4 spah klur tam sah ram ki kontraktor ia ka PWD, ong u myntri

Shillong, 11 Lber:
U Myntri ka tnad PWD ka jylla u Bah Sniawbhalang Dhar u la ong ba ki kontraktor ki shah ram ia ka tnad PWD, haduh palat 4 klur haduh ha kine ki sngi.
Haba jubab ia ka jingkylli ba la wanrah da u Dr Jemino Mawthoh hapoh ka iing dorbar thawain mynta ka sngi, u Bah Dhar u la ong ba ka sorkar ka shah kit ram ha ki kontraktor namar ba kam don pisa ban siew.
“Ka pisa kaba sah ban siew da ka tnad sha ki kontraktor ka la long T.40386.86 lak (400 klur tam) bad ia ki kontraktor ba pyntreikam ia ka skhim shna surok PMGSY ka long T. 60.10 klur”, la ong u Bah Dhar.U la ong ba ka tnad kan ialeh tyngeh ban siew ia ki bill jong ki kontraktor katkum ka jingioh pisa.
Shwa ia kane, na ka liang u Dr Mawthoh u la ong ba kaei kaban jia lada kine ki kontraktor ki bym ioh ia ka Bill kin kiew sha iing kashari, bad kan long ruh ka jingban khia shuh shuh ia ka tnad lada ka long ha kane ka dur. U la pynkynmaw ia ka jingjia ia ka tnad ialehkai ka jylla kaba la shah ai mukotduma ha ka kontraktor namar ba kam siew ia ka bill kaba la kot da ki klur.