Shillong, 13 Jylliew:
“U Myntri ba dei peit ia ka tnad sam bam u dei u ban hiar shuki bad dei ban tohkit CBI namar ka don ka jingiabamsap ha kaba thied ia ka shini ba sam sha ki paidbah lyngba ki dukan rashon ha ka rukom ai kontrak”, la ong ong u James K Sangma MLA bad u Nongaiktien ka NPP bad haba kren sha ki lad ai khubor mynta ka nohphai sngi ha ophis treikam ka NPP ha nongbah Shillong.
Ka NPP lyngba u Conrad Sangma MP na Tura, ka la pynpaw ruh kan rah ia kane kaiphoit ryngkat ki kot ki sla halor kane ka bam sap sha ka sorkar pdeng bad kan ym kut tang hapoh ka jylla namar ka sorkar jylla ka la thied ia ka shini ban ai sha ki paidbah ha ka dor kaba la palat ia ka dor iew dor hat.Kumba ka long mynta ka dor shi kilo ha iew ba la song plastic ka long T.45 tyngka katba ka sorkar pat kala thied haduh T.54.27 tyngka shi kilo.
“Ka sorkar pdeng ha u snem 2014 ka la pynsangeh ia kane ka jingsam shini lyngba jong ka Food Corporation of India, hynrei ka la shah ia ki sorkar jylla ba kin thied hi na iew bad ka sorkar pdeng kan bei pisa tang T.18.50 tyngka ha ka shikilo bad kaba tam kan dei da ka sorkar jylla” la ong shuh u tei u nongai ktien ka NPP haba pynshai paidbah halor kane ka kam bamsap ia ka dor shini.
“Ka sorkar jylla ka la khot tender lyngba ka Tnad Food & Civil Supply ba kino kino kiba kwah ban Supply shini sha ka sorkar naka bynta une u snem 2016, ha 26 tarik jong u bnai Lber bad ki don lai tylli ki kynhun kiba la thep tender kiba kynthup ia ka Beta Edibles Processing Private Limited kaba la thep T.54270 ha ka shi ton kata kalong T.54.27 tyngka shi kilo, Ka Doctor Frozen Food India Private Limited ka la thep T.55050 shi ton kata ka long T.55.05/- ha ka shikilo bad ka S.S. Food Industries kaba la thep T. 56210 ha ka shiton bad kata ka long T.56.21/-ha ka shikilo”, la pynshai shuh shuh u James K Sangma.
Na ka liang jong ka NPP ka ong ba lada ha iew lah ban ioh tang T.45 tyngka shi kilo ka shini ka sorkar balei ka leit ban thied haduh T.54.27 tyngka shi kilo ka shini, namar ka sorkar pdeng ka siew tang T.18.50 tyngka bad ki nongthied ki siew tang T.20 tyngka bad kaba tam kum ka subsidy kaba long haduh T. 15.77 /- hap sei na ka pla tyngka jong ka sorkar jylla bad kane ka dor shini ia kaba la thied da ka sorkar ka long kaba la rem sha ba palat.
“Ka sorkar kala pynsyrwa ei ia ka pisa paidbah haduh T.20 klur ha ka shisnem bad ka ong pat ym don pisa”, la ong shuh ka NPP bad ka dawa ba ka sorkar ka dei ban pynshai paidbah ia kane kam bad dawa ba dei ban aiti sha ka CBI ban tohkit.
T.20 shi kilo, ka dor shini, ong ka Sorkar
Ha kawei pat ka khubor lyngba ka kyrwoh ba la phah da U Principal Secretary ka Food, Civil Supplies & Consumer Affairs, Govt of Meghalaya ka kyntait halor ka jingkynnoh ka NPP ba ka don ka jingbam sap ha ka dor shini ba sam sha ki paidbah lyngba ki dukan rashon ha ka rukom ai kontrak bad ha ka ka la don ruh ka jingkynnoh ba ka dor jong ka shini ia kaba la shim da ka sorkar na ki company ka kham heh bun shah ban ia ka dor die ha iew.
“Kane ka long ban pynshai ba ia ka shini la sam sha sha ki paidbah ba dei hok ban ioh lyngba ki dukan rashon ha ki pla plastik 1 kg kiba la pyndait bha ryngat ka shap jong ka Jylla ha ka dor 20 tyngka shi kilo kaba long ka dor kaba kham hapoh ia ka dor iew.Ka rukom pyniaid kaba shai ban shim ia ka shini na ki iew lyngba ka jingthep tender la leh da ka sorkar jylla, ha kaba ia ka tender la pdiang sha ka company kaba lah supply ha ka dor kaba rit bad pynbiang ia baroh ki kyndon katkum ka tender”, la ong shuh shuh ka kyrwoh.
↧
Na ka jyrsih shini reshon ba T.20klur, “tohkit CBI” ong ka NPP
↧