Shillong,10 Rymphang: Ka khubor ham saia ka la pur sted mynta ba u bah Pynshngaiñ N Syiem CEM ka KHADC u don jingmut ban ia khun elekshon MLA 2018 noh na Pynthor –Umkhrah Konstitwensi, namar ba mynta u shong u sah hapoh katei ka konstitwensi bad la ong ruh ba ka jingthmu U bah Pynshngaiñ ban leit na Pynthorumkhrah ka dei namar ba u la syier ban ia khun pyrshah ia u bah Himalaya Shangpliang, IAS (Director ba mynta ka DIPR) na Mawsynram konstitwensi ha kaba ki hamsaia ki la ong ruh ba u bah Shangpliang u lah ban iakhun na ka tiket Congress ha katei ka elekshon na Mawsynram.
Halor katei ka jing her sted ka hamsaia katto katne ngut ki nongthoh khubor ki la leit ban ia kynduh ia u MLA ka Congress na Pynthor –Umkhrah u bah A.L Hek kumno u sngew ia katei ka jingpur sted ka khubor hamsaia, u bah AL Hek uba dei ruh u myntri ka koit ka khiah ka sorkar jylla u la pynthikna ba ha u 2018 un ia khun beit na ka tiket Congress na Pynthor-Umkhrah konstitwensi, “Ka Tiket Congress kan dei beit ka jong nga u MLA, balei kan leit sha ki briew kiba nabar” u la ong.
U la iathuh ruh ba ha kine ki sngi ki nongialam ka UDP na Nongthymmai konstitwensi ki la wan khot ia u ban ia khun na Nongthymmai namar ba u don ka ing ka sem ha Umpling, “Nga la ong ia ki ba nga la long u MLA ka Pynthor-Umkhrah la 20 snem bad nga kwah ban ioh rakhe ia ka jubili rupa syndon napoh katei ka konstitwensi” ong u bah Hek, uba la pynthikna ba ha u 2018 un ia khun beit na Pynthor –Umkhrah na ka tiket Congress.
Ha kaba ia dei bad ka khubor kaba la saphriang ba u bah Pynshngaiñ ruh un ia khun na katei ka konstitwensi bah Hek u la ong “Nga long uba la khreh ban ia khun pyrshah badno badno ruh u bah Pynshngaiñ ne iano iano ruh, nga la ia khun pyrshah ia u bah Process T Sawkmie ruh ha u 2013, u paidbah u pynjop ia nga-ngan ong kumno” ong u bah Hek. “Tangba ha ka elekshon hi ngam ju khein sting bad ngam ju khein poh ia uno uno u kyrtong ruh, nga kynmaw ha ka por ba nga ia khun pyrshah ia u bah J.M Pariat-u la ong ba nga dei tang u khynnah, hynrei haba la dei ka por nga jop ma nga u shu ang lyngngoh bad nga kynmaw ha katei ka por ruh ki briew ki ong ba nga dei u Giant Killer” ong biang u bah Hek.
U bah Pynshngaiñ kumba long mynta u don ka jingiadei kaba jan bha bad ki Rangbah Shnong, la kylli na u bah Hek kumno u sngew lada jia ba ki Rangbah Shnong jong ka Pynthor –Umkhrah ki kyrshan ia u bah Pynshngaiñ, “Ha ka por ba nga ia khun pyrshah ia u bah JM Pariat 13 tylli ki shnong ki dei kiba ki Rangbah shnong ki kyrshan ia u bah Pariat, nangta ki seng kynthei, ki seng samla bad ka KSU ruh ka kyrshan ia u bah Pariat hynrei u paidbah u ai ka vote sha nga” kren phuh samrkhie u bah Hek.
U bah Hek u la ong ba ha kane ka jylla jong ngi ha ka elekshon, u paidbah um pat jied Party, hynrei u jied ia u briew, “Nga la ia khun na ka BJP nga jop, nga ia khun Congress nga jop, peit u Purno seh u ia khun na ka NCP u jop – iakhun na ka NPP ruh u jop, ki paidbah hangne ki jied ia u briew, peit ha ki elekshon ba la dep kaba dang beh jur ka lyer u Modi ruh hynrei ki paidbah ki jied ia u briew ki don ki kyrtong ka BJP ruh na Pynthor-Umkhrah” u la pynkut.
↧
Ka tiket Congress ka jong nga, balei kan leit sha ki briew ba nabar, nga dei u Giant Killer:Hek
↧