Shillong, 10 Rymphang: Shi taiew myn shuwa ka KHNAM Youth Wing’s ka la leit ban tong ia ka um na ki ar tylli ki top um kiba don ha Khlieh Iewduh, kawei ka dei ka top um jong ka Municipal bad kawei pat ka top um jong ka PHE, la leit ban tong ia katei ka um khnang ban ioh leit phah test la ka long ne em kaba bit ban dih ne ioh ka long pynban kum ka um na Mawphlang kaba la tong na Saw mer shiteng.
Hadien shi taiew ka KHNAM ka la ioh ia ka ripod na Pasteur Institute bad ia katei ka ripod ka la ioh ha ka janmiet 9 tarik jong u rymphang. Katkum katei ka ripod kaba ka KHNAM ka la ioh la ong ba ka um kaba la tong na ka top jong ka Municipal ka dei kaba bit ba biang ban dih katba ka um jong ka PHE pat ka dei ka bym thikna ban dih bad la kynthoh ha katei ka ripod ba shuwa ban dih donkam ban da shet pynthnam ne ban philter shuwa ia ka khnang ba ki khniang jingpang kin iap. La buh jingkynthoh ba ka um PHE ka biang ha ki rukom khleh dawai bad ka Ph Value ruh ka biang tangba ki don pat ki khniang jingpang ha katei ka um na kata ka daw donkam ban da pynthnam shuwa.
Ia katei ka ripod ka KHNAM ka la leit rah mynta ka sngi sha u myntri ka sorkar jylla uba dei peit ia ka koit ka khiah u bah A.L Hek ban pyni ha u bad ban kyntu ruh ba un shimkhia ban leh eiei khnang ba ka um kaba ki paidbah ki dih kan thikna ba kan long kaba khuid. U bah A.L Hek u la ong ba u dang ap sa ia kiwei pat ki ripod ha kaba ia dei bad katei ka um bad hadien ba la ioh ia ki ripod un leh ia kaba donkam.
U bah Thomas Passah President ka KHNAM Youth Wing u la pynpaw ka jingsngewdiaw namarba ka jingleit tong ka KHNAM ia katei ka um na Khlieh Iew ka dei kaba la pyntip lypa lai sngi shuwa ban leit tong hynrei ka dang long kumtei katno tam lada jia ba shu leit tong kumto khlem da pyntip lypa, “Nangne shakhmat ngin shu leit kyndit noh khlem da pyntip lypa, ngi kwah ban pynthikna ba ka um kaba sam sha u paidbah ka dei kaba bit ban dih khlem kano kano ka jingsyier” ong u ba Thomas Passah. Lah ban kdew ba katei ka um ka PHE na Khlieh Iew ka dei kaba la sam sha ki bun tylli ki shnong jong kane ka nongbah Shillong kum ka Mawkhar, Laban, Jaiaw bad kiwei pat ki shnong hangne ha sor Shillong.
↧
Ka Um PHE na khlieh iew, kaba hap pynthnam shuwa ban dih
↧