Shillong, 15 Rymphang: Ka la pynkyndit ia uba bun ba lang ba ia u nongniah jong kawei ka kali kamai uba niah ia ka Max rong stem kaba don ia u nombar M-04A 3374 u bah J.L Mawdoh la pynngat ha ka kyndon aiñ thmu pyniap briew na ka daw ba u la kum synrud ia ka kali ba shong u myntri rangbah ka jylla u Dr.Mukul Sangma bad katei ka dei kaba la jia ha ka 11 tarik mynta u bnai ha 3 Mer Upper Shillong ha ka por 1:40 baje mynsngi. Bun ruh ki jing kynthoh ki la mih halor katei ka khubor kaba la pynngat ia utei u rangbah ha ka kyndon aiñ thmu pyniap briew.
Kaba kham pynlyng ngoh ia uba bun ba lang ka long ba haba u nong niah kali kamai u kum synrud ia ka kali u myntri rangbah la kem ia u bad la pynngat ha ki kyndon aiñ thmu pyniap briew, aiu pat ka aiñ ka la leh halor ka jingiap uwei u samla ha ka jingshah tynrah ha ka kali kaba synran leit jingleit ia u Dr.Mukul.
Kum ban shu pynkynmaw ba ha ka 20 tarik u iaiong, 2014 uwei u samla uba la tip kyrteng kum u Wanbok Syiem 28 snem karta u la duh ei la ka jingim na ka daw ka jingshah tynrah ha ka kali kit nongpang kaba synran leit jingleit ia u Dr.Mukul bad katei ka dei kaba la jia ha surok bah ha ka shnong Sumer-Ri-Bhoi District.
U Rupang u la wad jingtip aiu la leh ia u nongniah ne ia ka kali kaba bud ia u myntri rangbah kaba la shim ia ka jingim briew. Ha ka jingiakren bad u Rupang ka hynmen jong u samla Wanbok Syiem (Bam kwai ha dwar u Blei) ka kong Evangelyne Syiem ka la ong ba katei ka kes aksiden u para jong ka –ka la shu kynjah jar jar bad ym don briew ban iarap ia ka. Ka la ong ba hadien ba la jia katei ka jingjia ka la leit ban ujor ejahar sha ki pulit ha umiam Police Station hynrei ka la ong ba wat hadien ba la ujor ruh ym don ba kem lane set phatok ia u nongniah tang shimiet ruh.
“Nga i lyngngoh haba nga iohi ha ki kotkhubor ba ia u nongniah kali kamai uba kum pyntyngkhuh ia kali u myntri rangbah la pynngat ia u ha ka kyndon aiñ thmu pyniap briew,ia u para jong nga lei la pyniap syndon,ha ka aiñ aiu la pynngat ia ki,kane ka dei ka jingnion beiñ shisha ia ngi kiba rit ba ria” ong ka kong Evangelyne ryngkat ka dur khmat ba sngewsih ban pynkynmaw biang ia u para jong ka.
Hapdeng jingtap u lyoh ba dum ia ka ing ka sem jong ka, ka kong Evangelyne ka la ong ba u myntri rangbah ka jylla u la kular ban ia kynduh ia kiba haing hasem bad u la shim ba katei ka jingjia ka dei tang ka jingbakla,hynrei ka la ong ba manba kiba haing ki leit ban ia kynduh ia u Dr.Mukul ha ophis jong u ha Secretariat ka jubab ba ki la ioh na ki nongtrei ka long beit ba um don hapoh kamra bad u don shabar Shillong.
Kum ka briew kaba rit , ka kong Evangelyne ka la ong ba ka la pan jingiarap na u MLA jong ki u bah Ardent M Basaiawmoit ( namarba ka sah ha Madanrting) ba un iarap lem, hynrei haba la phone ia u ka la iathuh ba u ong wat ju wan sha ing jong u hynrei un sa phone hi ma u ynda u la dep ia ka kam, “Hynrei haduh mynta ruh u bah Ardent um pat phone” ka la ong . Haba la kylli la ka sorkar ka iarap ne em ia kiba haing hasem ha katei ka jingjia ka la ong “Ngi khlem iohi eiei ruh em”.
Katei ka longing kaba la ngat ia katei ka jingjia shisnem tam mynshuwa ki shong ki sah ha Madanrting hynrei u Wanbok pat u la leit sah bylla sha Sumer ryngkat ka Meiduh jong u bad u la poi kha ha katei ka shnong . Hynrei tang kumba katto katne por ba u shong u sah ha Sumer u la ngat pynban ha katei ka apot.
↧
“Ia u para jong nga la pyniap ka kali U Mukul, aiu ki bor ka Aiñ ki la leh”
↧