Dei ka buit U Mukul,bah Hek; ban ialam bakla ia ki paidbah

Shillong, 12 Rymphang:
“Dei ka buit U Mukul bad U bah Hek, ban ialam bakla ia ki paidbah” ong u heh Congress, haba iakren bad U Rupang mynta ka sngi. Katei ka long halor ka jing pynmih khubor jong U bah AL Hek MLA ka Pynthor umkhrah, ba U bah Pynshngain, u kwah ban ialeh elekshon ialade na Pynthorumkhrah, ban ailad ia U bah Himalaya Shangpliang, ba un iakhun na Mawsynram Constituency.
Utei u nongialam Congress, ula ong shuh shuh “U Bah Pynshngain, u dei U MLA jong ka Mawsynram bad un ialeh ia ka elekshon ka ban wan ruh, na katei hi ka Constituency” bad ula ong ba U bah Pynshngain, u dang dei hi haduh mynta U President jong ka Mawsynram Block Congress Committee.
La ong biang utei u nongialam Congress “U Bah Pynshngain, u dei tang u nongshong shnong jong ka Pynthor bad U Ma Sniawbhalang ruh kumjuh”.
Utei u heh Congress, u kren bynniaw ruh, ia ka jingleit jong U Bah Hek sha ki kotkhubor, ban iakren ia katei ka mat, ka bym don jingshisha haei haei ruh bad ula ong shuh shuh “U Bah Hek, haba u ioh jingtip, kum kata, ula dei ban thoh sha ka seng, ba kan leh ia kaba donkam”.
Katei ka hamsaia U bah Hek, la shim, namarkata, ba ka dei ka jing kutlad jong U Mukul Sangma, ba um lah ban leh eiei ruh ia U Bah PN Syiem bad ba ka paw shai, kumba un lah ban rem ialade, ha kane ka jing ia khun pyrshah ia U CEM jong ka KHADC.
Utei u heh Congress, u kob ruh, ba lada U Bah AL Hek,u sngew ba u jop beit ia ka elekshon, wat lada jia ba u ialeh na kano kano ka seng ruh, ba un pyrshang ha kane ka sien, ka ban wan, ba un mih noh, na ka seng Congress bad ba un iakhun kum u kyrtong shimet.