kashmir, ki la shah siat iap mynta ka sngi bad sa san ngut kiwei pat ki la mynsaw, ha ka jing iakhun bad ki ehrang ha ki bynta jong ka  Babagund Langate ha  Kupwara district jong ka Jammu and Kashmir mynta ka sngi. Nalor ki shipai, ula don ruh uwei u riew paidbah, uba la shah siat iap, ha katei ka jing ialeh hapdeng ki shipai bad ki ehrang.

Ki lad khubor ki iathuh ba katba ki CRP bad ki shipai ki dang leit peit ia ki met iap jong ki ehrang, ula don uwei pat uba la shim ba ula iap ha ka jing shah siat, hynrei, ula khie biang na ka jingthiah iap bad u sa siat naphang ia kitei ki shipai kiba don ha katei ka jaka.

Katei ka jing ia siat, ka la jia hynnin ka miet, haba ki shipai kiba kynthup ia ka  22 RR, 92 Battalion CRPF bad ki  SOG ki la leit ban kerkut ia katei ka jaka kaba don ha Khanan Babagund ha Langate.

Shillong: Nangne shakhmat, ki Bill ba thaw ki district council kim dei shuh ban iaid kyllain sha ka tnad District Council Affairs (DCA) ka sorkar jylla, hynrei ki dei ban iaid beit sak sha ka ophis jong u Lat ka jylla.

            Haba pyntip ia kane mynta ka sngi hadien ba la iakynduh ia u Lat ka jylla, u CEM ka KHADC u bah HS Shylla u la ong, “Ngi la pyni ha u Lat ba katkum ka Sixth Scheduled jong ka Para 3, 4, 6, 8 bad 10 bad ka AD rule, ka la dawa ia ngi ban submit ia ki Bill sha u Lat bad ym dei sha ka DCA”.

            U Bah Shylla u la bynrap, “U Lat u la sngewthuh bad u la ong ban sted ki bill, dei ban pan ia ka jingmut na ka sorkar hynrei kane ka dei ka kam iing jongu bad ka sorkar”.

            Katkum ka jingong u bah Shylla, u Lat u la pdiang ia kane ka jingpyni jong u, ba dei ban pyniaid ia ki Bill sha u Lat. “U Lat u la pdiang bad ki bill ki dei ban wan beit sha u kampher lada kan shim por katto katno ruh namar ba kam dei ban submit sha ka sorkar jylla namar ba ngi dei ka Autonomous bad ngi dei ban ioh ia ka bor laitluid”, u la ong.

            U bah Shylla u la ong ba ia ki bill ba la thaw da ka ing dorbar ka jylla, ka Parliament ne Council ba la jied ki paidbah, dei ban leit sha u Lat ne President bad mano mano ba pyrshah dei ban leit sha ka kashari, hynrei ym dei ban eksamin ki ophisar.

            “Ia ki bill ba thaw da ka iing dorbar ka District Council, kam mut ban pule da ki ophisar ka DCA, ba kin eksamin ia ki bad kam don jingmut hi ruh ban eksamin da ki ophisar ka DCA, ka dei tang ka Kashari”, u la ong.

            U la ong ba ka Para 12A , ka sixth scheduled, ka la ong ba kano kano ka ain kaba thaw ka district council, lada ka iatyngkhuh bad ka ain ka sorkar jylla, kan iap tang ha ita i bynta ba iatyngkhuh hynrei ka jingleh ka sorkar jylla ban eksamin ia ki bill, ka long kaba bakla.

            “Ngi la ujor sha ka Supreme Court halor kane jingkhein ka sorkar tang kum ka tnad sorkar ia ka district council kaba long pyrshah katkum ka United Khasi Jaintia Autonomous District Council (Application of laws 1952)”, la ong u bah Shylla bad, “ia kane ka dorkhas mukorduma la thep hynnin ka sngi bad ka la rung ha ka registry ka Supreme Court bad kan sa bishar shen ia kane”.    

            U Bah Shylla u la iathuh ba ka jingkynduh ia u Lat ka long ruh ba un shim biang ia ki Bill kum ka Khasi Social Custom Lineage Bill, Clan Administration Bill, ka ILP bad kiwei ba la phah ka District Council ban bishar ia ki, ym ban eksamin da ka DCA bad nangne shakhmat ym dei shuh ban iaid na ka DCA.

            “U Lat u la pdiang ia kane ka jingpyni jong ngi ban iaid beit sha ophis jong u khlem iaid shuh na ka DCA”, la bynrap biang u bah Shylla.

            U la ong, “Ngi la pyni ia u Lat ba lada wan ka shithi na ka sorkar kam long ban rah sha iing dorbar hynrei lada ka wan na u Lat, ka council kan rah sha iing dorbar”.

            U la ong ba ka jingleh ka sorkar jylla ka long kaba bakla namar ba ka pynialeh elekshon hynrei ka khein pat tang kum ka tnad ia ki district council bad ka thmu ban pyntroin ruh ia ki.

            “Ngi ngeit ba kine ki MDC kiba jop thymmai kin pynneh ia ka ADC kum ka autonomous”, la ong u bah Shylla.

Ha u kyrwoh khubor ba la pyllait lang da u Bah Satly Ryngkhlem, Waheh shnong bad u Heatermoon Ryngkhlem, Secretary ka Shnong Wapungskur, East Jaintia Hills, haba pynshai halor ka jingmih khubor,  ha ka 28 tarik u  Rymphang, 2019 halor ka phang “Mih jingkulmar bun jaka ha East Jaintia Hills…”, Ka DS Wapungskur ka lyngngoh haduh kata kata ban iohi ba ia ka kyrteng ka Polling Station, Govt LP School ha Wapungskur la kdew lang ha katei ka jingkynnoh. Kumta halor katei ka jingkynnoh, ka Dorbar Shnong ka kwah ban pynshai sha ka sorkar jylla bad u paidbah kumne:

 Ka DS Wapungskur na naduh ba sdang beh ka lyer Election MDC bad haduh ba kut, kam shym la shong kli kti hynrei ka la trei shitom miet la bad sngi ban peit ngor  ia ka shongsuk shong saiñ hapoh jong ka shong khnang ba kan ym don kano kano ka jingkulmar ha katei ka Election bad kane ka jingtrei shitom jong ka DS Wapungskur, ka la long kaba jop da ka jingiaid beit iaid ryntih jong kane Election naduh ba  sdang haduh ba ka kut.

 Ka jingiathep vote MDC ha ka Wapungskur, ha Government LP School ha ka 28 tarik u  Rymphang, 2019 ka la long kaba iaid beit iaid ryntih khlem kino kino ki jingthut naduh ba sdang haduh ba kut, hynrei ym kat kum ba la kynnoh,  ba ki don ki paidbah ki bym shym la ioh ban pyndonkam ia ka hok thep vote.

 Baroh ki nongthep ha katei ka sngi kiba la wan sha ka Polling Station, ki la ioh ban pyndep ia la ka jong ka hok da ka mon lait luid jong ki hi da ka  ba thep vote suk ban kyrshan ia la ki jong ki jong ki kyrtong kiba ki mon, hynrei ym shym la don kano kano ka jingpynbor na ka liang jong ka bor shnong ia ki nongthep vote ban thep tang ha u wei u kyrtong kat kum ba la kynnoh da ki nongkynnoh ha u kot khubor

 Ha katei ka sngi thep vote, ha shong Wapungskur, kam shym la don satia kano kano ka jingiashoh iadat ne jingpyrshang ban ktah kti  la ia u Bah Piwell Shylla, kum u kyrtong lane ia ki briew jong. U Bah Piwel Shylla lem bad ki nongbud jong u ki wan jngoh ia katei ka Polling Station da kaba suk bad  mih ruh da kaba suk. Ym don u wei ruh ba pynthud ia ki kum ba la kynnoh ha u kot khubor.

 Kam shym la don satia kaba kum kata, ka jingshah byrngem ki Polling Agents jong u Bah Piwell Shylla lane kaba patan ia ki shabar kat kum ba la kynnoh ha u kot khubor.  Hynrei ki Polling Agents jong u Bah Piwell Shylla, baroh ki la pyndep ia la ki jong ki kamram ha ryngkat ka  jingjai-jai jong ka jingiathep vote naduh ba sdang haduh ba kut.

 Ka Dorbar Shnong  ha kaba iarap ia ki bor sorkar ban pyniaid ia ka Election, ka peit ngor bha ba  ym dei  ban don mano mano ruh ban pynthud iaka hok thep jong u paidbah. Kumta ka jingkynnoh ha u kot khubor ba ki la don ki briew kiba bat bun tylli ki slip thep vote ha ki kti jong ki bad knieh ruh ia ki slip thep vote na ka kti jong kiwei bad ruh thep ia ki vote jong kiwei kam shym la don satia kaba kum kata ka jingjia namar baroh kiba wan thep vote ki la ioh ban thep suk ia la ki jong ki vote.

 U Presiding Officer bad ki Polling Officers, kiba pyniaid ia ka jingiathep vote, lem bad ki Polling Agents jong ki kyrtong ba pher  ba pher ki ia don ha ka Polling Station naduh ba sdang haduh ba kut ka jingthep vote bad  kitei baroh ki  ia  sakhi lang  ba ka jingthep vote ha Polling Station, Wapungskur Govt LP School ka la long kaba iaid beit iaid ryntih bad  lada da jia ba don kum kitei ki jingjia kat kum ba la kynnoh ha u kot khubor ngim tharai ba kitei baroh kin shu ia shong kli kti bad shah ia kita ki ba leh bor ban leh katba ki mon namar ka aiñ ka don te ha katei ka sngi ruh.

 Nalor kata, ki briew sorkar kiba la wan peit ngor ia ka suk ka saiñ ha katei ka sngi, ki ia wan khmih hi ia ka jingiathep vote ha katei ka Polling Station bad ngi tharai  ba lada ki lap ba jia kat kum kitei ki jingkynnoh kumno kin shu mih na katei ka jaka khlem da leh eiei.

 Kumta halor kitei ki jingkynnoh baroh, ka DS Wapungskur ka kwah ban pynshai sha ki paidbah ba ki long ki jingkynnoh ba khlem nongrim jong ki riew shim kabu kiba kwah ban pynjah burom  bad pynkulmar shnong wat hapdeng ka jingiaidbeit ka jingiathep vote ha ka tei ka Polling Station ha Wapungskur bad ka Dorbar Shnong ka kyntu ia ki bor sorkar  bad ki paidbah ba kim dei shah ialam bakla lyngba kiba kum kitei ki jingkynnoh ba khlem nongrim bad ruh ba ka jingdawa jong ki nongkynnoh ban pynlong biang ia ka jingiathep vote ha katei ka Polling Station ka long ka ba khlem nongrim bad kaba bym lah satia ban pdiang.

Mr. Satly Ryngkhlem

Waheh Shnong Wapungskur, East Jaintia Hills.

Mr. Heatermoon Ryngkhlem

Secretary Shnong Wapungskur. East Jaintia Hills.