Nongpoh, 14 Jylliew: Haduh 60 ngut ki samla khasi kiba trei ha ki kam bapher bapher jong Toll Gate Plaza kaba don ha Pahammawlein 20 Mer, Ri Bhoi District, mynta ka sngi ki la shah beh jubor noh ha ki briew jong ka Shurender Kumar Shukla ka Kompani na Mumbai, hadien ba ka la ioh ban shimti bad pyniaid ia katei ka jaka khrong khajna.
Katkum ka jing iathuh da kitei ki samla, la ong ba ki briew jong katei ka Kompani thymmai tang mar iapoi ha katei ka Toll Plaza, ki la shu wan beit beit ban beh ia ki briew kiba trei ha katei ka Toll Plaza, ki la bynrap ruh da kaba ong ba ha ka jing shisha ha shwa ba kin beh ki la dei ban ai jingtip, hynrei kane ka jingleh da ki briew jong katei ka kompeni ka pynpaw ba kim niewkor ei ei ia kiba trei ha kane ka Toll Plaza.
Kum ban shu pyn kynmaw hangne, naduh ba ka kompeni u Thomas Nongtdu ka la shimwai ia katei ka Toll Plaza, la thep kam tang da ki samla khasi suda, hynrei hadien ba u Thomas Nongtdu u la duh ban pyniaid, ha kaba la ioh pat ban pyniaid da katei ka kompeni thymmai, ka pynlong ia ki samla khasi ba ki shah beh noh.
Hadien ka jingshah beh jubor ia ki samla khasi ha ki briew jong katei ka kompani thymmai, na ka liang ki nongialam jong ki kynhun sengbhalang na ka thain Ri Bhoi ba kynthup ia ka FKJGP North Khasi Hills District, HNYF Northern Region, HYC North Khasi Hills bad ka Hynniewtrep United Movement (HUM), ki la hiar mar mar sha katei ka jaka ban sakhi halor ka jingshah beh jubor jong ki samla kiba ha katei ka Toll Plaza.
Hadien jong kane na ka liang jong kitei ki nongialam seng ba kynthup ia u Bah Luistar Lyngdoh na ka FKJGP, u Bah Marcus Marten na ka HNYF, u Bah Albert Nongrum na ka HYC bad u Bah Dapkupar Nongrum na ka HUM, ki la leit ban iakynduh syndon ia ki briew jong katei ka kompani, da kaba dawa ruh ba ki dei ban thung biang ia kitei ki samla kiba la shah beh jubor na katei ka Toll Plaza.
Ha ka jingiatai kaba jur hapdeng ki nongialam seng bad ki briew katei ka kompani bar jylla, khatduh kitei ki briew jong katei ka kompani ki la ai ruh ia ka jingmynjur da kaba rai ban thung tang 25 ngut, hynrei ki la kular ruh ba kin ialeh ban thep kam da briew ban a kane ka thain.Haba iadei bad kane, u Bah Luistar Lyngdoh, Chief Organizing Secretary ka FKJGP NKHD, kum u nonglamkhmat ha kane ka sngi, u la ong ba lada kane ka jingkular da kine briew jong kane ka kompani thymmai kaba la wan ban shimti ia katei ka jaka khrong khajna kam iahap, na ka liang jong kitei ki saw seng ki la long kiba kloi ban iamih paidbah kum ka jingpyrshah halor ka jingshah behkam jong ki samla khasi.Katba na ka liang ka Kong S. Shylla, kaba dei ka nongshimwai ia katei ka Toll Plaza, ka la ong ba na ka liang jong ka kum ka nongshimwai ia katei ka Toll Plaza, kim shem la ioh kano kano ka jingtip halor jong kane ka jingshah beh jong kitei ki samla khasi.
Ha ka jingshisha ngi don ia ka jingthmu ban pynrung kam tang da ki samla khasi suda ha kane ka Toll Plaza, hynrei tang namar ba ngi duhnoh ban pyniaid namar ba katei ka kompani ka la jop ha ka jingiakop ban pyniaid ia kane ka Toll Plaza, bynrap ka Kong S. Shylla.Haba iadei kine ki kynrum kynram hapoh katei ka Toll Plaza, na ka liang u Bah Jyian Sylliang, Rangbah Shnong ka Pahammawlein, u la ong ba ka Dorbar Shnong kam shem don kano kano ka jingtip halor ka jingiatreikam hapdeng jong katei ka Kompani barim bad kompani thymmai, namar ki laleh ia kiei kiei khlem ka jingtip jong ka Dorbar Shnong.
Yn wan Shillong U CP Joshi
↧
Kyndit kyndit shah beh ki samla, ba trei ha Toll Plaza Pahammawlein
↧