Her sted ka khubor ba kyrduh mluh, khih khohreh ki paidbah

Shillong, 13 Naiwieng:
Hadien ka jingkulmar jingmut na ka jingkylla ka pisa, ka la mih sa ka jingkulmar jingmut hapdeng u paidbah namar ka jingsaphriang sted ka khubor hamsaia ba ka don ka jingduna mluh bad nangne shakhmat kan kiew dor noh. Kane kam dei ka sien kaba nyngkong ba ka hamsaia mluh ka la saphriang ha kane ka jylla hynrei ka la jia teng ruh ha ki katto katne snem ba la leit ha kaba la iohi ba ki paidbah ki ia mareh sharum shaneng ban wad mluh bad wat ha iewduh ruh ym don mluh shuh ha katei ka por bad katei ka khubor ka la kynjah noh jak ha katei ka por hadien ba ki bor pyniaid district ki la pynthikna ba ka dei tang ka khubor hamsaia.
Ha ka sngi saitjaiñ jong ka taiew ka la don ka jingkhih jingmut hapdeng u paidbah halor katei ka hamsaia mluh, ha kaba la ioh jingtip ba ha ki katto katne jaka ki paidbah ki la khih khohreh ban thied mluh da ka jingtieng ioh ba kan kiew dor noh, katei ka jia ruh ha ki thaiñ Upper Shillong ha kaba ki paidbah ki la ia mreh pynsted sha ki dukan ban leit wad mluh. Hynrei namarba ka dei ka jingjia kaba dang shu jia shen,bun ki bym da khih khuslai than eh.
Katei ka hamsaia ha kane ka jylla ka la saphriang sted namar ka jingjia ha Uttar Pradesh ha kaba ki paidbah hangtei ki shu ia knieh ia ka mluh namarba la pynbna thok ba ka don ka jingduna mluh bad lapynbna thok ruh ba shen yn pynkiew noh T.200 tyngka shi kilo. Halor katei ka jingjia ki nongthohkhubor ki la pynthikna na ka tnad ba peit ia ka bam ka dih ha ka ri baroh kawei.
U myntri ba peit ia ka bam ka dih ha ka Ri u Ram Vilas Paswan u la ong ba kam shym la don kano kano ka jingpynkiew noh da ka sorkar ia ki marbam mardih bad ka dei tang ka hamsaia, “Ka kamkai suda , kam don jingshisha eiei ka dei tang ka hamsaia , kam don ka jingkyrduh mluh ha ka ri” u la ong.
Ka sorkar India ka la ong ruh ba kan pynshitom ia kito kiba die T.200 tyngka shi kilo ha ka jyla UP.
Ki heh sorkar na Uttar Pradesh ki la ioh jingtip ruh ba don kiba die T.700 tyngka shi kilo ha katei ka jylla, hynrei ia kitei baroh la ong ba kin ngat ha ka jingpyn shitom.
Katkum ka khubor na ka sorkar India ka la ong ba ka dor mluh ha ki dukan heh ( whole sale) ka dei ban long T.12 tyngka shi kilo katba ha ki dukan rit pat (retail) ka dei ban long hapdeng ka 14 haduh 15 tyngka shi kilo.