200 iing, wan buhai shnong thymmai ki khar Nepali ha ki thain Langpih

Nongstoin, 11 Lber:
Ka jingiai wan jong ki khar Nepali kiba thymmai na Nepal bad na kiwei ki jaka ban buhai shnong ha ha ka thain Langpih, ka dang iai bteng haduh kine ki sngi kiba mynta, bad katei ka jingiai bteng ban wan buhai shnong da ki briew kiba thymmai na Nepal, ha katei ka thain; ka kdew shai ba ka jingia kut bad ka rai jong ki ar ngut ki Chief Minister ka jylla Assam bad Meghalaya lyngba ka jingialang, kaba la long ha ka 5tarik Jylliew 2010, kam shymla treikam ei ei.
Katkum ka jingiakut jong kitei ki ar ngut ki Myntri Rangbah jong ka Jylla Assam bad Megha laya, ki la shim ruh ia ka rai ban yn nym shah shuh ban wan buhai shnong lane kyntur pud ha ki jaka ia kajia, da ki briew kiba thymmai bad kiba na bar bad kata ka long katkum ka para -5 jong ka jing ia teh ki ar ngut ki myntri rangbah; hynrei kumba ka long mynta ki dang don bun bah ki khar Nepali ki la wan buhai shnong thymmai ha katei ka thain.
Ia katei la pynthikna ruh katkum ka jinglap jong ka KSU Raid mynsaw Langpih Area unit, lyngba ka kyrwoh ba la phah da u Samla Jylliewsing Marwein, ha kaba u la pynpaw ba ka seng ka la lap ba ki don haduh kumba 200 iing ei ei ki khar Nepali kiba la wan buhai shnong thymmai ha ki shnong kiba kynthup ia ka shnong Umtap, Mawsikar, Umwali, Umwahsiang, Umsohram,Mawbynna, Umlon, Umwahshar, Umlon, Makoibari bad ki wei ki wei.
Na ka liang jong ka seng ha kaba iadei bad katei ka bynta kala leit ruh ban ia kynduh ia u Deputy Commissioner ka West Khasi Hills u bah S.Kharlyngdoh, myn ha ka sngi palei jong ka taiew da kaba ka la buh ia ka dorkhas halor katei ka bynta ia kaba la soi da u samla Jylliewsingh Marwein President ka Khasi Student Union (KSU) Raid Mynsaw, Langpih Area unit.
Kat kum katei ka dorkhas ba la phah da ka seng KSU sha u DC, WKH la pynpaw ba ka jingialang, kaba la long hapdeng ki myntri rangbah ka sorkar Assam bad Meghalaya, kaba la long ha ka 5tarik Jylliew 2010, ha kaba baroh arliang ki la ia rai ban ia pyrkhat tymmai ha kaba iadei bad ka border Area hapdeng ka jylla Meghalaya bad Assam bad ruh la rai ban phah ia ka kaiphot, hapoh ka 45 sngi, bad ha katei ka jingialang jong baroh arliang ki chief minister la rai ruh ba ym shah ban wan buhai shnong lane kyntur pud ha kine ki jaka ba don jing ia kynad.
Ha katei ka jingleit ia kynduh ka KSU na ka liang jong ka seng KSU, ka la kyntu bad kyrpad ia u DC, ban bishar bniah ia ka jing ia mynjur,kaba la ia soi lang da ki chief minister jong ki tei ki ar tylli ki jylla kaba la long ha katei ka tarik.
Na ka liang jong u DC ka WKHD, ha kaba iadei bad katei ka bynta u la kular ban shimkhia bad na kabynta katei ka kam un sa phah (forward) ia katei ka memorandum sha ka sorkar jylla.