Shongshit ka ia tainia halor ka VAB, khang dewiong

Nongstoin, 16 Naiwieng:
Ka rynsan iakop tainia na ka bynta ki saw ngut ki kyrtong, ki ban iakhun ha kane  ka election shiteng samoi na Nongstoin constituency, ba la khot pynlong da ka News Channel napoh Nongstoin kaba la tip kum U Kyrwoh News Broadcaster ( KNB ), kaba la long mynta ka sngi ha ka phyllaw jong ka DRDA Guest House New Nongstoin, ka la long kaba shongshit bha bad pynhun ruh ia u paidbah ba wan ban sngap ia katei ka jingiakop tainia jong kitei ki kyrtong. Ki kyrtong ba kynthup ia ka kong Fenella kyrtong shimet, bah Gabriel kyrtong Congress bad bah Dios HSPDP, ki la wan ban iashim bynta ha katei ka jingiatai nia hynrei tang u kyrtong jong ka seng UDP, u bah Mosklandar Marngar u ba la jah bad khlem paw dur satia tad haduh ban da wai noh katei ka prokram. Ka kong Fenella Lyngdoh Nonglait kyrtong shimet, ka la ioh lad ban kren nyngkong eh bad ha ka jingkren ka jong ka, ka la ong ba kitei ki lai tylli ki mat ba la buh ban ia tai ki long tang shi pawa ia ka dawbah jong ka daw bah jong ka jaitbynriew bad ha kaba iadei pat bad ka VAB, ka la ong ba ka dei tang ka bill ka bym pat trei kam bad kan sa long ain ynda la pyntrei kam, hynrei haduh mynta la shu sdien phasi ia katei ka VAB ha suin kaba la shna naduh u snem 2012, ha kaba iadei pat bad ka Mining policy, ka la ong ba katei ka policy ruh kala don lypa hynrei haduh mynta ka sorkar ia katei kam shym pat lah ban leh ei ei.
Ka jingkren kaba ar, ka la wan sa sha u kyrtong ka congress u bah Gabriel Wahlang bad na ka laing jong u bah Gabriel u la ong ba ka sorkar lyngba ka DCA ka dang lap ia kiba bun ki jingduna ha katei ka VAB bad dei halor kitei ki jingduna kiba la pynlong ia ka daw ba kan dang sahkut haduh mynta bad ym tang kata ka jingiashrut jong ki kynhun bhalang bapher bapher ruh ka la long kawei ka dawbah ba katei ka VAB kan dang sahkut.Shuh shuh u la ong ruh ba kiba bun, ki la shu kynnoh beit ba dei ka sorkar jylla kaba pynslem bad pynsahteng ia katei ka VAB hynrei u la ong ba ym dei ka sorkar, hynrei dei u lat ka Jylla u bym shym pat soi ia katei ka bill bad dei u lat uba la pynkyllain jalebi bad phah ruh shaduh ka tnat kam poh iing jong ka sorkar India.
Ha kaba iadei pat bad ka mat khang tih dewiong u bah Wahlang u la ong ba ia kane ruh la shu kynnoh beit ia ka sorkar bad ia ka seng congress hynrei to tip shwa ia ka jingsdang bad ka jingshisha shwa ban kynthoh namar ba dei ka NGT kaba la khang hadien ka jingujor jong ka All Dimasa Student Union ba ki um ba wan tuid na Jaintia Hills kila longbih lut namar ka jingtih dewiong.Ha kaba khatduh eh la ieng sa u bah Dios Jyndiang kyrtong ka HSPDP ha kaba, u la shim ia ka jingkren ka jong u bad na ka liang jong u bah Dios u la ong ba baroh ki kyrtong ki ban iakhun ha kane ka electiom ki don ia ka juh ka thong, wat la ki dei na kino kino ki seng bad kata ka thong ka long ban ai ia ka jingshakri ia u paidbah, bad u la ong ruh ba ka riti synshar jong ka Ri India kam niew shiliang khmat iano iano, la ki don ha ka sorkar ne ha ka liang pyrshah.Na ka liang jong u bah Dios, haba kren ia ka mat VAB, u la ong ba katei ka mat kam donkam shuh hapoh Nongstoin namar ba hapoh Nongstoin kala don lypa iala ka jong ka ain bad kata kadei ka ain jong ka Hima Nongstoin, katba halor ka jingsahteng pat jong katei ka bill u bah Dios u la ong ba ka daw ka dei ka jingkwah nam kwah burom jongno re jongno.
Shuh shuh haba poi pat sa sha ka mat khang tih dewiong u la ong ba ki paidbah kin bishar hi halor katei ka mat ba mynno la khang ban tih ia u dewiong bad mano ba don ha ka bor synshar hang thie hapoh ka sorkar pdeng ha Nongbah Delhi, ha ba phai sha ka mat kam pynroi hapoh Nongstoin u bah Dios u la ong ba ka roi ka par ka la don lypa ha kti bad ka ba sah ka long ban shu pyntreikam beit.Ha kaba kut jong ka jingkren na kitei ki kyrtong ki nongpyniaid ki la buh ruh ia ki jingkylli ha khmat kitei ki kyrtong ba kin jubab bad pynshai sha ki paidbah ia kaei kaba ki la kren halor kitei ki lai tylli ki mat bad hapdeng katei ka jingjubab ia ki jingkylli; ka la don ruh ka jingiatai nia kaba la khluit bha hapdeng u kyrtong congress bad ka kyrtong shimet halor ka mat bad ka ain tih mar khyndew.