Shillong, 12 Rymphang: U Chief Executive Member ka KHADC u bah Pynshngaiñ N Syiem u la pynpaw ba ka District Council ka kwah ban lum ban lang ia baroh ki khraw pyrkhat bad ki proh jabieng ka jylla na ka bynta ban thaw lad kumno ban saiñdur thymmai ia ka jylla. U CEM u la ong ba u kwah ban lum lut ia baroh ki nongiasaid-aiñ kiba la shongthait, ki ophisar ka sorkar kiba la shongthait bad kiwei pat.
“Ngi donkam ban wanrah kum katei ka kynhun namar ba ka sorkar ka la pheil ha baroh ki liang naduh ka ioh jam iohjam ki samla, ka pule puthi, ki riti dustur , ka shangkai pyrthei bad kiwei pat ha kane ka jylla” ong u bah Pynshngaiñ haba ia kren bad ki nongthohkhubor mynta ka sngi ha kamra treikam jong u. “Kumba ngi la ia khih Hills State ha ki snem kiba la dep, ka dei ban don noh da ka People’s Reformation Movement ruh mynta” u la ong. U la ong ba katei ka kynhun kan wanrah lut ia baroh ki jingdkoh jingduna jong ka sorkar jylla bad kan trei da kiwei pat ki lad ban weng noh ia ki jingdkoh ha kiba bun ki liang.
Haba la kylli na u bah Pynshngaiñ hato u shim ba kata ka jingpheil ka sorkar ka dei ruh ne em ka jingpheil jong ki 60 ngut ki MLA, “Ho, oid ngi lah pheil ha baroh ki liang la ha ka ioh ka kot ne ka synshar khadar kumba ngi la iohi ia kaei kaba la jia mynta” u la ong.
“Kane ka dei ka por ba ngin ia kren noh ia ka jingkylla kaba thymmai, hynrei ki seng saiñ pyrthei ki bunkam pynban ban pynbna kyrtong elekshon, hynrei ki briew kim dei ban jied Party mynta –ki donkam ban jied ia u briew uba don ka jingtbit kaba paka ban shakri ia ka jylla” pynkut u bah Pynshngaiñ.
↧
Kwah ka KHADC ban lum ia ki proh jabieng, ban saiñdur ia ka jylla
↧