Ioh kyrdan ka samla na Riwar College

Shillong, 15 Jylliew:
Sa shisien biang ka Ri-war College Pynursla ka la lah ban sei ia u soh ba thiang da ka jingioh Merit List I Samla Nunu Khongpdah ha ka kyrdan ba nyngkong duh ha ka Honours Khasi, ha kane ka Result B.A. Final 2016 jong ka NEHU. Ha u snem 2014 ruh ka College ka la ioh ia ka Position ha ka Merit List.
Ka College ka ai Khublei nyngkong eh ia ka Seng Khasi College Shillong kaba la kloi ban kdup ia ki students ha ka thup jongka, ia ka Dorbar Shnong Dusaw – Rang thylliang, Pynursla kiba la ai iing ei ban pynlong class, ia ki Nonghikai kiba la aiti met bad mynsiem ban shakri mon sngewbha, ia ki Dkhot ka College kiba la kyrshan met bad mynsiem bad khatduh eh ia ki Students kiba la trei shitom ban pass.
La plie ia ka Ri-War College ha u snem 2009 ban iarap ban kyntiew ia ka thain Ri-War khnang ban lah ban weng ia ki jingsahdien. Ka jingsiew ka long kaba tad tam ban ia nujor bad kiwei kiwei ki College ha State jong ngi, la shah ban siew bai class haduh 4 ne 5 sien ha ka shi snem katba lah ei. Ym juh shim bai class ruh ia kito kiba don ka jingjia ba sngewsih hapoh ka longing jong ki. Ki khynnah kiba wan class hangne ki dei kiba wan na ka longiing ba duk ba jynjar, namar ba kiba don ba em ki la ia beh sha sor, bad kito ki khynnah kiba rit ki marks, ki bym don lad shuh ban ioh Class ha Shillong. Ia mynta hi ka College ka la don ki Honours la jan baroh ki Subjects.
Kum ban shu pynkynmaw hangne, ka College ka don hapdeng ka jingduk jingkyrduh namar haduh mynta kam pat ioh jingiarap nangno nangno ruh, hynrei la shu kyrshan doh iap da ka jingaiti met bad mynsiem jong ki Nonghikai, ka jingdon ki riewlenlade ban aiti mon sngewbha bad ka jingkyrshan ki riew don mynsiem kiba kwah ban kyntiew ia ka thain Ri-War Pynursla. Wat la ki ba bun kine ki jingeh eh ruh, hynrei ka Pass Percentage na College ka long kaba bha palat ban ia nujor bad kiwei kiwei ki College.  Kane ka long katkum ka kyrwoh na u Bah M. Khongshei, u Secretary.
Ioh merit list u samla Khasi ha ka sobjek Hindi
U Samla Ehsing Khiewtam, na ka shnong Umñiuh – Tmar, Ri-War Pynursla, u la ioh Metit List ha ka Subject Hindi (kaba ngi ju ong ka ktien Dkhar) ha kane ka Result B.A. Final 2016 jong ka NEHU.  Une u samla u la pass ia ka B.A. Final na BBS College, Shillong bad u la ioh ha ka ktien Hindi ia ka MIL – 80 bad SL 94. Ka long kaba phylla ba u khynnah Khasi un lah ban ia knieh Position bad iehnoh shadien wat ia ki khynnah Dkhar ruh ha ka ktien Hindi. Bad um dei ruh u khynnah uba ioh kpa Dkhar ne Kmie Dkhar ne u khun Dkhar, hynrei u dei u khun jong I Bah Joksingh Khongshei bad I Kong Thwei Syiem Khiewtam na ka shnong Umniuh Tmar. La khmih lynti ba un leit pyndep ia ka jingpule ha ka kyrdan Master Degree bad ter ter khnang ban ioh jngi ha ka pyrthei baiar jong ka ktien Hindi ha ki University ba pawnam ka India.