Sangeh ia ki kam pyntriem, ong ka sorkar ia ka HNLC

Shillong, 11 Rymphang:
Ka sorkar jylla ka la jubab ia ka jingkwah iakren ka seng beain ka HNLC, da kaba ong, ba lada ka seng ka kut jingmut shisha ban wan iakren, ka dei ban sangeh shwa ia ki kam pyntriem.
Ha ka jingpynlait kyrwoh mynta ka sngi, ka sorkar jylla ka la ong ba ka kloi ban don ka jingiakren bd ka seng lehnoh bad kiwei ruh ki kynhun seng tang lada ki sangeh shwa ia ki kam pyntriem, ki kam pyrshah ia ka ri, ka jingkhot pakhang shnong, ki jingpyniap briew bad kiwei kiwei ki kam runar.
Kine ki kyndon ki long kiba donkam shwa ban iapoi sha ka mieh iakren, bad ki dei shi bynta jong ka sorkar jylla bad ka sorkar pdeng haba khot iakren ia kino kino ki seng.
Ka sorkar ka la ong ba ka long kaba kloi ban iakren ia kano kano ka kynhun seng lehnoh kynthup ka GNLA bad ka HNLC tang lada ki wan shakhmat da ka jingsngew khia bad ka jingkut jingmut.
Ym donkam ban batai, ka jingthung ki ksiang ka dei ka rukom ia kano iano ka jingkhot iakren na ka bynta ka jingsuk bad ka jingjai jai ha ka jylla.
Ka sorkar, ka kyntu jur ia ki kynhun lehnoh ban sangeh ki kam runar bad ban shim ia ka jingkhot iakren da ka jingkut jingmut bad ka jingkhuid mynsiem.