Lympat ki kot 500, 1000 ia ki malik Tim, 3 pawa hiar ka ïew die nombar

Shillong, 11 Naiwieng:
Ka kot T.500 bad T.1000 tyngka ka la lympat tyngeh ha kine ki ar sngi lai sngi ia ka kamai kajih ki malik Tim ha baroh kawei ka jylla bad katei ka la ktah jubor ha Pynursla bad Sohra. Katei ka jingktah ka kamai ki malik Tim ka dei arsien mih ka jingpynbna u myntri rangbah duh ka Ri u Narendra Modi ba ki kot T.500 bad T.1000 kin ym treikam shuh.
U Rupang u la ioh ban ia kren bad uwei u malik Tim ba paw ha Sohra u bah Rangphlang Khongwet, utei u la iathuh ba ka iew die Tim ka la sdang ban hiar jubor naduh mynhynnin ka sngi bad kumjuh ruh ka long mynta ka sngi. U la ong ba ka jinghiar ka iew die Tim kam dei shuh tang mar shiteng ruh hynrei ka la kot sha ka Lai pawa.
Kumba ka long mynta u la ong ba ki dukan Tim jong u ki dang pdiang ia kiba wan thoh Tim da ka kot T.500 bad T.1000 tyngka lada ki thoh pynbiang beit kattei, hynrei ym don pisa khutia pat ban biah lada ki thoh khyndiat khynsoit. U la ong ruh ba kumba long mynta ki dukan tim kim nud shuh ban bam heh hynrei ki hap bam antad noh ioh ym don pisa ban siew lada ki briew ki pom, “Ia kito kiba thoh heh , ngi ia kren lypa lada ki lah ne-em ban ap bai pom (payment) lada ki pom, lada ki lah ngi thoh, lada kim lah pat ngim treh” ong u bah Rang namarba mynta ym lah shuh ban sei pisa na bank katba mon kumba long mynshuwa hynrei lah ban sei bun eh tang T.10,000 tyngka ha ka shisngi.
La kylli na u bah Rang aiu kan jia ia ka kam thoh tim namar ba lah ban sei pisa tang T.10,000 ha ka shisngi bad tang T.20,000 ha ka shi taiew hynrei lada jia pat ba ki briew ki pom T.30,000 ne T.50,000 ne palat ia kata ha ka shisngi, “Ngi la ia kren ia ka bank bad ki ong ba kane kan neh tang shipor ar por mynta, ngin hap ban thoh shuwa tang katba dap pisa ban siew” u la ong. La kylli hato ka kam thoh tim lah ne-em ban siew pisa da ka cheque ia ki nongpom- u la ong ba ki don ki ba sngewthuh kiba treh hynrei ki don pat kiba kham biej hap ban siew beit da ka pisa ne pynwandur da kumne kumtai.
U Rupang u la ia kren ruh bad uwei na ki malik tim ba paw ha Pynursla u bah Disbar Khongsti uba shong basah ha Laitlyngkot, utei ruh u la pynpaw kumjuh ba ka iew die tim ka la hiar haduh Lai pawa eiei mynta. La ia kren ruh bad u bah Disbar ia ka juh ka mat ba la ia kren bad u bah Rang bad utei u rangbah ruh u la kren ki jingkren kiba ia syriem kumba la pynpaw u bah Rang bad u la ong ba katei ka jinghiar ka iew die Tim kam dei tang ha Pynursla ne Sohra hynrei ka long ruh kumjuh ha nongbah Shillong. Haba twad jingmut na utei u rangbah kumba katno tyngka ki malik Tim ki hap ban don pisa ha ka shisngi shisngi kum ka jingpynkhreh ioh don ki nongpom, u bah Disbar u la ong ba hap ban don beit ha kti T.5 ne T.6 lak tyngka.
Na ka jingiakren kyllum bad ki malik tim la sngewthuh ba lada katei ka rai ban shah sei pisa tang T.10,000 ha ka shisngi bad T.20 hajar ha ka shi taiew kan ktah bha ia ki dukam Tim namarba ki paidbah kin ym treh thoh tim lada ym ioh pisa nokot bad ki malik tim ruh kim nud ban bam tim lada kim don pisa ha kti ban siew sha ki nongpom bad kin ym nud ruh ban bh pisa ha met hynrei ki hap shaniah ha ki bank.