Kwah ia kynduh MLA ruh ym ioh: FKJGP

Shillong, 13 Nailur:
Ka FKJGP Mawsyn-ram, ka kwah ba U MLA/MDC ka Mawsynram un rah ia kajingiakren ha iing dorbar Jylla halor ka jingdonkam ban plie noh ia ka Civil Sub Division ha Mawsynram, namar ba katei ka dei ka jingkwah jong u paidlang ba bun balang.
Katei ka seng, ka ong, ba ka la thaw lad ban ia kynduh ia u, ha kine ki khyndiat sngi, hynrei, namar ba kam lah ban ia kynduh, namar ba u leit tista sha iing dorbar, kumta ki pynmih noh da ka khubor, ha ki kotkhubor, na ka bynta ban kyntu ia U MLA,MDC ba un iakren ia katei ka mat kaba kongsan bha. Katei ka seng, ka kwah ruh ba U Mukul Sangma, un wan rah ia katei ka mat ha kane ka iing dorbar kaba mynta.
La iathuh ba ka Mawsynram Block, ka don 166 tylli ki shnong bad ka dei ka Block kaba rim tam ha ka Jylla. Ka FKJGP ka pynkynmaw ruh ba une U MLA, uba mynta, u pynsngew ba ka mat kaba ha khmat duh jongu, ha ki elekshon 2018 bad 2013, ka dei hi halor ka Civil Sub Division.