Rakhe sngi seng ba 94 snem ka Laban Bengalee Boys skul

Shillong, 13 Nailur:
Ka Laban Bengalee Boys’ Higher Secondary School (LBBHSS), Shillong mynta ka sngi ka la rakhe ia ka sngi seng kaba 94 snem ha Laban, ha kaba u MP ka Shillong u Bah Vincent H. Pala u la long kongsan.
Haba kren ha kane ka sngi, u Bah Pala u la ong ba ka long kaba donkam ban ioh mark kaba heh ha ka jingpule hynrei kaba kham donkam ka long ka long ban don ka jinglong ba bha bad ban don ka jingsngew shipara, ka jingiatylli hapdeng ki nongshong shnong.
“Ka jingburom iwei ia iwei pat ka sdang ka skul bad dei ha kine ki sngi ba u briew u saindur ia ka lawei ban long uba don burom ha ka imlang sahlang”, la ong u Bah Pala. U la kyntu ia ki bor pyniaid skul bad ki samla pule ban trei da ka jinglong tylli ban ioh ia ka jingjop.
Ha kane ka sngi, u Bah Pala u la plie ruh ia ka Kailash Mancha Auditorium bad ia ka Mandir kaba don hapoh ka phyllaw jong kane ka skul.U la pynkup burom ia kiba la pyndep ia ka jingpule na kane ka skul ha ki snem ba la dep kynthup uProf. Subir Bijoy Sengupta bad u la sam ruh ia ki khusnam sha ki samla pule ba jop han ki jingialehkai bad ki kyrdan pule bapher bapher.
Kiwei kiba kren ha kane ki long u President ka Managing Committee u Dr. S. K. Chattopadhyay, u S. R. Choudhury bad u Naba Bhattacharjee nalor kiwei pat.