Jowai, 15 Rymphang:
La jan dap 4 bnai mynta ba ka iing Mane jong ka Balang U Blei kaba don ha shnong Iongnoh ha West Jaintia Hills ka la shah khang tala ha ka bor shnong tang na ka daw ka jingiapher jingmut ki paidbah bad ki nongialam shnong.
Katei ka Iing Mane ka Balang U Blei ka ieng ha kawei ka kyntoit kaba la tip kum ka dong Iaplashait ha kaba ki nongshong shnong ha kane ka dong ki dei kiba dang long Niamtre suda.
Katei ka Iing Mane ka dei kaba la shna da ka Circle Sohmynting Balang U Blei na ka bynta ki katto katne ki longing kiba don ha katei ka shnong.
Ka khubor na ka ki nongialam Balang ki la thied ia katei ka jaka bad
ki la pan bor ruh na ka Dorbar Shnong ban shna iing mane. U Rangbah Shnong ha katei ka por, u ma Thom Joh bad u Secretary u ma Mar Shylla kila ai NOC ia ka Balang ban shna ia katei ka iing Mane.
La iathuh ba ha ka por ba shna ia katei ka Iing Mane, ki nongtrei ki bun kiba na katei hi ka shnong bad kaba kongsan eh ka long ba ym don mano mano ba pyrshah ia ka jingwan tei ia katei ka Iing Mane.
Ha ka por baplie bad pynkyntang ia katei ka Iing Mane, la ia donlang ki paidbah nongshong shnong wat lada kidei na ka Niamtre bad wat u Rangbah Shnong uba mynta ruh, u ma Mar Shylla u la ai jingkren ha katei ka jingialang ban plie ia katei ka Iing Mane. Ia kane ka Iing Mane la plie don burom ia ka ha ka 15 tarik u Lber 2015.
Hynrei kyndit ha ka 22 tarik u ‘Naiwieng, ki dorbar shnong ka la rai ban khang tala ia katei ka IIng Mane.
Ha ka jingiakren bad ki nongialam shnong kiba kynthup ia u Rangbah shnong bad ki dkhot shnong mynta ka sngi ha katei ka shnong, ki la iathuh ba la khang ia katei ka Iing Mane dei namar ba u Rangbah Shnong barim u ma Joh bad u Secretary Shnong barim, u ma Mar Shylla uba dei u Rangbah Shnong mynta kim shym la lum dorbar haka por ba ai NOC ia ka
Balang U Blei Sohmynting Circle.
Ki don kiba la kynnoh pyrshah ia u Rangbah Shnong ba rim ba u la leh sop sop ban ai NOC. Hynrei kaba phylla pat ka long ba kam don ka jingpyrshah ha ka por ba sdang ka jingpyntrei ia katei ka Iing Mane khamtam ki paidbah ka shnong ki la wan sakhi shongshit ha ka por baplie iaka ki Pastor jong ka Balang ha ryngkat u ma JM Kyndiah uba dei ruh u MDC barim na Ummulong.
La sngewthuh ruh ba ki don ki katto katne ki riew shitniam jong ka Niamtre kiba ialam bakla ia ki paidbah ha katei ka shnong khamtam na katei ka dong Iaplashait kaba ki nongshong shnong ki dei tang kiba
dang long Niamtre suda lait noh tang kawei ka longing kaba la kylla na ka Balang Presbyterian sha ka Balang U Blei.
Ka shnong Iongnoh, ka jngai duna ia ka 6 Km lada iaid na Syntu Ksiar lyngba ka shnong Chyrmang hynrei kane ka shnong ka long ka shnong kaba dang sahdien ha baroh ki liang wat lada ka don ha Khapsor. Ka jingduna ym tang ha ka liang ka roi ka par hynrei wat ha ka rukom pyrkhat pyrdain jong ki nongshong shnong.
↧
Khang tala ka dorbar shnong ia ka iing mane Balang U Blei
↧
