Shillong, 11 Rymphang:
Ka GNLA ka la pynpaw ba ka kloi ban wan sha ka miej iakren bad ka sorkar lada ka shim khia shisha bad ka la dawa ba ka dei ban thung noh ia ki ksiang ban iakren.
“Lada ka sorkar ka shim khia shisha ban iakren, thung ia ki ksiang bad iakren bad u Champion R Sangma”, la ong ka seng ba la pynmih kyrwoh da u publicity secretary u Gantong Ch. Marak.
Ka GNLA ka la ong ba ba ka sorkar ka lah ban iakren bad u Champion uba dei u chairman ka seng uba lah ban iakynduh baroh 24 kynta.
Ka la ong ba katkum ka kyndon treikam ka seng, u chairman u dei u briew uba biang tam ban iakren. “Ka GNLA ka iaid katkum ki kyndon treikam bad kan bud ia ka jingmih na ka jingiakren hapdeng u Champion R Sangma bad ki ksiang ban thung ka sorkar”, la ong ka GNLA.
Ka seng ka la ong ba ban wanrah ia ka suk ka sain, ka seng ka kloi ban iakren bad ban sangeh iasiat ruh.
Ha kawei ka khubor, ki pulit ka Meghalaya ha kane ka sngi Palei ki la ioh kem ia lai ngut ki dkhot ka GNLA na thain Siju hajan ka Nongal ha South Garo Hills. Kine kiba shah kem ki kynthup ia u Kancha, Hinen bad Limbu. Kine kiba shah kem ki dei ba hap hapoh ka jingpeit jong u Rakkam uba dei u Finance secretary ka seng , la ong ki pulit.
Katkum ka jingong ki pulit, kine kiba kem, ki dei kiba donkti ban lum number phun jong ki nongkhaii na Nongal, Jadigittim, Wathre bad na thain Siju.
Ki la phla ba ka GNLA ka siew ia ki T. 3 hajar lada ki ioh lute bad rahbor ia ki briew.
Ha kajuh ka por, ki pulit ki la ong ba ki suba dkhot ka GNLA ki la siat suloi sha suin ha iew Mangsang kaba hap ha East Garo Hills bad hadien kane, ki pulit ki la pynlong ia ka jingkhynran bad ioh kem syndon ia uwei u dkhot ba la tip kum u Mickin Arengh 38 snem.
↧
Shah kem ki dkhot ka GNLA
↧