Na u pyrthat sniew ki Transformer

Shillong, 13 Nailur:
Ka jingsniew ka Transformer ka dei kongsan na ka jingtied u pyrthat bad nalor kiwei pat ki daw ba wanrah ia ka jingthut ka ding MeECL.
Katkum ka khubor sorkar, la ong ba nalor ka jingtied u pyrthat, kiwei ki daw ba ktah ia ka jingtreikam ka transformer, ka dei na ka jingkhia ka bor ding, jingkiew jinghiar ka ding, ka jingshot na ka jingsam ding namar ka jinglong ka suin bneng, jingtuh ding bad ka jinglong tymmen jong u transformer.
Bunsien ki transformer ka MeECL ki ju thut bad sniew khah khah ha kiba bun ki jaka bad kane ka tnad ai ding ka jylla kam shym la lah ban pynbha wut wut namar ba kam don stok ia ki transformer.
“Bunsien ka shim por lada kloi palat ruh haduh 3 bnai ban buh bujli ia u transformer lada jia ba u sniew”, la ong ka khubor sorkar.
Kumba la long ha kine ki sngi, ka jingthut ka rukom sam ding ka MeECL ka jur bha wat ha ka nongbah Shillong ruh ynnai iakren ia ki jaka sha nongkyndong kiba shu ioh ding teng khat tang katto katne bnai.