Shillong, 10 Rymphang: Ki Rangbah Shnong ki la mih jyndat noh na ka jingialang ba la khot da u Myntri Rangbah u Mukul Sangma hadien ba ka sorkar kam shym la pdiang ia ka jingdawa jongki ban pyndam noh ia ka jingpynkylla ia ka kyndon 20B ka Meghalaya Services (Conduct) Amend ment Rules 2015 kaba hukum ia ki nongtrei sorkar ban ai jingtip sha ka sorkar haba ki bat kam shnong ne ha ki seng.
Ki 12 ngut ki Rang bah Shnong hapoh ka lama ka Synjuk Ki Nongsyn shar Shnong ka Bri u Hynniewtrep (SNSBH) ki la mih jyndat noh hadien ba la iaid ka jingiatainia kaba la neh haduh kumba 2 kynta tam eiei naduh 5baje shiteng haduh 8 baje janmiet ha Main Secretariat.
“Ngi mih noh namar ka jingbym treh ka sorkar ban pyndam noh ia ki kyndon ba la bsuh ha ka Service Rules ia ki shakri sorkar haba ki bat kam shnong ne bat kam seng”, la ong u general secretary ka SNSBH u Bah RL Blah mar ia mih noh na kamra ba iakren ha Secretariat mynta ka sngi.
U Bah Blah ula ong, “Ka sorkar kam lah ban pynshai ia ka jingpan jingshai halor kano ka nongrim ba ka buh kyndon ia ki shakri sorkar ban bat kam shnong, kam seng, ka bym ju leh mynno mynno ruh naduh ba la ioh ia ka jylla”.
“Ngim shai kaei ka jingmut sha lyndet ban pan kyrteng ia ki shakri sorkar lada bat kam shnong, bat kam seng”, la bynrap biang u Bah Blah.
U la ong ba ka jingpan kyrteng ia ki nongtrei sorkar katkum ka kyndon ba ka dang bsuh ha ka Service Rule, dang shen, ka dei ka jingthmu ka sorkar ban pynlong mraw ia ki.
“Ngim tip balei ki pan tang ia ki kyrteng ia ki nongtrei sorkar, balei ka sorkar ka long adlukhi halor kane ka bynta”, la ong u Bah SD Khongwir u Chairman ka Mawlai Town Dorbar.
“Ngin iashong jingialang biang halor kane ka jingpyneh ka sorkar ban nym weng noh ia ka kyndon ka Service Rules”, la ong u chairman ka SNSBH u Dr Werlok Kharshiing.
Shwa ban leit iakren bad u Myntri Rangbah mynta ka sngi, ki Rangbah Shnong ki la pynlong ia ka jingialang bah jongki, kaba la wan poi ym duna ia ka 300 ngut tam ha Wahingdoh, ban pynpaw pyrshah ia ka jingbuh kyndon ka sorkar ia ki shakri sorkar ban bat kam.
Lah ban kdew ba ka sorkar jylla, dang shen, ka la ailad ba ia ki shakri sorkar ban bat ne long dkhot ha shnong, ha ki seng tangba halor ka kyndon ba ki dei ban pyntip mardor sha ka sorkar haba ki leh kumta.
“Mynshwa, ngi la rai ba ki nongtrei sorkar kiba kwah ban long dkhot, kitkam shnong, ha ki seng, ki dei ban pan bor shwa na ka sorkar, hynrei mynta, ngi la shah ba kin bat kam, long dkhot tangba ki dei ban pyntip mardor sha ka sorkar haba ki leh kumta”, la ong u Myntri Rangbah ka jylla u Dr Mukul Sangma haba kren sha ki lad pathai khubor hadien ba la mih na ka jingialang, katto katne minit hadien ba la phet noh ki Rangbah shnong.
“Ka sorkar ka la pynkylla ia ka Meghalaya Services (Conduct) Amendment Rules 2015 da kaba bsuh ia ka 20B ka Meghalaya Services (Conduct) Amendment Rules 2015 ka long ban pyni ba ka burom ia ki haba ki bat kam ha shnong ha thaw, bad ki briew ruh kin kham niew burom”, la ong u Mukul.
U la ong ba ka sorkar kam don eiei ka jingmut da kumwei haba ka bsuh ia ka kyndon thymmai ha ka Meghalaya Services (Conduct) Amendment Rules bad ka jingthmu ka long ban pynskhem shuh shuh ia ka rukom synshar ka khadar. “Ka jingthmu ka long ban pynkhlain ia ka rukom synshar”, la ong u Myntri Rangbah.
Kane ka kyndon ka la ong, “kito kiba la bat kam lypa, ki dei ban pyntip noh mardor sha ka sorkar”,.
Hynrei, la shah laitluid ia ki nongtrei sorkar ban bat kam ha ki kynhun niam, ki jait kur ha kaba kane ka ain, kan nym treikam.
“Ngi la shim ban pynkylla ia ka rai kaba la pynbna kham mynshwa ha kaba iadei bad ka jingpynkylla ia ka Service Rules ia ki nongtrei sorkar hadien ba la ioh ia ka jingpynsngew na kiba bun ki paidbah”, la ong u Mukul Sangma.
Kane ka ain kaba la pdiang da ka sorkar, kan nym treikam ia ki kynhun niam, ki seng kur, la bynrap u Myntri Rangbah.
↧
Mih ki Rangbah Shnong, bym treh pyndam ia ka kyndon Service Rule
↧