Ujor ka Khanduli, ba dawa Police outpost ki Karbi ha Khanduli

Jowai, 9 Nailur:
Ka Dorbar Shnong Khanduli mynta ka sngi ka la ujor sha u DC ka West Jaintia Hills District halor ka jingdawa ki Karbi na ka sorkar Assam ban buh Police Outpost ha Khanduli.
Ka Dorbar shnong kaba la long ha ka 6 tarik une u bnai ka la shim ia ka rai ban ieng pyrshah ia ka jingdawa ka Karbi Pnar Khanduli Region na u Chief Minister ka Assam, U Sarbananda Sonowal ban buh Police Outpost ha Khanduli.
“Ngi kwah ban pyntip shaphi ba napdeng ki 10 tylli ki jingdawa kiba ka Karbi Pnar Khanduli Region ka la dawa na ka sorkar Assam, kawei na kita ka long ban buh Police Outpost ha Khanduli bad ruh ban buh SBI Branch ha Am-ih kaba ki pnar ki tip kum ka Um-Ih.
Kane kadei ka jinglehbuit sianti ki nongialam ka Karbi Pnar Peace Committee (Khanduli Am-ih Area) ha kaba ki la leh buit tuh ban pynkylla ia ka kyrteng ka Committee kaba la thaw ha ka por ba ki ar DC na West Jaintia Hills, Meghalaya bad na West Karbi-Anglong District, Assam.
“Ngi pylla shi katdei eh ba ki Karbi ki la phah ia ka dorkhat ha ka kyrteng ka Karbi Pnar Khanduli Region da ki dkhot ka Karbi Pnar Peace Committee Khanduli Am-ih Area”, la ong  u Rangbah Shnong ka Khanduli bad u Secretary Shnong jong katei ka shnong u ma Wanbiang Slong bad u ma Yoshida Nongspung.
“Kane ka paw shai ba ki dkhot katei ka Committee na Karbi ki long kiba arsap bad kiba lehbuit tuh haduh katta katta”, la bynrap kitei ki rangbah.
Ka dei ha ka 1 tarik une u bnai, ka bor District Hamren, West Karbi Anglong ka la pynlong ia ka Bonhomie Festival – ka Tamasa ban wanrah ia ka jingialang shipara ha Umpawieng (kumba khot ki Pnar lane Langhempi ha ki Karbi) ha kaba la aiti ia ka dorkhat sha u Chief Minister ka Assam lyngba u DC ka HAmren ban dawa ban buh ia ka Police Outpost ha Khanduli bad kumjuh ruh ia ka tnad treikam ka Bank SBI ha Um-ih lane Am-ih.
Ia kane ka dorkhas, la aiti ha u DC ka Hamren khlem ka jingtip ki nongialam bad ki dkhot ka Karbi Pnar Peace Committee, Khanduli Am-ih Area bad baroh kiba la soi ha katei ka memo ki dei ki Karbi suba kynthup na ka Jait Timung kiba ki Pnar ki khein ba ki dei ki pnar namar ki bun kiba shong basah ha ri Pnar bad kiba ioh ei ruh ia ki ST Certificate
“Ki nongialam ka Peace Committee na ka liang ka West Jaintial Hills ki don jingtip eiei halor kane’, la ong ki nongialam Shnong ka Khanduli.