Wat khohnioh ban trei sha nongkyndong, ong U Lat ia ki Nos

Shillong, 09 Nailur:
Ka College pule nos ka NEIGRIHMS, mynta ka sngi ka la pynlong ia ka jingpynkup burom 4th Graduation Day cum 7th Lamp Lighting bad Oath Taking ha ka jingialang kaba long ha Auditorium ha kaba u Lat ka jylla u V.Shanmuganathan u la long kum u kongsan.
Ka jingthang sharak bad jingbam smai lane ka Lamp Lighting bad Oath Taking ka pyni ia ka jingpynthymmai ia ka jingkut jingmut jong ki samla pule nos bad ruh ban wanrah ia ka jingkmen, jingkyrmen bad ka jingsuk ia kiba pang, ba shitom bad kiba kynduh jingeh, katba ka Graduation ka dei ka por ha kaba kiba la pyndep ia ka jingpule kin sdang ban ai ia ka jingshakri ha ki jaka sumar bad ha ka imlang sahlang.
Ka dei ka jingkmen ia ki kmie kpa bad kiba ha iing jong ki 45 ngut ki samla ba la pyndep ia ka jingpule nos naduh 2012-2016 ban ioh pdiang ia ka syrnod jingjop na kane ka jaka pule. Ia kiba wan shakhmat lai ngut la pynlong da ka jingpynkup burom kyrpang.
Haba kren ha kane ka sngi u Lat ka jylla u la ong ba ki samla ba pyndep ia ka jingpule kim dei ban khohnioh ban leit trei sha jaka nongkyndong hynrei ki dei ban aiti ban leit ban shakri ia ki briew ba donkam.
U Lat u la kyntu ru ia ki ban sumar ia ki nongpang da ka mynsiem leh sbun khlem kano kano ka jingleh shiliang.
“Sumar ia kiba pang khlem kano kano ka jingsngew khohnioh. Man ki jingim u briew ka long kaba kordor la ki dei ba duk ne ba riew spah ba biej ne ba stad”, u la ong.
Katba u director ka NEIGRIHMS u Prof. (Dr) P.Bhattacharya u la ban jur ia kiba la pyndep ia ka jingpule ban pyndonkam ia ka sap ka jinghikai katkum kane ka juk mynta bad da ka jingsbun kum ka Florence Nightingale.
Kiwei kiba don lang ha kane ka sngi ki long Prof. (Dr) Vandana Raphael, Dean, NEIGRIHMS, Hima Das bad Babetlin Hynniewta, Tutors, College of Nursing, NEIGRIHMS bad kiwei kiwei.