Ban kyntiew ia ka rep, iakynduh u myntri ia ki nongrep ha Dewlieh, Umsning

Nongpoh, 16 Rymphang:
Shi sngi hadien ka jingplie ia ka Central Agriculture University ha Umiam, mynta ka sngi u myntri ka sorkar pdeng u ba deipeit ia ki kam ha ka rep ka riang ha ka Ri, u Radha Mahan Singh, lem bad kiwei kiwei ki heh sorkar, ki la hiar pat sha Dewlieh, Umsning, Ri Bhoi District, ban iakyn duh bad ki paidbah kiba im ha ka rep ka riang jong kane ka thain.
Ha ka jingwan jong u Radha Mahan Singh, la pynlong ia ka jingpdiang pyndon burom ia u, ha ryngkat ka jingiadon lang jong u S.V. Ngachan, Director ka ICAR, Vice Chancellor ka Central Agriculture University (CAU), Umiam, Proff. M. Premjit Singh, Joint Secretary Agriculture Department ka sorkar jylla ka M.N Nampui, ki ophisar ka Agriculture ha Ri Bhoi District, ki ophisar na kiwei ki tnat sorkar, ki nongrep lem bad kiwei kiwei de ki riewrangbah.
Ka nongrim ba ha khmat eh halor kane ka jingwan jong u Radha Mahan Singh, myntri ka sorkar pdeng, ka long ban iohi ia ka rukom jong ka rep ka riang ha kane ka thain bad kumjuh ban ioh ia ka jingpynshai na ki nongrep, halor kano ka jingeh kaba ki ju iakynduh ha kaba iadei bad ka rep ka riang.
U Radha Mahan Singh, haba kren ha kane ka ka sngi u la iathuh ba ka sorkar pdeng, mynta ka dang ialeh shitom ha ka ban wad ia ki lad ki lynti, khnang ban nang kyntiew shuh shuh ia ki kam rep kam riang ha ka Ri hi baroh kawei, namar kumba ka long mynta, ban kyntiew ia ka rep ka riang bad ban kyntiew ia ka ioh ka kot, kadei bynta ba kongsan eh ha ka Ri.
“U Myntri Rangbahduh ka Ri, u don ka jingthmu ban kyntiew ia ka thain Statei Lammihngi, khamtam haba iadei bad ka rep ka riang, haba iadei bad kane u la pynmih ruh ia ka (special scheme) ne skim ba kyrpang na ka bynta ki nongrep, kiba rep ia ki jait jingthung ba khlem pyndonkam kynja sboh dawai (Organic Scheme), ha kaba iadei bad kane u la mang pisa ba haduh T. 250 (ar spah sanphew klur) ban kyntiew ia ka rep ka riang ha ki thain Shatei Lammihngi” bynrap u Radha Mohan Singh. Ha kane ka sngi la ioh ruh ia ka jingkren na ki nongrep jong ka thain Umsning, kiba la pynpaw ia ki shibun ki jingeh kiba ki iakynduh ha ka por ba ki rep ki riang, hynrei kawei na ki mat ba kongsan, kaba ki iakynduh jingeh kadei halor ka jingjynjar ban pynpoi um sha ki jaka ba ki thung ia ki symbai.
Kawei ka longkmie kaba ai jingkren ha kane ka sngi, “ka la ong ka long shisha kaba eh na ka bynta ka jong ngi kum ki nongrep, ba ngin nangpynroi ia ka kam rep ka jong ngi, namar ka jinglong sharing jong ka jaka, kaba wanrah jingeh ia ngi, kadei ban pynpoi um sha ka jaka kaba ngi rep, nalor kata ka jingbun jong ki kynja kniang kiba wan ban bam ia ki jingthung, ka wanrah ia ngi ha ka jingeh, kumta halor kine ki jingeh ba ngi ia kynduh, ngi na ka liang jong ki nongrep ngi kyrpad ia ka sorkar ba kan phai khmat lem ban iarap kyrpang ia ngi ki nongrep” kren diaw kane ka longkmie.
Kumta ban nangkyntiew ia ka rep ka riang ha ka jylla, ka Agriculture Department jong ka sorkar jylla, ka la pyntip ruh ba mynta ka la pynkhreh ban tei ia ka District Irrigation Plant ha Ri Bhoi District.