Wan thombor ki pulit Assam ha Madan Umwang

Nongpoh, 16 Naiwieng: Ka sorkar Assam ka la wan thombor biang ia ki paidbah nongshong shnong ki thain khappud ha Meghalaya ha ka shnong Madan Umwang ka Raid Nongtung, Ri Bhoi District, ha kaba ki la pynsangeh jubor ia kawei ka jingtei kaba la bei lyngba ka skhim na ka sorkar Meghalaya ha ka shnong Madan Umwang ha ka 11 tarik Naiwieng.
Ia ka jingtei Eri Worm ka tnat Sericulture la bei pisa da ka sorkar jylla Meghalaya la pynsangeh jubor da ka sorkar Assam bad ki la khot hajir ruh wat ia u Rangbah Shnong ka Madan Umwang u Bah Blikson Mukhim da kaba byrngem ruh ba u dei ban kitkhlieh ban pynsangeh noh mardor lym kumta un hap ban mad ia ki jingeh ba har rukom.Ia kane la leh da phah da u SDO (Civil) Hamren Sub Division Karbi Anglong u ba la hukum ia u In-Charge ka Ulunkunji Outpost ka Assam Police ban khot hajir ia u Rangbah Shnong jong ka Madan Umwang bad ban phah sangeh noh mardor ia kane ka jingtei.U Rangbah Shnong bad katto katne ngut ki riew pawkhmat ha ka 12 tarik Naiwieng ki la ki la leit ban pan jingiarap ruh na ki bor jong ka district khamtam na ka liang jong ka DC, Ri Bhoi DC kumjuh ruh na ka KSU, NKHD.
U Rangbah Shnong ka Madan Umwang ki la pan jingiarap ba ki bor ka district ba kin phah ia ki bor pahara na ka liang ki pulit ka Meghalaya ban ai jingiada ia kino kino ki jingshah pynthut ha kane ka jingtei ia kane ka jingtei jong ka Sericulture.
Ki paidbah jong ka Madan Umwang ki la dap da ka jingkyndit ban iohi pat ba ki pulit ka Meghalaya ki la shu wan peit hato ka jingtei ia kane ka jingtei jong ka Sericulture ka iaid beit ne em.Hynne ka sngi u Rangbah Shnong lem bad katto katne ngut ki riew rangbah ki la hiar sha Nongpoh ban iakynduh ia ka DC ka district ka Dr. Pooja Pandey lem bad ka jingsynranlang da ki nongialam jong ka KSU, North Khasi Hills District ban pan ia ki lad jingiada halor kane ka jingtei bad ruh ia ka shongsuk shongshngain jong ki paidbah kane ka thain. Ka DC, ka Dr. Pandey ka la kular ban shimkhia halor kane ka jingeh bad jingjia da kaban kan sa ia kren ruh bad u Superintendent of Police ka Ri Bhoi District na ka bynta ban pynjur ia ka jingpahara sha kane ka thain.