Shah kem ki shijur ha Laitkroh, ba ialeh khlem rain

Shillong, 11 Lber:
Ar ngut ki shijur, ki la shah kem ha ki bor pyniaid shnong jong ka Laitkroh, Kynton Syrwa mynta ka sngi bad ka daw, ka long namar ba ki ialeh khlem rain, ha iwei i sanium, iba don ha kawei ka kper, naduh ka por 12baje nohsngi, haduh ka por 6baje janmiet.
“Katei ka jingjia, ka la pynlehrain shibun ia ki khyllung khynnah, kiba iaid na katei ka jaka, haba ki iohi, ia kitei ki arngut, ba ki ialeh khlem rain” ong U bah Darius Mawlieh, haba iakren bad U Rupang mynta ka miet. Haba ki kynthei khynnah, ki la iohi, ba katei ka jing ia leh ieid jong kitei, ka iai bteng khlem sangeh, kumta, ki la wad ia ki riew rangbah jong ka shnong, kiba dang don shabar (namar ba ka dei mynsngi) bad ynda haba ki la ioh jingtip, ia katei ka jingjia, ki la leit mar mar sha katei ka jaka bad ki sa bat ia kitei ki arngut, haba ki lap dalade ruh, ba ki dang ia muja ha katei ka kam awria.
U Bah Darius, u iathuh ba utei u shynrang, uba dang i samla lud bha, u dei imat, uba dang 35snem ka rta, katba ka kynthei briew te, kaba la i thei iaw shibun bad kaba la antad, ba ka don kumba 50snem shaneng, ong U bah Mawlieh.
Kitei ki arngut, kim shym la iathuh satia ia ki kyrteng jongki, wat la utei u shynrang, u shu iathuh ia ka kyrteng sin jongu, da U Bah Donstar, hynrei katei ka thei iaw, te kam shym la iathuh satia ia ka kyrteng jongka.
Haba ka shnong, ka la pyntip sha ki pulit Sohra ruh, hynrei, kim shym la treh satia ban shimti ia katei ka kam, namar ba ki iathuh, ba kam don ain satia ban bat ia kitei ki shijur, kiba dang ia leh ieid ha katei ka Shnong.
Hynrei, ki pulit, ki la shu iathuh, ia ki shnong, ba kin dain kuna noh tang mar T.4 ne T.5 hajar bad halor ka jingai jingmut ki pulit, ki bor shnong, ki la pan kuna na kitei ki shijur, tangba kim shym la siew satia, namar ba kim don pisa.
La iathuh ba kitei ki arngut, ki kam ialade, ba ki dei kiba trei ha Lawmali bad ki shim wai da kawei ka taksi, kaba leit buh nongkha khyllung sha Sohra. Kat haduh ba thoh ia kane ka khubor, kitei ki dang don ha kti jong ki nong pyniaid shnong bad ki pulit, kim pat shym la leit shimti satia.