Shillong, 11 Naiwieng:
U Lat ka jylla u V Shanmuganathan mynta ka sngi u la tem ksing Wangala ha ka tamasa ba 39 jong ka Shispah Ksiang Wangala ha Asananggre, West Garo Hills, hajan Tura ha ka jingdon lang ki heh sorkar.
Kane ka shad Wangala ka dei ka jing shad jong ka jaitbynriew Garo hadien ba la dep ot ia u kba u khaw kaba ju long man u snem ha ka taiew ba ar jong u Naiwieng man ka snem. Ka dei ka jingshad ainguh ia ka Misi Saljong kaba tip kum ka Pattigipa Rarongipa (Ka Nongai Bakhraw) kaba la kyrkhu ia ki paidbah da ka aiom ot kaba seisoh.
Ha ka jingkren jongu ha kane ka sngi, u Lat ka jylla u la ong ba ka India ka dei ka ri jong ki tamasa kaba sdang naduh jylla Jammu & Kashmir shaduh Kanya Kumari kaba dap da ki rong ki rup bad ka Wangala ka dei kawei na ki. Namar ba ka tamasa la pynkut ha ka jingainguh, ka pyni ba ki Garo ki dei kiba iadei bad ka mariang bad ka rep ka riang.
U la kyntu ia ki paidbah kynthup ki dkhot ka Garo Hills Autonomous District Council bad ki nongtrei sorkar ban plan bad ban trei lang ban pynlong ia ka rep ka riang kaba khlain ha kaba ki briew kin ioh ia ka kamai kajih kaba biang bad ka jingim ba laitluid.
Ha kajuh ka por, u Lat u la iaroh ia ka rukom im jong ki Garo kiba iarap uwei ia uwei pat ha ka por ka jingeh bad ha ka jingsuk jong ka longiing kum ha ka shongkha shongman ha kaba baroh ka jait kur ka iarap da ki tiar bad ka pisa.
Shwa ia kane, ka la don ka jingiatan tyllai kaba dei ka jingialehkai hyndai jong ki Garo, nalor ka jingiakop tem iakop rwai bad la pynbud da ka jingpyndonburom Rugala ba la pyni da ki Nokma .
↧
Tied ksing U Lat ha ka tamasa Wangala ba 39
↧