U heh Spah na Bangladesh, u nang ban kren Khasi tiak tiak

Shillong, 16 Naiwieng:
Ka la pynkyndit ia une u nongthohkhubor ban iohsngew da la ki shkor ba uwei u heh spah na ka ri Bangladesh, u la kren da ka ktien Khasi tiak tiak bad katei ka dei ha ka por ba utei u heh saipan ka ri Bangladesh u dang kren sha ki nongthoh khubor ha ka jingiakyn duh kaba la long ha ka sngi u Blei ha IB Dawki. Utei u heh spah u la kren da ka ktien Khasi ha ka por ba u batai ia ka jingeh ba ki nongkhaii katei ka ri, ki ia kynduh namar ka jingkhang dewiong bad mawshun na kane ka jylla kaba ju shalan sha Bangladesh. U la iathuh ba ym tang ki nong khaii kiba shem jingeh, hynrei naduh ki samla kiba shong khlem kam khlem jam, ki karkhana, ki surok bad bunbah ki kam pynroi ki shu sah kut lyngkding namar ka jingbym ioh mar na kane ka jylla. Utei u heh spah u dei uba la tip kyrteng kum u Jalal Uddin.
Kaba kham pynkyn dit shuh shuh ia une u nongthohkhubor ka dei hadien ba la dep ka jing iakren bad ki nong thohkhubor kaba u la kren da ka ktien khasi, utei u heh spah u la mih shabar bad ki paralok jong u na Dawki ki la iathuh ba u pnah bha ruh ban kren ktien War Pynursla bad ban kren ktien Pnar, Jowai. Hadien ba la ioh sngew ia ki jingkren jong u, une u nongthohkhubor u la tur shajan ban kylli na u kumno u nang bad pnah bha ban kren ym tang ia ka ktien khasi hynrei u nang ruh ban kren ia ka ktien War, Pnar, War Jaiñtia, u Jalal Uddin u la jubab ba u nang ban kren bun ki ktien bad ka jingnang jong u ban kren khasi ka dei namar ba naduh dang rit ka rta u ju im ja na ki kam khaii khappud.Ka jingpnah thylliej ban kren khasi bad ka jingbun paralok jong u ha kane ka ri ka la pynlong ia u ban kham sngewjan ia kane ka jylla Meghalaya ha kaba ia ki khun lajong ruh u phah skulhangne ha nongbah Shillong, “Nga don ar ngut ki khun shynrang kiba leit skul ha Shillong, ki don ha skul Assam Riffle” ong u Jalal Uddin. Katkum ka jingiathuh ki paralok jong u pat ki la ong ba u dei u briew uba nang lut ban kren bun tylli ki jait ktien, hynrei u kham shitom pat ban kren phareng, namar ba ki la ong ba ha ka por dang rit um leit pule u shu im tang da kaba khaii pylleng, katba mynta pat u la dei u wei na ki heh spah ha ri Bangladesh uba siew bun tam ka khajna sha ka sorkar Bangladesh bad ka jingioh nong jong u ha ka shisnem ka long 450 klur ha ka pisa Bangla.