Kwah General Secretary ka UDP da U MLA/MDC

Shillong, 11 Rymphang:
Ki nongialam ka UDP mynta ka sngi ki la kren shai ba kam don kano kano ka jingiaknieh nongialam hapoh katei ka seng bad ki la ong ruh ba ka UDP kam ju don elekshon ha ka jingjied ia u President ba thymmai jong ka hynrei ka don pat ia ka Nomination Committee ka ban jied iano ban thung kum u President.
Ki tyllong khubor na ka UDP ki la ong ba kam shym la don ka jingiaknieh President lane ka jingkan bas lypa da uno uno u briew hapoh ka Party ban ioh ia ka kam President hynrei ka kam jied President hi kan dei beit ka ban shong pyrkhat da ki khraw pyrkhat jong katei ka seng.
Haduh mynta ki la ong ba kam shym la don ka jingiakren than ia ka kam President hynrei ka jingiakren ka long ia ka kam General Secretary kaba katei ka seng ka kwah ba ia ka kam General Secretary dei ban shimti beit beit da ki briew kiba don ha ka kyrdan MLA ne MDC. Kumba shiphew snem tam u Dr.Donkupar Roy u la long kum u President jong UDP bad kam shym la don kano kano ka jingkren pyrshah ia utei u nongialam katei ka seng riewlum hynrei la ong ba ka jingiathnum mynta hapoh katei ka seng ka long ba la kwah da u General Secretary uba dei u MLA ne MDC.
Kumba long mynta u bah Allan F Dkhar u la long kum u General Secretary ka UDP kumba lai snem eiei mynta bad ha kane ka kynti la ong ba seng UDP kam don jingmut shuh ban jied ia u kum u GS bad la ioh jingtip ba ia kam GS lah ban wan da u Dr.Jemino Mawthoh uba dei ruh u Professor jong ka skulbah NEHU.