Da ki spah litar kurup kyiad pyrsi ka RBYF na Umsning

Nongpoh, 09 Nailur:
Da kaba peitngor halor ka jingdon jong ki kali kiba mlien ban kit kyiad beain na Sohiong bad wan shalan beain sha ki thain Umsning, hynnin ka janmiet ki dkhot ka Ri Bhoi Youth Federation (RBYF) Umsning Circle, ki la ioh ban bat ia kawei ka kali kit kyiad kaba dei ka Maruti Car ML 04A 2571, ha Nongthymmai Umsning.
Katkum ka kyrwoh na u Bah Shaining Thangkhiew, publicity ka RBYF Umsning Circle, la ong ba ka seng hadien ba ka la ioh ia ka jingtip kaba tikna halor ka jingdon jong ki kali kiba thmu ban wan shalan kyiad beain sha ki thain Umsning, kumta ka seng ha ka jingialam u Bah G. Lymphuid, President bad u Bah D. Warjri, General Secretary ka RBYF Umsning Circle, ki la pynlong ia ka jingpynap shrip ha Nongthymmai, Umsning, ha kaba ki la ioh ruh ban da ki spah litar ka kyiad pyrsi.
Hadien ba la ioh kurup ia katei ka kyiad, ka seng ka la theh lut noh baroh sha madan baroh bad ai jingsneng ruh katkum ki kyndon jong ka seng ia u trai jong katei ka kyiad beain.
La ong ruh, ba kum ka seng kaba peit ia ka bha ka miat hapoh ka Distrik, ka dap da ka jingsngewkhia halor kane ka jingjyllei jong ki briew kiba ju mlien ban shalan beain ia ka kyiad pyrsi na Sohiong sha ki thain Umsning, namardei lyngba jong kaba kum kine ki jait jingdih kiba pynbuaid, kaba ialam ia kiba bun ki khun samla ba kin ngop ha kine ki jingdih ba sniew, khamtam eh kaba ktah ruh ia ka imlang sahlang.
Kumta, ka seng nangne sha khmat ka maham jur ruh ia kito ki briew kiba mlien ban shalan beain ia ka kyiad ba ki dei ban sangeh noh ia katei ka kam beain, ha kajuh ka por ka seng ka la maham ruh ba lada nangne shakhmat kan dang lap ia kiba leh pyrshah, ka seng kan leh da kaba tyngeh ba katkum ki kyndon treikam jong ka seng, pynkut ka kyrwoh.