Nongpoh, 11 Rymphang: Ban ioh ia ka bor synshar hadien jong ka Election ka ban sa long ha u 2018, ka dei ka thong jong ka HSPDP, mih ka sur ha ka jingjied thymmai ia ki nongkitkam jong ka HSPDP jong ka Umsning Constituency, kaba la long mynta ka sngi ha iing Durbar Hall Lumroman, Umsning.
Ki nongkitkam ba thymmai ka HSPDP ha Umsning Constituency, ha kaba la pynskhem mynta ka sngi ki kynthup ia u Bah Nicky Kharthangmaw, uba dei uwei na ki heh nongialam barim ka Congress ha Ri-Bhoi bad uba la shim ia iaka lyngkor kum u President ka HSPDP Umsning Constituency, Bah K.J Suhktung vice-president, general secretary Bah Banlumlang Nongbri, Organizing Secretary Bah Donkupar Riang bad u Finance Secretary Bah S.K Nongsiej. Ia kine ki nongkitkam ba thymmai jong ka Umsning Constituency, la pynskhem mynta ka sngi da u president rangbah ka HSPDP, Bah Ardent Miller Basaiawmoit, MLA ka Nongkrem, ha ryngkat ka jingiadonlang jong u General Secretary ka HSPDP, Bah Witting Mawsor, MLA ka Mawshynrut Constituency, ryngkat bad bun ngut ki nongkitkam ba shitrhem jong ka Party, ba kynthup ia u president ka Shillong City u Dr. Karan Chen, u Bah Renikton Lyngdoh, Bah P.Sylliang lem bad kiwei kiwei ki riewpawkhmat haka dong Ri Bhoi.
Ha kane ka sngi kum ka jingpynskhem ia ki nongkitkam ba thymmai jong ka Umsning Constituency, u Bah Ardent M Basaiawmoit, ha kaba nyngkong eh u la pynpaw ia ka jingsngewkmen halor ka jingiohi jngai da kine ki riewrangbah jong ka thain Umsning, kiba don ia ka jingthmu ban pynkhie im biang ia HSPDP ha kane ka Constituency.
“Ka HSPDP ha ka jingiatreilang bad ki nongkitkam lem bad ka jingkyrshan na ki paidbah kan iai trei shitom khlem thait, na ka bynta ban wanrah ia ka nam bad burom ha ka Election kaban sa long ha u 2018 bad nga kyrmen ba ngin poi sha ka thong, hadien ka jingiohi jong ki paidbah ia ki jingthmu jong ka HSPDP, kaba ieng halor ka nongrim ha kaban iada ia ka Ri bad Jaitbynriew, khamtam eh ha kaba iadei bad u pud u sam u ba ka jylla haduh mynta kam pat lah satia ban pynbeit”ong u Bah Ardent.
Ki paidbah ka Ri Khasi Jaintia mynta ki la sdang ban phai khmat sha ka HSPDP, hadien ba ki la mad ia shibun ki jingshah banbein ha kane ka sorkar ba mynta, la ka long ha u pud u sam, kim shem lah ban pynbeit kat haduh mynta, ka jingkhang noh da ka sorkar ban pyniaid iew ia u mawshun, dewiong, shyiap, ki dieng lem bad kiwei kiwei, ka la wanrah ia ki paidbah nongshong shnong jong ka jylla ha ka khim ka khait, namar ki nongialam kiba don ha ka bor kim do satia ia kata ka jingkitkhlieh ban thaw ia ki arin kiba kyrpang ba ki paidbah kin nym mat ha ka lanot kumba jia mynta ha ka jylla, bynrap u Bah Ardent.
Ka jaidbynriew ka la dei ban sngewrem halor ka jinghiardor jong ka imlang sahlang, tang namar ka jingbym iohi jngai da ki nongialam, ha ka jaka ba kin long kum ki nongshna ain ban wanrah ia ka bha ka miat ha kaba iadei bad ka jinglong kyrpang jong ka Ri bad Jaidbynriew, hynrei la wanrah pynban da kiei kiei kiba long pyrshah ha ka imlang sahlang, pynkut u Bah Ardent Basawiamoit.
Ha kane ka sngi la ioh ruh ia ka jingkren na u MLA ka Mawshynrut Constituency, Bah Witting Mawsor, Bah Karan Chen, Bah P. L Ryntathiang kiba la pynshai halor ka jingthmu bad ka nongrim ba ka HSPDP ka ieng ban wan sha u paidbah ban ai ia ka jingkyrshan ia ka party, khnang ba baroh ki nongrim ba ka pary ka don ban pyntreikam na ka bynta ka jingmyntoi jong u paidbah lah ban pyntreikam, tang lada ka party kan poi ha ka bor ne ki paidbah kin pynkup bor ia ka, ki la ong.
Shuh shuh, kitei ki nongialam ba shitrhem ka HSPDP ki la pynpaw ruh ba kin dang bteng ia kam ban leit sha u paidbah ha ki kyndon kynshrot ka jylla, namar kaba bor kaba hakhlieh duh ka dei hi ka bor u paidbah bad ym kumba la jia ha ka jylla ha kaba kita ki nongialam ba la jied da u paidbah ki pynbor pynban ia u paidbah kumba la jia ka jingshah pynduh bor ki Rangbah Shnong, kaba dei hi na ka daw ba kita ki nongmihkhmat kin nang ban thaw ia ka ain ban ithuh da ka riti synshar ka ri halor ki kamram bad ki itkar jong ki rangbah bala pynkup bor da ki paidbah naduh hyndai hynthai, ki la bynrap.
↧
Pynmih ka HSPDP da ki nongialam thymmai ha Umsning
↧