Kylla jaka tep bad thang briew sha Bangladesh

Shillong, 11 Rymphang:
U Sordar ka Raid Lyngkhat Khyrim Syiem ship, u Bah KK Tangsong u la buh ia ka jingkyrpad ha u Deputy Commissioner ka East Khasi Hills ba un pyrkhat ia ki jingeh ba la iakynduh ka Raid na ka jingthung mawpud thymmai ka India bad ka Bangladesh.
Ha ka jingujor ba la phah sha u DC mynta ka sngi, u Sordar ka Raid Lyngkhat u la ong ba ka  sorkar India, na ka bynta ban ker kper sainar khappud ka India bad Bangladesh, ka la shim khia ban  pynbeit bad thung thymmai ia ki pud ki sam ha ki jaka ba iakajia Adverse Possesion Land (APL), pynban ha kane ka jingleh ka sorkar ka la ktah shibun eh ia ki bri ki bsah jong ki briew namar ka jingleh bad thew khlem da shim jingmut lem na ngi ki nongsynshar bad ki trai bri kumjuh.
U la ong ba hapoh u pud u sam ka Raid Lyngkhat, ki jaka ba dei ban pynbeit  thymmai ki long Lyngkhat ha BP No 1264/4S-1265/4S, BP No.1265/5S-1265/9S, BP No.1266/11S-1267/2S bad ha  Khurinalla BP No.1267/R-T-BP No 1268/4S.
“La lap ba ha ka Lyngkhat la thung thymmai ia ki pud tang naduh 1264/4S-1265 Main Pillar, katba na u Main Piller 1265-1265/4S ym shym la pynbeit eiei”, la ong u Sordar ka Raid Lyngkhat bad bynrap, ha kane ka jaka, la pynhap ia ki jaka ba dang kam trai jong ki briew ka India.
“Naduh u BP N0.1265/5S haduh BP No.1265/9S la thung thymmai ia ki piller da pynhap ia ki jaka jong ngi sha Bangladesh”, la ong u Sordar.
U la ong ruh ba ha Lyngkhat BP.No 1266/11S-1267/2S bad ka Khurinalla BP No.1267/R-E BP No.1268/4S, katkum ka repod bad ka jingjingai jingthoh ka Coordination committee bala thung da ka sorkar Meghalaya hapoh ka jingialam u Dr Donkupar Roy, kum u chairman, la kdew shai ba ka APL ka sdang naduh u BP no.1266/11S haduh u BP No.1267/2S. Hynrei, pynban ynda la sieh pud thymmai mynta, la sdang ban shim jingthew naduh u BP No.1266/13S.  Da kane ka jingleh, ka shnong Lyngkhat kan sa mad jingeh namar ba ia ka jaka tep bad thang briew la pynhap noh sha Bangladesh.
Halor kane, la kyrpad ia u DC ba un phah wan jurip hashen ban iohi ia ki jingshisha, la ong u sordar ka Raid Lyngkhat Bah KK Tangsong bad kyrpad ruh ba un pyntip sha ka sorkar India ia kane ka jingujor bad ka jingshisha ban leh da ka jingjurip na u DC.