Ki nongtrei sorkar ki dei ban shakri ia ka sorkar

Shillong, 11 Lber:
“Kaei ka jingmut haba ong nongtrei sorkar, ki shakri sorkar ki dei ban shakri ia ka sorkar. Ia ki nongtrei sorkar la siew ban trei ia ki kam ka sorkar”, la ong u Myntri Rangbah ka jylla u Mukul Sangma haba jubab halor ka jingiatainai halor ka jingkren jong u Lat hapoh ka iing dorbar thawain.
“Balei tang ki nongtrei sorkar kiba bit ban bat kam Rangbah Shnong, ki don bun kyrhai kiba tbit ban bat ia ka kam Rangbah Shnong”, la ong u Mukul haba kynthah ia ka jingpyrshah jong ka Synjuk ki Nongsynshar Shnong ka Bri u Hynniew trep (SNSBH) ia ka jingthmu ka sorkar ban khang lad ia ki nongtrei sorkar ban bat kam Rangbah Shnong.
U la iathuh ia kawei ka khana kaba ong, “Haba uwei u shakri jong nga u mih khlem ka jingtip, nga la kylli balei u mih khlem iathuh, bad nga la bitar namar ba u dei u shakri ba la siew da ka dor bad kumjuh ruh ki nongtrei sorkar ki dei ban iathuh ia ka sorkar haba ki bat ia ka kam Rangbah Shnong namar ba ka sorkar ka dei ka trai kaba siew tulop ia ki”.
U la ong ba ka jingthmu jong ki nongtrei sorkar, ka long ban shakri ia ka sorkar kaba la siew ia ki. Ki paidbah kiba bun ha Garo Hills bad ha Khasi Hills, ki kyrshan ia ka jingrai ka sorkar ba ki shakri sorkar ki dei ban pyntip sha ka sorkar hynrei ki don tang katto katne kiba pyrshah ia kane kiba thmu ban ialam bakla ia u paidbah, la ong u Myntri Rangbah.
“Ka sorkar kam khang ia ki nongtrei sorkar ban bat kam Rangbah Shnong hynrei ki dei ban pyntip haba ki leh kumta”, u la ong.