Ngi duwai ha U Blei, ba un pynjem ia ka dohnud u heh u hain

Shillong, 5 Rymphang:
Wat la ki don shibun ki khubor, kiba thoh shaphang ka jingshah kem jong U Bah Jeskalur Mawdoh, hynrei na ka bynta jong u kthaw jongu, U bah Bok, ka long ka kam kaba eh than, haba u pyrsa kurim jongu, u ngat ha kane ka sohsat.
Ha ka jingiakren bad U Rupang, U bah Bok, ula iathuh ba u ia kynduh ia utei u pyrsa kurim jongu, ha ka por mynstep ha Thanat ha Sardar, katba haba ki la leit peit biang, ha ka por janmiet, um shym don satia. “Ha Thanat um doh, la rah sha Court. Ym tip shaei u don” ula ong shuh shuh.
U Bah Bok, u iathuh ba u pyrsa kurim jongu, u shait u khlain. “U ong ka wan ka bike, u kiar ia kara, kum dei ia u minister” ong biang u kthaw jongu.
Utei u rangbah, uba dei na sha Mawkynrang, sharum Mairang, ula iai kren bunsien tang ia kawei ka sur bad kata ka long “Ngi pyndem jingduwai ha U Blei… ha jingduwai beit, ba un pyllait noh … Buh tang ha jingduwai, um don jingmut ba sniew”. Nalor ba u iathuh ba ka tnga bad ki khun jongu, ki don mynta ha ka jingsngewsih bad khuslai mynsiem kaba jur, na ka jingshah set jong U Bah Jeskalur, ula ong ruh ba i khun jongu, i shitom.
Kaba la ong biang da U bah Bok, ka long shuh shuh “Ngi buh tang ha jingduwai ba U Blei, un pynjem ia ka dohnud u heh u hain”. La iathuh ba U Bah Jeskalur, u don 25snem ka rta, u dei uba tip sngi bad uba im beit tang ha iing.
La iathuh shuh da U Bah Bok, uba don ha Shillong mynta ka sngi, ba ki dang thawlad ban pyllait jamin ia utei u pyrsa kurim jongu, hynrei, ula ong shuh shuh, ba kim don lad ban pan jingiarap nangno nangno ruh, namar ki dei ki nongkyndong bad ki dei kiba duk ba toi, ha kaba kim shym la ia kynduh satia wat ia U MLA jongki ruh.