Shillong, 12 Rymphang: Ka thma ktien hapdeng u khliehduh ka sorkar u Dr.Mukul Sangma bad u khlieh duh ka KHADC u bah Pynshngaiñ N Syiem ka la nangjur nangjur katba nangmih ki sngi ha kaba mynta ka sngi u bah Pynshngaiñ u la ther tyngeh ia ka sorkar hadien ki jingkren u Dr.Mukul da kaba ong ba ka dei ka sorkar jylla kaba pynjot ia ka Village Administration Bill ( VAB).
Kham mynshuwa u Dr.Mukul Sangma u la ong ba ka jingslem ka VAB dei na ka daw ka jingkhein sting ka District Council ka bym shym la pynbeit ia ki mat kiba la kdew ban pynbeit thymmai bad dei na katei ka daw ba ka VAB kam shymla ioh jingmynjur. Hynrei mynta u ba Pynshngaiñ u la ong ba katei ka jingkren u Dr.Mukul ka dei tang ka jingkren kyllaiñ. “Ka long kaba lyngngoh ba ka sorkar jylla ka mut ban pynkit pap ha ka KHADC , ka dei ka sorkar hi kaba leh ia kane ka pan jingpynshai bad jingpynbeit na ngi haba ka VAB ka la poi sha ka MHA” ong u bah Pynshngaiñ.
“Dei namar kane ba ka KHADC ka sngew ba kam myntoi shuh ban pynshai ia ki jingkwah jingshai ka sorkar haba ka Bill ka la dep don ha kti ka MHA,na kata ka daw ngi la rai ban ap ia ka jinglap ka MHA” u la ong biang. U Lat ka jylla u la phah ia ka VAB sha ka MHA ha ka 30 tarik u nailar, 2015 katba ka sorkar ka pan jingshai na ka District Council ha u nailur, 2015. U bah Pynshngaiñ u la ong ba u Lat u la phah sha ka sorkar ia katei ka Bill ban pan jingshai na ka District Council hynrei ka sorkar ka pynslem khnang bad kam shym la pan jingshai ha ka por kaba biang, “Mynta mano ba khein sting ka sorkar ne ka District Council” ong biang u CEM ka KHADC. “Ngam tharai ba u Lat un phah sha ka MHA da ka jingsngew lade hi khlem da shim ia ka jingai jingmut ka sorkar,ka KHADC kam dei kaba pynjot ia ka VAB hynrei dei ka sorkar jylla kaba dei ka nongai jingmut ia u Lat” u la ong.
Ha kaba iadei bad ka jingong u Dr.Mukul ba ki mat kiba la kdew ba dei ban pynbeit bha ki dei kiba ia tyngkhuh bad ki aiñ ka ing dorbar bah ka Ri u bah Pynshngaiñ u la ong ba ka la don ka jingshong jingialang khrui hapdeng ka KHADC, ka DCA bad ka tnad Aiñ ka sorkar shuwa ban pass ia ka VAB, 2015, “Dei hadien ba ngi laioh ia ka jingmynjur jong katei ka jingialang ba ka KHADC ka la rai ban khot ia ka dorbar kyrpang na ka bynta ban pass ia ka KHAD (Village Administration) Bill, 2015” u la ong biang.
Lah ban kdew ba ha ka taiew ba lai u jymmang ka la don ka jingialang jong ka District Council bad ka sorkar katba ia ka VAB-2015 pat la pass ha ka 30 tarik u jymmang ha ka por ba ka don ka dorbar bah ka bri u hynniewtrep ha madan Polo. Iano ngin kynnoh haba kumta ia ka DCA ne ia ka tnad Aiñ jong ka sorkar jylla kaba don bynta lang ban pynthikna ba ka VAB kan ym ia tyngkhuh bad kino kino ki aiñ ka sorkar India,ong u bah Pynshngaiñ uba la ong ba lada dei ba ka sorkar ka don jingkitkhlieh ka VAB la dep ban pass naduh mynno.
↧
Nangjur ka thma ktien U Mukul bad u bah Pynshngaiñ
↧